ពលរដ្ឋស្រុកឯកភ្នំ ខេត្តបាត់ដំបង មួយចំនួនបានបង្ហាញអារម្មណ៍រីករាយក្រោយដំណាំបន្លែបង្ការរបស់ពួកគាត់ដែលផលិតបាន លក់បានតម្លៃខ្ពស់ជាងពេលមិនទាន់មានបញ្ហាជាមួយថៃ ប៉ុន្តែពួកគេស្នើឱ្យពលរដ្ឋនាំគ្នាបន្តគាំទ្រផលិតរបស់ខ្មែរឱ្យបានកាន់តែផុសផុលបន្ថែមទៀត។
ប្រជាកសិករ ឃុំព្រែកខ្ពប ស្រុកឯកភ្នំ កញ្ញា វៀង ស្រីណែត បានប្រាប់ពលរដ្ឋសារព័ត៌មានថា ក្រោយមានសកម្មភាពបិទព្រំដែនកម្ពុជា-ថៃ បន្លែបង្ការរបស់ប្រជាកសិករលក់បានតម្លៃខ្ពស់ជាងមុន។
កញ្ញាបន្តថា កាលមិនទាន់បិទព្រំដែន ល្ពៅលក់បានមួយគីឡូត្រឹម៥០០រៀល ត្រកួនមួយគីឡូត្រឹម១០០០រៀល សាឡាត១គីឡូ ២ ៥០០រៀល ប៉ុន្តែបច្ចុប្បន្ននៅពេលបិទព្រំដែនកសិករលក់ល្ពៅបានមួយគីឡូ៣០០០រៀល សាឡាត់១គីឡូ៧០០០រៀល និងត្រកួនលក់បានតម្លៃ៥០០០រៀល។ កញ្ញា វៀង ស្រីណែត បន្ថែមទៀតថា បច្ចុប្បន្នកសិកររីករាយនៅពេលតម្លៃបន្លែបង្ការបានថ្លៃជាងមុន ប៉ុន្តែពួកគេក៏ត្អូញត្អែរដែរ ដោយសារតម្លៃជីកសិកម្មនៅលើទីផ្សារក៏បានហក់ឡើងខ្លស់ដែរ។ កសិកររូបនេះនិយាយថា កាលពីមុន ជីគីមីក្នុងមួយបាវ តម្លៃចន្លោះពី១៤ម៉ឺនរៀលទៅ១៦ម៉ឺនរៀល ប៉ុន្តែពេលនេះតម្លៃចាប់ពី១៥ម៉ឺនរៀល ដល់១៨ម៉ឺនរៀលក្នុងមួយបាវ។
កញ្ញា វៀង ស្រីណែត លើកឡើងថា៖ «ប៉ុន្តែក្រោយពេលគេបិទច្រកព្រំដែន(កម្ពុជា–ថៃ) ទៅកសិករផលិតបានផលអីចឹងទៅ ហើយលក់បានថ្លៃ មិនមែនថ្លៃខ្លាំងទេ តែបានល្មមដែរ។ »
កសិកររូបនេះ បានស្នើឱ្យពលរដ្ឋខ្មែរបន្តគាំទ្របន្លែបង្ការក្នុងស្រុកបន្ថែមទៀត ហើយអាជ្ញាធរអាចជួយដោះស្រាយបញ្ហាថ្លៃជី ថ្នាំកសិកម្មឱ្យបានសមរម្យ ដើម្បីជៀសវាងធ្វើឱ្យកសិករនៅតែប្រឈមការលំបាកដោយសារត្រូវចំណាយលើដើមទុនផលិតច្រើន។
ប្រជាសកិករអ្នកស្រី លី សុធារី ម្ចាស់ចម្ការដាំដំណាំផ្លែក្រូចពោធិសាត់ក្រូចឃ្លុងចំនួន៣រ៉ៃ ស្មើ៣០០ដើម នៅឃុំសំរោងក្នុងស្រុកឯកភ្នំ ខេត្តបាត់ដំបង បានប្រាប់ពលរដ្ឋសារព័ត៌មានថា ក្រោយពីបិទព្រំដែនយើងក៏ពិបាកក្នុងការនាំចេញផ្លែក្រូចចេញលក់ទៅខាងក្រៅដែរ កាលមិនទាន់បិទយើងបានលក់ឱ្យជនបរទេសមកទស្សនាស្រុកយើង ហើយនាំយកទៅលក់នៅជានដែនខ្លះ។ តែថានៅពេល បិទព្រំដែនយើងលក់បានតែក្នុងស្រុកដូចតាមភូមិទីផ្សាក្នុងស្រុក ហើយទីផ្សាតាមស្រុកបានតម្លៃទាប ត្រឹមមួយប្លូនបាន៤ម៉ឺន កាលមុនលក់ជាយដែនមួយប្លូនបាន៧ម៉ឺនរៀល។
កសិករដដែលនិយាយថា ដោយសារស្រុកទេសកំពុងមានបញ្ហាព្រំដែនប្រជាពលរដ្ឋជាកសិករពិបាកដែរព្រោះតម្លៃជី ថ្នាំ កសិកម្មក្នុងពេលបច្ចុប្បន្នេះឡើងថ្លៃផងដែរ។
ក្រុមកសិករទាំងនេះ សំណូមពរ ប្រជាពលរដ្ឋគ្រប់រូប ដូចជាដេប៉ូលក់ជីថ្នាំកសិកម្មខ្លះសូមកុំលក់ឆ្លៀតឧកាសតម្លើងម្លៃខ្ពស់។ ក្រៅពីនេះ ពួកគាត់ក៏ស្នើទៅអាជ្ញាធរពាក់ព័ន្ធ ជួយសម្រួលរកទីផ្សារបន្ថែមទៀតក្នុងការលក់ដូរបន្លែបង្ការ ព្រមទាំងដំណាំហូបផ្លែរបស់កសិករនៅខេត្តបាត់ដំបងផងដែរ។
អ្នកស្រី លី សុធារី លើកឡើងថា៖ «សំណូមពរដល់អាជ្ញាធរជួយរកទីផ្សារ រកអីហ្នឹងដើម្បីជួយលក់ផលិតផលខ្មែរយើងឱ្យបានច្រើន និងសូមឱ្យអាជ្ញាធរចុះទៅជួបកសិករផ្ទាល់ ដើម្បីសុំឱ្យពួកគាត់កាត់បន្ថយការប្រើប្រាស់ថ្នាំគីមី»។
លោក ឈឹម វជិរា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបាត់ដំបង មានប្រសាសន៍ថា តាមធម្មតាបើជីកសិកម្មនាំចូលពីប្រទេសខាងកើតវៀតណាមលោកគិតថាវាមិនឡើងថ្លៃទេ ហើយបញ្ហានេះនៅក្នុងកម្រិតរាជរដ្ឋាភិបាលគេកំពុងគិតគូ។
លោកបន្ថែមថា៖ «ដូចយើងបានស្ដាប់ប្រសាសន៍សម្ដេចធិបតិចឹង លោកកំពុងគិតគូធ្វើយ៉ាងម៉េចឱ្យអ្នកវិនិយោគក្នុងស្រុកយើង ឧកញ៉ា លោកឧកញ៉ាដែរមានលុយដើម្បីរកទុនមកដើម្បីវិនិយោគធ្វើម៉េចឱ្យមានការផលិតជីក្នុងស្រុកយើងជំនួសឱ្យការនាំចូលពីក្រៅប្រទេសព្រោះវាមានការលំបាក។ យើងឃើញហើយស្ថានភាពបច្ចុប្បន្នពិភពលោកកំពុងគ្មានសណ្ដាប់ធ្លាប់ផង ហើយប្រទេសផលិតជីធំៗទាំងអស់នឹងកំពុងមានសង្គ្រាមផងអីផងវាមានការលំបាក។ យើងនិយាយទៅវាមិនត្រូវទាំងស្រុងមួយរយភាគរយទេ សំខាន់តំបន់ដែលគាត់ផលិតអាចថា ពួកគាត់បើអាចកាត់បន្ថយការប្រើសប្រាស់ភាពចូលកសិកម្មនឹងបានជំនួសឱ្យការប្រើប្រាស់ជីធម្មជាតិដែលជាកាកសំណល់ដែលនៅជុំវិញផ្ទះរបស់ពួកគាត់ដើម្បីឱ្យសន្សំសច្ចៃ។ អានឹងទៅហើយយើងផ្សែផ្សំគ្នាទៅ កាត់បន្ថយការប្រើប្រាស់ជីគីមីបន្តិចទៅដើម្បីឱ្យបានសល់លុយច្រើន»។
ភាពតានតឹងរវាងកម្ពុជា-ថៃ បានកើតឡើង ក្រោយការប៉ះទង្គិចគ្នារវាងកងទ័ពកម្ពុជា-ថៃ នៅចំណុចមុំបី ក្នុងស្រុកជាំក្សាន្ត ខេត្តព្រះវិហារ បណ្តាលឱ្យទាហានខ្មែរម្នាក់ស្លាប់កាលពីថ្ងៃទី២៨ ខែឧសភា ឆ្នាំ២០២៥។ កម្ពុជាបានហៅសកម្មភាពនោះថា ជាការលួចឆ្មក់បាញ់លើទាហានខ្មែរ ជាការឈ្លានពាន និងជាអំពើមិនថ្លៃថ្នូរ និងមិនសមជាប្រទេសមានអរិយធម៌ខ្ពស់។ ក្រោយហេតុការនេះ ភាពតានតឹងបានកើតឡើងនៅតាមខ្សែបន្ទាត់នៃប្រទេសទាំងពីរ កើតមានកាន់តែច្រើន ដោយភាគីថៃបានបិទច្រកព្រំដែននៅចំណុចមួយចំនួនដោយឯកតោភាគី។ បន្ថែមពីនេះ បានព្រមានប្រើកម្លាំងយោធា ផ្តាច់ភ្លើង អ៊ិនធឺណិត ផ្តាច់ការនាំចូលប្រេងឥន្ទនៈដល់កម្ពុជាជាដើម។
ជាការឆ្លើយតបទៅនឹងការព្រមានទាំងនោះ រដ្ឋាភិបាលកម្ពុជា បានផ្តាច់អ៊ិនធឺណិត ភ្លើង បញ្ឈប់ការចាក់ផ្សាយរឿងថៃនៅលើកញ្ចក់ទូរទស្សន៍ ព្រមទាំងរាលដាល់ការការធ្វើយុទ្ធនាការឈប់ប្រើប្រាស់ទំនិញថៃ និងបិទការនាំចូលបន្លែ ផ្លែឈើ គ្រឿងកំប៉ុងចូលពីប្រទេសថៃជាដើម។ ជាមួយគ្នានេះ កម្ពុជាក៏បានដាក់សេចក្តីជូនដំណឹងអំពីការដាក់បណ្តឹងទៅតុលាការយុត្តិធម៌អន្តរជាតិពាក់ព័ន្ធសំណុំរឿងនៅតំបន់មុំបី ប្រាសាទតាមាន់តូច តាមាន់ធំ និងតាក្របី ផងដែរ៕
………………………………………………
អត្ថបទដោយពលរដ្ឋអ្នកសារព័ត៌មាន ជា វុទ្ធី
