អតីតនាយករដ្ឋមន្ត្រី និងជាប្រធានព្រឹទ្ធសភាកម្ពុជា បានប្រាប់ទៅពលរដ្ឋខ្មែរទាំងអស់ឱ្យធ្វើការរួបរួមគ្នាជាចលនាជាតិនិយមតែមួយ ដើម្បីត្រៀមទប់ទល់ទៅនឹងការចិញ្ចឹមចិត្តឈ្លានពានទឹកដីខ្មែរពីសំណាក់ភាគីអ្នកនយោបាយជ្រុលនិយមថៃជាយូរអង្វែង។
ការលើកឡើងនេះ ក្រោយអ្នកនយោបាយជ្រុលនិយមថៃដែលគេស្គាល់ថាជាមេក្រុមអាវលឿនថៃឈ្មោះ ស៊ិនធិ លឹមថងគុល បាននិយាយយ៉ាងច្បាស់ៗថា ប្រសិនបើគាត់ឈ្នះឆ្នោតដឹកនាំប្រទេសមានអំណាចពេញដៃ នឹងលើកកងទ័ពវាយប្រហារចូលទឹកដីកម្ពុជា យកខេត្តមួយចំនួនរបស់កម្ពុជាដូចជា បាត់ដំបង សៀមរាប បន្ទាយមានជ័យ ព្រះវិហារ និងកោះគុជ ហើយអាចរហូតដល់រាជធានីភ្នំពេញទៀតផង។
ប្រធានព្រឹទ្ធសភា បានដកស្រង់សម្តីរបស់ ស៊ិនធិ លឹមថងគុល ដែលនិយាយភាសាថៃដែលមានន័យជាភាសាខ្មែរយ៉ាងដូច្នេះថា៖ « អ្នកឯងសំណាងល្អដែលអញ ស៊ិនធិ លឹមថងគុល ដែលអញអត់មានអំណាច ប្រសិនបើអញមានអំណាចវិញ ថ្ងៃនេះ បាត់ដំបង សៀមរាប សិរីសោភណ្ឌ អញនឹងដណ្តើមយកមក ហើយស្អែកអញនឹងទៅយកព្រះវិហារ និងបន្តទៅយកកោះគុជទៀត ហើយអញសួរហ្អែងថា ប្រសិនបើនៅមិនពេញចិត្តទៀត អញនឹងទៅយកភ្នំពេញ»។
ប្រធានព្រឹទ្ធសភាកម្ពុជាលោក ហ៊ុន សែន បានលើកឡើងលើទំព័រហ្វេសប៊ុករបស់លោកនៅថ្ងៃទី៣០ ខែមេសា ថា នេះជាសំដីរបស់អ្នកនយោបាយជ្រុលនិយមថៃ ដែលបង្ហាញពីចេតនាចង់បានទឹកដីកម្ពុជា ដែលពលរដ្ឋខ្មែរទាំងអស់ត្រូវរួបរួមគ្នាជាចលនាជាតិមួយ ត្រៀមទប់ទល់កលល្បិចរបស់ថៃទៅថ្ងៃអនាគត។
លោកបានលើកឡើងថា៖«សម្តីបែបនេះរបស់អ្នកនយោបាយជ្រុលនិយមថៃ បង្ហាញយ៉ាងច្បាស់អំពីការចិញ្ចឹមចិត្ត និងមហិច្ចតាចង់បានទឹកដីរបស់កម្ពុជា ដូច្នេះហើយខ្ញុំសូមប្រកាសឲ្យជនរួមជាតិខ្មែរយើងទាំងអស់ ត្រូវរួបរួមគ្នាជាចលនាជាតិនិយមតែមួយ ដោយប្រុងប្រយ័ត្នជាប់ជានិច្ច ត្រូវត្រៀមខ្លួនជាប់ជានិច្ច ដើម្បីទប់ទល់ប្រឆាំងវៃបំបាក់ឧបាយកលដ៏សែនខ្មៅកខ្វក់របស់ថៃ ដែលចិញ្ចឹមចិត្ត និងមហិច្ចតាចង់លេបទឹកដីខេត្តមួយចំនួនរបស់កម្ពុជា»។
អតីតលោកនាយករដ្ឋមន្ត្រីបញ្ជាក់ទៀតថា ដោយចរិតឈ្លានពានបែបនេះ ទើបយើងត្រូវពង្រឹងកងកម្លាំងប្រដាប់អាវុធគ្រប់ប្រភេទ ត្រូវពង្រឹងខឿនការពារជាតិរបស់ប្រជាជន ត្រូវខិតខំចរចា ដើម្បីបោះបង្គោលព្រំដែនជាមួយថៃឲ្យបានឆាប់។ លោកបន្តថា យើងត្រូវត្រៀមខ្លួនតស៊ូរយៈពេលវែងតាមផ្លូវយោធា នយោបាយ ការទូត និងផ្លូវច្បាប់។ លោកថា ដរាបណាមិនទាន់មានការបោះបង្គោលព្រំដែនរួចរាល់ លទ្ធភាពប៉ះទង្គិចខាងយោធា ឬសង្គ្រាមតាមព្រំដែនងាយនឹងកើតឡើង និងពិបាកជៀសផុត។
លោកលើកឡើងបន្ថែមថា៖ «ខ្ញុំមិនតបតជាមួយពួកចោរឈ្លានពានទឹកដីទេ តែនេះជាសារដាស់តឿនដល់ បងប្អូនជនរួមជាតិកម្ពុជាដើម្បីត្រៀម ខ្លួនវាយចោរឈ្លានពានទឹកដី»។
អ្នកប្រឹក្សាយោបល់និងការស្រាវជ្រាវពីការអភិវឌ្ឍផ្នត់គំនិត លោក សេក សុជាតិ មានប្រសាសន៍គាំទ្រទៅនឹងគំនិតឱ្យមានការរួបរួមគ្នាជាថ្លុងមួយដោយអតីតនាយករដ្ឋមន្ត្រីកម្ពុជាពេលនេះ ដើម្បីជាការទប់ទល់ទៅនឹងបរទេសទាំងឡាយណាដែលមានបំណងទុច្ចរឹតមកលើអធិបតេយ្យភាពកម្ពុជា។ លោកថា ការរួបរួមដ៏រឹងមាំមិនមែនធ្វើឡើងតែពលរដ្ឋទេ ប៉ុន្តែសម្រាប់អ្នកនយោបាយខ្មែរ ព្រមទាំងអ្នកពាក់ព័ន្ធទាំងអស់ផងដែរ។
លោក សេក សុជាតិ លើកឡើងថា៖ «រាជរដ្ឋាភិបាលគួរតែផ្តល់ព័ត៌មានជាក់លាក់មួយចំនួនដើម្បីឱ្យប្រជាពលរដ្ឋមានទំនុកចិត្ត និងចូលរួមជាមួយរាជរដ្ឋាភិបាល។ រដ្ឋាភិបាលក៏ត្រូវត្រៀមខ្លួន នៅក្នុងការផ្តល់នូវព័ត៌មាន ដូចជាការគាំទ្រឬការអប់រំបណ្តុះបណ្តាលបន្ថែមទៀត ជាពិសេសទាក់ទងការចូលរួមពីសប្បុរសជន ក្រុមហ៊ុនឯកជន ក្នុងការបណ្តុះបណ្តាលដល់ពលរដ្ឋដែលរស់នៅតាមបន្ទាត់ព្រំដែនឱ្យមានការប្រុងប្រយ័ត្នខ្ពស់»។
លោកបន្តថា ជុំវិញបញ្ហាវិវាទជាមួយប្រទេសថៃពេលនេះ សម្រាប់ជាយុទ្ធសាស្ត្រកម្ពុជាត្រូវធ្វើយ៉ាងណាក៏ដោយ មិនត្រូវចាញ់ល្បិចបោកបញ្ជោត ឬបំប៉ោងព័ត៌មានពីសំណាក់ភាគីថៃនោះឡើយ។ កម្ពុជាត្រូវព្យាយាមលុបបំបាត់រាល់ព័ត៌មានទាំងឡាយណាដែលធ្វើឱ្យប៉ះពាល់ដល់ទឹកចិត្ត ហើយត្រូវឈរនៅលើគោលការណ៍ច្បាប់អន្តរជាតិ កិច្ចព្រមព្រៀងជាអន្តរជាតិ ពិសេសកិច្ចព្រមព្រៀងសន្តិភាពទីក្រុងប៉ារីស ២៣តុលា ដែលថៃជាហត្ថលេខី ព្រមទាំងយន្តការប្តឹងទៅតុលាការយុត្តិធម៌អន្តរជាតិគឺជារឿងដ៏ល្អបំផុត ក្នុងការដោះស្រាយវិវាទព្រំដែនជាមួយថៃដើម្បីបញ្ចប់បញ្ហាជាយូរអង្វែង៕
………………………………….
អត្ថបទដោយពលរដ្ឋអ្នកសារព័ត៌មាន ស៊ុន អ៊ូរ
