អ្នកតម្បាញមួយចំនួននៅខេត្ដស្វាយរៀង បានត្អូញត្អែរអំពីតម្លៃក្រមាចុះថោក និងគ្មានទីផ្សារសម្រាប់លក់ដូរ។
មានវ័យ៣៧ឆ្នាំរស់នៅភូមិដំណាក់កន្ទួត ឃុំស្វាយយា ស្រុកស្វាយជ្រំ ខេត្តស្វាយរៀង អ្នកស្រី ហោ មិច បានរៀបរាប់ថា អ្នកស្រីបានប្រកបរបរត្បាញក្រមាខ្នាតតូចឬក្រមាសម្រាប់ជាវត្ថុអនុស្សាវរីយ៍តាំងពីឆ្នាំ២០១៩។ អ្នកស្រីបញ្ជាក់ថា ប្រភេទក្រមាដែលអ្នកស្រីផលិតនោះ គឺគេប្រើសម្រាប់ធ្វើជាការដូ ឬចែកជូនភ្ញៀវក្នុងកម្មវិធីពិធីជប់លាង អាពាហ៍ពិពាណ៍ និងកម្មវិធីផ្សេងៗទៀត។
អ្នកស្រី ហោ មិច ឱ្យដឹងថា បច្ចុប្បន្នក្រមាប្រភេទនេះបានធ្លាក់ថ្លៃជាងពាក់កណ្តាលបើប្រៀបធៀបទៅនឹងរដូវប្រាំង ដោយនៅរដូវស្សាមានតម្លៃត្រឹមតែ៥០០រៀលប៉ុណ្ណោះ ខណៈនៅរដូវប្រាំងមានតម្លៃ១០០០រៀល។
ស្រ្តីពិការភ្នែករូបនេះបន្តថា ការត្បាញក្រមានេះ គឺអ្នកស្រីប្រើម៉ាស៊ីនចំនួន៣គ្រឿង ហើយអាចផលិតក្រម៉ាបានចន្លោះពី៨០ទៅ១០០ក្រមាក្នុង១ថ្ងៃ និងរកចំណូលបានប្រហែលពី៤០ម៉ឺនរៀលទៅ៥០ម៉ឺនរៀលក្នុង១ខែសម្រាប់រដូវស្សា និងបានពី៥០ម៉ឺនរៀលទៅ១លានរៀលសម្រាប់រដូវប្រាំង។ នេះមិនទាន់ដកថ្លៃអំបោះ និងថ្លៃភ្លើងចន្លោះពី១២ម៉ឺនរៀលទៅ១៥ម៉ឺនរៀលទេ។
អ្នកស្រីលើកឡើងថា៖ «លំបាកម៉ាសព្វ។ លក់អត់ដាច់ចឹងពិបាកអត់លុយបង់ភ្លើង ពិបាកលុយកូនរៀន ព្រោះលុយចំណាយលើយើងម្ហូប មហារវាអត់គ្រាន់ផង។ ជូនកាលខ្ញុំរត់ចោលផ្ទះទៅធ្វើសំណង់ ព្រោះនៅនេះ[ត្បាញ]វាប្រើដើម ។ធ្វើសំណង់អត់ប្រើដើមទេ។ មានតែខ្ញុំឈឺទេ បានខ្ញុំនៅផ្ទះ។ បើយើងធ្វើ[ត្បាញ]បានមួយពាន់[ក្រមា] ម្ចាស់អំបោះគេយកពាក់កណ្ដាល»។
អ្នកតម្បាញម្នាក់ទៀតអ្នកស្រី ជុំ ហិត និយាយថា សព្វថ្ងៃអ្នកស្រីមានម៉ាស៊ីនត្បាញចំនួន៣គ្រឿង ហើយក្នុងមួយថ្ងៃអ្នកស្រីអាចត្បាញក្រមាបានចន្លោះពី៩០ទៅ១០០ក្រមាដែរ។ អ្នកស្រីបានត្អូញត្អែពីការលំបាក និងខ្វះខាតជីវភាព ក្រោយតម្លៃក្រមាធ្លាក់ចុះ។
ស្រ្ដីវ័យ៤៥ឆ្នាំរូបនេះបន្តថា ពេលដែលក្រមាធ្លាក់ថ្លៃបែបនេះ គឺអ្នកស្រីមិនបង្ខំលក់ក្រមាឱ្យឈ្មួញនោះទេ ដោយអ្នកស្រីត្បាញទុកសម្រាប់នៅរដូវដែលក្រមាឡើងថ្លៃវិញ។ អ្នកតម្បាញម្នាក់នេះ ចង់ឱ្យអាជ្ញាធរពាក់ព័ន្ធជួយផ្សព្វផ្សាយ និងរកទីផ្សាឱ្យពួកគាត់លក់ក្រមាបានតម្លៃខ្ពស់ជាងនេះ។
អ្នកស្រីលើកឡើងថា៖ «ខ្ញុំសុំអំពាវនាវដល់រដ្ឋាភិបាលឲ្យជួយរកទីផ្សារក្នុងការលក់ក្រមាខ្មែរ ព្រោះអីក្រមាឥឡូវលែងដើរហើយ អ្នកទិញក៏លែងមានដែរ មានតែម្នាក់ពីរនាក់ក៏ថោកទទួលយកអត់បាន» ។
លោក ហែម សារិទ្ធ អភិបាលស្រុកស្វាយជ្រំ មានប្រសាសន៍ថា លោកនៅមិនទាន់បានដឹងថាពលរដ្ឋជួបបញ្ហាក្រមាចុះថោកនោះទេ។ លោកថា កន្លងមានឈ្មួញចូលមកទិញធម្មតា ប៉ុន្តែយ៉ាងណាលោកថា លោកនឹងចុះទៅជួបប្រជាពលរដ្ឋដោយផ្ទាល់ពិនិត្យមើលរឿងនេះ។
លោកលើកឡើងថា៖ «ប្រជាជនមួយចំនួនគាត់មានទីផ្សារបោះគាត់ ចាំមើលខ្ញុំជួប ចាំមើលខ្ញុំចុះទៅដល់ឃុំសួរនាំគាត់ផ្ទាល់ទៀតសិន ប្រមូលពត៌មានហ្នឹងសិន ខ្ញុំទើបតែឮដែរ»។
បើតាមអ្នកស្រី ជុំ ហិត កាលពីមុននៅភូមិដំណាក់កន្ទួតមានប្រជាពលរដ្ឋស្ទើរតែគ្រប់ផ្ទះបានដាក់កីត្បាញក្រមា ប៉ុន្តែបច្ចុប្បន្ននេះ នៅសល់ប្រហែល២០គ្រួសារប៉ុណ្ណោះដែលនៅបន្តត្បាញក្រមា។ អ្នកស្រីនិយាយថា បើសិនក្រមានៅតែបន្តធ្លាក់ថ្លៃទៀត គឺអ្នកស្រីនិងពលរដ្ឋផ្សេងទៀតអាចនឹងបោះបង់មុខរបរត្បាញក្រមានេះចោល ហើយទៅរកមុខរបរផ្សេងធ្វើជំនួសវិញ៕
រាយការណ៍ដោយលោក ខាត់ ណាក់ ពលរដ្ឋអ្នកសារព័ត៌មានខេត្តស្វាយរៀង។
