ប្រជាសហគមន៍ជនជាតិដើមភាគតិចពូនង ភូមិពូត្រុំ ក្រុងសែនមនោរម្យ ខេត្តមណ្ឌលគិរី បានស្នើឱ្យមានការទប់ស្កាត់ក្រុមហ៊ុនម៉ៅការសាងសង់បណ្តាញអគ្គិសនីមួយ ដែលបានធ្វើសកម្មភាពរំលោភលើដីតំបន់កប់សពរបស់ដូនតាពួកគេ ដោយពុំមានការជូនដំណឹង ឬការព្រមព្រៀងពីសហគមន៍ជាមុន។
ពលរដ្ឋជនជាតិដើមភាគតិពូនងម្នាក់នៅសង្កាត់រមនា ក្រុងសែនមនោរម្យ លោក ឆើល ឡូញ បានប្រាប់ពលរដ្ឋអ្នកសារព័ត៌មានថា ក្រុមហ៊ុនម៉ៅការសាងសង់អគ្គិសនីនៅមិនទាន់សងសំណងផលប៉ះពាល់ដីធ្លីដល់ជនជាតិភាគតិចនៅសហគមន៍ពូត្រុំនៅឡើយទេ គិតត្រឹមថ្ងៃទី៣ ខែមេសា ឆ្នាំ២០២៦។ លោកថា បើទោះបីអាជ្ញាធរសង្កាត់រមនា ព្យាយាមដោះស្រាយជាច្រើនដងក៏ដោយ ក៏ក្រុមហ៊ុនមិនទាន់ផ្តល់សំណងជូនពលរដ្ឋដែរ ដោយលើកហេតុផលថា ដីនោះគ្មានដំណាំអាស្រ័យផលជាក់ស្ដែង។
លោក ឆើល ឡូញ បន្ថែមថា ខាងក្រុមហ៊ុនអគ្គិសនីវិនិយោគប៉ះដីដែលមានប្លង់កម្មសិទ្ធិជាដីសហូហភាពខ្លះ និងខ្លះទៀតប៉ះពាល់ដីរបស់ប្រជាពលរដ្ឋប្រហែល៥គ្រួសារ ។
លោក ឆើល ឡូញ……………………………..
ពលរដ្ឋឱ្យដឹងថា ការសាងសង់របស់ក្រុមហ៊ុនម៉ៅការសំណង់បានចាប់ផ្តើមតាំងពីថ្ងៃទី១២ ខែមីនា ឆ្នាំ២០២៦ ដោយធ្វើការឈូសឆាយ និងកាយរណ្តៅដើម្បីដាក់បង្គោលបណ្តាញអគ្គិសនី ដោយឆ្លងកាត់តំបន់ដីគោរពបូជាសពនៅក្នុងសហគមន៍ពូត្រុំ។ ក្រោយឃើញសកម្មភាពនេះ ប្រជាសហគមន៍បានហាមឃាត់ភ្លាមៗ និងមិនអនុញ្ញាតឱ្យក្រុមហ៊ុនម៉ៅការបន្តការសាងសង់ឡើយ។ ពួកគេក៏បានស្នើឱ្យអាជ្ញាធរខេត្តធ្វើការដោះស្រាយ និងផ្លាស់ប្តូរទីតាំងសាងសង់បណ្តាញអគ្គិសនី ព្រមទាំងទាមទារឱ្យមានការពិគ្រោះយោបល់ និងដោះស្រាយជាមុន។
ទោះជាយ៉ាងណា នៅថ្ងៃទី២៣ ខែមីនា ឆ្នាំ២០២៦ ក្រុមហ៊ុនបានបន្តដឹកជញ្ជូនសម្ភារៈសាងសង់មកដាក់លើតំបន់ដីគោរពបូជាសពរបស់សហគមន៍ជនជាតិដើមភាគតិចពូនងទៀត។ អ្នកភូមិបញ្ជាក់ថា បើទោះបីជាសកម្មភាពឈូសឆាយបានផ្អាកតែសកម្មភាពសាងសង់បណ្តាញអគ្គិសនីនៅតែបន្តរហូតមកដល់ថ្ងៃទី៣ ខែមេសា។
ជនជាតិដើមភាគតិចពូនងមួយរូបទៀត លោក មើប បើង បាននិយាយថា ក្រុមហ៊ុនម៉ៅការសាងសង់បណ្តាញអគ្គិសនីនោះ បានឈូសឆាយប៉ះពាល់ដីចម្ការរបស់លោកអាស្រ័យ ដូចជាតំឡូង អំពៅ ហើយក្រុមហ៊ុនចូលឈូសឆាយក៏មិនបានជូនដំណឹងជាមុន និងមិនបានផ្ដល់ជាសំណងជូនពួកគាត់ឡើយ។
លោក មើប បើង……………..
លោក ភ្ជុំ សាមិត្ត មេភូមិពូត្រុំ បានប្រាប់ពលរដ្ឋអ្នកសារព័ត៌មានថា ក្រុមហ៊ុនអគ្គិសនីមិនទាន់បានផ្ដល់សំណងជូនពលរដ្ឋជនជាតិដើមពូនងដែលរងផលប៉ះពាល់នៅឡើយទេ ដូច្នេះទើបពលរដ្ឋលោកបង្ហោះសារលើហ្វេសប៊ុកអំពីរឿងនេះ។
មេភូមិពូត្រុំ…………………
លោក ភី ងូក ចៅសង្កាត់រមនា បានឱ្យពលរដ្ឋអ្នកសារព័ត៌មានដឹងថា លោកបានដោះស្រាយម្ដងជាពីរម្ដងរួចមកហើយ និងបានរាយការណ៍ជូនគណៈអភិបាលក្រុងសែនមនោរម្យរួចហើយដែរ។ លោកបញ្ជាក់ថា ចំពោះសកម្មភាពនៃការឈូសឆាយក៏លោកបញ្ជាឱ្យផ្អាកជាបណ្ដោះអាសន្នដែរ ដោយរង់ចាំក្រុមហ៊ុនផ្ដល់សំណងជាមុន និងដើម្បីគ្រួសារសពទិញសម្ភារៈយកទៅសែនព្រេនតាមប្រពៃណី និងដោះស្រាយចំណីផ្លូវឲ្យបានរួចរាល់ជាមុន។
លោក ភី ងូក ចៅសង្កាត់រមនា ……………………….
តំណាងភាគីក្រុមហ៊ុនម៉ៅការសាងសង់បណ្តាញអគ្គិសនីដែលរងការចោទ តាមលេខដែលអ្នកភូមិផ្តល់ឱ្យពលរដ្ឋអ្នកសារព័ត៌មាននៅមិនទាន់អាចសុំការឆ្លើយតបបាននៅឡើយទេរហូតដល់ថ្ងៃទី៣ ខែមេសា។
ដីសហគមន៍ពូត្រុំ ជាដីសមូហភាពសម្រាប់គោរបូជាសព ស្របពេលដីខ្លះទៀតពលរដ្ឋជនជាតិដើមភាគតិចដែលរងផលប៉ះពាល់អះអាងថា បានកាន់កាប់រាប់សិបឆ្នាំមកហើយ។ បច្ចុប្បន្នដីទាំងនោះ ជាកន្លែងដ៏មានសារៈសំខាន់សម្រាប់ការគោរពបូជា ការរក្សាវប្បធម៌ ប្រពៃណី និងជំនឿរបស់សហគមន៍ជនជាតិពូនងផងដែរ៕
……………………………………………………
អត្ថបទដោយពលរដ្ឋអ្នកសារព័ត៌មាន លោក សឿ សុជា