ក្រសួងការពារជាតិកម្ពុជា បានលើកឡើងថា ចាប់តាំងពីថ្ងៃទី៨ខែធ្នូ រហូតដល់ព្រឹកថ្ងៃទី៩ខែធ្នូនេះ ភាគីថៃបន្តវាយប្រហារមកលើទីតាំងប្រជាជនស៊ីវិលកម្ពុជា ដែលបណ្តាលឱ្យពលរដ្ឋស៊ីវិលកម្ពុជាចំនួន៧នាក់បានស្លាប់ និងរបួសចំនួន២០នាក់។
សេចក្តីប្រកាសព័ត៌មានរបស់ក្រសួងការពារជាតិកម្ពុជានៅព្រឹកថ្ងៃអង្គារ៍នេះ បានលើកឡើងអំពីស្ថានការណ៍នៅតាមបន្ទាត់ព្រំដែនកម្ពុជា-ថៃ ជុំវិញករណីយោធាថៃ បានបើកការបាញ់ប្រហារមកលើប្រជាពលរដ្ឋស៊ីវិលកម្ពុជា នៅក្នុងភូមិសាស្រ្តយោធភូមិភាគទី៥។ ក្នុងការវាយប្រហារ២ថ្ងៃនេះ បណ្តាលឱ្យពលរដ្ឋស៊ីវិលស្លាប់និងរបួសប្រមាណ៣០នាក់។
ក្រសួងបន្តថា៖«យោងតាមព័ត៌មានបឋមពីអាជ្ញាធរខេត្តបានឱ្យដឹងថា ការបើកការបាញ់ប្រហាររបស់យោធាថៃនៅលើទីតាំងប្រជាជនស៊ីវិលចាប់តាំងពីថ្ងៃទី៨ ខែធ្នូ ឆ្នាំ២០២៥ រហូតដល់ថ្ងៃទី៩ ខែធ្នូ ឆ្នាំ២០២៥នេះ គិតត្រឹមវេលាម៉ោង៦ព្រឹកនេះ បានបណ្តាលឱ្យប្រជាជនស៊ីវិលកម្ពុជាចំនួន៧នាក់បាត់បង់ជីវិត និងរបួសចំនួន២០នាក់»។
ក្រសួងការពារជាតិក៏បានឱ្យដឹងតាមរយៈសេចក្តីប្រកាសព័ត៌មានបណ្តាញសង្គមហ្វេសប៊ុកជាបន្តបន្ទាប់ថា យោធាថៃបានធ្វើសកម្មភាពបាញ់ប្រហារបន្តរហូតឥតដាច់ស្ទើរពេញមួយយប់នៅក្នុងភូមិសាស្រ្តយោធភូមិភាគទី៥ និងបាញ់ប្រហារមកលើកម្ពុជាកាន់តែខ្លាំងឡើង នៅភូមិសាស្ត្រស្រុកថ្មពួក ខេត្តបន្ទាយមានជ័យ។ បន្ថែមពីនេះពួកគេ បានបើកការបាញ់ប្រហារមកលើអធិបតេយ្យរបស់កម្ពុជា នៅក្នុងភូមិសាស្រ្តយោធភូមិភាគទី៥ ឃុំថ្មដា ស្រុកវាលវែង ខេត្តពោធិ៍សាត់។
ក្រសួងបញ្ជាក់ថា យោធាថៃបានប្រើប្រាស់ដ្រូនខ្នាតធំ ហោះស៊ើបការណ៍ចូលដល់ក្នុងភូមិសាស្ត្រភ្នំត្រង៉ោល បន្ទាប់មកយោធាថៃបានធ្វើសកម្មភាពបាញ់ផ្សែងពុលមកលើតំបន់នោះជាដើម។
ក្រៅពីនេះ យោធាថៃបានបើកការបាញ់ប្រហារនៅក្នុងភូមិសាស្ត្រយោធ ភូមិភាគទី៤ នៅក្នុងតំបន់ភ្នំខ្មោច និងបានពង្រីកភូមិសាស្រ្តនៃការវាយប្រហារទៅដល់តំបន់ផ្សេងៗទៀត រួមមាន តាថាវ, ប្រាសាទតាមាន់, ប្រាសាទព្រះវិហារ, ប្រាសាទខ្នារ, វាលឥន្ទ្រី, ភ្នំខ្មោច, គោល៨, ជាំតែ អានសេះ, ថ្មដូន, អូរស្មាច់, ភ្នំអនុស្សាវរីយ៍, មុខវត្តកែវសិក្ខាគីរិស្វារៈ និងបានបាញ់ផ្សែងពុលនៅប្រាសាទតាក្របីផងដែរ។
ប្រភពដដែលបញ្ជាក់ថា៖ «ក្រសួងការពារជាតិ និងកងយោធពលខេមរភូមិន្ទបន្តគោរព និងអនុវត្តឥតងាករេនូវរាល់ការសម្រេចចិត្តរបស់រាជរដ្ឋាភិបាល នៃព្រះរាជាណាចក្រកម្ពុជា ក្នុងការដោះស្រាយបញ្ហាដោយសន្តិវិធី ស្របតាមច្បាប់អន្តរជាតិ ដើម្បីការពារអធិបតេយ្យ និងបូរណភាពទឹកដី ព្រមទាំងសុខសុវត្ថិភាពរបស់ប្រជាជនកម្ពុជា»។
កម្ពុជាអះអាងថា ភាគីថៃបានរំលោភបំពានលើបទឈប់បាញ់ និង«សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ» ដែលភាគីកម្ពុជានិងភាគីថៃបានចុះហត្ថលេខា កាលពីថ្ងៃទី២៦ ខែតុលា ឆ្នាំ២០២៥ ដោយធ្វើសកម្មភាពឈ្លានពានប្រដាប់អាវុធសាជាថ្មីមកលើបូរណភាពទឹកដីរបស់កម្ពុជា ដោយការប្រើប្រាស់កម្លាំងយោធា។
អតីតនាយករដ្ឋមន្ត្រីកម្ពុជា និងជាប្រមុខស្តីទីបច្ចុប្បន្នលោក ហ៊ុន សែន បានលើកឡើងនៅព្រឹកនេះតាមហ្វេសប៊ុកលោកថា ក្រោយការអត់ធ្មត់លើស២៤ម៉ោងដើម្បីគោរពនូវបទឈប់បាញ់ និងត្រូវការពេលវេលាដើម្បីជម្លៀសប្រជាជនចេញមកតំបន់សុវត្ថិភាព ល្ងាចម្សិលមិញ កម្ពុជាបានតបតបន្ថែមកាលពីយប់មិញនិងព្រឹកនេះ។
ចំពោះការគំរាមវាយកម្ពុជាជាច្រើនចំណុច និងព្រមានបំផ្លាញមូលដ្ឋានយោធាកម្ពុជាឱ្យអស់នោះពីសំណាក់នាយករដ្ឋមន្ត្រីថៃ និងខាងភាគីកងទ័ពថៃនោះ អតីតនាយករដ្ឋមន្ត្រីរូបនេះបញ្ជាក់ថា កម្ពុជាពិតជាមិនអង្គុយអោបដៃឲ្យអស់លោកបំផ្លាញតាមចិត្តចង់របស់អស់លោកទេ។
លោក ហ៊ុន សែន បញ្ជាក់ថា៖ «យើងត្រូវការសន្តិភាពតែកម្ពុជាបង្ខំចិត្តវាយតបតដើម្បីការពារទឹកដីយើង»។
បន្ទាប់ពីមានកិច្ចព្រមព្រៀងសន្តិភាពដែលភាគីកម្ពុជា-ថៃ បានចុះហត្ថលេខាកាលពីចុងខែតុលា ក្រោមការសម្របសម្រួលដោយប្រធានអាស៊ានប្តូរវេន លោក អ៊ាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និងក្រោមវត្តមានប្រធានាធិបតីសហរដ្ឋអាមេរិក លោក ដូណាល់ ត្រាំ ធ្វើជាសាក្សី ភាគីទាហានថៃបានរំលោភកិច្ចព្រមព្រៀងសន្តិភាពជាបន្តបន្ទាប់ ដូចជារាយបន្លាយលួសលើដីអ្នកភូមិខ្មែរ ធ្វើផ្លូវ បាញ់លើកម្ពុជា។ ជាក់ស្តែងនៅរសៀលថ្ងៃទី១២ ខែវិច្ឆិកា បានបើកការបាញ់ប្រហារលើពលរដ្ឋខ្មែរ នៅភូមិព្រៃចាន់ ឃុំអូរបីជាន់ បណ្ដាលឱ្យរបួស៥នាក់ និងក្រោមមកមានអ្នករបួសម្នាក់បានស្លាប់៕
………………………………………
ដោយពលរដ្ឋអ្នកសារព័ត៌មាន
