អភិបាលខេត្ដកែបអះអាងថា អង្គភាពប្រឆាំងអំពើពុករលួយ(ACU)បានឃាត់ខ្លួនមន្រ្ដី២រូប និងយកទៅសួរនាំកាលពីម្សិលមិញ ប៉ុន្តែបានដោះលែងពួកគេឱ្យធ្វើការធម្មតាវិញ ខណៈសង្គមស៊ីវិល គាំទ្ររាល់សកម្មភាពប្រឆាំងអំពើពុករលួយដើម្បីធានាសង្គមស្អាតស្អំ និងការអភិវឌ្ឍ។
បើតាម លោក សោម ពិសិដ្ឋ អភិបាលខេត្ដកែប បានថ្លែងប្រាប់ពលរដ្ឋអ្នកសារព័ត៌មាននៅព្រឹកថ្ងៃពុធនេះថា មន្រ្ដីរបស់លោក២រូប ពិតជាត្រូវបានឃាត់ខ្លួនដោយអង្គភាពប្រឆាំងអំពើពុករលួយកាលពីម្សិលមិញ ប៉ុន្ដែត្រូវបានដោះលែង និងឱ្យចូលធ្វើការធម្មតាក្រោយពីសាកសួរចប់។ យ៉ាងណា លោកសុំមិនអត្ថាធិប្បាយបន្ថែមលើការសាកសួរនោះទេ ដោយលោកសុំរក្សាភាពស្ងៀមស្ងាត់។
លោកបន្ដថា៖«ពួកគាត់ចូលធ្វើការធម្មតាវិញហើយថ្ងៃនេះ។ខ្ញុំសុំមិនអត្ថាធិប្បាយថារឿងអីទេ»។
កាលពីព្រឹកថ្ងៃទី២ ខែមករា ឆ្នាំ២០២៤នេះ លោក ខេង យ័ន អភិបាលក្រុងកែប និង នាយករដ្ឋបាលម្នាក់ទៀត ត្រូវបានមន្រ្ដីរបស់អង្គភាពប្រឆាំងអំពើពុករលួយ និងបានឃាត់ភ្លាមៗ អំឡុយពេល លោក ខេង យ័ន ចេញពីប្រជុំ។
តាមច្បាប់ក្រមព្រហ្មទណ្ឌ មាត្រា៣៨ចែងថា អំពើពុករលួយគឺជាបទល្មើសដែលដាក់ទោសទណ្ឌទៅលើអំពើពុករលួយ ឬប៉ុនប៉ងពុករលួយ ប្រព្រឹត្ដដោយមន្ដ្រីនយោបាយ អ្នករាជការ យោធា ឬភ្នាក់ងាររបស់គណបក្សនយោបាយ។ អំពើពុករលួយទោះធ្វើឡើងក្រោមទម្រង់សកម្ម ឬអកម្ម ដូចជាការសូកប៉ាន់ ការរំលោភមុខងារ ដើម្បីប្រយោជន៍ផ្ទាល់ខ្លួន និងការជំរិតទារប្រាក់ ត្រូវបានកំណត់ថាជាបទល្មើសនៅក្រោមបទបញ្ញាតិ្ដរបស់ក្រមព្រហ្មទណ្ឌ។
អ្នកនាំពាក្យអង្គភាពប្រឆាំងអំពើពុករលួយ លោក សយ ច័ន្ទវិចិត្ដ បានថ្លែងនៅព្រឹកថ្ងៃពុធនេះថា កាលពីម្សិលមិញ ពិតជាមានការចាប់ខ្លួនមន្រ្ដីក្រុងកែប២រូបមែន។ លោកបន្ដថា ការចាប់ខ្លួននេះធ្វើឡើងបន្ទាប់ពីរកឃើញថា ពួកគេជាប់ព័ន្ធការប្រព្រឹត្ដអំពើពុករលួយ ប៉ុន្ដែលោកសុំមិនផ្តល់ព័ត៌មានលម្អិតនោះទេ។ យ៉ាងណាលោកថា អង្គភាពនេះ កំពុងប្រមូលព័ត៌មានបន្ថែមលើមន្រ្ដីខេត្ដកែប២រូបនេះបន្ដសិន។ លោកបញ្ជាក់ថា ក្រោយពីប្រមូលព័ត៌មានគ្រប់ជ្រុងជ្រោយហើយ អង្គភាពលោកនឹងចេញលិខិតបំភ្លឺជាសាធារណៈជន។
លោកបន្ដថា៖«ដូចខ្ញុំប្រាប់បងចឹងថាខ្ញុំមិនអាចផ្ដល់អ្វីឱ្យលើសពីនេះទេ រង់ចាំអង្គភាពប្រមូលព័ត៌មានបានហើយ ពួកខ្ញុំនឹងចេញលិខិតបំភ្លឺជុំវិញរឿងហ្នឹងបង។ខ្ញុំសុំរក្សាព័ត៌មានសិនបង»។
នៅថ្ងៃទី៦ ខែធ្នូ ឆ្នាំ២០២៣នេះលោក ហ៊ុន ម៉ាណែត នាយករដ្ឋមន្ត្រីនៃកម្ពុជា បានចេញសារលិខិតអបអរសាទរដល់ទិវាជាតិ និងអន្តរជាតិប្រឆាំងអំពើពុករលួយ៩ធ្នូ។ លោកបានណែនាំឱ្យបន្តពង្រឹង និងពង្រីកលើការងារអប់រំ បង្ការ និងទប់ស្កាត់ជាចម្បង ព្រមទាំងការពង្រឹងការអនុវត្តច្បាប់យ៉ាងម៉ឹងម៉ាត់ ដើម្បីបង្ក្រាបបទល្មើសអំពើពុករលួយ ។
ជុំវិញរឿងនេះ លោក ប៉ិច ពិសី នាយកប្រតិបត្ដិនៃអង្គការតម្លាភាពកម្ពុជា បានថ្លែងគាំទ្ររាល់សកម្មភាពរបស់អង្គភាពប្រឆាំងអំពើពុករលួយ ដោយថា បញ្ហាអំពើពុករលួយគឺជាដើមចមមិនឱ្យមានការអភិវឌ្ឍ និងធ្វើឱ្យពលរដ្ឋលែងមានទំនុកចិត្ដលើមន្រ្ដីសាធារណៈ។ លោកបន្ដថា រដ្ឋាភិបាលគួរតែបន្ដពង្រឹងសកម្មភាពរបស់ខ្លួនបន្ថែមទៀត ដើម្បីធានាបានថា កម្ពុជានឹងលែងមានអំពើពុករលួយ។
លោកថា៖«យើងគាំទ្រសកម្មភាពនេះ ព្រោះបញ្ហានេះជាដើមចមឱ្យប្រទេសយើងគ្មានការអភិវឌ្ឍ។ ខ្ញុំយល់ថា រដ្ឋាភិបាលគួរពង្រឹងឱ្យហ្មត់ចត់លើមន្រ្ដីសាធារណៈដើម្បីសាងទំនុកចិត្ដពីពលរដ្ឋ»។
ចំណែកឯ លោក អំ សំអាត នាយកចាត់ការទូទៅនៃអង្គការលីកាដូ បានលើកឡើងថា ការឃាត់នេះ វាជាសញ្ញាមួយល្អសម្រាប់មន្រ្ដីរដ្ឋាភិបាល និងវាបង្ហាញពីការវះកាត់ដូចការលើកឡើងរបស់រដ្ឋាភិបាលថ្មីដែលបានលើកឡើងពីបញ្ហាអំពើពុករលួយ។ លោកបន្ដថា ការឃាត់នេះក៏ជាការគំរាមដល់មន្រ្ដីមួយចំនួនដែលបម្រុងប្រព្រឹត្ដអំពើពុករលួយក្នុងកិច្ចការបម្រើពលរដ្ឋផងដែរ។
លោកបន្ដថា៖«ខ្ញុំយល់ថាវាសញ្ញាល្អមួយសម្រាប់ពលរដ្ឋ ហើយមន្រ្ដីខ្លួនឯងដែលចង់ប្រព្រឹត្ដអំពើពុករលួយក៏មានការភ័យខ្លាច ដូច្នេះក្នុងនាមយើងជាអង្គការសង្គមស៊ីវិលយើងគាំទ្រ»។
ពាក់ព័ន្ធនឹងអំពើពុករលួយនេះដែរ កាលពីថ្ងៃទី១៥ ខែធ្នូ ឆ្នាំ២០២៣កន្លងទៅ ព្រះមហាក្សត្របានចេញព្រះរាជក្រឹត្យមួយ ដោយត្រាស់បង្គាប់បញ្ចប់មុខតំណែង លោក កឹម ជាតិ ពីអនុរដ្ឋលេខាធិការក្រសួងមហាផ្ទៃ។ ការបញ្ចប់តំណែងនេះ ធ្វើឡើងបន្ទាប់ពីលោក កឹម ជាតិ បានប្រព្រឹត្ដអំពើពុករលួយដោយជំរឹតទារប្រាក់ចំនួន១០ម៉ឺនដុល្លារ និងដកហូតស្រា៤៨ដប ជាថ្នូរនឹងការបើកដំណើរវិញរបស់ក្រុមហ៊ុន ឈីវ ទីម៉ីចគ្រុប៕
………………………………………………
អត្ថបទដោយពលរដ្ឋអ្នកសារព័ត៌មាន លោក ឃាង សុខមាន
