អាជ្ញាធរខេត្ដស្វាយរៀងថា កំពុងធ្វើការស៊ើបសួររកអ្នកពាក់ព័ន្ធ និងកសាងសំណុំរឿងករណីប្រើប្រាស់អំពើហិង្សាទៅលើជនជាតិចិននៅក្រុងបាវិត ខេត្ដស្វាយរៀងកាលពីពេលថ្មីៗនេះ។
លោក ម៉ែន អេង អភិបាលរងខេត្ដស្វាយរៀងបានប្រាប់ពលរដ្ឋអ្នកសារព័ត៌មាននៅថ្ងៃទី៣១ ខែមករា ឆ្នាំ២០២៥ ថា អាជ្ញាធរកំពុងកសាងសំណុំរឿងបន្តនីតិវិធីស៊ើបសួរបន្ថែមលើករណីមានការប្រើប្រាស់ហិង្សាលើជនជាតិចិននៅខេត្តនេះ ។
នៅពេលពលរដ្ឋអ្នកសារព័ត៌មានសួរថាតើការឃាត់ខ្លួននោះពាក់ព័ន្ធបទល្មើសអ្វី?លោកមិនបានឆ្លើយតបទេហើយចុចទូរសព្ទផ្ដាច់ ។
លោកលើកឡើងថា៖ «គេកំពុងតែធ្វើការអញ្ចឹងអត់ទាន់រួចរាល់ទេ។ ខ្ញុំសូមជម្រាបជូនប៉ុណ្ណឹងថាការសាកសួរនៅបន្តនីតិវិធី» ។
កាលពីថ្ងៃទី២៩ ខែមករា ឆ្នាំ២០២៥ មានការចែកចាយវីដេអូចំនួន១៥វិនាទីនៅក្នុងបណ្ដាញសង្គមហ្វេសប៊ុកនៅក្នុងវីដេអូនោះគេឃើញមានមនុស្សប្រុសជាច្រើនអ្នកប្រដាប់ដោយដំបងនៅក្នុងដៃគ្រប់ៗគ្នា ខ្លះមានឯកសណ្ឋានជាសន្តិសុខខ្លះទៀតស៊ីវិលបានប្រើអំពើហិង្សាវ៉ៃទាត់់ទៅលើជនជាតិចិនចំនួន៣នាក់ឱ្យដេកទៅលើដី ។
គណនីហ្វេសប៊ុកដែលបានបង្ហោះវីដេអូនោះបានសរសេរបន្ថែមថា៖ «ចិនធ្វើការអនឡាញនៅបាវិតខេត្ដស្វាយរៀងលួចរត់ត្រូវបានក្រុមកាងដេញចាប់វ៉ៃគ្នាដូចសត្វធាតុ។មិនថាជនជាតិអ្វីទេលោកអើយការងារតាមអនឡាញឆបោក ចាប់ជំរិត កំពុងប្រមូលលុយនៅក្រុងបាវិតខេត្ដស្វាយរៀង។សង្ឃឹមថាការជួយស៊ែររបស់បងប្អូនបានជួយផ្សព្វផ្សាយដំណឹងដ៏ឈឺចាប់នេះដល់ស្ថានទូតចិនដើម្បីជួយដល់ជនរងគ្រោះផងចុះ» ។
អតីតរដ្ឋមន្រ្ដីក្រសួងព័ត៌មានលោក ខៀវ កាញារីទ្ធ បានសរសេរសារនៅលើបណ្ដាញសង្គមហ្វេសប៊ុករបស់លោកថា ករណីប្រើអំពើហិង្សាទៅលើជនជាតិចិនស្ថិតនៅភូមិប្រាសាទ សង្កាត់ប្រាសាទ ក្រុងបាវិត ខេត្ដស្វាយរៀង ។
លោកបន្តថា កម្លាំងអធិការដ្ឋាននគរបាល និងអាវុធហត្ថក្រុងបាវិត និងមានការសម្របសម្រួលនីតិវិធីច្បាប់ពីលោក ឡាយ ជុងហេង ព្រះរាជអាជ្ញារងនៃអយ្យការអមសាលាដំបូងខេត្ដស្វាយរៀងបានចុះទៅដល់កាស៊ីណូ អេអាយកាំង សមត្ថកិច្ចធ្វើការស្រាវជ្រាវរំដោះបានជនជាតិវៀតណាមបានចំនួន១៤នាក់ ឃាត់ខ្លួនជនសង្ស័យមានជនជាតិខ្មែរ និងចិនបាន១២នាក់ជាសន្តិសុខ និងមេការសន្តិសុខ។
លោកសរសេរថា៖ «ក្រោយមានការចែករំលែក វីដេអូឃ្លីបមួយលើបណ្តាញព័ត៌មាន សង្គម បង្ហាញពីសកម្មភាព មនុស្សមួយក្រុម ស្លៀកឈុត ពណ៌ខ្មៅវាយទៅលើជនជាតិបរទេសយ៉ាងកំរោល បន្ទាប់ពី ព្យាយាមរត់ចេញ ទីតាំងអគារអនឡាញ ស្ថិតក្នុងភូមិសាស្រ្តក្រុង បាវិត ពេលនេះ លោកអភិបាលរងខេត្តស្វាយរៀង លោក ម៉ែន អេង បញ្ជាក់ថា អាជ្ញាធរបានធ្វើការរំដោះមនុស្សចំនួន១៤នាក់ និង១២នាក់ត្រូវចាប់ខ្លួន» ។
នាយកប្រតិបត្តិអង្គការលីកាដូលោក អំ សំអាត បានប្រាប់ពលរដ្ឋអ្នកសារព័ត៌មានកាលពីថ្ងៃទី៣០ ថាបញ្ហាឆបោកតាមប្រពន្ធអនឡាញគឺជារឿងក្ដៅគគុកមួយសម្រាប់កម្ពុជាហើយមានការរិះគន់ច្រើនពីសហគមន៍អន្ដរជាតិ ។
លោកបន្តថាកន្លងមកប្រទេសនៅក្នុងអាស៊ានមួយចំនួនតែងតែរំលឹកប្រជាពលរដ្ឋរបស់គេឱ្យមានការប្រុងប្រយ័ត្នក្នុងការធ្វើដំណើរមកប្រទេសកម្ពុជា ធ្វើយ៉ាងណាកុំឱ្យធ្លាក់ចូលទៅក្នុងការឆបោកតាមប្រពន្ធអនឡាញ ។
លោកនិយាយថាមានកាសែតបរទេសជាច្រើនបានចុះផ្សាយពីការឆបោកតាមប្រពន្ធអនឡាញនៅក្នុងប្រទេសកម្ពុជា ដែលធ្វើឱ្យប៉ះពាល់ដល់មុខមាត់កម្ពុជា ប៉ះពាល់ទៅដល់វិស័យភ្ញៀវទេសចរណ៍អន្ដរជាតិ វិនិយោក ប៉ះពាល់ទៅដល់សណ្ដាប់ធ្នាប់សន្តិសុខសង្គម ។
លោកលើកឡើងថា៖ «ថ្មីៗប្រមុខរាជរដ្ឋាភិបាលក៏មានការបង្កើតនៅអន្ដរក្រសួងបន្ថែមទៀតដើម្បីធ្វើការទប់ស្កាត់ហ្នឹងបង្ក្រាបទៅលើការឆបោកតាមប្រពន្ធអនឡាញឱ្យមានប្រសិទ្ធភាព។ ដើម្បីចាត់វិធានការផ្លូវច្បាប់ឱ្យមានប្រសិទ្ធភាពអាជ្ញាធរខេត្ដស្វាយរៀងហ្នឹងអាជ្ញាធរពាក់ព័ន្ធត្រូវចាត់វិធានការស៊ើបអង្កេតស្រាវជ្រាវទៅលើរឿងនេះ ហើយបើរកទៅឃើញកើតមានពិតប្រាកដត្រូវអនុវត្តផ្លូវច្បាប់ឱ្យមានប្រសិទ្ធភាព » ។
អតីតនាយករដ្ឋមន្រ្ដីថៃលោក ថាក់ស៊ីន ស៊ីណាវ៉ាត់ត្រា បានអះអាងថាមានពលរដ្ឋថៃជាច្រើននាក់កំពុងជាប់ឃុំនៅក្នុងអាគារមជ្ឈមណ្ឌឆបោកតាមអ៊ីនធឺណេត(Call Center) ស្ថិតនៅក្រុងប៉ោយប៉ែត ខេត្ដបន្ទាយមានជ័យ និងបានស្នើឱ្យអាជ្ញាធរកម្ពុជាសហការជាមួយអាជ្ញាធរថៃធ្វើការបង្ក្រាប ។
កាលពីថ្ងៃទី២៣ ខែតុលា ឆ្នាំ២០២៤ ទូរទស្សន៍រដ្ឋកូរ៉េខាងត្បូង KBS បានផ្សាយព័ត៌មានថាមានពលរដ្ឋកូរ៉េខាងត្បូងត្រូវបានចាប់បង្ឃាំងឱ្យធ្វើការងារខុសច្បាប់ និងចាប់ជំរិតនៅក្នុងប្រទេសកម្ពុជា ។
ទូរទស្សន៍ដដែលបានបង្ហាញពីសម្មភាពប្រើប្រាស់អំពើហិង្សាទៅលើជនរងគ្រោះផងដែរ។នៅមួយថ្ងៃបន្ទាប់អគ្គស្នងការនគរបាលជាតិបានធ្វើការបដិសេធចំពោះការចុះផ្សាយរបស់ទូរទស្សន៍KBS ។
នៅថ្ងៃទី២៤ ខែតុលា ឆ្នាំ២០២៤ ដដែលលោក ឌី វិជ្ជា អគ្គស្នងការរងនគរបាលជាតិបានដឹកនាំកម្លាំងចម្រុះចុះបង្រ្កាបទីតាំងអាគារមួយកន្លែងស្ថិតនៅស្រុកគងពិសី ខេត្ដកំពង់ស្ពឺ ឃាត់ខ្លួនបានជនជាតិចិន កូរ៉េ ជាងមួយពាន់(១០០០)នាក់ ទីតាំងដែលសមត្ថកិច្ចបង្រ្កាបគឺជាទីតាំងដែលទូរទស្សន៍កូរ៉េខាងត្បូង KBS បានផ្សាយថាមានពលរដ្ឋកូរ៉េខាងត្បូងត្រូវបានចាប់បង្ឃាំងឱ្យធ្វើការខុសច្បាប់ និងចាប់ជំរិតនៅក្នុងប្រទេសកម្ពុជា ។
…………………………………….
អត្ថបទដោយពលរដ្ឋអ្នកសារព័ត៌មានលោក សួន វុត្ថា
