ប្រជាពលរដ្ឋមួយចំនួននៅឃុំអន្លង់វែង ស្រុកអន្លង់វែង ខេត្តឧត្តរមានជ័យ ស្នើដល់រដ្ឋបាលខេត្តនេះដោះស្រាយបញ្ហាតម្លៃបង់ពន្ធដីធ្លី និងករណីបំពានយកដីប្រាសាទគោករំចេក ធ្វើកម្មសិទ្ធិ។
ការស្នើនេះធ្វើឡើងវេទិកាផ្សព្វផ្សាយ និងពិគ្រោះយោបល់រវាងក្រុមប្រឹក្សាខេត្តឧត្តរមានជ័យ និងប្រជាពលរដ្ឋជាង២៥០នាក់នៅបរិវេណវត្តជ័យទឹកជុំ ហៅវត្តអន្លង់វែង ស្ថិតនៅភូមិថ្នល់កែង ឃុំអន្លង់វែង កាលពីថ្ងៃទី១ ខែវិច្ឆិកា ឆ្នាំ២០២៣ ដើម្បីផ្តល់ឱកាសដល់ប្រជាពលរដ្ឋលើកឡើងពីកង្វល់ និងស្នើសុំដោះស្រាយ។
ក្នុងវេទិកានោះអ្នកស្រី ឃឹម ស្រីពៅ រស់នៅភូមិរំចេក ឃុំអន្លង់វែង បានលើកឡើងថា ការធ្វើឯកសារ និងការបង់ពន្ធដីធ្លីហាក់មិនមានតម្លាភាពនោះទេ។ អ្នកស្រី អះអាងថា មន្ត្រីពន្ធដារបានយកពន្ធលើដីធ្លីលើសពីគោលការណ៍កំណត់របស់រដ្ឋាភិបាល។
អ្នកស្រីបន្ថែមថា៖ «លឺថាសម្តេចនិយាយថា ទាល់តែដីនោះមានតម្លៃលើស២៥ ០០០ដុល្លារបានយកពន្ធពីប្រជាពលរដ្ឋ ហើយមន្ត្រីជំនាញសូរិយោដីបានបិទទូរសព្ទមកឆ្លើយតប។ អីចឹងខ្ញុំសំណូមពរដល់ខាងជំនាញអីក៏ដោយ បើចុះធ្វើអីដល់ប្រជាពលរដ្ឋក៏ដោយត្រូវឱ្យមានតម្លាភាព»។
ស្ត្រីវ័យ៥៣ឆ្នាំរូបនេះ បានលើកឡើងពីបញ្ហាមួយទៀត គឺដីប្រាសាទគោករំចេក ស្ថិតក្នុងភូមិគោរំចេក ឃុំអន្លង់វែង កំពុងរងការរំលោភបំពានយកដោយខុសច្បាប់ពីប្រជាពលរដ្ឋមួយចំនួន ដែលមានក្បាលដីជាប់តំបន់នោះធ្វើជាកម្មសិទ្ធិ។
ពលរដ្ឋរូបនេះ បានស្នើដល់រដ្ឋបាលខេត្តឧត្តរមានជ័យអន្តរាគមន៍ទៅមន្ត្រីពន្ធដាខេត្តឱ្យយកតម្លៃពន្ធដាលើដីធ្លីឱ្យមានតម្លាភាព ហើយត្រូវបោះបង្គោលកំណត់ព្រំប្រទល់ដីប្រាសាទគោរំចេក និងចុះបញ្ជីឱ្យបានត្រឹមត្រូវ ដើម្បីទប់ស្កាត់កុំឱ្យជនខិលខូចបន្តបំពានយក។
អ្នកស្រីបន្ថែមថា៖«នៅខាងរំចេកខ្ញុំហ្នឹងមានប្រាសាទ២ ប្រជាពលរដ្ឋចេះតែរុករានទន្ទ្រានយកដីប្រាសាទ ដើម្បីបង្កបង្កើនផលដាំដំឡូង ឬធ្វើអាជីវកម្មផ្សេងៗ។ អីចឹងខ្ញុំសំណូមពរខាងបងអាជ្ញាធរទាំងអស់ចុះជួយចុចព្រំប្រទល់ប្រាសាទដើម្បីអភិរក្សទុកឱ្យក្មេងជំនាន់ក្រោយ ឬក៏ទុកធ្វើសាលារៀន»។
មន្រ្តីពន្ធដារសាខាខេត្តឧត្តរមានជ័យលោក អ៊ុន សុផល បានឡើយថា ការបង់ពន្ធប្រថាប់ត្រារបស់ពន្ធដារមានតាមប្រភេទឬតាមតំបន់ដីដូចជានៅជាប់ផ្លូវលំ ផ្លូវក្នុងភូមិ ផ្លូវជាតិ ដែលមានតារាងតម្លៃចេញ ដោយក្រសួងសេដ្ឋកិច្ច និងហិរញ្ញវត្ថុដែលមានតម្លៃផ្សេងៗគ្នា ហើយរាល់ការបង់ពន្ធគឺមានបង្កាន់ដៃត្រឹមត្រូវ ។
លោកបន្ថែមថា៖«មូលដ្ឋានគិតពន្ធរបស់ពន្ធដារមានប្រភេទតាមតំបន់ផ្លូវឃុំផ្លូវភូមិមានផ្លូវជាតិ។ ហើយតារាងតម្លៃហ្នឹងចេញដោយក្រសួងសេដ្ឋកិច្ចមានតម្លៃផ្សេងៗគ្នាដែរ។ យើងមិនយកលើសតម្លៃរដ្ឋកំណត់ទេ»។
ចំពោះការបោះបង្គោលព្រំប្រាសាទវិញ លោក ងួន ធារិទ្ធ អភិបាលស្រុកអន្លង់វែង មានប្រសាសន៍ថា ពាក់ព័ន្ធបញ្ហាដីប្រាសាទ គឺទាល់តែមន្ទីរវប្បធម៌ចុះទៅវាយតំលៃរួចរាល់ ទើបអាចយកមកចុះបញ្ជីបាន។
លោកបន្ថែមថា៖«ការចុះបញ្ជីដីប្រាសាទនីមួយៗបានទាល់តែខាងមន្ទីរវប្បធម៌គេវាយតម្លៃថា ជារបស់ប្រាសាទទើបអាចចុះបញ្ជីបាន។ បើមិនមែនជាដីប្រាសាទយើងចេះតែចុះៗប៉ះដីប្រជាជនរឿងដដែល»។
គួរបញ្ជាក់ថា ក្នុងវេទិកានេះក៏មានប្រជាពលរដ្ឋទៀតស្នើដល់រដ្ឋបាលខេត្តឧត្តរមានជ័យជួសជុលផ្លូវខូចក្នុងសហគមន៍ ជួយរកទីផ្សារលក់ផលិតផលកសិកម្មដែលពួកគាត់ បង្ក្រាបបិទល្មើសគ្រឿងញៀន និងបញ្ហផ្សេងៗទៀតក្នុងសហគមន៍។
ពាក់ព័ន្ធនឹងសំណូមពររបស់ប្រជាពលរដ្ឋបានលើកឡើងក្នុងវេទិកានេះ គឺលោក លួន អាន សមាជិកក្រុមប្រឹក្សាខេត្ដអះអាងថា រដ្ឋបាលខេត្តនឹងយកទៅធ្វើការពិចារណាដោះស្រាយ ដើម្បីលើកកម្ពស់ជីវភាពប្រជាពលរដ្ឋនៅតាមមូលដ្ឋានឱ្យកាន់តែល្អប្រសើរឡើង ដោយធ្វើយ៉ាងណា ពង្រឹងប្រសិទ្ធភាព តម្លាភាព គណនេយ្យភាពក្នុងគោលដៅអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ៕
……………………………………………….
អត្ថបទដោយប្រជាពលរដ្ឋខេត្តឧត្តរមានជ័យ លោក ចៀវ ពន្លឺ
