កម្មករបម្រើការងារតាមបណ្តារោងចក្រមួយចំនួនក្នុងខេត្តស្វាយរៀង អះអាងថា ពួកគេមិនទទួលបានប្រាក់ឧបត្ថម្ភពីរដ្ឋឡើយ អំឡុងពេលរោងចក្ររបស់ពួកគេព្យួរកិច្ចសន្យាការងារបណ្តោះអាសន្ន។
កាលពីថ្ងៃទី៦ ខែកញ្ញាឆ្នាំ ២០២៣ ក្រសួងការងារ និងបណ្ដុះបណ្ដាលវិជ្ជាជីវៈបានចេញសេចក្ដីជូនដំណឹងមួយស្ដីពីការផ្ដល់ប្រាក់ឧបត្ថម្ភជូនកម្មករនិយោជិតនៅតាមបណ្តារោងចក្រជាង២០សហគ្រាស ក្នុងរាជធានី ខេត្តកណ្តាល ស្វាយរៀងនិងខេត្តផ្សេងទៀត ដែលត្រូវព្យួរកិច្ចសន្យាការងារចាប់ពីខែមិថុនា ដល់ខែសីហាឆ្នាំ២០២៣។
ប៉ុន្តែកម្មករបម្រើការងារនៅតាមបណ្តារោងចក្រមួយចំនួនក្នុងខេត្តស្វាយរៀងបានលើកឡើងថា ពួកគេមិនទទួលបានប្រាក់ឧបត្ថម្ភនេះពីក្រសួងការងារឡើយរហូតមកទល់ពេលនេះ។
ក្នុងសេចក្ដីជូនដំណឹងនោះបញ្ជាក់ថា ការផ្ដល់ប្រាក់ឧបត្ថម្ភនេះ គឺអាស្រ័យទៅលើចំនួនថ្ងៃ នៃការព្យួរកិច្ចសន្យាការងារ សម្រាប់ព្យួរកិច្ចសន្យាការងាររយៈពេល៧ថ្ងៃដល់១៤ថ្ងៃទទួលបានប្រាក់ឧបត្ថម្ភចំនួន ៨១ ០០០រៀល ឬស្មើ២០ដុល្លារ។ចំពោះការព្យួរកិច្ចសន្យាការងារចំនួន១៥ថ្ងៃទៅដល់មួយខែ គឺទទួលបានប្រាក់ឧបត្ថម្ភចំនួន ១៦២ ០០០រៀល ឬស្មើ៤០ដុល្លារ។
កម្មការិនីបម្រើការងារនៅរោងចក្រឡេកស្ព័រ (Lake Sports ) ម្នាក់ដែលសុំមិនបញ្ចេញឈ្មោះដោយបារម្ភពីសុវត្តិភាពបានប្រាប់ពលរដ្ឋអ្នកសារព័ត៌មានថា រោងចក្ររបស់អ្នកស្រីបានព្យួរកិច្ចសន្យាការងារចំនួនពីរដងមកហើយ ប៉ុន្តែក្រុមកម្មករមិនទទួលបានប្រាក់ឧបត្ថម្ភពីរដ្ឋាភិបាលមួយរៀលឡើយ។ អ្នកស្រីថា តាំងពីខែ១២ ឆ្នាំ២០២២ ដល់ខែឧសភា ឆ្នាំ២០២៣រោងចក្រ ឡេកស្ព័រ បានព្យួរការងារលើកទីមួយ និងលើកទីពីរនៅថ្ងៃទី១៤ ខែសីហាឆ្នាំ២០២៣ ដល់ថ្ងៃទី១៣ ខែតុលា ឆ្នាំ២០២៣។
កម្មការិនីរូបនេះ អះអាងថា នៅអំឡុងពេលព្យួរកិច្ចសន្យាការងារលើកទីមួយអ្នកស្រី និងស្វាមីមិនទទួលបានប្រាក់ឧបត្ថម្ភពីក្រសួងនោះទេ ដោយខាងរដ្ឋបាលរោងចក្រប្រាប់ថា អ្នកស្រី និងស្វាមីប្រើប្រាស់លេខទូរសព្ទដូចគ្នាទើបខាងក្រសួងមិនបានផ្ដល់ប្រាក់ឧបត្ថម្ភឱ្យឡើយ។ បន្ថែមពីនេះ អ្នកស្រីថា ការព្យួរការងារលើកទី២ គឺមិនមានបញ្ជីឈ្មោះរោងចក្រ ឡេក ស្ព័រ ក្នុងបញ្ជីផ្តល់ប្រាក់ឧបត្តម្ភរបស់ក្រសួងការងារនោះទេ។
អ្នកស្រីលើកឡើងថា៖ « ខ្ញុំគិតថា អត់ស្មើភាពគ្នាទេ ព្រោះអីព្យួរឈ្មោះដូចគ្នា រោងចក្រគេផ្សេងមិចបានជាគេបាន [ប្រាក់ឧបត្ថម្ភ] រោងចក្រខ្ញុំហេតុអ្វីអត់បាន។ ពេលអញ្ចឹងអត់ស្មើភាពគ្នាហ្មង វាលម្អៀងពេក។ កាលព្យួរឈ្មោះលើកមុនគេបាន ប៉ុន្ដែខ្ញុំនិងគ្រួសារខ្ញុំអត់បាន»។
អ្នកស្រីបន្ថែមថា នៅក្នុងអំឡុងពេលព្យួរការងារលើកទីពីរនោះ គឺខាងរដ្ឋបាលរោងចក្របានដើរកត់ឈ្មោះកម្មករដែលត្រូវព្យួរការងារ ប៉ុន្តែនៅពេលក្រសួងការងារចេញសេក្ដីជូនដំណឹងស្ដីពីការផ្ដល់ប្រាក់ឧបត្ថម្ភបែរជាមិនឃើញមានឈ្មោះរោងចក្រដែលអ្នកស្រីធ្វើការទៅវិញ។
លោក កែវ សាន អាយុ២៧ ឆ្នាំ បម្រើការងារនៅរោងចក្រ យូធីឡាយ ស្ថិតក្នុងតំបន់សេដ្ឋកិច្ចពិសេស ហាយផាក និយាយថា ក្រុមហ៊ុននេះបានព្យួរកិច្ចសន្យាការងារកម្មកររយៈពេលពីរខែ គឺនៅក្នុងខែ៩ និង១០ឆ្នាំ២០២៣ ដោយនៅក្នុងអំឡុងពេលព្យួរកិច្ចសន្យាការងារនោះ គឺកម្មករទទួលបានប្រាក់ឧបត្ថម្ភពីរោងចក្រ ៣០ដុល្លារប៉ុណ្ណោះ ហើយមិនទទួលបានប្រាក់ឧបត្ថម្ភណាមួយពីក្រសួងការងារឡើយ។
កម្មកររូបនេះលើកឡើងថា ការឧបត្ថម្ភប្រាក់ដល់កម្មករកម្មការីនីនៅក្នុងពេលរោងចក្រព្យួរកិច្ចសន្យាការងារពីសំណាក់រដ្ឋាភិបាលហាក់មានការរើសអើង។
លោកលើកឡើងថា៖ « ខ្ញុំគេព្យួរ[ការងារ]ខែ៩ខែ១០ខែ១១ចូលធ្វើការបងហើយរោងចក្រហ្នឹងវាមានច្រើនដំណាក់កាលណាស់បងខ្ញុំអត់យល់ដែរអ្នកខ្លះបាន [ប្រាក់ឧបត្ថម្ភ] អ្នកខ្លះក៏អត់។ ខ្ញុំបានលុយ៣០ភាគរយពីថៅកែ ពីមុនគេថា ឱ្យលុយក្រសួងដែរ តែ[ក្រោយមក]គេថារោងចក្រហ្នឹងនៅក្រៅក្របខណ្ឌក្រសួងចឹងគេស្នើសុំអត់បានទេ។ គេឱ្យបានតែ៣០ភាគរយ » ។
យ៉ាងណាពលរដ្ឋអ្នកសារព័ត៌មានមិនអាចសុំការឆ្លើយពីរដ្ឋបាលរោងចក្រ ឡេកស្ព័រ និងរោងចក្រ យូធីឡាយ បាននោះទេ។
ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្ដស្វាយរៀង លោក អ៊ូ សុខខឿន បានប្រាប់ពលរដ្ឋអ្នកសាព័ត៌មានថា ជាគោលការណ៍ គឺរដ្ឋាភិបាលផ្ដល់ប្រាក់ឧបត្ថម្ភស្មើភាពគ្នាមិនមានការរើសអើងនោះទេ។ លោកថា ប្រាក់ឧបត្ថម្ភនោះផ្តល់ដល់កម្មករដែលបម្រើការងារក្នុងវិស័យ ដែលបានកំណត់ដូចជាកាត់ដេរ ផលិតផលស្បែកជើង កាបូប និងផលិតផលធ្វើដំណើរ។
លោក អ៊ូ សុខខឿន បន្តថា ចំពោះកម្មករបម្រើការងារនៅរោងចក្រ ឡេកស្ព័រ និងរោងចក្រផ្សេងទៀត ដែលមិនទទួលបានប្រាក់ឧបត្ថម្ភត្រូវរក្សាភាពអត់ធ្មត់ ខាងមន្ទីរនឹងសម្របសម្រួលដោះស្រាយស្រាយដោយគ្មានការរើសអើង។
លោកបន្ថែមថា៖ « ចឹងក្រុមហ៊ុនហ្នឹងគាត់មិនទាន់បានការអនុម័តទម្លាក់ប្រាក់ឧបត្ថម្ភមកទេ។ ចឹងធ្លាក់មកទៅតាមវគ្គៗដែលគេពិនិត្យហើយ ចឹងទាល់តែគាត់រង់ចាំបន្តិចគេមិនមានការរើសអើងអីទេគ្រាន់តែយឺតអត់ទាន់ធ្លាក់ »។
ប្រធានសម្ព័ន្ធសជីពចលនាកម្មករ លោក ប៉ាវ ស៊ីណា មានប្រសាសន៍ថា ឱ្យតែកម្មករដែលធ្វើការងារស្ថិតនៅក្រោមច្បាប់ស្ដីពីការងារ គឺកម្មករទាំងនោះត្រូវតែទទួលបានការឧបត្ថម្ភតាមរយៈប្រាក់មូលនិធិជំនួយសង្គមរបស់រដ្ឋាភិបាលដូចគ្នា។
ប្រធានសហជីពរូបនេះ លើកឡើងថា ករណីកម្មករនៅតាមរោងចក្រមួយចំនួនមិនទទួលបានប្រាក់ឧបត្ថម្ភពីរដ្ឋាភិបាលអំឡុងពេលព្យួរការងារនោះ អាចមកពីមន្ទីរការងារខេត្តខកខាន ឬមិនបានធ្វើរបាយការណ៍អំពីរោងចក្រការព្យួរការងារជូនរដ្ឋាភិបាល ឬក្រសួងការងារ។
លោកថា៖« ប្រសិនបើពួកគាត់មិនត្រូវបានផ្ដល់ជូននូវប្រាក់ជំនួយសង្គមទេ វាពិបាក។ គាត់ក៏ជាកម្មករស្ថិតនៅក្នុងប្រព័ន្ធការងាររបស់ប្រទេសកម្ពុជាដែរ មិនអាចត្រូវបានផាត់ចេញពីផ្នែកណាមួយក្នុងការមិនទទួលបានជំនួយសង្គម ឬអត្ថប្រយោជន៍នោះទេ »។
កន្លងមក រាជរដ្ឋាភិបាលបានប្រកាសផ្ដល់ប្រាក់ឧបត្ថម្ភដល់កម្មកររោងចក្រដែលត្រូវបានព្យួរការងារ ដោយពួកគេនឹងទទួលបានចំនួន៧០ដុល្លារក្នុង១ខែ ដោយទឹកប្រាក់ ៣០ដុល្លារទទួលបានពីភាគីក្រុមហ៊ុន និង៤០ដុល្លារបានពីរាជរដ្ឋាភិបាល៕
……………………………………
អត្ថបទដោយពលរដ្ឋអ្នកសារព័ត៌មានខេត្តស្វាយរៀង លោក សួន វុត្ថា
