រាជរដ្ឋាភិបាលបានប្រកាសពីការបង្កើតមូលនិធិកសាងហេដ្ឋារចនាសម្ព័ន្ធតាមបណ្ដោយព្រំដែន ដោយអះអាងថា ដើម្បីការពារបូរណភាពទឹកដីរបស់កម្ពុជា និងជាការបង្ហាញពីស្មារតីសាមគ្គីជាតិពិតប្រាកដ ខណៈសង្គមស៊ីវិលបង្ហាញការគាំទ្រ។
ក្នុងសេចក្ដីថ្លែងការណ៍កាលពីថ្ងៃទី២២ ខែសីហា ឆ្នាំ២០២៤ នាយករដ្ឋមន្ត្រីលើកឡើងថា មូលនិធិនេះ មានគោលដៅកៀរគរថវិកា និងផ្ដល់ឱកាសឱ្យប្រជាពលរដ្ឋនៅទូទាំងប្រទេស បានចូលរួមជាមួយរដ្ឋាភិបាល ក្នុងការកសាងហេដ្ឋារចនាសម្ព័ន្ធតាមបណ្ដោយព្រំដែន។ បន្ថែមពីនេះ ជាបង្ហាញនូវការយកចិត្តទុកដាក់ លើការកសាងផ្លូវនៅតាមព្រំដែនរបស់ពលរដ្ឋ និងរាជរដ្ឋាភិបាល។ លោក ហ៊ុន ម៉ាណែត បានអំពាវនាវដល់ប្រជាពលរដ្ឋ ចូលរួម និងរួមគ្នាកសាងផ្លូវក្រវាត់ព្រំដែន ដើម្បីជាកិច្ចការពារបូរណភាពទឹកដីកម្ពុជា។
នាយករដ្ឋមន្ដ្រីថ្លែងថា៖«ចាប់តាំងពីឆ្នាំ១៩៩៤មក រដ្ឋាភិបាលបានយកចិត្ដទុកដាក់ក្នុងការកសាងផ្លូវក្រវ៉ត់ព្រំដែនជាមួយប្រទេសវៀតណាម ឡាវ និងថៃ។ គិតមកដល់ពេលនេះយើងកសាងបានផ្លូវតាមបណ្ដោយកម្ពុជា ឡាវ វៀតណាមសន្លោះពី២០១៧ មក២០២២គឺកសាងផ្លូវបាន៦៨៨៥,៩៦គីឡូម៉ែត្រលើផែនការសរុប១០៦៩គីឡូម៉ែត្រ។ ផ្ដល់ឱកាសដល់ប្រជាពលរដ្ឋអាចចូលរួមនឹងរដ្ឋាភិបាលក្នុងការកសាងហេដ្ឋារចនាសម្ព័ន្ធនៅតាមព្រំដែន»។
យ៉ាងណា នាព្រឹកថ្ងៃទី២៧ ខែសីហានេះ អតីតនាយករដ្ឋមន្ត្រី និងជាប្រធានព្រឹទ្ធសភាបច្ចុប្បន្នលោក ហ៊ុន សែន បានបង្ហោះសារនៅលើហ្វេសប៊ុកដោយភ្ជាប់សារថា តាមរយៈមូលនិធិនេះយើងនឹងឃើញនូវស្មារតីសាមគ្គីការពារជាតិពិតប្រាកដពីសំណាក់គ្រប់មជ្ឈដ្ឋាននៃប្រជាជាតិយើង ពិសេសយើងនឹងអាចដឹងបានថាអ្នកចោទប្រកាន់ថាយើងកាត់៤ខេត្តឬច្រើនជាងនេះទៅឱ្យវៀតណាមតើពួកគេចូលលុយឬទេ។ លោកបន្ដថា ប្រសិនបើពួកគេខ្លាចបាត់ដីមែនវាជាពេលវេលាល្អសម្រាប់ការចូលរួមរបស់ពួកគេដើម្បីកសាងផ្លូវថ្នល់ ការកសាងសាលារៀនមន្ទីរពេទ្យ អណ្តូងទឹក។
លោកមានប្រសាសន៍ថា៖«ជាងនេះទៅទៀតខឿនការពារជាតិរបស់ប្រជាជនត្រូវបានពង្រឹងតាមរយៈប្រជាជនដែលនៅតាមព្រំដែនដែលជាព្រំដែនរស់ដែលរឹងមាំជាងរបងបេតុងឬដែកច្រើនជាន់និងល្អជាងការពង្រាយកងទ័ពនិងអាវុធដើម្បីការពារទៅទៀត។ សូមជនរួមជាតិចូលរួមទោះតិចក្តីច្រើនក្តីនិងជួយពិនិត្យមើលតើអ្នកចោទប្រកាន់បានចូលរួមឬទេ? នេះមិនមែនជាការដេញទាន់ជាន់កែងទេតែចង់ឱ្យជាតិខ្មែរសាមគ្គីគ្នាការពារទឹកដីប្រសិនយើងខ្លាចបាត់បង់ទឹកដី»។
ចំណែកអ្នកនាំពាក្យគណបក្សប្រជាជនកម្ពុជាលោក សុខ ឥសាន្ដ បានបញ្ជាក់ប្រាប់ពលរដ្ឋអ្នកសារព័ត៌មាននារសៀលថ្ងៃទី២៦ ខែសីហាថា រដ្ឋាភិបាលដឹកនាំដោយបក្សប្រជាជនគឺមានគោលបំណងរក្សាបូរណភាពទឹកដី និងចង់ឱ្យប្រជាពលរដ្ឋរួមចំណែកលើការកសាងហេដ្ឋារចនាសម្ព័ន្ធ។ លោកបន្ដថា សម្រាប់រដ្ឋាភិបាលតែងតែគិតគូរពីឯករាជ្យភាព និងភាពស្មោះត្រង់ដល់ពលរដ្ឋដែលបានបោះឆ្នោតឱ្យបក្សប្រជាជនដឹកនាំ។
អ្នកនាំពាក្យរូបនេះបន្ដថា៖«ផែនការអីនីមួយៗគឺមានករណីប្រើថវិការដ្ឋ ករណីខ្លះយើងប្រមូលពីសប្បុរសជនពីអ្នកដែលស្មោះស្មគ្រក្នុងការជួយ។ការប្រមូលថវិកាពីឯកជន ពីអ្នកមានលទ្ធភាពហ្នឹងជារឿងវប្បធម៌។សកម្មភាពនេះយើងប្រើជាញឹកញាប់កន្លងទៅសម្រាប់ផលប្រយោជន៍ដល់ប្រទេសជាតិ និងប្រជាជនយើង»។
ដោយឡែកសម្រាប់ប្រធានសមាគមអាដហុក លោក នី សុខា យល់ថា ការបង្កើតមូលនិធិនេះជារឿងល្អ ប៉ុន្ដែលោកនៅតែបារម្ភពីការបែងចែកថវិកាដោយគ្មានតម្លាភាពតាមរយៈជនឆ្លៀតឱកាសដែលបង្កើតឱ្យមានអំពើពុករលួយ។ លោកបារម្ភថា ផលអវិជ្ជមាននៅត្រង់ថា ជនឆ្លៀតឱកាសយកកម្មវិធីនេះដើម្បីជាខ្នងបង្អែកដើម្បីប្រព្រឹត្ដអំពើថោកទាប ប៉ុន្ដែបើគ្មានវិបត្ដិនោះទេលោកថា ជារឿងត្រឹមត្រូវ និងគាំទ្រ។
លោកថ្លែងថា៖«រឿងអភិវឌ្ឍន៍តាមព្រំដែនជារឿងចាំបាច់ដើម្បីអាចធានាបាននូវអធិបតេយ្យភាព និងបូរណភាពទឹកដី។ ប៉ុន្ដែយើងមិនអាចពឹងផ្អែកលើវិភាគទានដើម្បីជាមូលដ្ឋានធំ មូលដ្ឋានធំគឺរដ្ឋាភិបាលត្រូតែមានកញ្ចប់ជាតិត្រឹមត្រូវទើបល្អ។ ខ្ញុំយល់ថា បើអ្នកចូលរួមធំៗរកស៊ីត្រឹមត្រូវអាហ្នឹងអត់អីទេ ប៉ុន្ដែកន្លងមកយើងឃើញពួកទាំងនោះប្រើរូបភាពសប្បុរសដើម្បីយកជាខ្នងបង្អែកអាហ្នឹងគ្រោះថ្នាក់ធំសម្រាប់ពលរដ្ឋ អាហ្នឹងដែលយើងបារម្ភ»។
ប្រធានវិទ្យាស្ថានប្រជាធិតេយ្យកម្ពុជា លោកបណ្ឌិត ប៉ា ចន្ទរឿន មានប្រសាសន៍ថា វាជាសញ្ញាមួយល្អដែលលោកគាំទ្រសម្រាប់ការកសាងក្រវ៉ាត់តាមព្រំដែនក្នុងការការពារបូរណភាពទឹកដី។ លោកបន្ដជំរុញបន្ថែមថា ការគ្រប់គ្រងថវិកាដោយតម្លាភាពគ្មានអំពើពុករលួយគឺជារឿងចាំបាច់ដើម្បីកសាងទំនុកចិត្ដពលរដ្ឋ។
លោកនិយាយថា៖«វាជាចំណុចល្អក្នុងការបង្ហាញទៅកាន់ប្រជាពលរដ្ឋឱ្យបានមើលឃើញពីសកម្មភាពរដ្ឋាភិបាលលើការដឹកនាំ។ ខ្ញុំយល់ថា ការកសាងក្រវាត់ព្រំដែនជារឿងចាំបាច់ណាស់»៕
……………………………………..
អត្ថបទដោយពលរដ្ឋអ្នកសារព័ត៌មានលោក ឃាង សុខមាន
