សកម្មជនផ្សព្វផ្សាយកិច្ចព្រមព្រៀងសន្តិភាពទីក្រុងប៉ារីស បានអះអាងថា ពួកគេបានដាក់ពាក្យបណ្តឹងទៅអាជ្ញាធរថៃ ដោយស្នើឱ្យអាជ្ញាធរប្រទេសនេះរកជនដៃដល់មកផ្តន្ទាទោស ជុំវិញការប្រើប្រាស់ហិង្សាលើពួកគេអំឡុងពេលផ្សព្វផ្សាយពីច្បាប់ និងខ្លឹមសារនៃកិច្ចព្រមព្រៀងសន្តិភាពទីក្រុងប៉ារីស។
សកម្មជនផ្សព្វផ្សាយកិច្ចព្រមព្រៀងសន្តិភាពទីក្រុងប៉ារីស លោក ស្រ៊ុន ស្រ៊នថា លោកបានដាក់ពាក្យបណ្ដឹងទៅអាជ្ញាធរថៃ ជុំវិញករណីវាយប្រហារនៅប្រទេសថៃអំឡុងពេលលោកផ្សព្វផ្សាយពីសារៈសំខាន់នៃកិច្ចព្រមព្រៀងទីក្រុងប៉ារីស។ លោកថា អាជ្ញាធរថៃកំពុងបើកការស៊ើបអង្កេតស្វែងរកជនបង្ក។
លោកបានចាត់ទុកថា ការវាយលោកបែកក្បាលនេះគឺជាការធ្វើទុក្ខបុកម្នេញ និងជាការគំរាមកំហែងដល់អ្នកស្រលាញ់កិច្ចការងារសង្គម។
លោកបន្ដថា៖«ខ្ញុំបានដាក់ពាក្យបណ្ដឹងទៅអាជ្ញាធរថៃដើម្បីស្វែងរកយុត្ដិធម៌រួចហើយ ហើយគេបានដាក់មន្រ្ដីជំនាញគេរួចដែរ។ ការងារខ្ញុំនេះគឺជាប្រយោជន៍សាធារណៈ មិនមែនដើម្បីខ្លួនឯងនោះទេ។ ខ្ញុំយល់ថា សកម្មភាពនេះដើម្បីគំរាមកំហែងដល់សកម្មជនសង្គមផ្សេងទៀត»។
កាលពីល្ងាចថ្ងៃអាទិត្យទី៣១ ខែធ្នូ ឆ្នាំ២០២៣ លោក ស្រ៊ុន ស្រ៊ន នៅគ្រាដែលលោកកំពុងផ្សព្វផ្សាយផ្ទាល់លើបណ្តាញសង្គមហ្វេសប៊ុកអំពីសារៈសំខាន់នៃកិច្ចព្រមព្រៀងទីក្រុងប៉ារីស ដែលជាកិច្ចព្រមព្រៀងបញ្ចប់សង្រ្គាមនៅកម្ពុជា និងនាំកម្ពុជាមករកផ្លូវប្រជាធិបតេយ្យ ត្រូវបានជនអនាមិក៣នាក់វាយលោកបែកក្បាលក្នុងប្រទេសថៃ។
លោក ស្រ៊ុន ស្រ៊ន ដែលជាសកម្មជនផ្សព្វផ្សាយអំពីកិច្ចព្រមព្រៀងទីក្រុងប៉ារីស បានថ្លែងនៅក្នុងការឡាយនៅលើបណ្តាញសង្គមហ្វេសប៊ុកដែលមានឈ្មោះ សន្ធិសញ្ញាសន្តិភាពទីក្រុងប៉ារីសស្ដីពីកម្ពុជាថា ការវាយនេះមិនមានចេតនាសម្លាប់រូបលោកនោះទេ តែជាការសម្លុតរូបលោកនិងក្រុមការងារ មិនចង់ឱ្យបន្តផ្សព្វផ្សាយអំពីសារៈសំខាន់នៃកិច្ចព្រមព្រៀងទីក្រុងប៉ារីសទៅដល់ប្រជាជនខ្មែរដែលរស់នៅប្រទេសថៃ។
នាយកចាត់ការទូទៅនៃអង្គការលីកាដូ លោក អំ សំអាត បានថ្លែងប្រាប់ពលរដ្ឋអ្នកសារព័ត៌មានថា ករណីការវាយប្រហារសកម្មជនសន្ធិសញ្ញាសន្តិភាពទីក្រុងប៉ារីស លោក ស្រ៊ុន ស្រ៊ន នេះ គឺជាបង្ហាញថា អ្នកចូលរួម និងស្រលាញ់កិច្ចការងារហាក់លែងមានសុវត្ថិភាពហើយ។ លោកបន្តថា ប្រទេសថៃគឺជាទីតាំងដែលអង្គការសហប្រជាជាតិផ្ដល់ឱ្យពលរដ្ឋ និងសកម្មជនមួយចំនួនភៀសខ្លួន ប៉ុន្ដែពេលនេះលែងជាទីកន្លែងសុខសុវត្ថិភាពទៀតហើយ។ ការណ៍នេះលោកបន្ដថា ការវាយលោក ស្រ៊ុន ស្រ៊ន នេះ វាបង្ហាញអំពីការធ្វើទុក្ខបុកម្នេញ និងជាការរំលោភសិទ្ធិមនុស្សយ៉ាងធ្ងន់ធ្ងរដែលមិនគួរកើតមាននោះទេ។
លោក សំអាត ថ្លែងថា៖«ការគំរាមកំហែងបំភិតបំភ័យដល់ជនភៀសខ្លួនទាំងឡាយដែលស្នាក់នៅក្នុងប្រទេសថៃឬក៏ទទួលបានសិទ្ធិជ្រកកោនពី UNHCR នៅតែគ្មានសុវត្ថិភាពដែរ។ វាជារឿងមួយធ្វើទុក្ខបុកម្នេញ គំរាមកំហែងគ្រប់រូបភាពដល់ជនភៀសខ្លួន។ ខ្ញុំគិតថាប្រើការវាយដុំមិនមែនជាដំណោះស្រាយល្អសម្រាប់ដោះស្រាយបញ្ហាឡើយ»។
កន្លងមក លោក ស្រ៊ុន ស្រ៊ន ធ្លាប់ត្រូវបានអាជ្ញាធរខ្មែរឃាត់ខ្លួន និងសាកសួរនៅអធិការដ្ឋាននគរបាលក្រុងក្រចេះ អស់រយៈពេលប្រមាណ២ម៉ោងទាក់ទងនឹងការផ្សាយផ្ទាល់តាមបណ្តាញសង្គម កាលពីថ្ងៃទី ២៤ ខែឧសភា ឆ្នាំ ២០២៣ អំពីខ្លឹមសារកិច្ចព្រមព្រៀងសន្តិភាពទីក្រុងប៉ារីស។ លោកត្រូវបានដោះលែងវិញ បន្ទាប់ពីធ្វើកិច្ចសន្យាមួយនៅពេលនោះ។
មាត្រា៣១និង៤១នៃរដ្ឋធម្មនុញព្រះរាជាណាចក្រកម្ពុជា បានទទួលស្គាល់សិទ្ធិពលរដ្ឋ និងបើកទូលាយឱ្យប្រជាពលរដ្ឋគ្រប់រូប មានសិទ្ធិបញ្ចេញមតិតាមគ្រប់រូភាព កុំឱ្យតែប៉ះពាល់ដល់សិទ្ធិអ្នកដទៃ កិត្តិយស សេចក្តីថ្លៃថ្នូរអ្នកដទៃ សណ្តាប់ធ្នាប់សាធារណៈ ទំនៀមទម្លាប់ប្រពៃណីរបស់ជាតិ និងសន្តិសុខជាតិ។
ចំណែកឯលោក នី សុខា ប្រធានសមាគមអាដហុក បានលើកឡើងថា អាជ្ញាធរខ្មែរគួរតែសហការជាមួយអាជ្ញាធរថៃ ក្នុងការស្វែងរកជនដៃដល់មកដាក់ទោស ដើម្បីបង្ហាញពីតម្លាភាពសម្រាប់លោក ស្រ៊ុន ស្រ៊ន ព្រោះការវាយប្រហារនេះវាស្ដែងឱ្យឃើញពីអសមត្ថភាពរបស់អាជ្ញាធរខ្មែរ។ លោកបន្ដថា ដើម្បីឱ្យគេមើលឃើញពីសមត្ថភាពរបស់អាជ្ញាធរខ្មែរ ដូច្នេះអាជ្ញាធរត្រូវចេញដោះស្រាយ មិនមែនធ្វើមិនដឹងមិនឮនោះទេ។
លោកបន្ដថា៖«ខ្ញុំគិតថាអាជ្ញាធរខ្មែរគួរតែសហការនឹងអាជ្ញាធរថៃស្វែងរកជនដៃដល់មកដាក់ទោស បើមិនដូច្នេះទេគឺវាបង្ហាញពីអសមត្ថភាពរបស់រដ្ឋាភិបាលខ្មែរ និងគ្មានតម្លាភាព»។
ក្រៅពីលោក ស៊្រុន ស្រ៊ន ត្រូវបានវាយប្រហារនេះ កាលពីថ្ងៃទី២៩ខែធ្នូឆ្នាំ២០២៣កន្លងទៅ សកម្មជនសង្គមនិងនយោបាយខ្មែរចំនួន ៧នាក់ដែលត្រូវបានអាជ្ញាធរថៃចាប់ខ្លួននិងឃុំខ្លួន នៅមណ្ឌលឃុំឃាំងជនអន្តោប្រវេសន៍ក្នុងទីក្រុងបាងកកផងដែរ៕
…………………………………………
អត្ថបទដោយពលរដ្ឋអ្នកសារព័ត៌មាន លោក ឃាង សុខមាន
