អង្គការក្រៅរដ្ឋាភិបាលមួយដែលធ្វើការងារលើកកម្ពស់សិទ្ធិលំនៅឋាន និងសិទ្ធិមនុស្ស បានរកឃើញថា កម្ពុជាបានបន្តរំលោភសិទ្ធិមនុស្សតាមរយៈការបណ្តេញពលរដ្ឋខ្លួនឯងចេញពីលំនៅឋានទាំងបង្ខំ។
អង្គការសមាគមធាងត្នោតបានចេញរបាយការណ៍មួយកាលពីថ្ងៃទី២៥ ខែធ្នូ ឆ្នាំ២០២៣ស្ដីពី «ការបណ្ដេញចេញ សំណង និងបំណុលឆ្នាំ២០២៣»។ ក្នុងរបាយការណ៍នេះ អង្គការធាងត្នោតបានរកឃើញការបណ្តេញចេញទាំងបង្ខំមានចំនួន១២ករណី មាននៅរាជធានីភ្នំពេញ ខេត្តតាកែវ និងកណ្តាល ដោយការបណ្តាញចេញនេះ កើតឡើងចន្លោះឆ្នាំ២០១៩ដល់ឆ្នាំ២០២៣ ចំពេលមានការរីករាលដាលនៃជំងឺកូវីដ–១៩។
អង្គការសមាគមធាងត្នោតបានចាត់ទុកការបណ្ដេញចេញទាំងនេះថា ជាការរំលោភលើច្បាប់ សិទ្ធិមនុស្សអន្ដរជាតិជាពិសេសសិទ្ធិទទួលបានលំនៅឋានសមរម្យ។
អង្គការសមាគមធាងត្នោត បានរកឃើញទៀតថា ភាពមិនជាក់លាក់ នៃវិធីសាស្រ្តរបស់អាជ្ញាធរចំពោះការផ្តល់សំណងដល់ជនត្រូវបណ្តេញចេញធ្វើឱ្យមានការរំលោភសិទ្ធិមិនុស្ស ជាពិសេសទាក់ទងនឹងសិទ្ធិរបស់ប្រជាពលរដ្ឋក្នុងការទទួលបាន លំនៅឋានសមរម្យ និងសំណងគ្រប់គ្រាន់។
របាយការណ៍នេះបានឱ្យដឹងទៀតថា បុគ្គលដែលជួបប្រទះការបណ្តេញចេញដោយបង្ខំ ដោយមិនមានលំនៅឋានត្រឹមត្រូវនៅកន្លែងតាំងលំនៅថ្មី ត្រូវជំពាក់បំណុល ដែលជាហេតុនាំឱ្យខ្វះស្បៀងអាហារ ពលកម្មកុមារដោយបង្ខំ និងរំខាំនដល់ការអប់រំផងដែរ។
របាយការណ៍បន្តថា ការបន្តការលំបាកនៅកន្លែតាំងលំនៅថ្មីដោយសារតែផ្ទះសម្បែង និងសេវាសាធារណៈមិនគ្រប់គ្រាន់បានបង្កើតវដ្ត នៃបំណុលសម្រាប់ជនរងគ្រោះពីការបណ្តេញចេញដោយបង្ខំ។
សមាគមធាងត្នោតបានឱ្យដឹងថា កាលពីថ្ងៃ២៤ ខែតុលា ឆ្នាំ២០២៣ អាជ្ញាធរបានចុះរុះរើ និងបណ្តេញចេញពលរដ្ឋជាង៣០០គ្រួសារនៅសង្កាត់ព្រែកប្រា និងសង្កាត់ព្រែកថ្មី រាជធានីភ្នំពេញឱ្យទៅនៅទីតាំងថ្មីមានចម្ងាយប្រមាណ៦គីឡូពីទីតាំងចាស់។
សមាគមធាងត្នោត អះអាងថា ពលរដ្ឋដែលត្រូវបានបណ្តេញចេញទាំងបង្ខំទាំងនោះ បានត្អូញត្អែរពីផលលំបាក ក្រោយពីពួកគេផ្លាស់ប្ដូរទីលំនៅដោយគ្មានទឹកប្រើប្រាស់គ្រប់គ្រាន់ និងខ្វះភាពអនាម័យ។
របាយការណ៍៖«កាតព្វកិច្ចអន្តរជាតិរបស់កម្ពុជាក្នុងការលើកកម្ពស់សិទ្ធិមនុស្សក្នុងការមានលំនៅឋានសមរម្យ ការហាមឃាត់ការបណ្តេញចេញដោយបង្ខំ និងកំណត់ការផ្តល់កន្លែង តាំងទីលំនៅថ្មីដែលមានចែងក្នុងសិទ្ធិទទួលបានលំនៅឋានសមរម្យ។ លំនៅឋានត្រូវបានសង្កត់ធ្ងន់ថា មានសារៈសំខាន់មិនត្រឹមតែជាតម្រូវការមូលដ្ឋានប៉ុណ្ណោះទេ ប៉ុន្តែក៏សម្រាប់ការការពារ និងការលើកកម្ពស់សិទ្ធិមនុស្សដទៃទៀតផងដែរ»។
យ៉ាងណានាំពាក្យគណបក្សប្រជាជនកម្ពុជា លោក សុខ ឥសាន្ដ បានច្រានចោលរបាយការណ៍នេះ។ លោកថា របាយការណ៍នេះ គឹមិនបានឆ្លុះបញ្ចាំងពីការពិត និងបង្ហាញមូលហេតុឱ្យបានច្បាស់លាស់ឡើយ។
អ្នកនាំពាក្យរូបនេះ អះអាងថា រដ្ឋាភិបាលមិនដែលរំលោភសិទ្ធិមនុស្សនោះទេ ។ លោកថា មានតែគាំទ្រ និងការពារសិទ្ធិនៅកម្ពុជា។
លោកបានបដិសេធថា៖« សង្គមស៊ីវិលនិយាយតែពីការរំលោភ តែអត់និយាយរឿងការពារ។ ពលរដ្ឋខ្លះគាត់រស់នៅលើដីសាធារណរដ្ឋ ពេលរដ្ឋមិនទាន់ត្រូវការ គឺមិនអី ពេលរដ្ឋត្រូវការ គឺត្រូវដកហូតចឹង»។
អ្នកស្រី សឿន ស្រីសុទ្ធ វ័យ៣៤ឆ្នាំ ដែលអះអាងថា ជាតំណាងពលរដ្ឋនៅបឹងតាមោក និយាយថា គ្រួសារអ្នកស្រីក៏បានរងការបណ្តេញចេញពីលំនៅឋានទាំងបង្ខំ ក្រោមគម្រោងអភិវឌ្ឍន៍តំបន់បឹងតាមោកដែរ។ អ្នកស្រី អះអាងថា ការបណ្តេញចេញនេះ គឺអាជ្ញាធរបានប្រើហិង្សាលើពួកគាត់ ដែលធ្វើឱ្យអ្នកស្រីមានការឈឺចាប់ជាខ្លាំង។
តំណាងពលរដ្ឋរូបនេះបន្តថា ប្រជាពលរដ្ឋចង់ឱ្យអាជ្ញាធរដោះស្រាយដោយឱ្យពួកគាត់អភិវឌ្ឍន៍នៅនឹងកន្លែង និងចេញប័ណ្ណកម្មសិទ្ធិជូនពួកគាត់ដើម្បីបានបន្តរស់នៅ និងប្រកបមុខនៅទីនោះ។
អ្នកស្រីបន្ថែមថា៖«ខ្ញុំឈឺចាប់ណាស់។លុបបឹង មិនឱ្យខ្ញុំរកស៊ី ឥឡូវខ្ញុំធ្វើរោងលក់បន្លែតិចតួចគេមកធ្វើបាបខ្ញុំទៀត»។
នាយកប្រតិបត្ដិ នៃអង្គការសមាគមធាងត្នោត លោក សឿង សារ៉ន មានប្រសាសន៍បន្ថែមលើរបាយការណ៍ថា មុនចេញរបាយការណ៍មួយនេះ គឺសមាគមបានចុះស្រាវជ្រាវ និងតាមដានដោយយកចិត្ដទុកដាក់គ្រប់ករណីទាំងអស់ ជាពិសេសបញ្ហាបណ្ដេញដោយបង្ខំតែម្ដង។
លោក សឿង សារ៉ន បន្តថា ការចេញរបាយការណ៍នេះជាចំណុចមួយដែលរដ្ឋាភិបាលថ្មីគួរតែទទួលយក និងបង្កើនការគោរពសិទ្ធិមនុស្សដែលមានចែងក្នុងច្បាប់ ដើម្បីធានាបានថា កម្ពុជាក្លាយជាប្រទេសគោរពសិទ្ធិមនុស្ស និងអភិវឌ្ឍន៍។
លោកបន្ដថា៖«យើងបានស្រាវជ្រាវ និងតាមដានច្បាស់លាស់។ ការចេញរបាយការណ៍នេះ ដើម្បីឱ្យរដ្ឋាភិបាលអនុវត្ដ និងអនុលោមតាមច្បាប់ជាតិ និងអន្ដរជាតិដែលមានស្រាប់»។
ប្រធានសមាគមអាដហុកលោក នី សុខា បានគាំទ្រចំពោះរបាយការណ៍របស់អង្គការសមាគមធាងត្នោតនេះ។ លោកថា មានពលរដ្ឋជាច្រើននៅសឹងគ្រប់ខេត្ដបានរងគ្រោះពីការបណ្ដេញចេញដោយបង្ខំ និងមិនបានទទួលសំណងសមរម្យ។
លោកថា៖«រដ្ឋាភិបាលគួរតែទទួលយកនូវរបាយការណ៍នេះ ដើម្បីកែលម្អបញ្ហាប្រឈមផ្សេងៗក្នុងប្រទេសយើង។ ខ្ញុំគាំទ្ររបាយការណ៍នេះ ព្រោះវាជារឿងពិតដែលបានកើតឡើង ហើយពលរដ្ឋតែងតែរងគ្រោះពីការបណ្ដេញចេញដោយបង្ខំ»៕
………………………………………………..
អត្ថបទដោយពលរដ្ឋអ្នកសារព័ត៌មាន លោក ឃាង សុខមាន
