បណ្តាញសហគមន៍ព្រៃឡង់ អះអាងថា ដីព្រៃឡង់ជាង៣០ហិកតា ស្ថិតក្នុងឃុំរួសរាន់ ស្រុករវៀង ខេត្តព្រះវិហារ កំពុងរងការកាប់បំផ្លាញ និងទន្ទ្រានយកធ្វើកម្មសិទ្ធិដោយខុសច្បាប់ ខណៈមន្ត្រីជំនាញលើកឡើងថា ខ្លួនមិនបានដឹងករណីនេះ។
ការអះអាងនេះ ក្រោយបណ្ដាញសហគមន៍ព្រៃឡង់ខេត្តព្រះវិហារបានចុះល្បាតព្រៃឡង់រយៈពេល៤ថ្ងៃ ចាប់ពីថ្ងៃទី១ ដល់ថ្ងៃទី៤ ខែតុលា ឆ្នាំ២០២៣ ដោយបានរកឃើញការកាប់ទន្ទ្រានយកដីធ្វើជាកម្មសិទ្ធិចំនួន៣កន្លែងផ្សេងៗគ្នា ដែលមានទំហំសរុប៣៥ហិកតា។
លោក ឃុត សឿម សមាជិកបណ្តាញសហគមន៍ព្រៃឡង់ខេត្តព្រះវិហារបានឱ្យដឹងថា សកម្មភាពកាប់រានព្រៃឡង់កន្លែងទី១ស្ថិតត្រង់ចំណុចអូរអាស្រមកាប់អស់១៥ហិកតា កន្លែងទី២ស្ថិតត្រង់ចំណុចអូរចំបក់ក្អែកខាងជើងអូរគោលមានចំនួន៥ហិកតា និងទីតាំងទី៣ត្រង់ចំណុចជ្រាប់ព្រាលមានចំនួន១៥ហិកតា ដែលចំណុចទាំង៣នេះ ស្ថិតក្នុងឃុំរួសរាន់ ស្រុករវៀង ខេត្តព្រះវិហារ។
សមាជិកបណ្តាញសហគមន៍ព្រៃឡង់រូបនេះបន្តថា ក្រៅពីរកឃើញការកាប់ទន្ទ្រានយកដីព្រៃធ្វើកម្មសិទ្ធិនោះ គឺក្រុមអ្នកចុះល្បាតជួបករណីជនល្មើសបរបាញ់សត្វព្រៃចំនួន២ករណី ដោយជនល្មើសទាំងនោះបានប្រើប្រាស់អាវុធកែច្នៃចំនួន៥ដើម និងជួបប្រទះគោយន្តដឹកចំនួន២គ្រឿងផងដែរ។
យ៉ាងណាលោកថា ក្រុមអ្នកចុះល្បាតពុំទាន់បានដឹងពីមុខសញ្ញារបស់អ្នកកាប់ព្រៃនៅឡើយទេ ដោយសារពេលចុះល្បាតនោះ ក្រុមជនល្មើសបានរត់គេចខ្លួនអស់។ លោក ឃុត សឿម បានដាក់ការសង្ស័យថា ករណីកាប់ទន្ទ្រានយកដីព្រៃឡង់នោះ អាចជាបញ្ជារបស់អ្នកមានលុយមានអំណាចជួលឱ្យប្រជាពលរដ្ឋទៅកាប់ដើម្បីយកដីធ្វើកម្មសិទ្ធិ។
លោកថា៖« ពេលក្រុមខ្ញុំចុះទៅអង្កេត ល្បាត គឺជនល្មើសបានគេចខ្លួនបាត់អស់ ហាក់បីដូចជាដឹងដំណឹងមុន។ គេបន្សល់ទុកតែវត្ថុតាងមួយចំនួន ដូចជាឈើហ៊ុប កាំភ្លើងស្នប់ និងអីវ៉ាន់ខ្លះទៀត ទើបខ្ញុំសង័្សយថាក្រុមនេះធ្វើការឱ្យអ្នកមានលុយ មានអំណាច» ។
សមាជិកបណ្ដាញសហគមន៍ព្រៃឡង់ខេត្តព្រះវិហារម្នាក់ទៀត លោក ចាន់ សារិន បានបង្ហាញការព្រួយបារម្ភពីការបាត់បង់ព្រៃឈើក្នុងតំបន់ការពារព្រៃឡង់ឆាប់រហ័ស ប្រសិនបើការកាប់បំផ្លាញព្រៃឈើក្នុងតំបន់ការពារមួយនេះនៅតែបន្តកើតមាន ហើយគ្មានការយកចិត្តទុកដាក់ទប់ស្កាត់ និងចាត់វិធានការតាមផ្លូវច្បាប់ទាន់ពេលទៅលើជនល្មើសនោះ។
មួយទៀតនោះ លោក ចាន់ សារិន បានលើកឡើងថា ការបាត់បង់ព្រៃឈើនេះនឹងធ្វើឱ្យប៉ះពាល់ដល់ជម្រកសត្វព្រៃ បាត់បង់មុខរបរជនជាតិដើមភាគតិចដែលអាស្រ័យផលពីតំបន់ការពារមួយនេះ។ លោកថា បានសំណូមពរទៅដល់រដ្ឋមន្ត្រីបរិស្ថានដែលទើបឡើងថ្មីឱ្យពង្រឹងមន្ត្រីថ្នាក់ក្រោមរបស់ខ្លួនឱ្យសកម្មក្នុងការចូលរួមការពារព្រៃឈើ ដោយថា បច្ចុប្បន្នមន្ត្រីបរិស្ថានមានភាពធូររលុងក្នុងការគ្រប់គ្រងព្រៃឈើ។
លោកបន្តថា៖«ការបាត់បង់ព្រៃឈើនៅទីនេះវាមិនមែនប៉ះពាល់តែជនជាតិដើមភាគតិចនៅទីនេះទេ វាអាចធ្វើឱ្យប៉ះពាល់ដោយប្រយោលដល់មនុស្សជាតិទាំងអស់គ្នា ព្រោះព្រៃឈើវាជួយបន្សុតខ្យល់ ជួយទាញទឺកភ្លៀង ជួយទប់ស្កាត់ការបាក់ច្រោះដីជាដើម នៅមានច្រើនទៀត»។
មន្ត្រីបរិស្ថានដែលមានទីស្នាក់ការប្រចាំនៅភូមិស្រែវាល ឃុំរួសរាន់ លោក ប្រាក់ វណ្ណៈ ប្រាប់ពលរដ្ឋអ្នកសារព័ត៌មានថា លោកពុំទាន់បានដឹងហេតុការណ៍នេះនៅឡើយទេ ហើយថា តំបន់នោះក៏មិនស្ថិតក្រោមការគ្រប់គ្រងរបស់លោកដែរ។
មន្ត្រីសម្របសម្រួលសមាគមអាដហុកប្រចាំខេត្តព្រះវិហារ លោក បូ ទីតា មានប្រសាសន៍ថា លោកនឹងជួយសម្របសម្របសម្រួលរៀបចំពាក្យបណ្តឹងដោយប្តឹងករណីបទល្មើសនេះទៅអាជ្ញាធរតាមលំដាប់ថ្នាក់ដើម្បីចាត់វិធានការតាមផ្លូវច្បាប់ និងការពារព្រៃឈើក្នុងតំបន់ការពារមួយនេះឱ្យបានគង់វង្ស។
លោកបន្ថែមថា៖«វិធីសាស្ត្រល្អគឺមានតែជំរុញឱ្យតំណាងសហគមន៍ឧស្សាហ៍ចុះតាមដានឱ្យបានញឹកញាប់និងត្រូវតែមានការសហការមួយជំនាញក៏ដូចជាសមត្ថកិច្ចដើម្បីចៀសផុតពីការចោទប្រកាន់ពីអាជ្ញាធរ»។
ព្រៃឡង់ មានផ្ទៃដីជាង ៤៣ម៉ឺនហិកតា គ្របដណ្ដប់ខេត្តចំនួន៤ គឺខេត្តព្រះវិហារ កំពង់ធំ ក្រចេះ និងស្ទឹងត្រែង។ ព្រៃឡង់ ជាព្រៃធំជាងគេនៅកម្ពុជា ហើយត្រូវបានរដ្ឋាភិបាលកំណត់ជាតំបន់ដែនជម្រកសត្វព្រៃ នៅក្នុងឆ្នាំ២០១៦។
របាយការណ៍របស់អង្គការ Global Forest Watch បានឱ្យដឹងថា នៅចន្លោះពីថ្ងៃទី១៤ ខែមេសា ឆ្នាំ២០២៣ ដល់ថ្ងៃទី២១ ខែមេសា ឆ្នាំ២០២៣ ក្នុងពេលដែលប្រជាពលរដ្ឋកម្ពុជាឈប់សម្រាកក្នុងពិធីបុណ្យចូលឆ្នាំនោះគឺ មានការកាប់បំផ្លាញព្រៃឈើចំនួន ៩៥ ៤៧៨ ករណីបានកើតមានឡើងនៅក្នុងប្រទេសកម្ពុជា ដែលគ្របដណ្ដប់លើផ្ទៃដីសរុបចំនួន១១៥ហិកតា ដែលករណីនេះត្រូវបានរកឃើញដោយប្រព័ន្ធជូនដំណឹង ឬប្រព័ន្ធផ្កាយរណប៕
……………………………………….
អត្ថបទដោយពលរដ្ឋអ្នកសារព័ត៌មាន លោក នូ រ៉េន