សត្វទន្សោងញីមួយក្បាលស្ថិតនៅក្នុងព្រៃសង្ឃសហគមន៍រុក្ខាវ័ន ខេត្តឧត្តរមានជ័យ បានស្លាប់កាលពីថ្ងៃទី២៩ ខែមករា ឆ្នាំ២០២៣ ក្រោយពីក្រុមអ្នកអភិរក្សមិនអាចជួយសង្គ្រោះជីវិតបានដោយសារតែជាប់អន្ទាក់របួសធ្ងន់ធ្ងរ។
ព្រះតេជគុណ ថូ ធុរស់ ប្រធានសហគមន៏តំបន់ដែនជំរកការពារសត្វព្រៃសង្ឃរុក្ខាវ័នបានឱ្យដឹងតាមរយៈទំព័រហ្វេសប៊ុក «ព្រៃសង្ឃសហគមន៍រុក្ខាវ័ន» កាលពីថ្ងៃទី២៩ ខែមករា ថា សត្វទន្សោងនៅសង្ឃរុក្ខាវ័ន ដែលរបួសជើងផ្នែកខាងមុខទាំងពីរបានស្លាប់កាលពីវេលាម៉ោង៣ទាបភ្លឺ ថ្ងៃទី២៩ ខែមករា ដោយសារតែរបួសធ្ងន់ធ្ងរពេក។ ព្រះអង្គមានសង្ឃដីកាថា ព្រះអង្គមានការសោកស្តាយយ៉ាងខ្លាំង ចំពោះការបាត់បង់នូវប្រភេទសត្វព្រៃដ៏កម្រមួយនេះ បើទោះបីជាមានការយកចិត្តទុកដាក់ព្យាបាលពីសំណាក់ក្រុមគ្រូពេទ្យជំនាញរបស់អង្គការសម្ព័ន្ធមិត្តសត្វព្រៃមកពីភ្នំតាម៉ៅក៏ដោយ។
ព្រះអង្គមានសង្ឃដីកាថា៖ «ក្នុងនាមអាត្មាភាព យើងខ្ញុំជាអ្នកអភិរក្សគ្រប់រូប មានការសោកស្តាយយ៉ាងខ្លាំង ចំពោះការបាត់បង់នូប្រភេទសត្វមាន ដោយកម្រមួយប្រភេទនេះ»។
កាលពីថ្ងៃទី២២ ខែមករា ប្រជាពលរដ្ឋបានប្រទះឃើញសត្វទន្សោងញីមួយក្បាលជាប់អន្ទាក់នៅក្បែរចំការស្វាយចន្ទី ស្ថិតនៅខាងកើតភ្នំអណ្តូង ភូមិគោកសំពរ័ ឃុំលំទង ស្រុកអន្លង់វែង ខេត្តឧត្តរមានជ័យ។ ក្រោយទទួលព័ត៌មាននេះ គណៈកម្មការសហគមន៏បានយកសត្វទន្សោងញីមួយក្បាលនេះ មករក្សាព្យាបាលរបួសនៅស្នាក់ការកណ្តាលរបស់សហគមន៏សង្ឃរុក្ខាវ័ន ស្ថិតនៅក្នុងភូមិឈូកមាស សង្កាត់កូនក្រៀល ក្រុងសំរោង ខេត្តឧត្តរមានជ័យ រហូតមកដល់ថ្ងៃទី២៩ ខែមករា។
យោងតាមកាបញ្ជាក់របស់ក្រុមគ្រូពេទ្យ ប្រាប់ដល់មន្រ្តីឧទ្យានុរក្សថា សត្វទន្សោងញីមួយក្បាលនេះ ពួកគាត់មិនសូវមានសង្ឃឹមជួយសង្គ្រោះឱ្យរស់នោះទេ បើទោះបីជាក្រុមគ្រូពេទ្យបានចាក់ថ្នាំ និងដាក់សេរ៉ូមអស់ចំនួន ១២កំប្លោកក៏ដោយ។
ក្រុមអ្នកអភិរក្សនិងព្រះតេជគុណ ថូ ធុរស់ ប្រធានសហគមន៏តំបន់ដែនជំរកការពារសត្វព្រៃសង្ឃរុក្ខាវ័នបានយកសាកសពសត្វទន្សោងញីមួយក្បាលនេះ ទៅកប់នៅក្នុងដែនជំរកសត្វព្រៃសង្ឃរុក្ខាវ័នចប់សព្វគ្រប់ហើយ នៅព្រឹកថ្ងៃទី៣០ ខែមករានេះ ដោយមានការសូត្រធម៌ បង្សុកូលឱ្យសត្វទន្សោងញីមួយក្បាលនេះថែមទៀតផង៕
…………………..
អត្ថបទដោយពលរដ្ឋអ្នកសារព័ត៌មានលោក ប៊ុនថេត
