កង្វះគ្រូបង្រៀនធ្វើឱ្យប៉ះពាល់ការសិក្សារបស់ក្មេងៗនៅស្រុកថ្មបាំង ខេត្ដកោះកុង

ឪពុកម្ដាយនិងអាជ្ញាធរឃុំជំនាប់ ស្រុកថ្មបាំង ខេត្តកោះកុង បានសម្ដែងក្ដីកង្វល់ចិត្តអំពីអនាគតរបស់ក្មេងៗនៅក្នុងភូមិដោយសារសាលាអនុវិទ្យាល័យមួយមានតែបន្ទប់សិក្សា ប៉ុន្ដែពុំមានគ្រូបង្រៀនគ្រប់គ្រាន់។​

ពលរដ្ឋម្នាក់នៅរស់នៅភូមិច្រកឬស្សី ឃុំជំនាប់ អ្នកស្រី រាម សៅស៊ី អាយុ៣២ឆ្នាំ ប្រាប់ពលរដ្ឋអ្នកសារព័ត៌មាន CCIM ថា អ្នកស្រីបារម្ភពីការសិក្សារបស់កូនៗ និងកូនរបស់អ្នកភូមិដ៏ទៃទៀតដោយខ្លាចពួកគេរៀនមិនបានចប់ចុងចប់ដើម ព្រោះថានៅអនុវិទ្យាល័យសម្ដេចហ៊ុនសែនជំនាប់មានតែខ្នងសាលា និងថ្នាក់រៀន ប៉ុន្ដែ​ ពុំមានគ្រូបង្រៀននោះទេ។

ម្យ៉ាងទៀត អ្នកស្រីថា កូនរបស់គាត់កំពុងសិក្សានៅថ្នាក់អនុវិទ្យាល័យនេះ ប៉ុន្ដែ ពួកគេត្រូវធ្វើដំណើរផ្លូវឆ្ងាយនិងលំបាក ហើយគ្រូបង្រៀនក៏មិនមានគ្រប់គ្រាន់។

អ្នកស្រីបន្ថែមថា៖ «កូនអត់បានទៅរៀនបន្តថ្នាក់ទី៧ ទី៨ ទី៩អីទេ។ បញ្ហាមួយទៀត ពេលដែលបន្តឱ្យទៅរៀនថ្នាក់ទី៧ទី៨អីបន្តទៀត ត្រូវឱ្យកូននឹងជិះទៅមកៗពេលទៅត្រូវជិះទូកឆ្លងទូកកាត់ទឹកជន់ទឹក។ អាហ្នឹងមានផលលំបាកច្រើន មានបញ្ហាសម្រាប់ក្មេងជាពិសេលនៅរដូវប្រាំងមានឡានច្រើនម៉ូតូច្រើន និងបញ្ហាសាំងឡើងថ្លៃវាជាបញ្ហារបស់ក្មេងទៅរៀន។ សិស្សមករៀនសាលានេះមានចំនួនច្រើនមក២ឃុំ គឺឃុំជំនាប់និងឃុំក្បាលប្រឡាយ»។

នាយកសាលាអនុវិទ្យាល័យសម្ដេចហ៊ុនសែនជំនាប់ លោក អាង សេងលី មានប្រសាសន៍ថា ករណីសាលាខ្វះគ្រូបង្រៀននេះជារឿងពិត ប៉ុន្តែលោកមិនបានដឹងមូលហេតុពិតនោះទេ ព្រោះនេះជាចាត់ចែងរបស់មន្ទីរអប់រំ យុវជន និងកីឡាខេត្តកោះកុង។ ប៉ុន្ដែ លោកសន្និដ្ឋានថា អាចមកពីតំបន់នេះជាតំបន់ដាច់ស្រយាល និងមិនមានគ្រូបង្រៀនស្ម័គ្រចិត្តមកបង្រៀននៅតំបន់នេះ ខណៈចំនួនប្រជាជន និងសិស្សានុសិស្សក៏មានតិច។

លោកបន្ថែមថា៖ «ខ្វះគ្រូក៏ខ្វះហើយចំនួនសិស្សក៏មិនគ្រប់គ្រាន់ដែរ ចំនួនប្រជាជនយើងតិច។»។

មេភូមិជំនាប់ លោក ហាស ម៉ន ប្រាប់ពលរដ្ឋអ្នកសារព័ត៌មានថា ករណីសាលាខ្វះគ្រូនេះគឺជារឿងពិត ដោយកន្លងមករូបលោកក៏ធ្លាប់លើកបញ្ហានេះទៅដល់ថ្នាក់លើនៅពេលប្រជុំប្រចាំខែ ប៉ុន្ដែរកដំណោះស្រាយមិនបាន។ មេភូមិរូបនេះក៏បារម្ភពីអនាគតកូនរបស់លោក និងក្មេងៗនៅក្នុងភូមិផងដែរ ព្រោះពួកគេត្រូវការអប់រំជាចាំបាច់។

លោកបន្ថែមថា៖ «ខ្វះមែនលោកពូមកពីអាជ្ញាធរដែលអត់សូវយល់។ អាជ្ញាធរមូលដ្ឋានអត់យកចិត្ដទុកដាក់ចាប់ពីក្រោមឡើងទៅលើ»។

អភិបាលខេត្តកោះកុងលោកស្រី មិថុនា ភូថង ប្រាប់ពលរដ្ឋអ្នកសារព័ត៌មានថា លោកស្រីមិនបានដឹងរឿងនេះទេតែយ៉ាងណាលោកស្រីនិងឆែកមើលករណីនេះជាមួយមន្ទីរអប់រំខេត្ដដើម្បីដោះស្រាយបញ្ហានេះ។

លោកស្រីប្ដថា៖ «ខ្ញុំពិភាក្សាជាមួយមន្ទីរអប់រំដើម្បីចាត់ចែងការងារនេះអាច ចលត់គ្រូឬក៏ត្រូវសុំ(គ្រូ) ក្របខណ្ឌបន្ថែមទៅតាមខាងក្រសួងនិងមន្ទីរ»។

នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី លើកឡើងថា កខ្វះគ្រូបង្រៀននៅតាមសាលារៀនអាចធ្វើឱ្យកុមារ និងយុវជនបាត់បង់ឱកាសក្នុងការអប់រំដែលមានគុណភាព ដែលវាជាសិទ្ធិត្រូវបានធានាដោយរដ្ឋធម្មនុញ្ញកម្ពុជាដែលធានថា កុមារា និងយុវជនទាំងពីរភេទមានសិទ្ធិទទួលបាននៅការអប់រំដោយស្មើភាពគ្នា។

លោកថា មូលហេតុចំនួនគ្រូបង្រៀននៅទីជនបទមានចំនួនតិច ឬមិនគ្រប់គ្រាន់ គឺមកពីគ្រូបង្រៀនខ្លះមិនអាចទ្រាំទ្របង្រៀននៅតំបន់ជនបទបានយូរនិងចង់ផ្លាស់ប្ដូរទៅទីក្រុងវិញ ដែលបញ្ហានេះទាមទារយន្ដការច្បាស់លាស់ពីរដ្ឋាភិបាល និងការគាំទ្រផ្សេងៗទៀតដល់ក្រុមគ្រូបង្រៀនផងដែរ។

លោកបន្ថែមថា៖ «លោកគ្រូអ្នកគ្រូខ្លះគាត់ត្រូវបានបញ្ជូនទៅបង្រៀននៅតាមទីជនបទឆ្ងាយៗ ភាគច្រើនគាត់ទៅតែមួយរយៈប៉ុណ្ណោះ ហើយព្យាយាមផ្លាស់មកទីប្រជុំជនវិញ។ បញ្ហានេះកើតឡើងជាច្រើនករណីបើតាមខ្ញុំបានដឹង យើងដឹងថាមូលហេតុអ្វីបានគាត់ចង់ផ្លាស់ប្ដូរមកទីក្រុងហើយហេតុផលនេះធ្វើឱ្យទីជនបទដាច់ស្រយាលខ្វះគ្រូទៅវិញ។ ខ្ញុំគិតថា ប្រាក់ខែតែមានមុខប្រហែលពិបាកជួយជ្រោមជ្រែងគាត់ ព្រោះគាត់ទៅតំបន់ឆ្ងាយបែកពីគ្រួសារគាត់ត្រូវចំណាយច្រើនក្នុងការធ្វើដំណើរចេញចូល»។

លោក ប៉ិច ពិសី បន្ដថា ការខ្វះគ្រូឬខ្វះយន្តការរៀបចំអាចធ្វើឱ្យកុមារនិងយុវជនបាត់បង់សិទ្ធិនិងបាត់បង់ឱកាសសំរាប់កសាងអនាគតខ្លួនឯងនិងគ្រួសារនាពេលអនាគត៕

———————————

ពលរដ្ឋអ្នកសារព័ត៌មាន CCIM លោក សួន​ វុត្ថា