ស្រូវប្រាំងរាប់រយហិកតារបស់ប្រជាកសិករ នៅឃុំបាក់ចិញ្ចៀន ស្រុកភ្នំក្រវាញ ខេត្តពោធិ៍សាត់ ប្រឈមនឹងការខូចខាតដោយសារពុំមានទឹកស្រោចស្រពគ្រាប់គ្រាន់។
អ្នកស្រី សំ នូន កសិករនៅភូមិអូររំចង់ ឃុំបាក់ចិញ្ចៀន ប្រាប់ពលរដ្ឋអ្នកសារព័ត៌មានថា កាលពីសប្តាហ៍មុនថា ស្រូវប្រាំងរបស់គាត់ជាង១ហិកតាត្រូវបានបោះបង់ចោល ដោយសារពុំមានទឹកគ្រប់គ្រាន់ ខណៈប្រឡាយទឹកនៅតំបន់ជុំវិញនោះក៏កំពុងគ្មានទឹកឬរីងស្ងួត។
កសិករវ័យជាង៥០ឆ្នាំរូបនេះឱ្យដឹងថា គ្រួសារអ្នកស្រីបានចំណាយដើមទុនជាង១លានរៀលដើម្បីបង្កបង្កើនផល ដោយទិញពូជ ជី និងភ្ជួររាស់ជាដើម។
ជុំវិញបញ្ហាខ្វះទឹកនេះ អ្នកស្រីបានអំពាវនាវដល់អាជ្ញាធរជួយធ្វើប្រឡាយទឹកមួយខ្សែរប្រវែង៥០០០ម៉ែត្រពីមាត់ស្ទឹង ត្រង់ចំណុចកោះថាស់ ដើម្បីឱ្យប្រជាកសិករអាចយកទឹកស្ទឹងមកប្រើប្រាស់ស្រោចស្របផលដំណាំបាន ដោយថា ស្ទឹងមិនចេះរីងស្ងួតដូចជាបឹងឡើយ។
អ្នកស្រីបន្ថែមថា៖« ទោះបីខ្ញុំហើយនិងអ្នកភូមិគាត់ព្យាយាម សុំឲ្យគេបង្ហូរទឹកពីលើទម្លាក់មកក្រោមដើម្បីបូមចូលស្រែយ៉ាងណាក៏ដោយ ក៏ពុំមានទឹកសម្រាប់បូមដែរ ព្រោះអីអ្នកខាងលើគេស្ទាក់បូមអស់។ ហើយពួកខ្ញុំទៅសុំគេឱ្យបង្ហូរទឹកទម្លាក់មកទៀត។ គេឈប់បង្ហូរហើយ។ គេប្រាប់ថា ទំនប់បឹងគេជាកន្លែងអភិរក្សសត្វស្លាប និងមច្ឆា បើហូរទៀតគឺអស់ទឹកក្នុងបឹង»។
កសិករម្នាក់ទៀតអ្នកស្រី ផុន ភី នៅភូមិអូរឬស្សី ឃុំបាក់ចិញ្ចៀន និយាយថា គ្រួសារគាត់ធ្វើស្រែប្រាំង៣ហិកតា ដោយបច្ចុប្បន្នគ្មានទឹកសម្រាប់ស្រោចស្រពឡើយ និងកំពុងប្រឈមនឹងការបោះចោលផងដែរ ខណៈបឹងព្រះពន្លៃដែលជាប្រភពទឹកស្រោចស្រពត្រូវបានអាជ្ញាធរហាមឃាត់មិនឱ្យនាំទឹកចេញច្រើន ដើម្បីអភិរក្សត្រី និងសត្វ។
អ្នកស្រី ផុន ភី បន្តថា អ្នកស្រី និងអ្នកភូមិផ្សេងទៀត បានទៅសុំបង្ហូរទឹកពីបឹងព្រះពន្លៃដែរ ប៉ុន្តែរាល់ការបង្ហូរទឹកមកនោះគឺទឹកមិនបានហូរមកដល់ភូមិគាត់ឡើយ ដោយសារផ្នែកខាងលើគេបូមបញ្ចូលស្រែគេអស់ដែរ ។
អ្នកស្រីប្រាប់ថា៖«ខ្ញុំសុខចិត្តទិញទឹកឡានគេយកមកស្រោចស្រពក្រែងបានដើមវិញខ្លះ ដោយក្នុងមួយឡាន មានតម្លៃពីរម៉ឺនប្រាំពាន់រៀលមានចំណុះបីពាន់លីត្រ ហើយក្នុងទំហំចិតសិបអានោះស្រោចស្រពម្ដងគឺប្រហែលជាដប់ទៅដប់ប្រាំឡាន ចំណែកស្រូវជាងពីរហិកតាទៀតប្រហែលចោលហើយ ទប់មិនឈ្នះទេ»។
លោក មិត្ត យឿន នៅភូមិកំពង់ខ្ទុំ ឃុំបាក់ចិញ្ចៀន ដែលកំពុងបូមសម្រេងទឹកនៅបាតប្រឡាយមកស្រោយដំណាំស្រូវ និយាយថា ដោយគ្មានស្រោចស្រពគ្រាន់គឺកសិករខ្លះបានទឹកដឹកតាមឡានមកស្រោចស្រពដំណាំស្រូវ ដោយបានចំណាយថវិកាជាច្រើនផងដែរ។
លោក មិត្ត យឿន បានអំពាវនាវដល់អាជ្ញាធរស្រុក និងខេត្តឱ្យចុះពិនិត្យ និងដោះស្រាយបញ្ហាខ្វះទឹកជូនពួកគាត់ ដោយថា ស្រូវប្រាំងរបស់ពួកគាត់កំពុងប្រឈមនឹងការខូចខាតទាំងស្រុងហើយ។ លោកថា គ្រួសារលោកបានចំណាយដើមទុកជិត៤លានរៀន ដើម្បីធ្វើស្រែប្រាំងជាង៣ហិកតា។
លោកបានឲ្យដឹងថា៖«ខ្ញុំធ្វើស្រែប្រាំងជាងបីហិកតា ហើយឥឡូវខ្ញុំបោះបង់ចោលស្រែបីហិកតា នៅសល់ដីជាងកន្លះហិកតា គឺខ្ញុំខំបូមសម្រេងតាមបាតប្រឡាយដើម្បីយកទៅស្រោចស្រពក្រែកបានសល់ពូជបន្តធ្វើទៅឆ្នាំមុខទៀត»។
មេឃុំបាក់ចិញ្ចៀនលោក ជួប ឌិន មានប្រសាសន៍ថា នៅក្នុងឃុំរបស់លោក មានភូមិចំនួន៩ ហើយមានកសិករបង្កបង្កើនផលធ្វើស្រែប្រាំងប្រមាណ៩៥០ហិកតា ប៉ុន្តែលោកថា ស្រូវដែលខូចខាតប្រហែល៥០ភាគរយ។
មេឃុំរូបនេះ អះអាងថា មុនពេលធ្វើស្រែ គឺរដ្ឋបាលឃុំបានផ្សព្វផ្សាយឱ្យប្រជាពលរដ្ឋប្រុងប្រយ័ត្នចំពោះការធ្វើស្រែប្រាំងនេះផងដែរ ដោយកុំឱ្យធ្វើឆ្ងាយពីប្រភពទឹក ដើម្បីជៀសវាងការខាតបង់ថវិកា។
លោកបន្ថែមថា៖«ខ្ញុំបានប្រាប់ពលរដ្ឋថាការធ្វើស្រែប្រាំងមើលប្រភពទឺកផង ប្រយ័ត្នពេលអត់ទឹកអីមកបន្ទោសឃុំ ឃុំមិនដឹងរកទឹកឯណាបានទេ កុំឱ្យមកបន្ទោសឃុំ»។
លោកមេឃុំបញ្ជាក់បន្ថែមថា នៅឆ្នាំ២០២៤នេះ ប្រជាកសិករបានសម្រុកធ្វើស្រែប្រាំងច្រើនជាងឆ្នាំមុន ដែលបណ្តាលឱ្យខ្វះទឹកសម្រាប់ស្រោចស្រព។
ចំពោះសំណូមពររបស់ប្រជាពលរដ្ឋសុំឱ្យកាយប្រឡាយមួយខ្សែពីមាត់ស្ទឹងតម្រង់ទៅតំបន់ស្រែពួកគេនោះ មេឃុំ ជួប ឌិន និយាយថា ប្រហែលមិនអាចធ្វើបាននោះទេ ដោយសារប៉ះពាល់លើដីឯកជនច្រើនពេក ប៉ុន្តែលោកថា ប្រសិនបើមានការយល់ព្រមបរិច្ចាកដីពីម្ចាស់ដីនោះរដ្ឋបាលឃុំនឹងពិចារណាធ្វើ។
គួររំឭកដែរថាកាលពីថ្ងៃទី៣ ខែមករា ឆ្នាំ២០២៤ រដ្ឋបាលខេត្តពោធិ៍សាត់ បានចេញសេចក្ដីណែនាំស្ដីពីការផ្អាកការងារបង្កបង្កើនផល ស្រូវរដូវប្រាំងជាលើកទីពីរ ក្រោមហេតុផលពុំមានទឹកស្រោចស្រពគ្រាប់គ្រាន់ដល់ផលដំណាំកសិករ។
រដ្ឋបាលខេត្តពោធិ៍សាត់បញ្ជាក់ថា ក្នុងឆ្នាំ២០២៤នេះ មន្ទីរធនធានទឹក និងឧតុនិយមខេត្ត ផ្គត់ផ្គង់ទឹកជូនប្រជាកសិករបានត្រឹមតែ ២០ ០០០ហិកតាប៉ុណ្ណោះ ប៉ុន្តែតាមចុះពិនិត្យជាក់ស្តែង គឺការបង្កបង្កើនផលរបស់កសិករយើងបានកើនឡើងរហូតដល់ ៤៦ ៣៤១ ហិកតា ដែលចំនួនកើនឡើងលើសផែនការប្រើប្រាស់ទឹក ២៦ ៣៤១ហិកតា។
រដ្ឋបាលខេត្តពោធិ៍សាត់ បានណែនាំដល់ប្រជាកសិករដែលកំពុងបង្កបង្កើនផលស្រូវប្រាំងនៅឆ្នាំ២០២៤នេះ គឺត្រូវត្រៀមលក្ខណៈស្តុកទឹកទុក ដើម្បីប្រើប្រាស់ ឬដោះស្រាយបញ្ហា ហើយថា ក្នុងករណីប្រជាកសិករមិនគោរពតាមគឺរដ្ឋបាលខេត្តនេះមិនទទួលខុសត្រូវលើកការខ្វះខាតទឹកស្រោចស្រព ឬការខាតបង់ថវិកាឡើយ៕
……………………………………………
អត្ថបទដោយពលរដ្ឋអ្នកសារព័ត៌មាន លោក នូ រ៉េន
