ពលរដ្ឋរស់នៅឃុំស្ទឹងកែវ ស្រុកទឹកឈូ ខេត្តកំពត បង្ហាញការភិតភ័យ និងសុវត្ថិភាព បន្ទាប់អាជ្ញាធរខេត្តនេះដឹកសាកសពអ្នកស្លាប់ដោយជំងឺកូវីដ-១៩ ទៅបញ្ចុះនៅក្បែរតំបន់សហគមន៍ពួកគេរស់នៅ។
ពលរដ្ឋម្នាក់រស់នៅភូមិកំពង់ចិន ឃុំស្ទឹងកែវ ស្រុកទឹកឈូ លោក អ៊ុក នឿន ប្រាប់ពលរដ្ឋអ្នកសារព័ត៌មាន CCIM ថា លោកសង្កេតឃើញឡានពេទ្យដឹកសាពសពមកបញ្ចុះ ឬកប់នៅតំបន់របស់គាត់រស់នៅជាញឹកញាប់ ដោយថា ការបញ្ចុះសពនៅទីតាំងក្បែរផ្ទះសម្បែងរបស់ពួកគាត់រស់នៅនេះ អាចបង្កផលប៉ះពាល់ដល់ប្រភពទឹក ដែលពួកគាត់ប្រើប្រាស់។
ម្យ៉ាងទៀត លោកថា ពលរដ្ឋមានការភ័យខ្លាចនៅពេលឡានពេទ្យចេញចូលភូមិរបស់ពួកគេ ហើយលោកស្នើសុំឱ្យប្ដូរទីតាំងទៅតំបន់ផ្សេងវិញ។
លោកបន្ដថា៖ «ម្ដុំនេះជិតប្រភពទឹកដែលហូរទៅអូរ ហើយនៅតាមបណ្ដោយអូរ សុទ្ធតែអណ្ដូងប្រើប្រាស់ទឹកហូបរបស់ពលរដ្ឌ ជិតផ្លូវក៏ជិត ផ្ទះក៏ជិតដែរ។ ហេតុអ្វីមិនរកទីតាំងណាឆ្ងាយពីផ្ទះប្រជាពលរដ្ឋបន្តិច ថ្ងៃក្រោយមានប៉ះពាល់កម្រិតណាណា គ្មាននរណាស្មានដល់ឡើយ។ បើសិនជំងឺកូវីដ-១៩នេះ ជ្រួលជ្រាបសាយភាយឆ្លងដល់ពលរដ្ឋក្នុងតំបន់នេះ តើទៅជាយ៉ាងណាទៅ កន្លែងនេះជាកន្លែងស្មៅចិញ្ចឹមគោក្របីដកផ្សិតនិងប្រមូលបន្លែព្រៃរបស់ប្រជាពលរដ្ឋទៀតផង»។
មេភូមិកំពង់ចិន លោក នួន វឿន ស្នើឱ្យពលរដ្ឋក្នុងភូមិកុំមានការព្រួយបារម្ភ ដោយថា ការដឹកជញ្ជូន និងបញ្ចុះសពអ្នកកើតជំងឺកូវីដ-១៩នេះ គឺរៀបចំត្រឹមត្រូវតាមស្ដង់ដាបច្ចេកទេស និងមិនបង្កការឆ្លងដល់ពលរដ្ឋឡើយ។
លោកបន្ថែមថា ដើម្បីចូលរួមការពារកុំឱ្យមានការឆ្លងរីករាលដាលជំងឺកូវីដ-១៩ ពលរដ្ឋត្រូវចៀសវាងការជួបជុំ និងប្រមូលផ្ដុំគ្នាច្រើន ពិសេសអនុវត្តតាមការណែនាំរបស់ក្រសួងសុខាភិបាល។
លោកបន្ដថា៖ «សពដែលស្លាប់ដោយសារជំងឺកូវីដ-១៩នេះ អ្នករៀបចំបានធ្វើតាមលក្ខណបច្ចេកទេសត្រឹមត្រូវ បិទស្កុតទាំងក្នុងនិងក្រៅមឈ្ឈូស។ បើពលរដ្ឋខ្លាចឆ្លងជំងឺកូវីដ-១៩ គួរតែប្រយត្ន័ខាងក្រៅ តាមតូប កន្លែងផឹកស៊ីជួបជុំនានាវិញ។ បើបងប្អូនមិនបានមកជិតទេ សូមកុំព្រួយបារម្ភ ខ្ញុំនៅទីនេះផ្ទាល់នៅតាមដានយ៉ាងយកចិត្តទុកដាក់ចំពោះការរៀបចំសពនេះ»។
មន្រ្ដីការិយាល័យច្រកចេញចូលតែមួយខេត្តកំពត លោក មុំ សារាវុធ ប្រាប់ CCIM ថា អាជ្ញាធរខេត្តនេះបានរៀបចំទីតាំងទុកដាក់សាកសពអ្នកស្លាប់ដោយជំងឺកូវីដ-១៩ នៅលើទីទំហំជាង ៥ហិកតា សម្រាប់សាកសពទាំងខ្មែរ និងខ្មែរអ៊ីស្លាម ដោយពុំរើសអើងជាតិសាសន៍ឡើយ។
លោកថា ក្រោយមានបញ្ជាពីថ្នាក់លើ និងមើលឃើញពីចំនួនអ្នកស្លាប់ដោយជំងឺកូវីដ-១៩កាន់តែច្រើននេះ វាជាការចាំបាច់ដែលត្រូវរកទីតាំងសម្រាប់បូជា និងបង្ការការឆ្លងជំងឺនេះទៅមនុស្សផ្សេងទៀត។
លោកបន្ដថា៖ «កន្លែងទុកដាក់សពគឺទុកដាក់យ៉ាងត្រឹមត្រូវបើប្រហែសមិនបានទេ ព្រោះជំងឺនេះវាសាយភាយមិនអាចយកទៅក្បែរប្រជាពលរដ្ឌគឺគម្លាតឆ្ងាយ ទីតាំងដែលត្រូវទុកដាក់បញ្ចុះសពនេះ។ យើងរៀបចំស៊ីញ៉េឯកសារទាំងថ្នាក់ស្រុកនិងថ្នាក់ខេត្តរៀបចំមួយកំផ្លេរ។ ការទុកដាក់មិនរើសអើងជាតិសាសន៍នោះទេ រស់ក្នុងប្រទេសតែមួយ»។
សេចក្ដីជូនដំណឹងរបស់រដ្ឋបាលខេត្តកំពតឱ្យដឹងថា គិតត្រឹមថ្ងៃទី០១ កក្កដា ឆ្នាំ២០២១ ខេត្តកំពតរកឃើញអ្នកកើតជំងឺកូវីដ-១៩ សរុប ១៦២៥នាក់ ក្នុងនោះ កំពុងសម្រាកព្យាបាលចំនួន ៦៨២នាក់ និងជាស្បះស្បើយចំនួន ៩៥៣នាក់ និងស្លាប់១៧នាក់៕
_________________________________________________________________________
ពលរដ្ឋអ្នកសារព័ត៌មានខេត្តកំពត លោក អ៊ុំ វិចិត្រ
