សង្គមស៊ីវិលបានបង្ហាញការសោកស្តាយចំពោះការដាក់ពាក្យប្តឹងលោក ស៊ឹង សែនករុណា ដែលជាអនុប្រធានសមាគមការពារសិទ្ធិមនុស្សអាដហុក (Adhoc)ពីសំណាក់គណបក្សកាន់អំណាច។
យោងតាមពាក្យបណ្ដឹងរបស់សហមេធាវីតំណាងគណបក្សប្រជាជនកម្ពុជាបានប្ដឹង លោក ស៊ឹង សែនករុណា ជុំវិញរឿងដែលលោកបានផ្ដល់បទសម្ភាសន៍ឱ្យសារព័ត៌មានខេមបូឌា ដេលី កាលពីថ្ងៃទី២ ខែកុម្ភៈ ឆ្នាំ២០២៤ ពាក់ព័ន្ធការប្រកាសលក់ផ្ទះចុងក្រោយរបស់ លោក សុន ឆ័យ អតីតអនុប្រធានគណបក្សភ្លើងទៀន ដើម្បីសងជំងឺចិត្តទៅបក្សកាន់អំណាចជាង១លានដុល្លារ។
ក្នុងការអត្ថាធិប្បាយនោះ ត្រូវបានប្រធានគណបក្សប្រជាជនកម្ពុជាលោក ហ៊ុន សែន បានលើកឡើងលើទំព័រហ្វេសប៊ុករបស់លោកកាលពីថ្ងៃទី៤ខែកុម្ភៈ ដោយបញ្ជាឱ្យមេធាវីសិក្សាលើមូលដ្ឋានច្បាប់ដើម្បីប្តឹងមន្ត្រីជាន់ខ្ពស់សមាគមអាដហុករូបនេះថែមទៀតផង។ លោកបន្ថែមថា អំណេះតទៅគ្មានការយោគយល់ចំពោះជនណាដែលបានវាយប្រហារឬប្រមាថលើគណបក្សកាន់អំណាចទៀតនោះឡើយ។
ក្នុងលិខិតពាក្យបណ្តឹងរបស់សហមេធាវីតំណាងបក្សកាន់អំណាចកាលពីថ្ងៃទី៥ ខែកុម្ភៈ ឆ្នាំ២០២៤ បានប្ដឹងលោក ស៊ឹង សែនករុណា ពីបទ«អំពើបង្កចលាចល ញុះញង់បង្កើតឱ្យមានការស្អប់រើសអើងចំពោះ គណបក្សប្រជាជន និងមានចេតនាធ្វើឱ្យប៉ះពាល់ដល់ការបោះឆ្នោតជ្រើសរើសតាំងសមាជិកព្រឹទ្ធសភានីតិកាលទី៥ ដែលប្រព្រឹត្ដទៅខែកុម្ភៈឆ្នាំ២០២៤»។
ក្នុងពាក្យបណ្ដឹងដដែល សហមេធាវីតំណាងឱ្យគណបក្សប្រជាជនកម្ពុជា ស្នើឱ្យតុលាការពិនិត្យសម្រេចចោទប្រកាន់ និងផ្ដន្ទាទោសលើឈ្មោះ ស៊ឹង សែនករុណា តាមច្បាប់ និងទាមទារឱ្យលោក សងជំងឺចិត្តគណបក្សប្រជាជនកម្ពុជាចំនួនពីរពាន់លានរៀល(២០០០.០០០.០០០)ឬប្រមាណ៥០ម៉ឺនដុល្លារ។
ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា បានឱ្យពលរដ្ឋអ្នកសារព័ត៌មានដឹងនៅព្រឹកថ្ងៃអង្គារ៍ថា លោកមិនអាចធ្វើការអត្ថាធិប្បាយបានទេជុំវិញរឿងនេះ ដោយលោកថា លោកសុំរក្សាស្ងៀមស្ងាត់ និងកំពុងតែដោះស្រាយលើបញ្ហានេះ។
លោកថ្លែងថា៖«ពូអត់អាចនិយាយបានទេពេលនេះ។ ពូសុំផ្អាកមួយរយៈសិន ព្រោះរឿងកំពុងក្ដៅ»។
មាត្រា ៣១ និង ៤១នៃរដ្ឋធម្មនុញព្រះរាជាណាចក្រកម្ពុជា បានទទួលស្គាល់សិទ្ធិពលរដ្ឋ និងបើកទូលាយឱ្យប្រជាពលរដ្ឋគ្រប់រូប មានសិទ្ធិបញ្ចេញមតិតាមគ្រប់រូភាព កុំឱ្យតែប៉ះពាល់ដល់សិទ្ធិអ្នកដទៃ កិត្តិយស សេចក្តីថ្លៃថ្នូរអ្នកដទៃ សណ្តាប់ធ្នាប់សាធារណៈ ទំនៀមទម្លាប់ប្រពៃណីរបស់ជាតិ និងសន្តិសុខជាតិ។
ចំណែកឯនាយកទទួលបន្ទុកកិច្ចការទូទៅនៃអង្គការលីកាដូ លោក អំ សំអាត បានបញ្ជាក់ថា លោកមានការសោកស្ដាយជុំវិញរឿងដាក់ពាក្យបណ្ដឹងរបស់គណបក្សប្រជាជនលើលោក ស៊ឹង សែនកុណា។ លោកថា បើមើលលើសកម្មភាពរបស់លោក ស៊ឹង សែនករុណា ជាង២០ឆ្នាំមកនេះលោកធ្វើការលើវិស័យសិទ្ធិមនុស្ស ក្នុងការលើកកម្ពស់សិទ្ធិសេរីភាពជាមូលដ្ឋានដែលមានក្នុងប្រទេសកម្ពុជា។ លោកបន្ដថ្លែងថា សម្រាប់លោក ស៊ឹង សែនករុណា តែងតែផ្ដល់បទសម្ភាសន៍ផ្សេងៗដល់សារព័ត៌មានដើម្បីលើកកម្ពស់ដល់សិទ្ធិសេរីភាពបញ្ចេញមតិ។
លោកថា៖«ចុងក្រោយលោក[ស៊ឹង សែនករុណា]ត្រូវបានទទួលនូវបញ្ហាដែលបានកើតឡើងយើងពិតជាមានការសោកស្ដាយ»។
កាលពីថ្ងៃទី២ ខែកុម្ភៈ សារព័ត៌មាន ឌឹខេមបូឌាដេលីខ្មែរ បានចុះផ្សាយអត្ថបទមួយដោយដកស្រង់សម្តីរបស់លោក ស៊ឹង សែនករុណា ដែលនិយាយថា វិវាទរបស់អ្នកនយោបាយគួរបញ្ចប់ដោយនយោបាយ មិនគួរប្រើប្រព័ន្ធតុលាការមកដោះស្រាយទេ។ ប្រភពដដែលបានដកស្រង់សម្តីប្រភពទៀតថា គណបក្សកាន់អំណាច តែងតែយកតុលាការមកប្រើដើម្បីគាបសង្កត់ដៃគូនយោបាយប្រឆាំងរបស់ខ្លួន ហើយវិធីនេះលោកថា គួរតែបញ្ឈប់ដើម្បីជាគំរូសម្រាប់អ្នកនយោបាយជំនាន់ក្រោយ។
លោក ស៊ឹង សែនករុណា លើគណនីហ្វេសប៊ុកផ្ទាល់កាលពីថ្ងៃទី៥ ខែកុម្ភៈ បានសរសេរថាបេសកម្ម សកម្មភាព និងការផ្តល់បទសម្ភាសន៍ របស់លោកធ្វើឡើងក្នុងបំណងពង្រឹងការគោរព សិទ្ធិមនុស្ស ច្បាប់ យុត្តិធម៌សង្គម និងប្រជាធិបតេយ្យ ដោយមិនបម្រើបក្សនយោបាយណាមួយនោះទេ ហើយក៏គ្មានចេតនាណាមួយវាយប្រហារបក្សនយោបាយណាមួយឡើយ។ លោកបន្តថា៖ «រាល់ការសម្រង់សម្តីរបស់ខ្ញុំ ទៅបន្ថែមបន្ថយបញ្ចេញបញ្ចូលវាយប្រហារចំៗលើឈ្មោះបក្សនយោបាយណាមួយនោះវាមិនមែនជាចេតនា និងគោលបំណងរបស់ខ្ញុំនោះទេ ដូច្នេះខ្ញុំមិនទទួលស្គាល់ឡើយ»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន្ដ បានថ្លែងបញ្ជាក់ថា ការដាក់ពាក្យបណ្ដឹងនេះដោយសារតែគណបក្សលោកបានរងការវាយប្រហារជាខ្លាំងរបស់គណបក្សប្រឆាំង និងអង្គការសង្គមស៊ីវិលមួយចំនួនដែលបានចោទគណបក្សលោកថា ជាអ្នករំលោភសិទ្ធិមនុស្ស និងជាអ្នកលួចសន្លឹកឆ្នោត។ លោកបន្ដថា ការដាក់ពាក្យបណ្ដឹងនេះដើម្បីបង្ហាញដល់ពលរដ្ឋថា គណបក្សប្រជាជនក៏ត្រូវមានសិទ្ធិសេរីក្នុងការបញ្ចេញមតិដូចអ្នកផ្សេងដែរ។
អ្នកនាំពាក្យរូបនេះបន្ដថា ៖«ការមានមតិរបស់គាត់វាប៉ះពាល់សិទ្ធិអ្នកដទៃ។ក្នុងនាមជាអ្នកទទួលរងនូវការវាយប្រហារដោយអយុត្ដិធម៌ និងទុច្ចរិតនេះគឺថាគណបក្សប្រជាជនត្រូវតែបញ្ជាក់ជូនសាធារណជនមិនដូចគណបក្សប្រឆាំង ឬសង្គមស៊ីវិលមួយចំនួនវាយប្រហារទេ»។
លោកបន្ថែមថា៖«មានតែដោះស្រាយតាមផ្លូវតុលាការដើម្បីរកយុត្ដិធម៌ឱ្យគណបក្សប្រជាជន។បើមិនដោះស្រាយតាមប្រព័ន្ធតុលាការគណបក្សប្រជាជននៅតែរងនូវភាពអយុត្ដិធម៌»។
លោក សឹង សែនករុណា បច្ចុប្បន្នជាអនុប្រធាន និងជាអ្នកនាំពាក្យរបស់សមាគមអាដហុក កន្លងមកលោកតែងតែព្យាយាមតាមដាន និងសង្កេតការលើបញ្ហាសិទ្ធិមនុស្ស និងការរំលោភផ្សេងៗ។ មុនពេលបម្រើការងារនៅសមាគមអាដហុក លោក ក៏ធ្លាប់ជាមន្ត្រីនៃអង្គការការពារសិទ្ធិមនុស្សលីកាដូផងដែរ។
នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព លើកឡើងថា សកម្មជនអ្នកការពារសិទ្ធិមនុស្សតួយ៉ាងដូចលោក ស៊ឹង សែនករុណា តែងតែប្រកាន់ខ្ជាប់វិជ្ជាជីវៈ និងបំពេញបេសកម្មការងាររបស់ខ្លួនដោយឥតរួញរា។ បន្ថែមពីនេះ លោកចំណាយពេលវេលានៅមូលដ្ឋាន សង្កេតការណ៍គ្រប់ករណី និងចូលរួមយ៉ាងសកម្មជាមួយសហគមន៍នានា។
អ្នកស្រី សង្ឃឹមថា តុលាការនឹងឈរលើមូលដ្ឋានយុត្តិធម៌លើករណីលោក ករុណា និងអំពាវនាវឱ្យមានការយោគយល់ ដោយធានា និងការពារដល់ការបំពេញតួនាទីរបស់តួអង្គសង្គមស៊ីវិល ដែលមានទស្សនវិស័យចូលរួមធានាលើកកម្ពស់សិទ្ធិសេរីភាពមូលដ្ឋានដែលប្រទេសកម្ពុជាបានទទួលស្គាល់៕
………………………………………………
អត្ថបទដោយពលរដ្ឋអ្នកសារព័ត៌មាន លោក ឃាង សុខមាន
