សកម្មភាពក្រុមជនល្មើសដែលចូលទៅកាប់បំផ្លាញព្រៃឈើនៅតំបន់ព្រៃអចិន្ត្រៃយ៍របស់រដ្ឋនៅតំបន់ត្រពាំងប្រើស ស្ថិតក្នុងដែនការពាររបស់សង្កាត់រដ្ឋបាលព្រៃឈើទំរីង ក្នុងឃុំទំរីង ស្រុកសណ្ដាន់ ខេត្តកំពង់ធំ នៅតែបន្តកើតមាន ប៉ុន្តែមន្ត្រីជំនាញថាពង្រឹងវិធានការទប់ស្កាត់បន្ថែមទៀត។
ការកាប់ និងដឹកឈើចេញពីតំបន់ព្រៃអចិន្ត្រៃយ៍របស់រដ្ឋនេះ កើតមានជាបន្តបន្ទាប់ រួចដឹកចេញដោយប្រើរទេះក្របី រទេះគោយន្ត និងគោយន្តកន្ត្រៃ។ ជាក់ស្ដែង នៅខែមីនា និងមុនថ្ងៃបុណ្យចូលឆ្នាំថ្មីប្រពៃណីជាតិខ្មែរ នាថ្ងៃទី១០ ខែមេសា ឆ្នាំ២០២៦ គេឃើញមានគំនឈើជាច្រើនដែលត្រូវបានកាប់ និងដឹកចេញពីតំបន់ព្រៃអចិន្ត្រៃយ៍របស់រដ្ឋ។
លោក អៀ គឹមឈៀត នាយសង្កាត់រដ្ឋបាលព្រៃឈើទំរីង បានប្រាប់ពលរដ្ឋអ្នកសារព័ត៌មានថា ក្រោយពីមានសេចក្តីរាយការណ៍ពីប្រជាពលរដ្ឋ រូបលោកបានទៅដឹកជញ្ជូនឈើទាំងនោះយកមករក្សាទុកនៅសង្កាត់រដ្ឋបាលព្រៃឈើភ្លាមៗ។ លោកបន្ថែមថា ជនល្មើសចាប់មិនបានទេ តែលោកនឹងកសាងសំណុំរឿងករណីនេះបញ្ជូនតាមនីតិវិធីច្បាប់។
លោក អៀ គឹមឈៀត លើកឡើងថា៖«យើងកសាងសំណុំរឿងធ្វើតាមនីតិវិធីច្បាប់។ អាហ្នឹងបើចូលខ្លួន(ជនល្មើស)ដាក់ឈ្មោះគាត់ទៅតុលាការហ្នឹងឯង» ។
អភិបាលស្រុកសណ្ដាន់ លោក ស៊ិន វណ្ណវុឍ្ឍ មានប្រសាសន៍ថា លោកបានបញ្ជាទៅនាយសង្កាត់រដ្ឋបាលទំរីង ចាត់ការតាមច្បាប់ហើយ ដោយរឹបអូសឈើទាំងនោះមករក្សាទុកអស់ហើយ ក៏ប៉ុន្តែជនដែលប្រព្រឹត្តិរកមិនឃើញនោះទេ បានត្រឹមដាក់បណ្ដឹងជាអញ្ញាតជនប៉ុណ្ណោះ។ លោកបន្តថា នឹងប្រជុំដាក់ផែនការពង្រឹងការទប់ស្កាត់បទល្មើសធនធានធម្មជាតិបន្ថែមទៀត ដោយល្បាតពេលយប់ នឹងចាត់អភិបាលរងម្នាក់ឲ្យទទួលទិសនៅតំបន់នោះផងដែរ។
លោក ស៊ិន វណ្ណវុឌ្ឍ មានប្រសាសន៍ថា៖ …………………………………..។
ប្រជាពលរដ្ឋម្នាក់នៅខេត្តកំពង់ធំ នឹងជាគ្រូបង្រៀន លោក ជា ធារ៉ា បានមានប្រសាសន៍ថា ការកាប់បំផ្លាញព្រៃឈើ ពិសេសនៅឃុំទំរីង ស្រុកសណ្ដាន់ ជាបញ្ហារាំរៃ។
លោក ជា ធារ៉ា បញ្ជាក់បន្ថែមថា ការបាត់បង់ព្រៃឈើ អ្នកដែលបាត់បង់ប្រយោជន៍មុនគេ គឺប្រជាពលរដ្ឋនៅក្នុងសហគមន៍តែម្តង។
លោក ជា ធារ៉ា បានលើកឡើងថា៖ «មែនទែនការបាត់បង់ព្រៃឈើនេះយើងឃើញថាអ្នកបាត់បង់ផលប្រយោជន៍មុនគេហ្នឹង គឺសហគមន៍ហ្នឹង ដែលគាត់អាស្រ័យផលទៅដោយព្រៃឈើជាដើម។ ជាពិសេសវាជាសម្បត្តិធនធានធម្មជាតិរបស់ប្រជាជនខ្មែរយើងគ្រប់រូប។ អីចឹងវាបាត់បង់ផលប្រយោជន៍សម្រាប់ជនជាតិខ្មែរទាំងមូលផលងដែរ»។
លោក ជា ធារ៉ា ចង់ឃើញអាជ្ញាធរពាក់ព័ន្ធទាំងឡាយ ត្រូវអនុវត្តន៍ច្បាប់ឱ្យបានតឹងរឹង អនុវត្តច្បាប់ឱ្យមានតម្លាភាពឬស្មើភាពគ្នា ពិសេសស្រាវជ្រាវរកមេខ្លោងដែលនៅពីក្រោយខ្នងជនល្មើសយកមកផ្តន្ទាទោសទៅតាមផ្លូវច្បាប់៕
………………………………………………
អត្ថបទដោយពលរដ្ឋអ្នកសារព័ត៌មាន លោក សឿ សុជា