អាជ្ញាធរស្រុកសណ្ដាន់ ខេត្តកំពង់ធំ បានលើកឡើងថា នឹងចុះធ្វើការណែនាំពីវិធានការសណ្តាប់ធ្នាប់ដល់អ្នកលក់ដូរនៅបរិវេណមុខផ្សារទំរីង ឱ្យរៀបចំកន្លែងលក់ដូរឱ្យបានល្អប្រសើរឡើងវិញ ដើម្បីធានាសណ្ដាប់ធ្នាប់ និងជៀសវាងការកកស្ទះចរាចរណ៍នៅតំបន់នោះ។
ការលើកឡើងនេះ ក្រោយមានប្រជាពលរដ្ឋក្នុងមូលដ្ឋាន បានត្អូញត្អែរថា នាពេលថ្មីៗនេះមុខផ្សារទំរីង ស្ថិតនៅភូមិខោស ឃុំទំរីង ស្រុកសណ្ដាន់ ខេត្តកំពង់ធំ មានអ្នកលក់ដូររាយប៉ាយ លក់ផ្លែឈើ បន្លែ សម្លៀកបំពាក់ និងទំនិញផ្សេងៗ ដែលបានធ្វើឱ្យផ្លូវតូចចង្អៀត ជាពិសេសនៅពេលព្រឹកព្រលឹម ពេលប្រជាពលរដ្ឋចេញធ្វើការ ឬទៅផ្សារ បង្កឱ្យមានការកកស្ទះចរាចរណ៍។
ពលរដ្ឋម្នាក់ ដោយសុំមិនបញ្ចេញឈ្មោះប្រាប់ពលរដ្ឋអ្នកសារព័ត៌មានថា នៅពីមុខផ្សារទំរីងឲ្យតែព្រឹកឡើងនៅបរិវេនខាងមុខផ្សារគឺកកស្ទះរាល់ព្រឹក។ លោកបន្តថា ការកកស្ទះនេះ ដោយអ្នកមានផ្ទះនៅបរិវេននោះជួលទីតាំងមុខផ្ទះឲ្យអាជីវកលក់ដូរនិងឡានដឹកទំនិញផ្សេងៗយកឥវ៉ាន់មកទម្លាក់ឲ្យម៉ូយរៀងៗខ្លួនទើបបណ្ដាលឲ្យមានការកកស្ទះនៅពេលព្រឹកៗ ។
ពលរដ្ឋម្នាក់ទៀត លោក វុទ្ធី បានប្រាប់ពលរដ្ឋអ្នកសារព័ត៌មានថា លោកសំណូមពរឲ្យអាជ្ញាធរ រៀបចំកន្លែងចតម៉ូតូ ឡានឲ្យបានត្រឹមត្រូវ ដើម្បីឲ្យអ្នកធ្វើដំណើរមានសុវត្ថិភាពជៀសវាងការប៉ះពារណាមួយកកើតឡើង នឹងការកកស្ទះពីខាងមុខផ្សារផងដែរ។ លោក វុទ្ធី បន្តថា បញ្ហាកកស្ទះមុខផ្សារទំរីង(ផ្សារក្រោម) លោកក៏ធ្លាប់បានបង្ហោះហ្វេសប៊ុក និងបានរាយការណ៍ជូនទៅអាជ្ញាធរឃុំនិងស្រុកសណ្ដាន់ផងដែរ ហើយអាជ្ញាធរក៏ធ្លាប់ដោះស្រាយតែបញ្ហានេះនៅតែកើតមានឡើងដដែល។ លោក វុទ្ធី បានគូសបញ្ជាក់បន្ថែមថា ប្រភពបញ្ហានាំឱ្យកកស្ទះនៅមុខផ្សារទំរីងមកពីមូលហេតុ ការចត ម៉ូតូ ឡាន គ្មានរបៀបរៀបរយ ស្របពេលម្ចាស់ផ្ទះខ្លះជួលបរិវេណខាងមុខផ្ទះឲ្យអាជីវករលក់ដូរជាដើម ។
លោក វុទ្ធី បានលើកឡើងថា៖ ……………………
លោក ស៊ូ សុវណ្ណ មេឃុំទំរីង មានប្រសាសន៍ថា លោកបានគិតទុករឿងនេះយូរដែរហើយ និងបានពិភាក្សាគ្នាជាមួយក្រុមព្រឹក្សាឃុំរបស់លោក ព្រមទាំងបានហៅម្ចាស់ផ្សារ និងប្រជាពលរដ្ឋដែលបានជួលដីឬតូបឲ្យអ្នកលក់ដូរនៅពីខាងមុខផ្សារ មកពិភាក្សាគ្នា រកដំណោះស្រាយដែរ។ លោកបញ្ជាក់ថា ពីពេលមុនៗក៏ធ្លាប់ចេញសេចក្ដីជូនដំណឹងឱ្យអាជីវកលក់ដូរសូមឱ្យផុតពីផ្លូវបេតុងចម្ងាយ២ម៉ែតកន្លះ ទៅ៣ម៉ែត ដើម្បីទុកចន្លោះហ្នឹងដាក់ម៉ូតូដើម្បីឲ្យមានសណ្ដាប់ធ្នាប់ ហើយការចុះណែនាំនិងរៀបចំសណ្តាប់ធ្នាប់នេះក៏បានធ្វើឡើងជាច្រើនសារ តែសកម្មភាពនៅដដែល។ ក្រៅពីនេះ លោកក៏ធ្លាប់ឲ្យប្រជាការពាររៀបចំសណ្ដាប់ធ្នាប់នៅផ្សារនោះដែរ ដោយឧបត្ថម្ភក្នុងមួយខែ១០០$ តែក្រោយមកដោយខ្វះខាតថវិការក៏បានសម្រេចឲ្យប្រជាការពារផ្អាកសកម្មភាពនោះទៅវិញ ។
លោក ស៊ូ សុវណ្ណ មេឃុំទំរីង បានលើកឡើងថា៖ ………………….
លោក ស៊ិន វណ្ណវុឍ្ឍ អភិបាលស្រុកសណ្ដាន់ ខេត្តកំពង់ធំ បានប្រាប់ថា លោកបានឲ្យសាលាឃុំទំរីងធ្វើមួយរយៈសិន បើសាលាឃុំមានចំណាត់ការអត់បានទេ អាជ្ញាធរស្រុកនឹងធ្វើការងារនេះតែម្តង ដើម្បីធានាបាននូវសណ្តាប់ធ្លាប់និងការធ្វើដំណើរជូនពលរដ្ឋ៕
………………………………………………….
អត្ថបទដោយពលរដ្ឋអ្នកសារព័ត៌មាន លោក សឿ សុជា