អង្គភាពប្រឆាំងអំពើពុករលួយ (ACU) បានប្រកាសពីការបើកការស៊ើបអង្កេតទៅលើលោក ស៊ាន បូរ៉ាត ជារដ្ឋលេខាធិការក្រសួងអប់រំ យុវជន និងកីឡា និងជាអនុប្រធានអង្គភាពប្រឆាំងអំពើពុករលួយនិងលោក ស ថាវី ជាអនុរដ្ឋលេខាធិការក្រសួងការពារជាតិ ដែលពាក់ព័ន្ធសំណុំរឿងជាមួយអតីតឧកញ៉ា ឡេង ចាន់ណា ករណីឆបោកទ្រង់ទ្រាយធំនៅខេត្តកំពង់ធំ និងខេត្តសៀមរាប ដែលមានអ្នកចាញ់បោករាប់ពាន់នាក់ និងគិតជាទឹកប្រាក់រាប់រយលានដុល្លារ។
ទំព័រហ្វេសប៊ុករបស់អង្គភាពប្រឆាំងអំពើពុករលួយបានឱ្យដឹងនៅថ្ងៃទី៣ ខែកក្កដា ឆ្នាំ២០២៥ថា អង្គភាពមួយនេះ តាមរយៈក្រុមស៊ើបអង្កេតផ្ទៃក្នុង បានបើកការស៊ើបអង្កេតលើអនុប្រធានអង្គភាពប្រឆាំងពុករលួយ គឺលោក ស៊ាន បូរ៉ាត ជារដ្ឋលេខាធិការក្រសួងអប់រំ យុវជន និងកីឡា និងជាអនុប្រធានអង្គភាពប្រឆាំងអំពើពុករលួយ ព្រមទាំងអតីតអភិបាលខេត្តឧត្តរមានជ័យ និងជាអនុរដ្ឋលេខាធិការក្រសួងការពារជាតិនិងលោក ស ថាវី ដែលបានជាប់ពាក់ព័ន្ធជាមួយសំណុំរឿងអតីតឧកញ៉ា ឡេង ចាន់ណា។
អង្គភាពប្រឆាំងអំពើពុករលួយបញ្ជាក់ថា ស្របជាមួយគ្នានេះ តុលាការខេត្តសៀមរាប ក៏បានបញ្ជូនសំណុំរឿងករណីអតីតឧកញ៉ា ឡេង ចាន់ណា និងបក្ខពួកចំនួន៣២ សំណុំរឿងមកអង្គភាពប្រឆាំងអំពើពុករលួយផងដែរ ហើយតុលាការបានខិតខំធ្វើការយ៉ាងម៉ត់ចត់អស់រយៈពេលជិតពីរឆ្នាំមកនេះ។
ប្រភពដដែលបន្ថែមថា សំណុំរឿងទាំង ៣២នោះ មានទាំងអស់ ២៤ ៨៥២ ទំព័រ ហើយអង្គភាពចាត់មន្ត្រី១០រូបអានឯកសារទាំងនេះមួយខែបានចប់ ហើយតួអង្គ ស៊ាន បូរ៉ាត និង ស ថាវី នៅដំណាក់កាលតុលាការខេត្តសៀមរាប គឺជាសាក្សី។
អង្គភាពប្រឆាំងអំពើពុករលួយបន្ថែមថា៖ «រីឯក្នុងសំណុំរឿងបើកការស៊ើបអង្កេតរបស់អង្គភាពប្រឆាំងអំពើពុករលួយលើ ស៊ាន បូរ៉ាត និងស ថាវី វិញ អ្នកទាំងពីរនេះមិនមែនជាអ្នកសាក្សីទេ គឺជាជនសង្ស័យនៃសំណុំរឿង»។
កាលពីថ្ងៃទី២ ខែមីនា ឆ្នាំ២០២០ លោក សាយ ណូរ៉ា ព្រះរាជអាជ្ញារងអមសាលាដំបូងរាជធានីភ្នំពេញ បានចោទប្រកាន់ លោក ស ថាវី ដែលជាអតីតអភិបាលខេត្តឧត្តរមានជ័យ និងជាអនុរដ្ឋលេខាធិការក្រសួងការពារជាតិ និងបក្ខពួក៨នាក់ទៀត ពាក់ព័ន្ធនឹងការលួចលក់ដីមិនមែនជារបស់ខ្លួន នៅសង្កាត់សំរោង ខណ្ឌព្រែកព្នៅ រាជធានីភ្នំពេញ។
ដោយឡែក តុលាការខេត្តសៀមរាប កាលពីចុងឆ្នាំ២០២៤ បានកោះហៅ លោក ស៊ាន បូរ៉ាត និងលោក ស ថាវី ឱ្យចូលខ្លួនឆ្លើយបំភ្លឺម្តងរួចមកហើយ ក្នុងនាមសាក្សីក្នុងសំណុំរឿង បោកប្រាស់ពលរដ្ឋរបស់ក្រុមហ៊ុន ឡេង ចាន់ណា នេះ។
អ្នកប្រឹក្សាយោបល់ផ្នែកអភិវឌ្ឍន៍ និងផ្នត់គំនិត លោក សេក សុជាតិ មានប្រសាសន៍ថា គឺជាដំណឹងល្អដែលអង្គភាពប្រឆាំងអំពើពុករលួយបើការស៊ើបអង្កេតលើសំណុំរឿងឆបោកពលរដ្ឋទ្រង់ទ្រាយធំនេះ។ លោកចង់ឱ្យអង្គភាពបើករការស៊ើបអង្កេតដោយឈើនៅលើគោលការណ៍តម្លាភាព យុត្តិធម៌ និងមិនប្រកាន់បក្ខពួក ដើម្បីផ្តល់យុត្តិធម៌ពិតប្រាកដជូនជនរងគ្រោះ។
លោក សេក សុជាតិ បន្តថា ៖ «នៅក្នុងសំណុំរឿងនៃការចាញ់បោកនេះ យើងដឹងហើយថា ធ្វើឱ្យប្រជាពលរដ្ឋមានបញ្ហាច្រើនរាប់មិនអស់នោះទេ។ ដូច្នេះហើយ អ្នកដែលរកស៊ីទុច្ចរឹតគួរតែត្រូវបានច្បាប់ផ្តន្ទាទោស ហើយក្នុងករណីនេះក៏ជាមេរៀនមួយសម្រាប់រដ្ឋាភិបាលនៅក្នុងការដោះស្រាយបញ្ហាដែលជាសំណើរបស់បងប្អូនប្រជាពលរដ្ឋដែលកំពុងតែរងគ្រោះ ដោយសារតែការចុះបោកដោយសារតែការទិញដី ការទិញផ្ទះ ឬអចនទ្រព្យ ដែលមិនមានច្បាប់ មិនមានប្លង់រឹង មិនមានឯកសារត្រឹមត្រូវជាដើម»។
លោក យល់ឃើញថា ប្រសិនបើសំណុំរឿងឆបោកពលរដ្ឋយ៉ាងច្រើន ក្នុងទំហំទឹកប្រាក់ធំធេងនេះមិនមានយុត្តិធម៌សម្រាប់ពលរដ្ឋរងគ្រោះទាំងអស់ទេ នឹងមានការលើកឡើងបន្តទៀតជុំវិញប្រសិទ្ធភាពនៃការអនុវត្តច្បាប់ ពិសេសនឹងមានការលើកឡើងថា ការអនុវត្តច្បាប់មានការរើសអើង ប្រកាន់បក្ខពួក ភាពមិនច្បាស់លាស់ក្នុងការស៊ើបអង្កេត និងការមិនហ៊ានចាត់វិធានការចំពោះជនល្មើសដែលនៅពីក្រោយខ្នងជាដើម។
ជនជាប់ចោទ ឡេង ចាន់ណា និងបក្ខពួក ត្រូវបានសមត្ថកិច្ចខេត្តសៀមរាប ឃាត់ខ្លួននៅថ្ងៃទី១២ មីនា ឆ្នាំ២០២៤ ពាក់ព័ន្ធនឹងការឆបោកពលរដ្ឋ ប្រមាណ៥ពាន់នាក់ ឱ្យដាក់ប្រាក់វិនិយោគក្រោមរូបភាពទទួលបានការប្រាក់ប្រចាំខែក្នុងអត្រាខ្ពស់ ហើយទំហំទឹកប្រាក់ដែលឆបោកពីពលរដ្ឋនោះមានចំនួនប្រមាណ៣០០លានដុល្លារសហរដ្ឋអាមេរិក។
នៅថ្ងៃទី១៣ ខែមីនា ឆ្នាំ២០២៤ សាលាដំបូងខេត្តសៀមរាប បានសម្រេចចោទប្រកាន់អតីតឧកញ៉ា ឡេង ចាន់ណា អគ្គនាយិកាក្រុមហ៊ុន ទ្រីលានស៊ីធី និងអគ្គនាយករងក្រុមហ៊ុន២នាក់ទៀត ព្រមទាំងបក្ខពួកចំនួន៣បទល្មើស គឺ បទឆបោកមានស្ថានទម្ងន់ទោស, មិនបំពេញកាតព្វកិច្ច ឧបករណ៍ដែលអាចជួញដូរបាន និងសម្អាតប្រាក់។ រហូតដល់ ថ្ងៃទី ១៧ ខែមេសា ឆ្នាំ២០២៤ សាលាដំបូងខេត្តសៀមរាប បានសម្រេចឃុំខ្លួនជនត្រូវចោទចំនួន៥នាក់ និងបង្កកគណនីធនាគារចំនួន១៨៣ និងទ្រព្យសម្បត្តិមួយចំនួនពាក់ព័ន្ធនឹងសំណុំរឿងក្រុមហ៊ុន ប៊ីលាន ស៊ីធីនេះ៕
………………………………….
អត្ថបទដោយពលរដ្ឋអ្នកសារព័ត៌មាន ស៊ុន អ៊ូរ
