លោកនាយករដ្ឋមន្ត្រីកម្ពុជា បានឱ្យដឹថាចាប់អនុវត្តចាប់ពីម៉ោង ១២យប់ថ្ងៃទី២២ចូលថ្ងៃទី២៣ ខែមិថុនានេះទៅ ការនាំចូលប្រេងឥន្ធនៈនិងឧស្ម័នឥន្ធនៈគ្រប់ប្រភេទពីប្រទេសថៃ ត្រូវផ្អាកទាំងស្រុង។
លោកនាយករដ្ឋមន្ត្រី ហ៊ុន ម៉ាណែត បានលើកឡើងលើទំព័រហ្វេសប៊ុកកាលពីយប់ថ្ងៃទី២២មិថុនាថា បណ្ដាក្រុមហ៊ុនចែកចាយប្រេងឥន្ធនៈនៅកម្ពុជា មានលទ្ធភាពនាំចូលប្រេងឥន្ធនៈនិងឧស្ម័នឥន្ធនៈពីប្រភពផ្សេង គ្រប់គ្រាន់ ដើម្បីផ្គត់ផ្គង់តម្រូវការប្រើប្រាស់ក្នុងស្រុករបស់ប្រជាពលរដ្ឋយើង កុំថាឡើយត្រឹមមួយខែ ទោះជារៀងរហូតក៏មិនជាបញ្ហា។
ការលើកឡើងនេះ ក្រោយពីកម្ពុជាបានទទួលបានព័ត៌មាននៃសមាជិកបក្សប្រឆាំងថៃមួយរូបបានលើកដាក់សំណើរស្នើទៅរដ្ឋាភិបាលថៃឱ្យមានការផ្អាកការនាំប្រេងឥន្ធនៈចូលប្រទេសកម្ពុជា ដើម្បីជាថ្នូរឱ្យកម្ពុជាចុះចាញ់ថៃ ក្នុងគ្រាលដែលមានភាពតាមដានរឿងព្រំដែនជាមួយកម្ពុជាពេលនេះ។
ជាមួយគ្នានេះ ប្រធានអង្គភាពអ្នកនាំពាក្យរាជរដ្ឋាភិបាលកម្ពុជា លោក ប៉ែន បូណា បានអះអាងថា ចាប់តាំងពីមានភាពតានតឹងបញ្ហាព្រំដែនតាំងពីចុងខែឧសភាមក ប្រទេសថៃដែលកងទ័ពមានអំណាចជាងនាយករដ្ឋមន្ត្រី តែងតែប្រើវិធីគំរាមនិងដាក់សម្ពាធមកលើកម្ពុជាជានិច្ច។ ដំបូងឡើយកងទ័ពថៃបានសម្រេចបិទព្រំដែនជាឯកតោភាគី បន្ទាប់មកគំរាមផ្តាច់អគ្គិសនី ផ្តាច់អ៊ិនធឺណិត ផ្តាច់ការនាំចូលទំនិញ និងចុងក្រោយនេះ គេបានគំរាមឈប់នាំប្រេងឥន្ធនៈមកកម្ពុជាក្រោមអំនួតថា កម្ពុជានឹងវេទនាដោយសារពួកគេ។
មន្ត្រីជាន់ខ្ពស់កម្ពុជារូបនេះ បន្តថា អាកប្បកិរិយាបែបមើលស្រាលកម្ពុជានេះកើតឡើងដោយសារកងទ័ពថៃនិងអ្នកនយោបាយមួយចំនួន រួមទាំងក្រុមជ្រុលនិយមផង លង់លក់ក្នុងអំនួតហើយមិនបានសិក្សាពីកម្ពុជាឱ្យបានច្បាស់ដែលធ្វើឱ្យពួកគេដើរមិនទាន់សភាពការណ៍។ ពួកគេនៅតែដក់ក្នុងអារម្មណ៍ថា កម្ពុជាមានស្ថានភាពដូចកាលពីទសវត្សរ៍៨០នៅឡើយដែលរស់ដោយសារខ្យល់ដកដង្ហើមរបស់ថៃ។ ដូច្នេះ បើថៃដាក់សម្ពាធតែបន្តិច កម្ពុជាច្បាស់ជាជួបការលំបាកហើយចុះញ៉មចំពោះពួកគេជាមិនខាន ប៉ុន្តែការគិតបែបនេះជារឿងខុសស្រឡះ។
លោកលើកឡើងថា ៖«ប៉ុន្តែ តាមរយៈវិធានការឆ្លើយតបរបស់កម្ពុជាជាបន្តបន្ទាប់រហូតដល់ការផ្អាកនាំប្រេងឥន្ធនៈនិងឧស្ម័នទាំងស្រុងពីប្រទេសថៃ យោធានិងរដ្ឋាភិបាលថៃចាប់ផ្តើមភ្លឺភ្នែក។ នៅត្រង់ថា កម្ពុជាមិនត្រឹមតែមិនបានរងសម្ពាធនិងមិនចុះញ៉មប៉ុណ្ណោះទេ តែបែរជាដាក់ចេញវិធានការឆ្លើយតបវិញមុនពេលដែលថៃដាក់មកលើកម្ពុជាទៅទៀត»។
ប្រធានវិទ្យាស្ថានប្រជាធិបតេយ្យធិបតេយ្យកម្ពុជា លោកបណ្ឌិត ប៉ា ច័ន្ទរឿន បានលើកឡើងលើបណ្តាញសង្គមហ្វេសប៊ុកថា ជម្លោះបញ្ហាព្រំដែនកម្ពុជា-ថៃ បានរាលដាលទៅជាសង្គ្រាមពាណិជ្ជកម្ម ហើយការយកបញ្ហាប្រេងឥន្ធនៈ និងឧស្ម័នមកដាក់សម្ពាធលើកម្ពុជានេះ ជាឱកាសសម្រាប់កម្ពុជាទៅវិញទេក្នុងការស្វែងរកប្រភពផ្សេង និងដោះស្រាយបញ្ហាប្រេងឥន្ធនៈនេះដោយខ្លួនឯងផងដែរ។
លោកលើកឡើងថា៖ « ការដាក់គំនាបពាណិជ្ជកម្មទាក់ទងនឹងការបញ្ឈប់ផ្គត់ផ្គង់ប្រេងនិងហ្គាសរបស់ថៃមកកម្ពុជា ក៏ជាឱកាសសម្រាប់កម្ពុជាធ្វើពិពិធកម្មការផ្គត់ផ្គង់ប្រេងនិងហ្គាសពីប្រភពផ្សេងៗជាជាងការពឹងផ្អែកច្រើនពេកលើប្រទេសជិតខាង។ ហើយវាក៏ជាពេលដែលកម្ពុជាត្រូវសិក្សានិងពិចារណាឡើងវិញអំពីការបង្កើតរោងចក្រចម្រាញ់ប្រេងនៅក្នុងប្រទេសរបស់ខ្លួន»។
ដោយឡែកអ្នកផលិតមាតិការអំពីបញ្ហាសង្គម និងនយោបាយដែលល្បីលើបណ្តាញសង្គមមួយរូប អ្នកស្រី កន្និដា បានសរសេរលើទំព័រហ្វេសប៊ុកថា ប្រទេសកម្ពុជាបានបិទការនាំចូលប្រេងឥន្ទនៈពីប្រទេសថៃទាំងស្រុង ហើកម្ពុជាគឺជាអតិថិជន ចំណែកឯអ្នកដែលខាតខ្លាំងជាងគឺជាប្រទេសថៃដែលជាអ្នកលក់។
អ្នកស្រីបន្តថា៖ «អ្វីដែលភាគីខាងថៃត្រូវការធ្វើ គឺគ្រាន់តែបើកព្រំដែនឱ្យដូចពីមុនវិញ ដោយកុំមានការរារាំងភ្ញៀវទេសចរណ៍មកកាន់ប្រទេសកម្ពុជាមកទល់ពេលនេះភាគីថៃគឺមិនព្រមធ្វើនោះទេរឿងនេះគឺភាគីថៃគឺជាអ្នកបង្ករឿងមុន មិនមែនកម្ពុជាទេ»។
ក្រោយមានការប៉ះទង្គិចគ្នាដោយកម្លាំងមួយប្រាវនៅចំណុចមុំបី ក្នុងស្រុកជាំក្សាន្ត ខេត្តព្រះវិហារ កាលពីថ្ងៃទី២៨ ខែឧសភា បណ្តាលឱ្យកងទ័ពខ្មែរម្នាក់ស្លាប់នោះ ភាគីថៃបានព្យាយាមបង្ហើបឱ្យដឹងពីការដាក់សម្ពាធសេដ្ឋកិច្ចមកលើកម្ពុជាជាបន្តបន្ទាប់ ដូចជាការបិទព្រំដែនដោយឯកតោភាគី ព្រមទាំងគំរាមផ្តាច់ភ្លើងឬ អ៊ិនធឺណិតជាដើម។
យ៉ាងណា ជាការឆ្លើយតបកម្ពុជាក៏សម្រេចផ្តាច់ការតភ្ជាប់អ៊ិនធឺណិតពីថៃ បិទការនាំបន្លែផ្លែឈើ គ្រឿងកំប៉ុងគ្រប់ប្រភេទពីថៃតាមគ្រប់ច្រកព្រំដែន ព្រមទាំងវិធានការផ្អាកការនាំចូលប្រេងឥន្ធនៈ និងឧស្ម័នទាំងស្រុងពេលប្រទេសថៃផងដែរ៕
ទោះបីយ៉ាងណា អតីតនាយករដ្ឋមន្ត្រីកម្ពុជា លោក ហ៊ុន សែន ធ្លាប់អំពាវនាវឱ្យជនរួមជាតិ កុំធ្វើអំពើជ្រុលនិយមណាមួយ ដូចជាបាតុកម្មប្រឆាំងស្ថានទូតថៃ ក្រុមហ៊ុនថៃ និងជនជាតិថៃនៅកម្ពុជា និងសូមកុំស្អប់ខ្ពើមប្រកាន់ពូជសាសន៍ ចំពោះជនជាតិថៃដែលភាគច្រើនលើសលប់ជាមនុស្សល្អ៕
……………………………………………
អត្ថបទដោយពលរដ្ឋអ្នកសារព័ត៌មាន ស៊ុន អ៊ូរ
