សាលាឧទ្ធរណ៍ភ្នំពេញ បានសម្រេចតម្កល់សាលក្រមរបស់តុលាការជាន់ទាប ដែលផ្តន្ទាទោសអ្នកអត្ថាធិប្បាយសង្គម លោក នី ណាក់ ឱ្យជាប់ពន្ធនាគាររយៈពេល ២ឆ្នាំ និងសងជំងឺចិត្តដល់ដើមបណ្ដឹងរដ្ឋមន្រ្តីក្រសួងការងារចំនួន ២០០លានរៀល។
កាលថ្ងៃទី២១ ខែវិច្ឆិកា ឆ្នាំ២០២៤ សាលាដំបូងរាជធានីភ្នំពេញ បានផ្តន្ទាទោស លោក នី ណាក់ ដាក់ពន្ធនាគារពីរឆ្នាំ និងពិន័យជាប្រាក់ ៣លានរៀល ពីបទ បរិហារកេរ្តិ៍ជាសាធារណៈ និងញុះញង់ឱ្យមានការរើសអើង និងបង្គាប់ឱ្យសងជំងឺចិត្តទៅដើមបណ្តឹងចំនួន ២០០លានរៀលផងដែរ។
មេធាវីការពារក្ដីឱ្យ លោក នី ណាក់ គឺលោក ជូង ជូងី ថ្លែងប្រាប់អ្នកកាសែតនៅមុខសាលាឧទ្ធរណ៍ភ្នំពេញថា សវនការព្រឹកនេះ ប្រធានក្រុមប្រឹក្សាជំនុំជម្រះ លោក អ៊ិត សុធា បានសម្រេចតម្កល់សាលក្រមរបស់សាលាដំបូងរាជធានីភ្នំពេញទុកជាបានការដដែល។
លោកនិយាយថា៖ «ចំពោះករណីលោក នី ណាក់ គឺសាលាឧទ្ធរណ៍សម្រេចតម្កល់សាលក្រមរបស់សាលាដំបូងរាជធានីភ្នំពេញ ទុកជាបានការដដែល (មូលហេតុអ្វី) ដោយសារពេលវេលាខ្លីសាលាឧទ្ធរណ៍អត់បានប្រកាសសំអាងហេតុ មូលហេតុទេ»។
យ៉ាងណា មេធាវីការពារក្ដីឱ្យអ្នកអត្ថាធិប្បាយសង្គមរូបនេះ បានចាត់ទុកការតម្កល់សាលក្រមនេះ ជាការផ្ដល់ភាពអយុត្តិធម៌លើលោក ណាក់ បន្តទៀត ក្រោមហេតុផលថា កូនក្ដីរបស់លោកមិនបានប្រព្រឹត្តកំហុសដូចការចោទប្រកាន់របស់តុលាការជាន់ទាបឡើយ។
លោកនិយាយថា៖ «ខ្ញុំមានការសោកស្ដាយចំពោះលទ្ធផលទាំងករណីលោក ជិន ប៊ុនណារ័ត្ន (សកម្មជននយោបាយ) និងលោកនី ណាក់ គឺមិនបានផ្ដល់យុត្តិធម៌ដល់ [ពួកគាត់] ពីព្រោះគាត់អត់មានចេតនាប្រព្រឹត្តអំពើដែលបំពានច្បាប់នោះទេ ហើយអ្វីហេតុផល ខ្ញុំបាននិយាយច្រើនណាស់ជូនក្រុមប្រឹក្សា ប៉ុន្តែអ្វីដែលខ្ញុំស្ដាយ គឺក្រុមប្រឹក្សាអត់បានពិចារណា ហេតុផលដែលខ្ញុំលើកទៅ»។
សាច់ញាតិរបស់លោក នី ណាក់ និងមន្រ្តីសង្គមស៊ីវិលបានចូលស្ដាប់សវនការព្រឹកនេះដែរ យល់ថា ការលើកឡើងរបស់លោក ណាក់ ជុំវិញការកាត់ឆ្វៀលដីរបស់រដ្ឋដើម្បីប្រគល់ជូនបុគ្គលឈ្មោះ ហេង សួរ គឺគ្រាន់តែជាការបញ្ចេញមតិក្នុងនាមពលរដ្ឋប៉ុណ្ណោះ។
ភរិយារបស់លោក នី ណាក់ គឺអ្នកស្រី សុខ ស៊ីណែត បានថ្លែងថា ការសម្រេចក្ដីរបស់តុលាការជាន់ខ្ពស់បែបនេះ គឺផ្ទុយទាំងស្រុងពីការរំពឹងទុករបស់អ្នកស្រី ដែលយល់ថា ប្ដីរបស់អ្នកស្រីមិនមានកំហុស ហើយគួរតែត្រូវបានទម្លាក់បទចោទនៅដំណាក់កាលសាលាឧទ្ធរណ៍នេះ។
អ្នកស្រីនិយាយថា៖ «ខ្ញុំមានការសោកស្ដាយ ដំបូងមករំពឹងថា សាលាឧទ្ធរណ៍នឹងដោះលែងបង នី ណាក់ ចឹង ព្រោះអីគាត់មិនបានធ្វើខុសតាំងពីដើម។ អ្វីដែលគាត់សរសេរលើបណ្ដាញសង្គម គឺជាការបញ្ចេញមតិក្នុងនាមជាពលរដ្ឋម្នាក់។ វាជាទស្សនៈផ្ទាល់ខ្លួនរបស់គាត់ចឹងគាត់អត់មានចេតនាទៅញុះញង់អ្នកណាចឹង»។
បើតាមអ្នកស្រី ស៊ីណែត អំឡុងពេលសវនការ លោក ណាក់ បានអះអាងនៅចំពោះមុខចៅក្រមថា គាត់គ្មានបំណងក្នុងការញុះញង់ ឬបរិហាកេរ្តិ៍ឱ្យពលរដ្ឋស្អប់នរណាម្នាក់ ដូចការចោទប្រកាន់នោះទេ។ ទន្ទឹមនេះ លោក ណាក់ ក៏បានស្នើឱ្យសាលាឧទ្ធរណ៍ផ្ទេរការឃុំខ្លួនរបស់លោកពីពន្ធនាគារត្រពាំងផ្លុង ខេត្តត្បូងឃ្មុំ មកកាន់ពន្ធនាគារ ម១ រាជធានីភ្នំពេញវិញ ក្រោមហេតុផលថា គ្រួសារពិបាកក្នុងការសួរសុខទុក្ខ។
អ្នកស្រី ស៊ីណែត ឱ្យដឹងទៀតថា ជាការឆ្លើយតប សាលាឧទ្ធរណ៍ថា ករណីនេះស្ថិតក្រោមការសម្រេចរបស់ក្រសួងមហាផ្ទៃ។
ក្រោយការចាប់ខ្លួនបានរយៈពេលជាង២០ថ្ងៃ លោក ណាក់ ត្រូវបានបញ្ជូនចេញទៅពន្ធនាគារត្រពាំងផ្លុង ក្រោមហេតុផលថា ដោយសារមានកំណើនជនជាប់ឃុំច្រើននៅពន្ធនាគារព្រៃស ឬ ម១។
អ្នកនាំពាក្យអគ្គនាយកដ្ឋានពន្ធនាគារ លោក ឃៀង សុណាឌីន ថ្លែងថា ការផ្លាស់ប្ដូរទីតាំងឃុំខ្លួនរបស់ជនជាប់ឃុំអាចធ្វើទៅបាន លុះត្រាតែមានការសរសេរលិខិតស្នើសុំផ្លូវការរបស់សាច់ញាតិឬមេធាវី មកកាន់អគ្គនាយកដ្ឋានពន្ធនាគារដើម្បីពិនិត្យមើលលទ្ធភាព។
លោកបញ្ជាក់ថា៖ «ជាទូទៅពាក់ព័ន្ធការផ្ទេរជនជាប់ឃុំពីកន្លែងមួយទៅកន្លែងមួយ គឺផ្អែកទៅតាមសំណើររបស់ក្រុមគ្រួសារសាច់ញាតិគាត់។ អាចទាក់ទងទៅក្រុមគ្រួសារសាច់ញាតិគាត់ឱ្យធ្វើសំណើរផ្លូវការមកអគ្គនាយកដ្ឋានពន្ធនាគារ ហើយអគ្គនាយកដ្ឋានពន្ធនាគារនឹងពិនិត្យលទ្ធភាព។ មេធាវីគាត់ក៏បាន ក្រុមគ្រួសារសាច់ញាតិក៏បានដាក់សំណើរជាផ្លូវការមក។ ដល់ពេលនោះនាយកដ្ឋានជំនាញនឹងពិនិត្យបានឬមិនបាន ផ្អែកលើមូលហេតុអ្វី»។
អ្នកនាំពាក្យក្រសួងការងារ លោក ស៊ុន មេសា មិនអាចសូមការអត្ថាធិប្បាយបានទេ ដោយផ្ញើសំណួរតាមតេលេក្រាមលោកចូលមើលតែមិនមានការឆ្លើយតប។
មន្ត្រីស៊ើបអង្កេតជាន់ខ្ពស់នៃសមាគមការពារសិទ្ធិមនុស្សអាដហុក លោក យី សុខសាន្ត យល់ថា ការសម្រេចតម្កល់សាលក្រមជារឿងអយុត្តិធម៌ដល់លោក នី ណាក់ ដែលលោកជាពលរដ្ឋម្នាក់មានសិទ្ធិក្នុងបញ្ចេញមតិដែរ។
លោកនិយាយថា៖ «ការដាក់ទោសទណ្ឌលើលោក នី ណាក់ ក៏ដូចជាការតម្កល់សាលក្រមរបស់សាលាដំបូងរាជធានីភ្នំពេញ វាជាការធ្ងន់ធ្ងរលើគាត់ដែលអង្គការសង្គមស៊ីវិល ហាក់ដូចជាមិនអាចទទួលយកបាន ចំពោះដាក់ទោសទណ្ឌទៅដល់អ្នកដែលហ៊ានបញ្ចេញមតិយោបល់»។
លោក នី ណាក់ អាយុ ៤៦ឆ្នាំ ត្រូវបានចាប់ខ្លួនកាលពីថ្ងៃទី៥ ខែមករា ឆ្នាំ ២០២៤ ក្រោមបទចោទ «ការមិនរាងចាលក្នុងបទមជ្ឈិម បន្ទាប់ពីការផ្តន្ទាទោសបទមជ្ឈិមបរិហារកេរ្តិ៍ជាសាធារណៈ និងញុះញង់ឲ្យមានការរើសអើង» ដែលប្តឹងដោយរដ្ឋមន្រ្តីក្រសួងការងារ លោក ហេង សួរ ពាក់ព័ន្ធនឹងការបង្ហោះសារនៅលើហ្វេសប៊ុករបស់លោក។
លោក នី ណាក់ ធ្លាប់ជាប់ពន្ធនាគារ ១៨ខែ ពីបទ «ជេរប្រមាថជាសាធារណៈ និងបទញុះញង់ឲ្យប្រព្រឹត្តបទឧក្រិដ្ឋជាអាទិ៍» កាលពីចុងឆ្នាំ២០២០ ពាក់ព័ន្ធនឹងការបង្ហោះសារលើបណ្តាញទំនាក់ទំនងសង្គមហ្វេសប៊ុកក្នុងលក្ខណៈកំប្លែង រឿងទិញម៉ាស់ពាក់ឱ្យមាន់ អំឡុងពេលមានការឆ្លងរាតត្បាតជំងឺកូវីដ-១៩៕
អត្ថបទដោយ៖ វ៉ា សុភានុត
