តុលាការកំពូល នៅថ្ងៃទី២៦ខែឧសភា បានសម្រេចបដិសេធសំណើរសុំនៅក្រៅឃុំជាបណ្តោះអាសន្នរបស់សមាជិកសមាគមសម្ព័ន្ធនិស្សិតបញ្ញវន្តខ្មែរ កញ្ញា រៀម ស្រីពេជ្ររតនា និង លោក ធី ថន។
អ្នកទាំងពីរ ត្រូវបានចាប់ឃុំខ្លួនកាលពីខែសីហា ឆ្នាំ២០២៤ ដោយចោទប្រកាន់ពីបទ «រួមគំនិតក្បត់» យោងតាមមាត្រា៤៥៣ នៃក្រមព្រហ្មទណ្ឌ ពាក់ព័ន្ធនឹងព្រឹត្តិការណ៍នៃការបង្ក្រាបទ្រង់ទ្រាយធំលើមនុស្សជាង ១០០នាក់ ដែលអ្នកទាំងនោះត្រូវបានគេចោទប្រកាន់ថា បានបញ្ចេញមតិ ឬគ្រោងនឹងប្រមូលផ្តុំគ្នាទាក់ទងនឹងតំបន់ត្រីកោណអភិវឌ្ឍន៍ កម្ពុជា វៀតណាម និងឡាវ (CLV-DTA) ដែលជាកិច្ចព្រមព្រៀងសហប្រតិបត្តិការក្នុងតំបន់ ហើយដែលកម្ពុជាទើបតែសម្រេចដកខ្លួនចេញកាលពីពេលថ្មីៗនេះ។ នេះបើតាមការផ្សព្វផ្សាយលើបណ្តាញសង្គមរបស់អង្គការសិទ្ធិមនុស្សលីកាដូ។
ប្រភពដដែលបន្តថា ក្រោយពីបានបើកសវនាការនាពេលកន្លងមក នៅថ្ងៃទី២៦ ខែឧសភា ឆ្នាំ២០២៥នេះ តុលាការកំពូល បានសម្រេចច្រានចោលបណ្តឹង ស្នើសុំបដិសេធសេចក្តីសម្រេចឃុំខ្លួនបណ្តោះអាសន្នរបស់យុវជនទាំងពីររូបនេះ។
លោក អំ សំអាត នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ បានសម្តែងនូវការខកចិត្តចំពោះការសម្រេចនេះ បើទោះបីជាពួកគេបានបំពេញគ្រប់លក្ខខណ្ឌហើយក៏ដោយ។
លោកបានថ្លែងថា៖ «មើលទៅករណីនេះ មិនគួរត្រូវបន្តឃុំខ្លួនពួកគាត់ទេ ដោយសារតែអ្នកទាំងពីរមានអាសយដ្ឋាន មានលក្ខខណ្ឌគ្រប់គ្រាន់នៅក្នុងការនៅក្រៅឃុំ។ […] ហើយករណីហ្នឹងក៏មើលទៅ ក៏ដូចជាមិនមានអីស្មុគស្មាញទេ ព្រោះអីយើងមើលទៅករណីដូចឬស្រដៀងគ្នាហ្នឹង មានការដោះលែងឲ្យនៅក្រៅឃុំបណ្តោះអាសន្នច្រើនគ្នាហើយ។»
លោក អំ សំអាត បានអំពាវនាវដល់តុលាការកំពូល គួរតែបន្តការតាមដាន ត្រួតពិនិត្យករណីនេះឡើងវិញ ដើម្បីផ្តល់ឱកាសដល់សកម្មជនទាំង២រូប ដែលជាបញ្ញាវ័ន្ត។
លោកថា៖ «មើលពួកគាត់ទាំងពីរសុទ្ធតែនៅបន្តការសិក្សា ហើយក៏ជាអ្នកដែលចូលរួមយ៉ាងសកម្មនៅក្នុងកិច្ចការងារសង្គមទៅទៀត អ៊ីចឹងយើងមានការសោកស្តាយ។ […] យើងក៏រង់ចាំមើលការសម្រេចបន្តទៀត ប៉ុន្តែយើងមិនទាន់ដឹងថាការជំនុំជម្រះបន្ទាប់នឹងកើតឡើងនៅពេលណានៅឡើយទេ»។
អ្នកនាំពាក្យតុលាការកំពូល អ្នកស្រី ម៉ៅ ធីតា មិនអាចសុំការអត្ថាធិប្បាយបានទេ។
ជុំវិញករណីនេះ លោក សេង ឌីណា អ្នកនាំពាក្យក្រសួងយុត្តិធម៌ បានលើកឡើងថា នៅក្នុងសង្គមនីតិរដ្ឋ កាលណាប្រព្រឹត្តិអំពើខុសច្បាប់ គឺត្រូវតែមានការទទួលខុសត្រូវតាមផ្លូវច្បាប់ជាធរមាន មិនថាអ្នកនោះជាសកម្មជននយោបាយ សកម្មជនសិទ្ធិមនុស្ស ឬជានរណានោះទេ។
លោកក៏បានច្រានចោលផងដែរ ចំពោះលើកឡើងកន្លងមកដែលថា ការចាប់ខ្លួនអ្នកទាំងពីរជាការបំបិទសិទ្ធិសេរីភាពក្នុងការបញ្ចេញមតិ។
លោកថា៖ «ទាក់ទងនឹងការលើកឡើងថា ការចាប់ខ្លួនអ្នកទាំងពីរជាការបំបិទសិទ្ធិសេរីភាពក្នុងការបញ្ចេញមតិ គឺជារឿងមិនត្រឹមត្រូវទេ ព្រោះថាការចាប់ខ្លួននេះ មិនមានពាក់ព័ន្ធនឹងសកម្មភាពបញ្ចេញមតិណាមួយនោះទេ ហើយក៏មិនមែនចាប់ខ្លួនដោយសារពួកគាត់ជាសកម្មជនអ្វីនោះដែរ ប៉ុន្តែគឺចាប់ខ្លួនដោយសារតែពួកគាត់បានប្រព្រឹត្តិអំពើដែលល្មើសនឹងច្បាប់»។
កាលខែកុម្ភៈ ឆ្នាំ២០២៥ សាលាដំបូងរាជធានីភ្នំពេញ បានសម្រេចពន្យារការឃុំខ្លួនបណ្តោះអាន្នទៅលើ កញ្ញា រៀម ស្រីពេជ្ររតនា និង លោក ធី ថន រយៈពេល៦ខែបន្ថែមទៀត ក្រោយពីឃុំខ្លួនបណ្តោះអាសន្នអស់រយៈពេល ៦ខែរួចមកហើយ។ ក្រោយមកសាលាឧទ្ធរណ៍ក៏បានតម្កល់ការសម្រេចរបស់តុលាការជាន់ទាបនេះទុកជាបានការ កាលពីថ្ងៃទី២៤ ខែមីនា ឆ្នាំ២០២៥។
ក្រៅពីកញ្ញា រៀម ស្រីពេជ្ររតនា និងលោក ធី ថន ក៏នៅមានយុវជនសមាគមសម្ពន្ធនិស្សិតបញ្ញវន្តខ្មែរចំនួន ៣រូបទៀត ត្រូវបានជាប់ឃុំនៅពន្ធនាគារផ្សេងៗគ្នានោះទេ ដោយក្នុងនោះ យុវជន២នាក់ត្រូវបានតុលាការចោទប្រកាន់ពីបទ «រួមគំនិតក្បត់» និងយុវជនម្នាក់ទៀតជាប់ចោទពីបទ«ញុះញង់»។
ចំណែក ប្រធាននៃសមាគមសម្ពន្ធនិស្សិតបញ្ញវន្តខ្មែរ លោក កើត សារ៉ាយ ក៏កំពុងតែអនុវត្តទោសក្នុងពន្ធនាគាររយៈពេល ៤ឆ្នាំ បន្ទាប់ពីការចាប់ខ្លួនកាលពីខែមេសា ឆ្នាំ២០២៤ ពីបទ “ញុះញង់ឱ្យប្រព្រឹត្តបទឧក្រិដ្ឋជាអាទិ៍” និងបទ “មិនរាងចាលក្នុងបទមជ្ឈិមបន្ទាប់ពីការផ្តន្ទាទោសបទមជ្ឈិម” យោងតាមមាត្រា ៤៩៤, ៤៩៥ និងមាត្រា៨៨ នៃក្រមព្រហ្មទណ្ឌ ទាក់ទងនឹងការបញ្ចេញមតិ ជុំវិញការបណ្តេញចេញដោយហិង្សាមួយនៅក្នុងខេត្តព្រះវិហារ៕
អត្ថបទដោយ៖ ណុប ស្រីម៉ៅ
