កម្ពុជាតាមរយៈក្រសួងកសិកម្ម រុក្ខាប្រមាញ់ និងនេសាទ បានប្រកាសហាមឃាត់ជាបណ្តោះអាសន្នលើការនាំចូលសត្វពាហនៈ និងផលិតផលសត្វ ពីច្រកព្រំដែនទាំងអស់នៃប្រទេសថៃ ដើម្បីធានាការដល់សុវត្ថិភាពចំណីអាហារនិងសុខភាពពលរដ្ឋ ក្រោយប្រទេសជាប់កម្ពុជាមួយនេះរកឃើញករណីផ្ទុះជំងឺពិសធ្យូងនៅលើសត្វគោបណ្តាលឱ្យឆ្លងដល់មនុស្ស។
ក្រសួងកសិកម្ម រុក្ខាប្រមាញ់ និងនេសាទនៅថ្ងៃទី៧ ខែឧសភានេះ បានចេញសេចក្តីប្រកាសព័ត៌មានមួយ ស្តីពីករណីកើតមានជំងឺឈាមខ្មៅ ឬជំងឺអង់ត្រាក់ លើសត្វពាហនៈ នៅក្នុងប្រទេសថៃ។ ក្រសួងអះអាងថា កម្ពុជាកំពុងតាមដានយ៉ាងយកចិត្តទុកដាក់ចំពោះករណីកើតឡើងជំងឺឈាមខ្មៅ ទៅលើសត្វគោក្របីដែលបានកើតមាននៅតំបន់មួយចំនួននៅប្រទេសថៃ។
ក្រសួងកសិកម្មបន្តថា៖ «បច្ចុប្បន្ន ពុំមានករណីជំងឺនេះនៅក្នុងប្រទេសកម្ពុជានោះទេ ប៉ុន្តែយ៉ាងណាក្តីជាវិធានការបង្ការ ក្រសួងបានដាក់ឱ្យអនុវត្តការហាមឃាត់ជាបណ្តោះអាសន្នលើការនាំចូលសត្វពាហនៈ និងផលិតផលសាច់សត្វ ពីច្រកព្រំដែនទាំងអស់នៃប្រទេសថៃ ព្រមទាំងបានសហការយ៉ាងជិតស្និទ្ធជាមួយស្ថាប័នពាក់ព័ន្ធនៅតាម បណ្តាច្រកព្រំដែនទាំងនេះដើម្បីពង្រឹងការត្រួតពិនិត្យ និងធានាការអនុវត្តវិធានការប្រកបដោយប្រសិទ្ធភាពខ្ពស់»។
សេចក្តីប្រកាសព័ត៌មានរបស់ក្រសួងកសិកម្ម បញ្ជាក់ទៀតថា បច្ចុប្បន្ន កម្ពុជាពុំរកឃើញមានជំងឺឈាមខ្មៅ ឬជំងឺអង់ត្រាក់ (ពិសធ្យូង) លើសត្វពាហនៈ (គោ-ក្របី)នៅកម្ពុជាឡើយ។
ជាមួយគ្នានេះ អគ្គនាយកដ្ឋានសុខភាពសត្វ និងផលិតកម្មសត្វក៏បានរៀបចំបណ្តាញប្រព័ន្ធប្រតិកម្មរហ័សមួយ នៅគ្រប់រាជធានី-ខេត្តទាំង២៥ ក្នុងគោលដៅតាមដានសុខភាពសត្វពាហនៈ និងធ្វើការអន្តរាគមន៍ក្នុងករណីសង្ស័យ។ ក្រសួងនឹងបន្តធ្វើបច្ចុប្បន្នភាពជាបន្តបន្ទាប់ និងផ្តល់ព័ត៌មានថ្មីៗពីការវិវត្តនៃជំងឺនេះក្នុងករណីចាំបាច់។ សម្រាប់ព័ត៌មានបន្ថែម សូមទំនាក់ទំនងទៅកាន់ទូរស័ព្ទលេខ ១២៨៩។
ដោយឡែក នាយកដ្ឋានប្រយុទ្ធនឹងងជំងឺឆ្លង(CDC) នៃក្រសួងសុខាភិបាល បានលើកឡើងកាលពីថ្ងៃទី៥ ខែឧសភាថា ខេត្តមុកដាហាន ប្រទេសថៃ បានរកឃើញវិជ្ជមានជំងឺអង់ត្រាក់ (ពិសធ្យូង) ពីរករណីលើមនុស្ស ក្នុងនោះមួយករណីបានស្លាប់អាយុ៥៣ឆ្នាំភេទប្រុស និងម្នាក់ទៀតកំពុងព្យាបាលនៅមន្ទីរពេទ្យ ។ ប្រភពដដែលបន្តថា មូលហេតុឆ្លងដោយសារបរិភោគសាច់គោឆៅ។
នាយកដ្ឋានប្រយុទ្ធនឹងងជំងឺឆ្លងបន្តថា៖ «មូលហេតុដែលឆ្លងជំងឺនេះ ដោយសារពួកគាត់បរិភោគសាច់គោឆៅ ដែលមានឆ្លងមេរោគបាក់តេរី អង់ត្រាក់ ។ ជំងឺនេះមានឱសថព្យាបាលជាបាន ក្រោយធ្វើវិនិច្ឆ័យជំងឺច្បាស់លាស់» ។
ប្រភពដដែលបន្តថា ជំងឺAnthraxឬ ពិសធ្យូងនេះ គឺជាជំងឺឆ្លងដែលបណ្តាលមកពីបាក់តេរីឈ្មោះ Bacillus anthracis ។ ការឆ្លងបណ្តាលមកពីបរិភោគសាច់ឆៅ ឬប៉ះពាល់នឺងប្រភេទសត្វស៊ីស្មៅ ដូចជាគោ ក្របី ជាដើម ។ ជំងឺបង្កឡើងដោយមេរោគបាក់តឹរីនេះមានបីទម្រង់ជំងឺអង់ត្រាក់លើមនុស្ស រួមមាន ស្បែក (ស្បែក) ដង្ហើមចូល (សួត) និងក្រពះ ពោះវៀន។ ការព្យាបាលភ្លាមៗជាមួយនឹងថ្នាំអង់ទីប៊ីយោទិច គឺមានសារៈសំខាន់ណាស់សម្រាប់ការរស់រានមានជីវិត ។ ព័ត៌មានបន្ថែមសូមទាក់ទងលេខទូរស័ព្ទ ១១៥
ដោយឡែក ក្រសួងសុខាភិបាល នៅថ្ងៃទី៦ ខែឧសភា ឆ្នាំ២០២៥នេះ បានចេញសេចក្តីប្រកាសព័ត៌មាន ស្តីពីការការពារខ្លួនពីការឆ្លងបាក់តេរីអង់ត្រាក់ ឬហៅម្យ៉ាងទៀតថា ជំងឺពិសធ្យូងឬជំងឺឈាមខ្មៅ។ ក្រសួងបញ្ជាក់ថា ថ្មីៗនេះជំងឺនេះបានផ្ទុះឡើងនៅប្រទេសជិតខាងកម្ពុជា និងបណ្តាប្រទេសមួយចំនួនទៅលើមនុស្សនិងសត្វ។ ជំងឺអង់ត្រាក់ឬជំងឺឈាមខ្មៅនេះ ជាជំងឺដ៏កម្រ ហើយធ្ងន់ធ្ងរដែលអាចកើតឡើងជាចម្បងដល់សត្វពាហនៈ និងសត្វព្រៃ ប៉ុន្តែជំងឺនេះមានឱសថសម្រាប់ព្យាបាល និងមានថ្នាំវ៉ាក់សាំងសម្រាប់ចាក់បង្ការផងដែរ។
ក្រសួងបានបន្តពីរបៀបនៃការចម្លងពីសត្វពាហនៈទៅមនុស្សថា វាអាចឆ្លងដោយសារការប៉ះពាល់ផ្ទាល់ជាមួយសត្វដែលមានជំងឺនេះ នៅកន្លែងដាច់រលាត់ស្បែកនៃសត្វនោះ។ ការសម្លាប់សត្វដែលមានផ្ទុកមេរោគអង់ត្រាក់នេះ ឬផលិតផលដែលមានដើមកំណើតពីសត្វដែលមានជំងឺនេះ ដូចជា សាច់ ឈាម រោម ឆ្អឹងជាដើម។ ការដកដង្ហើមចូលនូវធីលី ដែលមានស្ព័រមេរោគអង់ត្រាក់។ ប្រើម្ជុលរួមគ្នាជាមួយមនុស្សមានផ្ទុកមេរោគអង់ត្រាក់ បរិភោគសត្វដែលមានមេរោគអង់ត្រាក់ ជាដើម។
ក្រសួងសុខាភិបាបន្តថា ជំងឺពិសធ្យូងនេះ មិនទាន់រកឃើញមាននៅកម្ពុជានៅឡើយនោះទេ ប៉ុន្តែក្រសួងក៏បានដាក់ចេញនូវវិធានការមួយចំនួនដើម្បីទប់ស្កាត់ និងការពារដល់សុខមាភាពសត្វ ពិសេសមនុស្ស។ វិធានការទាំងនោះ ដូចជា ជៀសវាងប៉ះពាល់ដោយផ្ទាល់ជាមួយសត្វដែលសង្ស័យថាមានជំងឺអង់ត្រាក់។ ហាមបរិភោគសាច់សត្វដែលមានជំងឺអង់ត្រាក់។
ក្រសួងសុខាភិបាល៖ «សាកសពសត្វដែលងាប់ត្រូវយកទៅដុតកម្ទេច ឬកប់ចោល។ ត្រូវប្រញាប់បញ្ជូនអ្នកជំងឺដែលសង្ស័យមានជំងឺអង់ត្រាក់ទៅមន្ទីរពេទ្យជាបន្ទាន់ ដើម្បីទទួលការព្យាបាលឱ្យទាន់ពេលវេលា ឬទំនាក់ទំនងទៅកាន់លេខ១១៥»។
ប្រជាកសិករមួយចំនួនបានបង្ហាញការសាទរចំពោះវិធានការរបស់ក្រសួងសុខាភិបាលនេះ ប៉ុន្តែក៏មានការស្នើឱ្យក្រសួងពាក់ព័ន្ធត្រូវតាមដានករណីនេះឱ្យបានដិតដល់ ដើម្បីធានាដល់វិធានការដាក់ចេញឱ្យមានប្រសិទ្ធភាពខ្ពស់។
ពលរដ្ឋមួយរូបឈ្មោះ លីវ ស៊ាវឡុង បានលើកឡើងថា សុំសំណូមពរក្រសួងកសិកម្មជួយទប់ស្កាត់ជំងឺនេះឱ្យមានប្រសិទ្ធភាពជាងពេលមុន។
ពលរដ្ឋមួយរូប ឈ្មោះ មីគី បានលើកឡើងថា សូមអស់លោក មេត្តាប្រាប់ពីរោគសញ្ញានៃជំងឺអង់ត្រាកដែលកើតលើសត្វ វិធីព្យាបាល និងវ៉ាក់សាំងផង។ កសិករចិញ្ចឹមសត្វកំពុងដេកព្រួយ ដូចករណីជំងឺដុំពកលើស្បែកកាលពីប៉ុន្មានឆ្នាំមុន។
កសិករចិញ្ចឹមគោ និងដឹកគោនៅខេត្តកណ្តាលមួយរូបឈ្មោះ ហួង ម៉េង បានស្នើឱ្យឈ្មួញដែលតែងទិញគោពីប្រទេសថៃ អាចផ្អាក ហើយពិនិត្យឱ្យបានមែនទែន ជៀសវាងយកមកចម្លងដល់គោនៅកម្ពុជា។
លោក ហួង ម៉េង លើកឡើងថា៖ « បងដែលយកគោពីថៃមកលក់ជួយមើលៗផងបងអាណិតកសិករខ្មែរបងគោទឹមមានតម្លៃបន្តិចឥឡូវមានជំងឺផ្សេងទៀតហើយ។ ខ្ញុំចង់អោយបងៗយកគោពីថៃមកលក់នៅខ្មែរសូមមានការប្រុងប្រយ័ត្នផងកុំឲ្យជំងឺនេះឆ្លងមកដល់ខ្មែរ»។
បើបានកាសែតបាងកកប៉ុស្តិ៍របស់ថៃនៅថ្ងៃ៧ ខែឧសភា បានឱ្យដឹងថា បច្ចុប្បន្នមានអ្នកឆ្លងជំងឺអង់ត្រាក់ចំនួន ៤នាក់ ក្នុងនោះមានអ្នកស្លាប់១នាក់ ។ ការស៊ើបអង្កេតជំហានដំបូង រកឃើញ មានមនុស្សចំនួន ៦៣៦នាក់ មានហានិភ័យនៃជំងឺឆ្លងមួយនេះ ក្នុងនោះមនុស្សចំនួន ៥៣៨នាក់ បានបញ្ចប់ការតាមដាន ហើយមនុស្សចំនួន ៩៨នាក់ នឹងបញ្ចប់ការធ្វើតេស្តនៅថ្ងៃទី៧ ខែឧសភាផងដែរ៕
………………………………………………………
អត្ថបទដោយពលរដ្ឋអ្នកសារព័ត៌មាន ស៊ុន អ៊ូរ
