អ្នកឃ្លាំមើលបញ្ហាសង្គម បានលើកឡើងថា ករណីចោរដែលជាប់គុកហើយពេលដោះលែងទៅវិញ ពួកគេនៅប្រព្រឹត្តអំពើឬមុខរបរទាំងនោះដដែល អាចដោយសារការអនុវត្តច្បាប់ និងប្រព័ន្ធនៃការអប់រំដល់ពួកគេនៅមានកម្រិត ព្រមទាំងបញ្ហាបណ្តាញរបស់ពួកគេនៅតែមានទំនាក់ទំនងគ្នាដើម្បីធ្វើការងារនេះបន្តទៀត។
អ្នកស្រាវជ្រាវការអភិវឌ្ឍន៍ផ្នត់គំនិតលោក សេក សុជាតិ មានប្រសាសន៍ថា មិនមែនជារឿងល្អឡើយដល់សង្គម នៅពេលដែលឧក្រិដ្ឋជនជាប់ពន្ធនាគារហើយ ពេលចេញទៅវិញនៅតែប្រព្រឹត្តខ្លួនជាជនឧក្រិដ្ឋដដែលនោះ។ លោកបន្តថា បញ្ហានេះ កើតឡើងអាចបណ្តាលមកពីការអនុវត្តច្បាប់នៅមានកម្រិត ឬខ្វះខាតច្រើន ពិសេសពាក់ព័ន្ធការអប់រំផ្នត់គំនិតរបស់ឧក្រិដ្ឋជនដែលមិនខ្លាចគុក ដ្បិតនៅមានបណ្តាញពីខាងក្រៅដែលចាំយកពួកគេធ្វើសកម្មភាពដូចមុនទៀត។
លោកបន្តថា៖ «ដែលបញ្ហានេះ វាធ្វើឱ្យប៉ះពាល់ធ្ងន់ធ្ងរមែនទែនទៅដល់ទិដ្ឋភាពរួមរបស់សង្គម ជាពិសេសទាក់ទងទៅនឹងសន្តិសុខរបស់ប្រជាពលរដ្ឋនៅតាមសហគមន៍ ហើយនឹងនៅតាមដងផ្លូវដែលត្រូវធ្វើដំណើរ ។ ហើយនៅក្នុងនេះក៏គួរពិចារណាទៅដល់ការអនុវត្តច្បាប់របស់ប្រព័ន្ធតុលាការ ហើយនិងការប្រព្រឹត្តអំពើពុករលួយរបស់បុគ្គលមួយចំនួនដែលអាចមានពាក់ព័ន្ធទៅដល់ក្រុមឧក្រិដ្ឋជនដែលនៅខាងក្រោយហ្នឹង»។
ការលើកឡើងរបស់អ្នកឃ្លាំមើលនេះ ក្រោយពេលអគ្គស្នងការរង និងជាស្នងការនគរបាលរាជធានីភ្នំពេញ លោក ជួន ណារិន្ទ បានធ្វើសន្និសីទកាសែតមួយដែលត្រូវបានផ្សព្វផ្សាយនៅគេហទំព័រស្នងការដ្ឋាននគរបាលរាជធានីភ្នំពេញកាលពីថ្ងៃទី៥ ខែមីនា ឆ្នាំ២០២៥ បង្ហាញថា សមត្ថភាពនៃការយាមល្បាត ទប់ស្កាត់ និងការបង្ក្រាបបទល្មើសរបស់សមត្ថកិច្ចនៅភ្នំពេញ ដែលប្រសិទ្ធភាពបង្ក្រាបបទល្មើសបានរហូតដល់៩៥ភាគរយ ពិសេសពាក់ព័ន្ធនឹង ករណីឆក់ លួច គាស់ផ្ទះ វាយឬប្លន់តាមដងផ្លូវ បានថយចុះ។
ប៉ុន្តែលោកសង្កេតឃើញថា មានឧក្រិដ្ឋជនករណីលួច ឆក់ ប្លន់ ដែលជាប់គុកប្រមាណ៩០ភាគរយ មិនរាងចាលឡើយ ដោយពួកគេពេលចេញពីពន្ធនាគារវិញ គឺ ចេញធ្វើសកម្មភាពលួច ឆក់ ប្លន់ដដែល។
លោក ជួន ណារិន្ទ មានប្រសាសន៍ថា៖ «មុខសញ្ញាដែលជាប់ពន្ធនាគារ ពីបទល្មើសនេះ(លួច ឆក់ ប្លន់) ពេលទទួលទោសកែប្រែខ្លួនចប់ ចេញពីពន្ធនាគារមកវិញ ៩០ភាគរយ គាត់អត់ដែលដូរមុខរបរទេ! អ៊ីចឹងគាត់មក គាត់បន្តធ្វើទៀត។ អីចឹងទេថ្មីៗនេះ យើងឃាត់ចាប់ខ្លួនទៅ គឺថា សុទ្ធតែអ្នកធ្លាប់ជាប់អស់អាញត្តិចេញពីពន្ធនាគារហើយ ចេញមកវិញប្រព្រឹត្តដដែល»។
គិតត្រឹមដើមត្រីមាសទី១ ឆ្នាំ២០២៥ មានបទល្មើសតូចធំ សរុប១២២ករណី ក្នុងនោះមានបទឧក្រិដ្ឋ២៦ករណី។ ក្នុងចំណោម១២២ករណីនេះ សមត្ថកិច្ចបង្ក្រាបបាន១១៦ករណី ស្មើនឹង៩៥ភាគរយនៃបទល្មើសសរុប ខណៈបទល្មើសឧក្រិដ្ឋបង្ក្រាបបាន២០ករណី។ ចំពោះ សំណុំរឿងបទក្រិដ្ឋនេះ សមត្ថកិច្ចកំពុងដំណើរការនីតិវិធី និងស្រាវជ្រាវបន្ត ហើយសមត្ថកិច្ចបានឃាត់ខ្លួនជនសង្ស័យ៥០នាក់។ បទល្មើសឧក្រិដ្ឋដែលកើតឡើង ១២២ករណី នៅដើមត្រីមាសទី១ ក្នុងឆ្នាំ២០២៥នេះ បើធើបទៅនឹងត្រីមាសទី១ឆ្នាំ ២០២៤ មានការថយចុះ១៨ករណី ស្មើនឹង១៣ភាគរយ។ រីឯបទមជ្ឈិមវិញ បើធៀបនឹងរយៈពេលដូចគ្នា មានការថយចុះ១២លើក ស្មើនឹង១៣ភាគរយ។
សម្រាប់លោក សេក សុជាតិ យល់ថា ប្រសិនបើបញ្ហាឧក្រិដ្ឋជនដែលជាប់ពន្ធនាគារ ហើយមិនរាងចាលនៅតែបន្តធ្វើសកម្មភាព លួច ឆក់ ប្លន់ ទៀតនោះ នឹងធ្វើឱ្យប៉ះពាល់ធ្ងន់ធ្ងរដល់សន្តិសុខសាធារណៈ ប៉ះពាល់ដល់ ទំនុកចិត្តប្រជាពលរដ្ឋ ហើយភាពភ័យខ្លាចរបស់ពលរដ្ឋនឹងនៅតែបន្តកើតមាន។ បន្ថែមពីនេះ នឹងផលប៉ះពាល់ដល់មុខមាត់ កិត្តិយស សេចក្តីថ្លៃថ្នូររបស់ប្រទេសជាតិ។ មិនត្រឹមតែប៉ុណ្ណោះ បញ្ហានេះនឹងធ្វើឱ្យប៉ះពាល់វិស័យទេសចរណ៍ ពាណិជ្ជកម្ម ដោយអ្នកវិនិយោគពីខាងក្រៅនឹងមិនហ៊ានចូលមករកស៊ីនៅកម្ពុជាឡើយ៕
…………………………………………………
អត្ថបទដោយពលរដ្ឋអ្នកសារព័ត៌មាន ស៊ុន អ៊ូរ
