សមត្ថកិច្ចរាជធានីភ្នំពេញ អះអាងថា ការចាប់ខ្លួនសកម្មជនគណបក្សកម្លាំងជាតិ លោក ផាន់ សារ៉ាត់ ដោយផ្អែកតាមអង្គហេតុនិងអង្គច្បាប់ ពាក់ព័ន្ធនឹងចេតនាផ្សាយព័ត៌មានមិនពិតដែលនាំឱ្យមានការរើសអើងថ្នាក់ដឹកនាំ និងប៉ះពាល់ដល់សន្តិសុខជាតិ។
ការអះអាងនេះ ធ្វើឡើងក្រោយពីគណបក្សកម្លាំងជាតិ បានចេញសេចក្តីថ្លែងការណ៍មួយកាលពីថ្ងៃម្សិលមិញ ដោយចោទថា អាជ្ញាធរបានចុះចាប់សមាជិករបស់ខ្លួនដល់ផ្ទះ ដែលស្ថិតនៅភូមិធន់មន សង្កាត់បារាយណ៍ ក្រុងដូនកែវ ខេត្តតាកែវ កាលពីថ្ងៃអង្គារ ដោយមិនមានដីកា និងមូលហេតុច្បាស់លាស់ ដែលជាការបំភិតបំភ័យ និងគាបសង្កត់លើផ្នែកនយោបាយរបស់គណបក្សក្រៅរដ្ឋាភិបាល។
បើតាមសេចក្ដីប្រកាសព័ត៌មានរបស់ស្នងការដ្ឋាននគរបាលរាជធានីភ្នំពេញ ដែលចេញផ្សាយនៅរសៀលថ្ងៃទី៣០ ខែមករានេះ ឱ្យដឹងថា ការចាប់ខ្លួនលោក ផាន់ សារ៉ាត់ ពាក់ព័ន្ធនឹងការញុះញង់បង្កភាពវឹកវរដល់សន្តិសុខសង្គម ផ្សព្វផ្សាយព័ត៌មានបំភ្លៃខុសពីការពិត ដែលមានចេតនាញុះញង់ នាំឱ្យមានការរើសអើងថ្នាក់ដឹកនាំ និងធ្វើឱ្យប៉ះពាល់ដល់សន្តិសុខជាតិ កាលពីពេលកន្លងមក។
ក្នុងសេចក្ដីប្រកាសព័ត៌មាន បានអះអាងថា លោក សារ៉ាត់ ព្រមទទួលស្គាល់ថាខ្លួនពិតជាបានធ្វើសកម្មភាពបំភ្លៃព័ត៌មាន និងចែកចាយព័ត៌មានមិនពិត ដែលមានលក្ខណៈញុះញង់បង្កភាពវឹកវរដល់សន្តិសុខសង្គមពិតប្រាកដមែន ហើយនគរបាល បានកសាងសំណុំរឿង និងបានបញ្ជូនលោក សារ៉ាត់ ទៅកាន់សាលាដំបូងរាជធានីភ្នំពេញ នៅព្រឹកថ្ងៃព្រហស្បតិ៍នេះ។
សមត្ថកិច្ច ក៏បានគូសបញ្ជាក់ដែរថា ការចាប់ខ្លួនសកម្មជនបក្សប្រឆាំងរូបនេះ គឺជាការអនុវត្តតាមច្បាប់ ដោយមិនពាក់ព័ន្ធនឹងការគាបសង្កត់ ឬបំភិតបំភ័យ ផ្នែកនយោបាយលើសិទ្ធិបញ្ចេញមតិនោះទេ។
តែយ៉ាងណា ក្នុងសេចក្តីប្រកាសព័ត៌មានរបស់សមត្ថកិច្ច មិនបានបញ្ជាក់ថាតើ លោក ផាន់ សារ៉ាត់ បានផ្សព្វផ្សាយព័ត៌មានមិនពិត លើករណីណាមួយនោះទេ។
Newsroom Cambodia មិនអាចសុំការបញ្ជាក់បន្ថែមករណីនេះ ពីអ្នកនាំពាក្យស្នងការនគរបាលរាជធានីភ្នំពេញ លោក សំ វិច្ឆិកា និងអ្នកនាំពាក្យក្រសួងមហាផ្ទៃ លោក ទូច សុខៈ និងអ្នកនាំពាក្យសាលាដំបូងរាជធានីភ្នំពេញ លោក ប្លង់ សុផល និង លោក អ៊ី រិន្ទ បានទេ ដោយសារខលចូលមិនមានអ្នកទទួល ខណៈផ្ញើសំណួរតាមប្រព័ន្ធតេឡេក្រាមមិនមានការឆ្លើយតប។
អ្នកស្រី អឿន ម៉ៅ ជាភរិយារបស់លោក ផាន់ សារ៉ាត់ និយាយថា ពីមុនមក ប្ដីរបស់អ្នកស្រី មិនធ្លាប់មានជម្លោះទាស់ទែងជាមួយបុគ្គលណាម្នាក់នោះទេ។ អ្នកស្រីបានស្នើយ៉ាងទទូចទៅតុលាការ ដោះលែងប្ដីរបស់អ្នកស្រី ឱ្យមានសេរីភាពដើម្បីបានមកជួបជុំគ្រួសារវិញ។
អ្នកស្រីនិយាយថា៖ «គាត់អត់ដែលមាន[ជម្លោះ]ស្អីទេ»។
លោក រ៉ុង ឈុន ទីប្រឹក្សាគណបក្សកម្លាំងជាតិ យល់ថា ការអះអាងរបស់សមត្ថកិច្ចរាជធានីភ្នំពេញ មិនបានឆ្លុះបញ្ចាំងពីទិដ្ឋភាពជាក់ស្ដែងនៅមូលដ្ឋានរបស់លោក ផាន់ សារ៉ាត់ ដែលមានភាពស្ងប់ស្ងាត់នោះទេ។ លោកថា ការបញ្ចេញមតិណាមួយរបស់លោក សារ៉ាត់ គ្រាន់តែរិះគន់ក្នុងន័យស្ថាបនាប៉ុណ្ណោះ។
លោកថា៖ «ខ្ញុំគិតថា គួរតែបញ្ឈប់រាល់ការចោទប្រកាន់គ្រាន់តែការបញ្ចេញមតិ ក្នុងន័យស្ថាបនា ចូលរួមការកែលម្អសង្គម វាស្របទៅនឹងគោលការណ៍ប្រជាធិបតេយ្យ»។
គិតមកដល់ពេលនេះ មានសមាជិកបក្សកម្លាំងជាតិចំនួន៤រូបហើយ ត្រូវបានចាប់ខ្លួន ក្នុងនោះមាន លោក ស៊ុន ចន្ធី ប្រធានគណបក្ស លោក ជិន ប៊ុណ្ណារ័ត្ន អគ្គនាយករដ្ឋបាល លោក អ៊ុំ វីរៈរដ្ឋ អគ្គហិរញ្ញិក (ដោះលែងក្រោយចុះចូល) លោក គា វិសាល អនុប្រធានក្រុមការងារ ខេត្តកំពង់ចាម និងលោក ផាន់ សារ៉ាត់ អនុប្រធានប្រតិបត្តិក្រុងដូនកែវ ខេត្តតាកែវ។
ប្រធានសមាគមការពារសិទ្ធិមនុស្សអាដហុក លោក នី សុខា យល់ថា កម្ពុជាដែលប្រកាន់ភ្ជាប់នូវនយោបាយប្រជាធិបតេយ្យ គួរតែមានការសន្ដោសប្រណីខ្ពស់ដល់ការបញ្ចេញមតិណាមួយរបស់ពលរដ្ឋ បើមានភាពឆ្គាំឆ្គងនោះ។
លោកបញ្ជាក់ថា៖ «កម្ពុជាជាប្រទេសមួយប្រកាន់នូវរបបប្រជាធិបតេយ្យសេរី ដូច្នេះនៅក្នុងប្រទេសប្រកាន់របបប្រជាធិបតេយ្យសេរី គឺជារបបមួយដែលគេបើកសិទ្ធិសេរីភាពឱ្យប្រជាពលរដ្ឋក្នុងការបញ្ចេញមតិហ្នឹងឱ្យបានទូលំទូលាយ ហើយបើសិនជាទោះបីថា ពលរដ្ឋនិយាយ នៅក្នុងកម្រិតដែលវាអាចមានការឆ្គាំឆ្គង ឬក៏វាខុសទាស់ត្រង់ណាក៏គេមិនសូវមានការចាប់ទោសដែរ»៕
…………………………………….
អត្ថបទដោយ៖ វ៉ា សុភានុត
