តំណាងកម្មករម្នាក់បម្រើការងារនៅរោងចក្រ ស៊ិនឡន អ៊ិនធើណេសិនណល (ខេមបូឌា) (ឯ.ក (CINLON INTERNATIONAL (CAMBODIA) CO.,LTD) ស្ថិតតាមបណ្ដោយផ្លូវលេខជាតិ៤១ ក្នុងភូមិចាស់ ឃុំពេជ្រមុនី ស្រុកគងពិសី ខេត្តកំពង់ស្ពឺ ត្រូវបានតុលាការខេត្តនេះ កោះហៅឱ្យឆ្លើយបំភ្លឺនៅចុងខែធ្នូនេះ ក្រោយមានវិវាទការងារជាមួយថែកែរោងចក្រ។
កាលពីថ្ងៃទី១៦ ខែវិច្ឆិកា ឆ្នាំ២០២៣ ចៅក្រមស៊ើបសួរសាលាដំបូងខេត្តកំពង់ស្ពឺអ្នកស្រី ស៊ លីណា បានចេញដីកាបង្គាប់ឱ្យតំណាងកម្មក និងជាអនុប្រធានសហជីពសិទ្ធិកម្មករខ្មែរប្រចាំរោងចក្រ ស៊ិនឡន អ្នកស្រី ប៊ូ រ៉ាត់ ឱ្យចូលទៅបំភ្លឺចំពោះតុលាការនៅថ្ងៃទី២៧ ខែធ្នូ ឆ្នាំ២០២៣ ក្រោមបទចោទ «លក្ខខណ្ឌអត្ថិភាព នៃការញុះញង់ និងញុះញង់ឱ្យប្រព្រឹត្តបទឧក្រិដ្ឋជាអាទ៍» តាមបណ្តឹងរបស់ក្រុមហ៊ុន។
អនុប្រធានសហជីពសិទ្ធិកម្មករខ្មែរប្រចាំរោងចក្រ ស៊ិនឡន អ្នកស្រី ប៊ូ រ៉ាត់ និយាយថា អ្នកស្រីនឹងចូលទៅបំភ្លឺតាមការកោះហៅរបស់តុលាការ ដោយអ្នកស្រីថា អ្នកស្រីមិនបានប្រព្រឹត្តកំហុសដូចការចោទប្រកាន់ឡើយ។
កម្មការិនី និងជាអនុប្រធានសហជីពរូបនេះបានចាត់ទុកថា ករណីថៅកែរោងចក្រប្តឹងអ្នកស្រីទៅតុលាការ និងតុលាការចាត់វិធានការលើប្តឹងនោះ គឺបង្ហាញពីរំលោភសិទ្ធិសហជីព និងជាការគំរាមកំហែងមិនឱ្យពួកគាត់ហ៊ានតវ៉ាទាមទារសិទ្ធិការងារតែប៉ុណ្ណោះ។
អ្នកស្រី ប៊ូ រ៉ាត់ បានឱ្យដឹងថា កាលពីអំឡុងខែមិថុនា ឆ្នាំ២០២២ ពួកគាត់បាននាំគ្នាចងក្រងបង្កើតសហជីពមូលដ្ឋាននៅក្នុងរោងចក្រ ស៊ិន ឡន ដើម្បីការពារផលប្រយោជន៍របស់កម្មករ ក្រោយពីមើលឃើញរោងចក្រនេះរំលោភសិទ្ធិកម្មករ។ អ្នកស្រីថា ក្រោយជូនដំណឹងអំពីគម្រោងបង្កើតសហជីពនេះទៅភាគីរោងចក្រ គឺពួកគាត់ដែលជាថ្នាក់ដឹកនាំសហជីពចំនួន៣នាក់ត្រូវថៅកែបញ្ឈប់ពីការងារ និងបានប្តឹងអ្នកស្រីទៅតុលាការថែមទៀត។
អ្នកស្រីបន្ថែមថា៖« អស់រយៈពេលកន្លងមកពីឆ្នាំមកហើយដែលតុលាការខេត្តកំពង់ស្ពឺមិនបានដោះស្រាយ។ យឺតយ៉ាវរឿងនេះបើនិយាយទៅពិបាកណាស់ក្នុងជីវភាពគ្រួសារ។ ពិបាកចុះឡើងតាមគោលការណ៍របស់តុលាការហៅចុះឡើងផង។គោលការណ៍របស់តុលាការអញ្ចឹងមានការផលប៉ះពាល់ច្រើនសម្រាប់ខ្ញុំ»។
ប្រធានសហជីពសិទ្ធិកម្មករខ្មែរ លោក ស្រឺ នាង ដែលត្រូវបានថៅកែបញ្ឈប់ពីការងារដែរនោះបាននិយាយថា វិវាទការងាររបស់ពួកគាត់កើតឡើងដោយសារថៅកែរើសអើងសហជីព។ លោកថា វិវាទការងារនេះ គឺពួកគាត់បានដាក់បណ្តឹងទៅក្រសួងការងារឱ្យជួយដោះស្រាយជាច្រើនដងហើយ ប៉ុន្តែពុំមានដំណោះស្រាយឡើយ បើទោះបីក្រសួងសម្រេចឱ្យថៅកែទទួលយកពួកគាត់ចូលធ្វើការងារវិញក៏ដោយ។
លោក ស្រឺ នាង លើកឡើងថា ភាគីក្រុមហ៊ុនមិនអនុវត្តតាមសេចក្តីសម្រេចរបស់ក្រសួងឡើយ ហើយពួកគាត់អត់ការងារធ្វើរយៈពេលជិត២ឆ្នាំ ដែលធ្វើឱ្យគាត់ជួបបញ្ហាជីវភាពជាខ្លាំង។
លោកបន្ថែមថា៖«ខ្ញុំសំណូមពរទៅដល់ក្រសួងការងារជំរុញខាងក្រុមហ៊ុនរោងចក្រគោរពច្បាប់សហជីព។ សុំឱ្យក្រសួងជួយពន្លឿនរឿងហ្នឹង ព្រោះអីរឿងនេះ វាបានពន្យារពេលយូរហើយតាំងពីឆ្នាំ ២០២២ ខែ ០៦។ ហើយសំណូមពរដល់ក្រសួងជួយឱ្យសហជីពពួកយើងខ្ញុំចូលធ្វើការងារបានវិញផង ជាពិសេស គឺខាងតុលាការសាលាដំបូងខេត្តកំពង់ស្ពឺកាត់ក្តីឱ្យមានភាពយុត្តិធម៌ និងតម្លាភាពផង»។
ពលរដ្ឋអ្នកសារព័ត៌មានមិនអាចសុំការបញ្ជាក់ជុំវិញករណីនេះពីតំណាងរោងចក្រ ស៊ិនឡន បានទេនៅថ្ងៃចន្ទនេះ។
ប្រធានសហព័ន្ធសហជីពឯករាជ្យ លោក រី សិទ្ធីណែត ដែលតាមដានករណីនេះមានប្រសាសន៍ថា ករណីថៅកែប្តឹងតំណាងកម្មករទៅតុលាការនេះ គឺជាការគំរាមកំហែង និងជាការរំលោភសិទ្ធិកម្មករធ្ងន់ធ្ងរ។
លោក រី សិទ្ធីណែត បន្តថា ជុំវិញវិវាទការងារនេះ សហព័ន្ធសហជីពរបស់លោក បានដាក់លិខិតមួយទៅក្រសួងការងារ ដើម្បីសុំអន្តរាគមន៍ពីរដ្ឋមន្ត្រីក្រសួងការងារលោក ហេង សួរ ឱ្យជួយដោះស្រាយ ដោយជំរុញទៅថៅឱ្យទទួលយកថ្នាក់ដឹកនាំសហជីពទាំង៣នាក់នោះចូលធ្វើការងារវិញ និងបើកប្រាក់រំលឹកអតីតភាពការងារជូនផងដែរ។
លោកបន្ថែមថា៖« ករណីប្ដឹងផ្ដល់នេះ គឺជាការកំរាមកំហែងមួយ ដែលខាងនិយោជក់ចិត្តខ្មៅ ចិត្តអាក្រក់។ តែងតែយកលឡេះ និងបណ្ដឹងទៅដល់តុលាការ។ នេះគឺជាការបំបាក់ស្មារតីដល់និយោជិក។ អញ្ចឹងគួរណាស់តែខាងតុលាការផ្ដល់នៅភាពយុត្តិធម៌ ហើយជាពិសេស គឺខាងរោងចក្រស៊ីនឡន គួរផ្ដល់ឱ្យសហជីពកម្មករចូលធ្វើការវិញ។ ព្រោះខាងរោងចក្របានធ្វើកិច្ចសន្យាជាមួយក្រសួងការងារហើយដែរ។ សង្ឃឹមថា រដ្ឋាភិបាលថ្មីរបស់សម្ដេចបវរធិបតីនឹងជួយដល់កម្មករដែលកំពុងអត់មានការងារធ្វើកំពុងតែប្រឈមហ្នឹងភាពខ្វះខាតផងដែរ»។
កាលពីថ្ងៃទី៤ ខែកក្កដា ឆ្នាំ២០២២ នាយកដ្ឋានវិវាទការងារ បានចេញលិខិតមួយបញ្ជាទៅថៅកែរោងចក្រ ស៊ិនឡន ឱ្យទទួលកម្មករ ៣នាក់នោះចូលធ្វើការងារវិញ ក្រោយរកឃើញថា ការបញ្ឈប់នោះមិនត្រឹមត្រូវតាមផ្លូវច្បាប់។
លិខិតបានបញ្ជាក់ថា ក្រោយពីពិនិត្យមើលសំណុំរឿង នៃពាក្យបណ្តឹងរបស់កម្មករ ដោយផ្អែកលើអង្គហេតុ និងអង្គច្បាប់ បានរកឃើញថា ករណីថៅកែបញ្ឈប់កម្មករទាំងនោះ គឺធ្វើឡើងមិនត្រូវតាមច្បាប់ស្តីពីសហជីព ត្រង់មាត្រា៤៣ ដែលចែងថា រាល់ការបញ្ឈប់ប្រតិភូបុគ្គលិក ឬរាល់ការបញ្ឈប់បេក្ខជនណាម្នាក់ពីការងាររបស់ខ្លួន អាចធ្វើទៅបាន លុះត្រាតែមានការយល់ព្រមពីអធិការការងារ។
មួយទៀតនោះ មាត្រា៦៧ នៃច្បាប់ដដែលនេះ ចែងថា កម្មករនិយោជិតទាំងអស់ដែលជាបេក្ខជនឈរឈ្មោះសម្រាប់ការបោះឆ្នោតជ្រើសរើសថ្នាក់ដឹកនាំគ្រប់គ្រងសហជីព ទទួលបាននូវការការពារពីការរងគ្រោះ និងការបញ្ឈប់ពីការងារដូចប្រតិភូបុគ្គលិកដែរ។
អង្គការឃ្លាំមើលសិទិ្ធមនុស្សអន្តរជាតិ Human Rights Watch បានចេញរបាយការណ៍មួយកាលពីថ្ងៃទី២១ ខែវិច្ឆិកា ឆ្នាំ២០២២ ដោយលើកឡើងថា នៅកម្ពុជាមានតែសហជីពដែលស្និទ្ធជាមួយថៅកែនោះទេ ទើបអាចបន្តរស់រានមានជីវិតបានល្អប្រសើរ ខណៈសហជីពឯករាជ្យក្នុងវិស័យកាត់ដេរសម្លៀកបំពាក់ និងទេសចរណ៍ បានរងការធ្វើទុក្ខបុកម្នេញឥតស្រាកស្រាន្តពីសំណាក់ថៅកែ និងរដ្ឋាភិបាល។
អង្គការអន្តរជាតិមួយនេះបានជំរុញទៅរដ្ឋាភិបាលកម្ពុជា អនុវត្តឱ្យពេញលេញនូវកាតព្វកិច្ចជាអន្តរជាតិរបស់កម្ពុជា ក្រោមអនុសញ្ញាអង្គការពលកម្មអន្តរជាតិ ហើយត្រូវធ្វើវិសោធនកម្ម ឬលុបចោលមាត្រាច្បាប់ទាំងឡាយណាដែលរឹតត្បិតសិទ្ធិសេរីភាពបង្កើតសមាគម និងរំលោភសិទ្ធិសេរីភាពបញ្ចេញមតិ ដូចជា «បទញុះញង់» «បទបរិហារកេរ្តិ៍» «បទបរិហារជាសាធារណៈ» ឬ «បទបរិហារកេរ្តិ៍មន្ត្រីសាធារណៈ» ដើម្បីធានាដល់ការការពារសិទ្ធិមនុស្សនៅកម្ពុជា៕
……………………………………..
អត្ថបទដោយពលរដ្ឋអ្នកសារព័ត៌មាន លោក សួស ចាន់ឌឿន
