ក្រសួងអប់រំបានប្រកាសលុបឈ្មោះ លោក ស៊ិន វត្ថា ជាប្រធានគណបក្សភ្លើងទៀនខេត្តបន្ទាយមានជ័យ ចេញពីក្របខណ្ឌគ្រូបង្រៀន ក្រោមហេតុផលថា បានប្រព្រឹត្តកំហុសឆ្គងវិជ្ជាជីវៈមន្រ្តីរាជការ។ នេះបើតាមលិខិតរបស់ក្រសួងអប់រំ យុវជននិងកីឡា ចុះថ្ងៃទី០៨ ខែមិថុនា ឆ្នាំ២០២៣។
លោក ស៊ិន វត្ថា ប្រធានក្រុមការងារគណបក្សភ្លើងទៀនខេត្តបន្ទាយមានជ័យ ជំរុញឱ្យក្រសួងអប់រំ បង្ហាញពីកំហុសឆ្គងរបស់លោកដើម្បីបណ្ដេញលោកចេញពីក្របខណ្ឌនេះ។
លោក វត្ថា និយាយថា៖ «ពាក្យក្នុងសេចក្ដីសម្រេចគឺវាមិនច្បាស់លាស់ តែខ្ញុំច្បាស់ខ្លួនឯងថាមិនមានកំហុសណាពាក់ព័ន្ធទៅលើការបង្រៀនបំពេញតួនាទីខ្ញុំទេ»។
អ្នកនាំពាក្យក្រសួងអប់រំ លោក រស់ សុវាចា មិនអាចសូមការអត្ថាធិប្បាយបានទេនៅថ្ងៃចន្ទ ដោយហៅចូលពុំមានអ្នកលើកទូរសព្ទ។
លោក ខឹម តាំងស៊ុន អនុប្រធានមន្ទីរអប់រំខេត្តបន្ទាយមានជ័យ ប្រាប់ឱ្យអ្នកសារព័ត៌មានសួរ ទៅប្រធានមន្ទីរអប់រំជំនួសវិញ។ ដោយឡែកប្រធានមន្ទីរអប់រំខេត្តបន្ទាយមានជ័យ លោក ឈូ ប៊ុនរឿង ហៅចូលតែពុំមានអ្នកលើកទូរសព្ទ។
លោក វត្ថា ដែលធ្វើជាគ្រូបង្រៀនតាំងពីឆ្នាំ ២០០៧ និងបច្ចុប្បន្នបង្រៀននៅថ្នាក់ទី១១, ទី១២ នៅវិទ្យាល័យសិរីសោភ័ណ ខេត្តបន្ទាយមានជ័យ និយាយថា ការលុបឈ្មោះលោកចេញពីក្របខណ្ឌនេះ ជាការរើសអើងផ្នែកនយោបាយមកលើរូបលោកដែលជាសមាជិកគណបក្សជំទាស់។
លោក អះអាងថា ការបង្រៀនរាល់ថ្ងៃនេះ លោកមិនដែលប្រព្រឹត្តអំពើពុករលួយ លក់ក្រដាសឱ្យសិស្ស និងបែងចែកពេលវេលាច្បាស់លាស់ទាំងក្នុងម៉ោងបង្រៀននិងការងារបក្ស។
លោក វត្ថា និយាយថា៖ «កំហុសខ្ញុំមិនដែលបានធ្វើអ្វីសោះគឺជាអំពើយ៉ាងអាក្រក់មួយទៅដល់ប្រទេសជាតិដូចជាមនុស្សជំនាន់ក្រោយជាពិសេសវិស័យអប់រំគ្រូៗ និងសិទ្ធិសេរីភាពប្រជាពលរដ្ឋ។…ខ្ញុំជីវភាពគ្រូបង្រៀននិយាយទៅបានមួយរស់ៗ ខ្ញុំមិនដែលពុករលួយទេ មានតែចេញលុយឱ្យសិស្សទៀត… ខ្ញុំគ្មានលក់ក្រដាសស្អីទេ ខ្ញុំមិនដែលពាក់ព័ន្ធទាំងអស់ សួរសិស្សបាន ខ្ញុំមានតែហែកក្រដាសសរសេរទេ ជីវិតគ្រូបង្រៀនបានមួយរស់ៗនេះ ហើយគាត់[ក្រសួងអប់រំ ]មកធ្វើបែបនេះគឺវាមិនត្រឹមត្រូវទេ»។
ច្បាប់ស្ដីពីសហលក្ខន្តិកៈមន្រ្តីរាជការស៊ីវិល មាត្រា ៤៧ ឱ្យដឹងថា កំហុសឆ្គងក្នុងវិន័យរហូតដល់បណ្ដេញចេញពីក្របខណ្ឌ ត្រូវហៅអ្នករាជការជាប់ចោទមកពន្យល់ដោះសារដោយផ្ទាល់មាត់ និងជាលាយលក្ខណ៍អក្សរមុននឹងក្រុមប្រឹក្សាវិន័យធ្វើការសន្និដ្ឋានអំពីកំហុសនិងទណ្ឌកម្ម ដើម្បីជាយោបល់ដល់ថ្នាក់មានសមត្ថកិច្ចសំរេច។
លោក វត្ថា លើកឡើងថា មន្ទីរអប់រំខេត្តពុំធ្លាប់ធ្វើការណែនាំលោកផ្ទាល់មាត់ និងព្រមានជាលាយលក្ខណ៍អក្សរម្តងណាឡើយ មុននឹងសម្រេចបណ្ដេញលោកចេញពីក្របខណ្ឌនេះ។ ជុំវិញករណីនេះ លោក វត្ថា គ្រោងនឹងដាក់ពាក្យប្ដឹងជំទាស់ការលុបឈ្មោះចេញពីក្របខណ្ឌទៅកាន់ក្រសួងអប់រំដោយផ្ទាល់។
លោក ប្រាក់ ចាន់សោភ័ណ នាយករងវិទ្យាល័យសិរីសោភ័ណ ថ្លែងថា សាលាពុំដឹងនោះទេ ថាក្រសួងអប់រំលុបឈ្មោះ លោក ស៊ិន វត្ថា ចេញពីក្របខណ្ឌនោះ។ លោកបន្ថែមថា លោក វត្ថា ជាគ្រូបង្រៀនគោរពច្បាប់ទម្លាប់មួយរូប។
លោក និយាយថា៖ «ពេលដែលគាត់មកបង្រៀនគឺបង្រៀន ពេលដែលគាត់សុំច្បាប់ គាត់សុំតែទៅណាទៅណីខាងយើងអត់ដឹងទេ ព្រោះគាត់មានធុរៈផ្ទាល់ខ្លួនគាត់»។
នាយកកិច្ចការទូទៅនៃអង្គការការពារសិទ្ធិមនុស្សលីកាដូ លោក អំ សំអាត ជំរុញឱ្យក្រសួងអនុវត្តវិធានការផ្ទៃក្នុង មុននឹងឈានទៅរកការបញ្ឈប់បុគ្គលិកពីក្របខណ្ឌ។
លោក ក៏បានណែនាំឱ្យលោក ស៊ិន វត្ថា ប្ដឹងជំទាស់ទៅនឹងការសម្រេចបណ្ដេញចេញពីក្របខណ្ឌនេះ បើសិនជាយល់ថាពុំមានមូលហេតុច្បាស់លាស់។
កាលពីថ្ងៃទី២០ ខែមេសា ឆ្នាំ២០២៣ រដ្ឋបាលខេត្តកណ្ដាល បានលុបឈ្មោះ លោក ផុន សុភា លេខាធិការគណបក្សភ្លើងទៀនប្រចាំខេត្តកណ្តាល ចេញពីក្របខណ្ឌមន្រ្តីរាជការស៊ីវិល ក្រោមហេតុផលថា លោក ផុន សុភា បានប្រព្រឹត្តផ្ទុយទៅនឹងច្បាប់ស្ដីពីសហលក្ខន្តិកៈមន្រ្តីរាជការស៊ីវិល មាត្រា៣៧ ដែលចែងអំពីអព្យាក្រឹតភាព នៃមន្រ្តីរាជការស៊ីវិល៕
……………………………
អត្ថបទដោយពលរដ្ឋអ្នកសារព័ត៌មាន លោក វ៉ា សុភានុត
