ស្លាកសញ្ញាគណបក្សភ្លើងទៀននៅជាប់ដីរបស់ក្រុមហ៊ុន អេស ប៊ី ប៊ី ភី គ្រុប ស្ថិតនៅក្នុងឃុំព្រៃតាអី ស្រុកស្វាយទាប ខេត្ដស្វាយរៀង ត្រូវបានម្ចាស់ក្រុមហ៊ុនមួយនេះដកចេញពីទីតាំងដើម ប៉ុន្តែមិនបានបញ្ជាក់ពីមូលហេតុនោះទេ។
មន្ត្រីគណបក្សភ្លើងទៀនក្នុងខេត្តនេះបញ្ជាក់ថា កាលពីថ្ងៃចន្ទ ទី២២ ខែឩសភា ឆ្នាំ២០២៣ ស្លាកសញ្ញារបស់គណបក្សភ្លើងទៀន ចំនួន១ដែលនៅជាប់ដីរបស់ក្រុមហ៊ុន អេស ប៊ី ប៊ី ភី គ្រុប(S B B P Group) ដែលបច្ចុប្បន្នជាក្រុមហ៊ុនពុះដីឡូតិ៍ស្ថិតនៅក្នុងភូមិត្រពាំងតាអី ឃុំព្រៃតាអី ស្រុកស្វាយទាប ខេត្ដស្វាយរៀង ត្រូវបានម្ចាស់ក្រុមហ៊ុននេះនិងមេការរបស់ខ្លួនដកចេញពីកន្លែងដើម ហើយយកទៅផ្អែកនៅរបងផ្ទះសមាជិកគណបក្សភ្លើងទៀនម្នាក់នៅក្នុងឃុំព្រៃតាអី។
លោក សោម បឿន សមាជិកគណបក្សភ្លើងទៀនដែលបានឃើញហេតុការណ៍នេះ បានប្រាប់ពលរដ្ឋអ្នកសារព័ត៌មានថា នៅម៉ោង៣និង៥០នាទី កាលពីថ្ងៃទី២២ ខែឧសភា ស្លាកសញ្ញាគណបក្សភ្លើងទៀនដែលដាក់នៅក្នុងភូមិព្រៃត្រពាំងតាអី ត្រូវបានបុគ្គលពីរនាក់មកដកចេញពីកន្លែងដើម ហើយបានយកស្លាកសញ្ញាគណបក្សនោះមកផ្អែកនៅរបងផ្ទះរបស់លោក។
លោកប្រាប់ថា បុគ្គលដែលមកដកស្លាកសញ្ញាគណបក្សនោះរួមមានទី១ឈ្មោះ សួស សម្បត្តិ ជាម្ចាស់ក្រុមហ៊ុន អេស ប៊ី ប៊ី ភី គ្រុប (S B B P Group) ហើយម្នាក់ទៀតជាមេការរបស់ក្រុមហ៊ុននេះតែម្ដងដែលមានឈ្មោះណាត។
លោកលើកឡើងថា៖ «ការដែលដកហ្នឹងខ្ញុំមិនបានឃើញទេ តែខ្ញុំឃើញគាត់បានជូនស្លាកមកដាក់នៅមុខផ្ទះរបស់ខ្ញុំនៅម៉ោង៣.៥០[នាទីរសៀល]មានគ្នាពីរនាក់ តាសម្បត្តិ ហ្នឹងមេការរបស់គាត់»។
លោកបន្ថែមថា ការដែលលោកនិងក្រុមការងារបានមកលើកស្លាកសញ្ញាគណបក្សបានជូនដំណឹងត្រឹមត្រូវទៅកាន់អាជ្ញាធរហើយមានកម្លាំងនគបាលចូលរួមការពារត្រឹមត្រូវ។ លោកប្រាប់ថាការលើកស្លាកសញ្ញាគណបក្សនេះមិនបានធ្វើឱ្យប៉ះពាល់ដល់នរណានោះទេហើយដីនេះជាដីសាធារណៈរបស់រដ្ឋផងដែរ។
លោកបន្តថា៖ « សមត្ថកិច្ចគាត់មកការពារ ដាក់កន្លែងហ្នឹងអត់មានប៉ះពាល់របស់អ្នកណាម្នាក់នោះទេ ដល់ពេលដកយកមកដាក់មុខផ្ទះខ្ញុំចឹង។ ខ្ញុំមានចម្ងល់ដែលខ្ញុំបានរាយការណ៍ឱ្យតំណាងមេបក្សហើយ »។
ប្រធានគណកម្មាធិការប្រតិបត្តិស្រុកស្វាយទាបរបស់គណបក្សភ្លើងទៀន លោក រត្ន័ សំបូ បានប្រាប់ពលរដ្ឋអ្នកសារព័ត៌មានថា ការដកស្លាកសញ្ញាគណបក្សនយោបាយនីមួយៗត្រូវជូនដំណឹងទៅកាន់អាជ្ញាធរ ហើយអាជ្ញាធរត្រូវជូនដំណឹងទៅកាន់ម្ចាស់ស្លាកឬសកម្មជនរបស់គណបក្សនៅតាមបណ្ដាឃុំនីមួយៗរបស់បក្សដែលខ្លួនចង់ដក។
លោកថា បើស្លាកសញ្ញាគណបក្សនោះធ្វើឱ្យប៉ះពាល់ដល់ក្រុមហ៊ុនឬបុគ្គលណាមួយអ្នកទាំងនោះត្រូវរាយការណ៍តាមរយៈមេភូមិឬមេឃុំដើម្បីឱ្យមេភូមិឬមេឃុំជូនដំណឹងមកភ្នាក់ងារគណបក្សប្រចាំឃុំនីមួយៗ ដើម្បីគាត់ចុះទៅដកដោយផ្ទាល់។
លោកបន្ថែមថា ការដែលបុគ្គលមួយទៅដកឬរុះរើស្លាកសញ្ញារបស់គណបក្សផ្សេងនោះជាអំពើខុសច្បាប់ ព្រោះការលើកស្លាកសញ្ញាគណបក្សនយោបាយនីមួយៗគឺត្រូវបានជូនដំណឹងទៅកាន់អាជ្ញាធរដែនដីឱ្យបានដឹងមិនមែនចេះតែធ្វើនោះទេ។
លោកលើកឡើងថា៖ « ពេលដែលយើងដាក់មិនមានបញ្ហាទេ ដោយសារមានប៉ូលិសមកការពារ មកឃុំគ្រងពេលដែលយើងដាក់ »។
លោកយល់ថា ការដកស្លាកសញ្ញាគណបក្សភ្លើងទៀននេះមិនមែនជាសកម្មភាពគំរាមគំហែងផ្នែកខាងនយោបាយនោះទេ ដោយលោកលើកឡើងថា អ្នកដែលមកដកស្លាកសញ្ញារបស់គណបក្សភ្លើងទៀននោះគាត់មិនមែនជាអ្នកនយោបាយមិនមែនជាមន្រ្ដីរបស់គណបក្សនយោបាយនោះទេ គ្រាន់តែជាអ្នករកស៊ីធម្មតា។
លោកបន្ថែមថា៖ « គ្មានសកម្មភាពគំរាមគំហែងអីនោះទេ ព្រោះគាត់មិនមែនជាអ្នកនយោបាយមិនមែនជាមន្រ្ដីពាក់ពន្ធ័នយោបាយគាត់ជាអ្នករកស៊ី ជាអ្នកធ្វើការប្រកបអាជីវកម្មរកស៊ីដូចពលរដ្ឋសាមញ្ញធម្មតា »។
លោក យិន ធាវី ជាមន្រ្ដីជាន់ខ្ពស់របស់គណបក្សភ្លើងទៀន និងជាប្រធានគណកម្មាធិការប្រតិបត្តិខេត្ដស្វាយរៀង បានប្រាប់ពលរដ្ឋអ្នកសារព័ត៌មានថា ករណីនេះលោកនឹងប្ដឹងទៅកាន់អាជ្ញាធរដែនដីដើម្បីឱ្យអាជ្ញាធរដែនដីកោះហៅបុគ្គលដែលហ៊ានដកស្លាកសញ្ញាគណបក្សនោះមកសួរនាំអំពីរឿងនេះ។
លោកប្រាប់ថា បើប្ដឹងទៅកាន់អាជ្ញាធរដែនដីមិនមានដំណោះស្រាយនោះទេលោកនឹងដាក់ពាក្យប្ដឹងទៅកាន់ស្នងការដ្ឋាននគរបាលខេត្ដស្វាយរៀងហើយ បើនៅតែគ្មានដំណោះស្រាយទៀតលោកនិងដាក់ពាក្យប្ដឹងទៅក្រសួងមហាផ្ទៃបន្ថែមទៀត។
លោកថា នៅក្នុងខេត្ដស្វាយរៀងទាំងមូលមានករណីបំផ្លាញស្លាកសញ្ញាគណបក្សភ្លើងទៀនមានចំនួន៦ករណីហើយនៅក្នុងឆ្នាំ២០២៣នេះ។
លោកលើកឡើងថា៖ « រាប់មកដល់ពេលនេះមាន៦ស្លាកហើយគឺនៅឃុំកំពង់ចំឡង់ ស្រុកស្វាយជ្រុំចំនួន៥ស្លាកនិងនៅព្រៃតាអីចំនួន១ស្លាកត្រឹមថ្ងៃនេះសម្រាប់ឆ្នាំ២០២៣ »។
ពលរដ្ឋអ្នកសារព័ត៌មានមិនអាចរកការទាក់ទងទៅលោក សួស សម្បត្តិ និងមេការរបស់ក្រុមហ៊ុនអេស ប៊ី ប៊ី ភី គ្រុប ឈ្មោះណាត បាននោះទេរហូតដល់ថ្ងៃទី២៤ ខែឧសភា។
មេឃុំព្រៃតាអី លោក នុត ផល្លា បានប្រាប់ពលរដ្ឋអ្នកសារព័ត៌មានថា ករណីដកស្លាកសញ្ញារបស់គណបក្សភ្លើងទៀននេះ លោកបានដោះស្រាយគ្នាជាមួយតំណាងគណបក្សភ្លើងទៀនប្រចាំឃុំព្រៃតាអីនិងតំណាងគណបក្សពីរនាក់ផ្សេងទៀតរួចហើយ។
លោកលើកឡើងថា៖ « ខ្ញុំបានដោះស្រាយគ្នារួចរាល់អស់ហើយ គាត់ខាងតំណាងគណបក្សភ្លើងទៀនគាត់មកសាលាឃុំ គាត់ក៏មិនថាអីដែរ។ ខ្ញុំបានសម្របសម្រួលគ្នាឱ្យគាត់ដាក់នៅផ្ទះសមាជិករបស់គាត់។ ខ្ញុំបានសម្របសម្រួលគ្នារួចរាល់អស់ហើយគាត់មិនថាអីទេ »។
លោក កន សាវាង្ស អ្នកសម្របសម្រួលផ្នែកអង្កេតនៃអង្គការខុមហ្រ្វែល បានប្រាប់ពលរដ្ឋអ្នកសារព័ត៌មានថា ដើម្បីដោះស្រាយបញ្ហានេះបានគណបក្សត្រូវដាក់ពាក់ប្ដឹងទៅកាន់អាជ្ញាធរមូលដ្ឋានដើម្បីឱ្យអាជ្ញាធរមូលដ្ឋានធ្វើការដោះស្រាយ។ លោកថា ក្នុងករណីស្គាល់មុខជនប្រព្រឹត្តទៀតកាន់តែប្រសើរ។
លោកលើកឡើងថា៖ « គណបក្សដើម្បីដោះស្រាយបានគណបក្សហ្នឹងធ្វើមិចដាក់ពាក្យបណ្ដឹងទៅអាជ្ញាធរមូលដ្ឋានដើម្បីឱ្យធ្វើការដោះស្រាយហើយ បើសិនជាការបំផ្លិចបំផ្លាញនេះបានដឹងច្បាស់លាស់អំពីជនប្រព្រឹត្តទៀតអាហ្នឹងរឹតតែប្រសើរ។ ជាការបើកផ្លូវមួយដើម្បីឱ្យអាជ្ញាធរមូលដ្ឋានធ្វើការអនុវត្តទៅតាមផ្លូវច្បាប់ »៕
…………………………………..
អត្ថបទដោយពលរដ្ឋអ្នកសារព័ត៌មានខេត្តស្វាយរៀង លោក សួន វត្ថា
