របាយការណ៍ពលរដ្ឋអ្នកសារព័ត៌មាន
អ្នកស្រី ណាក់ កេន ភរិយារបស់លោក រាជ សីម៉ា សកម្មជនដីធ្លីសហគមន៍ឡពាង ឃុំតាជេស ស្រុកកំពង់ត្រឡាច ខេត្តកំពង់ឆ្នាំង បានលើកឡើងថា ការកាត់ក្ដីរបស់តុលាការខេត្តកំពង់ឆ្នាំងកាលពីថ្ងៃម្សិលមិញ ដោយផ្ដន្ទាទោសប្ដីអ្នកស្រីឱ្យជាប់ពន្ធនាគាររយៈពេល២ឆ្នាំ គឺជារឿងអយុត្តិធម៌។
សាលាដំបូងខេត្ដកំពង់ឆ្នាំង កាលពីថ្ងៃទី៦ ខែកក្កដា បានផ្ដន្ទាទោសលោក រាជ សីម៉ា សកម្មជនតវ៉ាដីធ្លីសហគមន៍ឡពាងឱ្យជាប់ពន្ធនាគាររយៈពេល២ឆ្នាំ ក្រោមការចោទប្រកាន់ពីបទ ប្រើហិង្សាដោយចេតនាលើពលរដ្ឋម្នាក់ ស្ថិតក្នុងឃុំតាជេស ស្រុកកំពង់ត្រឡាច ខេត្តកំពង់ឆ្នាំង កាលពីឆ្នាំ២០២១។
អ្នកស្រី ណាក់ កេន អាយុ៣៧ឆ្នាំ ជាភរិយារបស់លោក រាជ សីម៉ា បានប្រាប់ពលរដ្ឋអ្នកសារព័ត៌មានថា កាលពីថ្ងៃម្សិលមិញ តុលាការខេត្តកំពង់ឆ្នាំង បានសម្រេចផ្ដន្ទាទោសប្ដីអ្នកស្រីឲ្យជាប់ពន្ធនាគារ២ឆ្នាំ និងពិន័យជាទឹកប្រាក់៤លានរៀល។ ប៉ុន្ដែអ្នកស្រីថា ការកាត់ក្ដីបែរនេះ វាអយុត្តិធម៌ណាស់ ពីព្រោះប្ដីអ្នកស្រីគ្មានទោស និងមិនបានប្រព្រឹត្តដូចការចោទប្រកាន់របស់តុលាការនោះទេ។
អ្នកស្រីថា កំឡុងពេលដែលប្ដីអ្នកស្រីជាប់ឃុំឃាំងបណ្ដោះអាសន្នអស់រយៈពេល៨ខែមកនេះ បានធ្វើឱ្យជីវភាពរបស់អ្នកស្រីជួបការលំបាកច្រើន។
អ្នកស្រីបន្ដអះអាងថា៖ «ពេលលឺថាប្ដីខ្ញុំជាប់ពន្ធនាគារ ខ្ញុំគ្មានកម្លាំងនិងអស់សង្ឃឹមក្នុងជីវិតអាហ្មង ខ្ញុំមិនដឹងថា ត្រូវដើរផ្លូវណាបន្ដនោះទេ ណាមួយបង់រដ្ឋ ណាមួយចិញ្ចឹមកូនហើយត្រូវរកតែឯង សុំឲ្យសម្ដេចជួយអន្ដរាគមន៍ដោះលែងប្ដីខ្ញុំមកវិញផង ខ្ញុំគ្មានទីពឹងទេ អស់ហើយ»។
ប្រធានសហគមន៍ឡពាង អ្នកស្រី អ៊ុំ សុភី បានចាត់ទុកថា វាជាការគំរាមកំហែងមួយសម្រាប់អ្នកណា ដែលហ៊ានចេញមុខតវ៉ារឿងដីធ្លី គឺគេនឹងប្រើប្រព័ន្ធតុលាការដើម្បីទប់ស្កាត់និងមិនឲ្យធ្វើសកម្មភាពតវ៉ាអ្វីទាំងអស់។ អ្នកស្រីថា សម្រាប់ខ្លួនអ្នកស្រីក៏ជាប់បណ្តឹងនៅក្នុងតុលាការខេត្តកំពង់ឆ្នាំង ចំនួន៥ករណីរួចមកហើយ ដោយមិនបានប្រកាសសាលក្រមណាមួយទេ គឺទុកឲ្យនៅក្រោមការតាមដានរបស់តុលាការរហូត ដោយមិនឲ្យអ្នកស្រីមានសេរីភាពពេញលេញ និងតែងតែចោទពួកអ្នកស្រីថា ជាបក្សប្រឆាំងហើយការធ្វើបែបនេះវាបានប៉ះពាល់ដល់សហគមន៍ឡពាងជាខ្លាំងដោយសារតែការប្រើប្រាស់ប្រព័ន្ធតុលាការនេះសម្រាប់ការគំរាមដើម្បីមិនឲ្យមានការតវ៉ា។
អ្នកស្រីបានសង្កត់ធ្ងន់ថា៖ «សម្រាប់ខ្ញុំ ខ្ញុំគិតថាគាត់(តុលាការ)ធ្វើចឹងដូចជាការគំរាមកំហែងពួកខ្ញុំដែលអ្នកប្ដឹងតវ៉ាក្រោយៗទៀត ហើយសម្រាប់ពួកខ្ញុំមានការព្រួយបារម្ភពីសុវត្ថិភាពខ្លួនឯងពេលចេញទៅតវ៉ាត្រូវតុលាការប្ដឹងដាក់គុកឲ្យច្រើនៗទៅ ដើម្បីគំរាមកំហែងអ្នកតវ៉ាក្រោយៗកុំឲ្យគាត់ហ៊ានតវ៉ា កាលណាគាត់ហ៊ានតវ៉ា គឺត្រូវមានការចាប់ដាក់ពន្ធនាគារចឹង»។
ចំណែកមេធាវីការពារក្ដីលោក រាជ សីម៉ា គឺអ្នកស្រី ស៊ឹម សោភា បាននិយាយថា ការសម្រេចរបស់តុលាការសម្រាប់កូនក្ដីអ្នកស្រី វាជារឿងអយុត្តិធម៌ ហើយអ្នកស្រីនឹងដាក់ពាក្យប្តឹងឧទ្ធរណ៍ ដើម្បីស្វែងរកយុត្តិធម៌ជូនកូនក្ដីនិងគ្រួសារ។
មេធាវីរូបនេះអះអាងថា៖ «ខ្ញុំដាក់ពាក្យបណ្ដឹងទៅសាលាឧទ្ធរណ៍ល្ងាចហ្នឹង»។
អ្នកចាត់ការទូទៅនៃអង្គការលីកាដូ លោក អំ សំអាត ហាក់ដូចជាអស់សំណើចនិងការកាត់ក្ដីរបស់តុលាការខេត្តកំពង់ឆ្នាំងនេះ។ លោកថា វាជាវប្បធម៌ប្រពៃណីរបស់តុលាការស្រុកខ្មែរ ទៅហើយដែលតែងតែ ប្រើប្រព័ន្ធតុលាការសម្រាប់ការគំរាមកំហែងទៅលើតំណាង ឬក៏សហគមន៍ណាដែលចង់តវ៉ារឿងដីធ្លី និងរឿងអីផ្សេងៗទៀត ដែលវាប៉ះពាល់ផលប្រយោជន៍របស់បុគ្គល គឺគេប្រើទម្រង់បែបហ្នឹងតែម្ដង។ ហើយករណីលោក រាជ សីម៉ា នេះបើលោកមិនមែនជាតំណាងសហគមន៍តវ៉ាដីធ្លីសកម្មទេ ប្រហែលជាតុលាការមិនសម្រេចនិងចាប់ខ្លួនលោកដូច្នេះទេ។
លោកបានបន្ថែមថា៖ «យើងជាអង្គការសង្គមស៊ីវិលយើងអំពាវនាវគ្រប់ភាគីទាំងអស់កុំយកប្រព័ន្ធតុលាការដើម្បីយកមកលេងសើចឬក៏ដើម្បីដាក់គំនាប់ទៅលើបញ្ហាសហគមន៍ដីធ្លី បើសិនជាបញ្ហាដីធ្លីក៏ត្រូវស្វែងរកការដោះស្រាយណាមួយដែលសមស្របហើយនិងអាចទទួលយកបាន»។
កាលពីថ្ងៃទី៨ ខែកក្កដា សាលាដំបូងរាជធានីភ្នំពេញបានផ្តន្ទាទោសអ្នកភូមិ៤នាក់រួម ទាំងអ្នកស្រី អ៊ុំ សុភី និងលោក រាជ សីម៉ា ដោយកំបាំងមុខដាក់ពន្ធនាគាររយៈពេលមួយឆ្នាំ ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ ធ្វើឱ្យខូចខាតដោយចេតនា និងបទប្រើប្រាស់អំពើហិង្សាលើបុគ្គលជាអ្នកកាន់កាប់អចលនទ្រព្យកាលពីឆ្នាំ២០១២៕
………………………
អត្ថបទដោយពលរដ្ឋអ្នកសារព័ត៌មានប្រចាំខេត្តកណ្តាល
