ប្រធានគណបក្សខ្មែររួបរួមជាតិ លោក ញឹក ប៊ុនឆៃ រំលឹកដល់អ្នកនយោបាយខ្មែរឱ្យវិលរកតុចរចានយោបាយវិញ បន្ទាប់ពីសហគមន៍បានសម្រេចថា នឹងព្យួរផ្នែកខ្លះនៃប្រព័ន្ធអនុគ្រោះពន្ធដែលផ្តល់មកឱ្យកម្ពុជា។
កាលពីថ្ងៃទី២៩ ខែកុម្ភៈ ឆ្នាំ២០២០ គណបក្សខ្មែររួបរួមជាតិបានរៀបចំពិធីគម្រប់ខួប៤ឆ្នាំ នៃថ្ងៃបង្កើតគណបក្សនេះ នៅឯសង្កាត់បាខែង ខណ្ឌជ្រោយចង្វា រាជធានីភ្នំពេញ។
ថ្លែងនៅកាន់សកម្មជនប្រមាណជា ២៣០នាក់ លោក ញឹក ប៊ុនឆៃ មានប្រសាសន៍ថា ដើម្បីការពារលទ្ធិប្រជាធិបតេយ្យ និងនិតិរដ្ឋនៅកម្ពុជា អ្នកនយោបាយខ្មែរមិនគួរយកទំនាស់ ឬផលប្រយោជន៍គណបក្ស មកពាក់ព័ន្ធជាមួយនឹងផលប្រយោជន៍ជាតិ លទ្ធិប្រជាធិបតេយ្យ និងនិតិរដ្ឋនោះឡើយ។
លោក ញឹក ប៊ុនឆៃ ថ្លែងបន្ដថា លទ្ធិប្រជាធិបតេយ្យ និងនីតិរដ្ឋ គឺជារបស់ជាតិ និងប្រជាជនខ្មែរទាំងអស់ ដោយលោកថា គណបក្សលោក នឹងបន្ដតស៊ូមតិជាមួយសហគមន៍អន្ដរជាតិ ដើម្បីរកយុត្តិធម៍ជូនប្រជាពលរដ្ឋកម្ពុជា និងកម្មករ កម្មការិនី ដែលអាចរងផលប៉ះពាល់ពីការព្យួរផ្នែកខ្លះនៃប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» ពីកម្ពុជានាពេលខាងមុខ។
ក្នុងសេចក្ដីប្រកាសព័ត៌មាននៅថ្ងៃទី១២ ខែកុម្ភៈ ឆ្នាំ២០២០ សហភាពអឺរ៉ុបបានសម្រេចព្យួរផ្នែកខ្លះនៃប្រព័ន្ធ «អ្វីគ្រប់យ៉ាងលើកលែងតែអាវុធ» ឬហៅកាត់ថា EBA ពីកម្ពុជា ដោយចោទរដ្ឋាភិបាលរបស់លោកនាយករដ្ឋមន្ដ្រី ហ៊ុន សែន បានប្រព្រឹត្តអំពើរំលោភសិទ្ធិមនុស្សជាលក្ខណៈប្រព័ន្ធ និងធ្ងន់ធ្ងរ ដែលផ្ទុយពីកតិកាសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយ។
បើតាមសេចក្ដីសម្រេចរបស់អឺរ៉ុបនេះ មានន័យថា កម្ពុជាបាត់បង់ ២០ភាគរយនៃប្រព័ន្ធ EBA នេះ ឬស្មើនឹងទឹកប្រាក់ប្រមាណ ១, ១០០ លានដុល្លារអាមេរិកក្នុងមួយឆ្នាំ ចំពោះផលិតផលនាំចេញផ្នែកស្បែកជើង និងសម្លៀកបំពាក់ និងស្ករសទៅកាន់ទីផ្សារអន្ដរជាតិមួយនេះ។
បើតាមសេចក្ដីប្រកាសព័ត៌មានដដែល ទណ្ឌកម្មនេះនឹងអនុវត្តនៅថ្ងៃទី១២ ខែសីហា ឆ្នាំ២០២០ ពោលគឺកម្ពុជាមានរយៈពេល ៦ខែទៀត៕
——————————————————-
ដោយពលរដ្ឋសារព័ត៌មានខេត្តព្រៃវែង លោក តក់ ឈុននាថ
