ពលករខ្មែរចំណាកស្រុកមួយចំនួនបានដើររកការងារធ្វើសំណង់នៅស្រុកកំណើតវិញ ក្រោយពេលកម្ពុជា និងថៃបានសម្រេចផ្អាកច្រកទ្វារព្រំដែនប្រទេសទាំងពីរ ទប់ស្កាត់ការរីករាលនៃជំងឺកូវីដ-១៩។
ពលករខ្មែរម្នាក់ លោក ផាត សុភា អាយុ ៣៦ឆ្នាំ ប្រាប់ថា ក្រុមគ្រួសាររបស់គាត់ រួមទាំងប្រពន្ធផងបានត្រឡប់មកស្រុកកំណើតវិញ នៅភូមិកន្សែង សង្កាត់សំរោង ក្រុងសំរោង ខេត្តឧត្ដរមានជ័យ តាំងពីចុងឆ្នាំ២០១៩ និងបានជាប់នៅក្នុងស្រុកមិនអាចត្រឡប់ទៅប្រទេសថៃវិញ នៅពេលជំងឺកូវីដ-១៩ ផ្ទុះឡើង។
លោកបន្ដថា លោក និងភរិយាបានទៅធ្វើការនៅប្រទេសថៃប្រមាណជាង៧ឆ្នាំមកហើយ ដោយធ្វើការជាកម្មករ និងជាអ្នកបើកបរដឹកដំណាំពីចម្ការ។ លោកថា ចាប់តាំងពីផ្ទុះជំងឺកូវីដ-១៩ ដែលធ្វើឲ្យរដ្ឋាភិបាលកម្ពុជា និងថៃសម្រេចបិទច្រកទ្វារព្រំដែនមកនោះ គាត់ និងភរិយា កំពុងជួបការលំបាក និងបាត់បង់ប្រាក់ចំណូល ដើម្បីចិញ្ចឹមគ្រួសារ និងមើលថែកូនៗ ២នាក់ ដែលជាបន្ទុកគ្រួសារ។
ដើម្បីទប់ទល់ជីវភាពអំឡុងពេលផ្ទុះជំងឺកូវីដ-១៩ លោក ផាត សុភា និយាយថា គាត់ និងប្រពន្ធបានដើររកការងារសំណង់នៅស្រុក និងម្យ៉ាង ឆ្លៀតពេលបង្ហើយធ្វើផ្ទះ និងដំណាំស្រែចម្ការរបស់ខ្លួនផង។
លោក ផាត សុភា រៀបរាប់បន្ដថា៖ «ព្រោះអីសព្វថ្ងៃ គេអត់ត្រូវការកម្មករទេ ថៅកែគេប្រាប់ហើយថា ចាំមើលវារួចរាល់សិន យើងអាចត្រឡប់ទៅវិញបាន តែឥឡូវនេះ យើងទៅក៏អត់មានការងារធ្វើទេ»។
លោក ផាត សុភា សង្ឃឹមថា នឹងអាចត្រឡប់ទៅធ្វើការនៅប្រទេសថៃវិញនៅពេលជំងឺកូវីដ-១៩ បានស្រាកស្រាន្ដ ដោយថា ការងារនៅទីនោះផ្ដល់ប្រាក់ខែច្រើនជាងការងារនៅក្នុងប្រទេស។
ពលករចំណាកស្រុកម្នាក់ទៀត អ្នកស្រី កែវ យ៉ិ ជាកម្មការិនីធ្វើការសំណង់នៅប្រទេសថៃ ដែលបានវិលត្រឡប់មកស្រុកកំណើតវិញ នៅអំឡុងផ្ទុះជំងឺកូវីដ-១៩ផងដែរ។
ស្ដ្រីវ័យ ៣៧ឆ្នាំរូបនេះរៀបរាប់ថា នៅពេលកើតជំងឺកូវីដ១៩ គាត់មានតែរកការងារធម្មតាៗ ធ្វើជាបណ្ដោះអាសន្នសិន ដោយថា ដើម្បីចិញ្ចឹមកូនៗ ក្នុងបន្ទុក៦នាក់ ទម្រាំរដ្ឋាភិបាលប្រទេសទាំងពីរបើកច្រកទ្វារព្រំដែនឡើងិវញ។ អ្នកស្រីថា ការងារសំណត់នៅស្រុក ក្នុងមួយថ្ងៃ អាចរកប្រាក់ពី២ ទៅ៣ម៉ឺនរៀល និងត្រូវរ៉ាប់រងចំណាយផ្សេងៗ ពេលបាត់បង់ការងារដូច្នេះ។
អ្នកស្រីបន្ដថា៖ «សំណូមពរឲ្យឆាប់បើក ខ្ញុំហាន់នឹងបានត្រឡប់ទៅធ្វើការនៅថៃវិញ ព្រោះខ្ញុំក្រណាស់»។
មេភូមិអូរកន្សែង លោក អ៊ុក វ៉ាន់ឌឿន អះអាងថា នៅភូមិរបស់គាត់ មានពលករខ្មែរចំណាកស្រុកទៅប្រទេសថៃចំនួន១០នាក់ប៉ុណ្ណោះ ក្នុងនោះមានស្រី៦នាក់។
បើតាមមេភូមិអូរកន្សែង លោក អ៊ុក វ៉ាន់ឌឿន ពលរដ្ឋសរុបក្នុងភូមិអូរកន្សែង មានចំនួន ១៣១គ្រួសារ ឬស្មើនឹង ៦២៧នាក់ ក្នុងនោះមានស្រី ៣៤៥នាក់។
កាលពីខែមិនា ឆ្នាំ២០២០ អាជ្ញាធរកម្ពុជា និងថៃ ព្រមព្រៀងសម្រេចបិទច្រកព្រំដែនអន្តរជាតិចំនួន១៥ជាបណ្តោះអាសន្នរហូតមកទល់ពេលនេះ ដើម្បីទប់ស្កាត់ការរីករាលដាលនៃជំងឺកូវីដ-១៩។
ច្រកទាំងនោះរួមមាន ច្រកទ្វាអន្តរជាតិចាំយាម ច្រកទ្វាអន្តរជាតិព្រំ (ប៉ៃលិន) ច្រកទ្វាអន្តរជាតិភ្នំដី ច្រកទ្វាអូរស្មាច់ និងច្រកទ្វារតំបន់ស្ពានជ័យជំនះ តំបន់ពាមតា តំបន់២០៣ តំបន់៤០០(សំឡូត) តំបន់សែនចៅ តំបន់អូរអន្លក់ តំបន់អូររំដួល តំបន់ម៉ាឡៃ តំបន់បឹងត្រកួន តំបន់ជប់គគីរ និងច្រកទ្វាតំបន់អានសេះជាដើម។ ច្រកទ្វាអន្តរជាតិ និងច្រកទ្វាតំបន់ រវាងកម្ពុជា-ថៃ មានចំនួន២៤ច្រក៕
—————————————————
ពលរដ្ឋសារព័ត៌មានខេត្តឧត្តរមានជ័យ លោក សួន សន
