ប្រជាពលរដ្ឋនៅស្រុកចន្ទ្រា ខេត្តស្វាយរៀង ស្នើទៅអាជ្ញាធរជួយពន្លឿនការតភ្ជាប់បណ្ដាញអគ្គិសនីរបស់រដ្ឋទៅដល់ក្នុងភូមិដែលសព្វថ្ងៃ ពួកគេត្រូវចំណាយអស់ប្រាក់ច្រើនទៅលើភ្លើងអគ្គិសនីដែលផ្ដល់ដោយក្រុមហ៊ុនឯកជន។
លោក សំ ផាត រស់នៅភូមិអង់ក្ដួច ឃុំព្រៃគគី ស្រុកចន្ទ្រា បានឱ្យដឹងថា រាល់ថ្ងៃនៅក្នុងភូមិរបស់គាត់មិនទាន់មានភ្លើងអគ្គិសនីរបស់រដ្ឋប្រើប្រាស់នោះទេ គឺប្រើតែភ្លើងឯកជនដែលមានតម្លៃថ្លៃ ១៥០០រៀល ក្នុងមួយគីឡូវ៉ាត់។ លោក សំ ផាត បន្ដថា ក្នុងមួយខែ គាត់ចំណាយអស់ថ្លៃអគ្គិសនីផ្ដល់ដោយឯកជនចន្លោះពី ១៤ម៉ឺនទៅ ២០ម៉ឺនរៀល។
ពលរដ្ឋម្នាក់ទៀតរស់នៅភូមិអង់ក្ដួច ឃុំព្រៃគគី ស្រុកចន្ទ្រា ដែរនោះ អ្នកស្រី សឹប ណាវី រអ៊ូថា តម្លៃអគ្គិសនីរបស់ឯកជនថ្លៃ ១៥០០រៀលក្នុងមួយគីឡូវ៉ាត់នេះ គឺជាតម្លៃមួយខ្ពស់ ហើយគ្រួសារគាត់ត្រូវចំណាយអស់ប្រាក់ច្រើនក្នុងមួយខែៗ។
ពលរដ្ឋរូបនេះស្នើអាជ្ញាធរឱ្យគិតគូដោះស្រាយបញ្ហាតម្លៃអគ្គិសនីផ្ដល់ដោយក្រុមហ៊ុនឯកជននេះ និងពន្លឿនការតភ្ជាប់បណ្ដាញអគ្គិសនីរបស់រដ្ឋចូលទៅដល់ភូមិរបស់គាត់ឱ្យបានកាន់តែឆាប់កាន់តែល្អ។
អ្នកស្រី សឹប ណាវី រៀបរាប់បន្ដថា៖ «ក្នុងភូមិរបស់ខ្ញុំ តម្លៃភ្លើងថ្លៃណាស់នៅក្នុង១គីឡូ១៥០០រៀល ដោយសារតែនៅក្នុងភូមិនៅមិនទាន់មានភ្លើងរបស់រដ្ឋប្រើ គឺប្រើភ្លើងឯកជន។ ក្នុងមួយខែៗ ខ្ញុំចំណាយលុយបង់ភ្លើងចន្លោះពី១៨០០០០រៀលទៅ២៤០០០០រៀល ទៅតាមការប្រើតិច ឬច្រើន»។
មេភូអង់ក្ដួច ឃុំព្រៃគគី លោក យិន បូណា ទទួលស្គាល់ថា នៅក្នុងភូមិរបស់គាត់ពិតជាជួបការលំបាកមិនទាន់មានភ្លើងរដ្ឋចូលទៅដល់នោះទេ ដោយសព្វថ្ងៃ គឺប្រជាពលរដ្ឋនៅក្នុងភូមិមានតែប្រើប្រាស់ភ្លើងអគ្គិសនីរបស់ឯកជន។
បើតាមមេភូអង់ក្ដួច លោក យិន បូណា នៅក្នុងភូមិអង់ក្ដួចទាំងមូលមានប្រជាជនសរុប៣៤០គ្រួសារ ហើយប្រជាជន១៧០គ្រួសារ នៅបន្តប្រើភ្លើងឯកជន។ ចំណែក ១៧០គ្រួសារទៀត កំពុងប្រើប្រាស់ភ្លើងអគ្គិសនីរបស់រដ្ឋ៕
——————————————-
ដោយពលរដ្ឋសារព័ត៌មានខេត្តស្វាយរៀង លោក សួន វុត្ថា
