ពលរដ្ឋ៦៦គ្រួសារនៅសង្កាត់ព្រែកត្នោត ក្រុងបូកគោ ខេត្ដកំពត ជំរុញទៅអាជ្ញាធរខេត្តនេះ ឱ្យពន្លឿនការដោះស្រាយវិវាទដីធ្លីជូនពួកគេ ក្រោយមានជម្លោះជាមួយអ្នកមានឥទ្ធិពលដែលគេដឹងថាមានងារជាឧកញ៉ា និងអ្នកឧកញ៉ា។
យោងតាមលិខិតចុះថ្ងៃទី២២ ខែមិថុនា ឆ្នាំ២០២៣ បុគ្គលម្នាក់ឈ្មោះ យឹម សុគន្ធ នៅរាជធានីភ្នំពេញ បានដាក់សំណើរមួយទៅមន្ទីររៀបចំដែនដីនគរូបនីយកម្ម និងសំណង់ខេត្តកំពត ដើម្បីសុំចុះបញ្ជីដីធ្លីស្ថិតនៅភូមិចង្កោន សង្កាត់ព្រែកត្នោត ក្រុងបូកគោ ហើយនៅថ្ងៃខែដដែល អភិបាលក្រុងបូកគោ លោកស្រី ងិន ផលរ័ត្ន បានចេញលិខិតអនុញ្ញាតឱ្យមានការវាស់វែងតាមការស្នើសុំរបស់លោក យឹម សុគន្ធ។
ប៉ុន្តែអ្នកភូមិអះអាងថា ប្លង់ដីដែលបុគ្គលឈ្មោះ យឹម សុគន្ធ សុំចុះបញ្ជីនោះ គឺបានជាន់ ឬគ្របលើដីរបស់ប្រជាពលរដ្ឋដែលបានកាន់កាប់ និងអាស្រ័យផលធ្វើស្រែចម្ការជាច្រើនឆ្នាំមកហើយ។
លោក ណុល វុទ្ធី អាយុ៤៤ឆ្នាំ នៅភូមិចង្កោន សង្កាត់ព្រែកត្នោត ប្រាប់ពលរដ្ឋអ្នកសារព័ត៌មានថា ក្រោយពីរដ្ឋបាលក្រុងបូកគោបិទប្រកាសពីការចុះបញ្ជីដីធ្លីគឺ មានបុគ្គលពីរនាក់បានស្នើសុំចុះបញ្ជីដីប៉ះពាល់ពលរដ្ឋ មានលោក យឹម សុគន្ធ និងលោក មាស ធំ។
ពលរដ្ឋរូបនេះបន្តថា តំបន់ដីដែលបុគ្គលពីរនាក់នោះសុំចុះបញ្ជីគឺបានប៉ះពាល់លើដីធ្លីអ្នកភូមិចំនួន៦៦គ្រួសារ និងមានដីទំហំដីសរុបប្រហែល ៣០០ហិកតា ដោយក្នុងនោះ ដីរបស់គ្រួសារលោកមានទំហំ ២ហិកតាចំនួន២កន្លែងផងដែរ។
លោក ណុល វុទ្ធី ឱ្យដឹងថា ជុំវិញបញ្ហានេះ អ្នកភូមិបានដាក់ពាក្យបណ្តឹងទៅរដ្ឋបាលសង្កាត់ព្រែកត្នោត និងរដ្ឋបាលក្រុងបូកគោដែរ ប៉ុន្តែពុំមានដំណោះស្រាយណាមួយឡើយ ហើយកាលពីថ្ងៃទី១១ ខែកញ្ញា ឆ្នាំ២០២៣ រូបលោក និងពលរដ្ឋផ្សេងទៀតនាំគ្នាទៅសាលាសង្កាត់សារជាថ្មី ដើម្បីជំរុញដល់អាជ្ញាធរឱ្យពន្លឿនការដោះស្រាយជូនពួកគាត់។
លោកលើកឡើងថា៖ «បើគាត់ [រដ្ឋបាលក្រុងបូកគោ] ធ្វើដោយចិត្ដឯង ធ្វើដោយចង់បាន ដោយរំលោភបំពាន គឺពលរដ្ឋគាត់អត់សប្បាយចិត្ដហ្នឹងធ្វើទង្វើហ្នឹងទេ។ ប្រទេសមានច្បាប់ ពលរដ្ឋគាត់រស់នៅអាស្រ័យផលតាំងពីដូនតាគាត់មកតគ្នា។ ដល់គាត់មកធ្វើចឹង វាអយុត្តិធម៌ខ្លាំងណាស់។ សូមឯកឧត្ដមអភិបាលខេត្ដ [កំពត]និងឯកឧត្ដម ហ៊ុន ម៉ាណែត ជួយដោះស្រាយដល់ប្រជាពលរដ្ឋដែលរង់ទុក្ខលំបាកក្នុងការធ្វើស្រែចំការឱ្យបានឆាប់» ។
លោក ឯម សាមុត អាយុ៥០ឆ្នាំ នៅភូមិព្រែកត្នោត សង្កាត់ព្រែកត្នោត បាននិយាយថា វាជារឿងអយុត្តិធម៌មួយសម្រាប់ប្រជាពលរដ្ឋ ដែលអ្នកមានលុយមានអំណាចមានសិទ្ធិស្នើសុំចុះបញ្ជីដីធ្លី ឬធ្វើប័ណ្ណកម្មសិទ្ធិជាន់ពីលើដីរបស់ប្រជាពលរដ្ឋដែលរស់នៅអាស្រ័យផលជាច្រើនឆ្នាំមកហើយនោះ។
ពលរដ្ឋរូបនេះ អះអាងថា អ្នកដែលមករំលោភយកដីស្រែចំការរបស់ពលរដ្ឋគឺលោក យឹម សុគន្ធ និងលោក មាស ធំ មិនមែនជាប្រជាពលរដ្ឋរស់នៅសង្កាត់ព្រែកត្នោតឡើយ ប៉ុន្តែបុគ្គលទាំងពីរូបនោះ មានសិទ្ធិកាន់កាប់ដីនៅក្នុងសង្កាត់ព្រែកត្នោតជាច្រើនហិកតា ខណៈពលរដ្ឋមានដីអាស្រ័យផលបន្តិចបន្តួចគ្មានសិទ្ធិកាប់កាន់ ដោយអាជ្ញាធរមិនបានចេញប័ណ្ណកម្មសិទ្ធិឱ្យពួកគាត់ឡើយ។
លោក ឯម សាមុត ឱ្យដឹងថា ដីស្រែរបស់លោកត្រូវបានគេរំលោភយកអស់កន្លះហិកតាដែលត្រូវបាននិស្សិតស្ម័គ្រចិត្តវាស់វែងឱ្យកាលពីឆ្នាំ២០១២។ លោកថា ប្រសិនបើវិវាទដីធ្លីនេះមិនត្រូវបានដោះស្រាយទេ គឺគ្រួសារលោកនឹងជួបការលំបាកក្នុងជីវភាពគ្រួសារដោយសារគ្មានដីសម្រាប់បង្កបង្កើនផល។
លោកលើកឡើងថា៖ « ខ្ញុំធ្វើស្រែរាល់តែឆ្នាំ ហើយស្រែនេះ ខ្ញុំកាន់កាន់តាំងតែពីសង្គមរាស្រ្ដនិយមមកម្លេះ មុនជំនាន់ ប៉ុល ពត ទៀត។ បើនិយាយទៅ វាតជំនាន់មកហើយ»។
យ៉ាងណា ពលរដ្ឋអ្នកសារព័ត៌មានមិនអាចរកឆ្លើយតបពីភាគី លោក យឹម សុគន្ធ និងលោក មាស ធំ និងចៅសង្កាត់ព្រែកត្នោតបាននោះទេ ។
ក្រុមប្រឹក្សាសង្កាត់ព្រែកត្នោត លោក ទិត រីន បានឱ្យដឹងថា លោក យឹម សុគន្ធ មានងារជាឧកញ៉ា រស់នៅរាជធានីភ្នំពេញ ហើយទទួលបានសិទ្ធិកាន់កាប់ដីសង្កាត់ព្រែកត្នោតក្រុងបូកគោ ខេត្តកំពត។ លោកថា ជុំវិញជម្លោះដីនេះគឺរដ្ឋបាលសង្កាត់បានបញ្ជូនទៅរដ្ឋបាលក្រុងជាអ្នកដោះស្រាយហើយ ដោយថា ជម្លោះដីធ្លីនេះពាក់ព័ន្ធជាមួយដីឧទ្យានជាតិ ដោយហួសពីសមត្ថកិច្ចរដ្ឋបានសង្កាត់ក្នុងការដោះស្រាយ។
លោកលើកឡើងថា៖ « ព្រោះអីដីរបស់រដ្ឋវាពាក់ព័ន្ធប្រជាពលរដ្ឋមួយចំនួនទៅទន្រ្ទានយកដីរដ្ឋ ប៉ុន្តែដីចំការដីស្រែគាត់ដប់ជាងគ្រួសារគេដោះហើយ។ អាហ្នឹងគេកាត់ឆ្វៀលជាប្លង់រឹងឱ្យទៀត ប៉ុន្តែដីនៅក្នុងឧទ្យានមិនដឹងថា យ៉ាងមិចទេព្រោះជាប់ពាក់ព័ន្ធជាមួយដីរដ្ឋ»។
ក្នុងព្រះរាជក្រឹត្យរបស់ព្រះមហាក្សត្រខ្មែរ ព្រះករុណាព្រះបាទសម្តេចព្រះបរមនាថ នរោត្តម សីហមុនី កាលពីថ្ងៃទី២០ ខែមេសា ឆ្នាំ២០២៣ បានទ្រាស់បង្កាប់ផ្តល់គោរមងារ ដល់លោក មាស ធំ ជាអ្នកឧកញ៉ា។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៅមជ្ឈមណ្ឌលសិទ្ធិមនុស្សកម្ពុជា លោក វណ្ណ សូផាត មានប្រសាសន៍ថា ប្រសិនបើពលរដ្ឋគាត់រស់លើដីនោះដោយស្របច្បាប់ហើយមានសាលកប័ត្រទទួលស្គាល់ពីអាជ្ញាធរ ហើយមានក្រុមហ៊ុនឬអ្នកមានអំណាចមកគប់គិតជាមួយអាជ្ញាធរមូលដ្ឋានមកធ្វើប័ណ្ណជាន់លើដីរបស់ពួកគាត់នោះ គឺវាឆ្លុះបញ្ចាំងពីការចេញប័ណ្ណមិនស្របទៅតាមផ្លូវច្បាប់។
លោក វណ្ណ សូផាត បន្តថា មុនចេញប័ណ្ណទៅឱ្យបុគ្គលណាមួយត្រូវបិតប្រកាសជាសាធារណៈ ដើម្បីឱ្យម្ចាស់ដីដែលមានព្រំប្រទល់ជាប់ ឬអ្នកដែលពាក់ព័ន្ធមានសិទ្ធិទាមទារឱ្យមានការសើរើឡើងវិញ។ លោកថា បើសិនជាមានប្រជាពលរដ្ឋជំទាស់នោះនិតិវិធីក្នុងការចេញប័ណ្ណនោះ គឺអាជ្ញាធរមិនអាចធ្វើបាននោះទេ។
លោកលើកឡើងថា៖ « ព្រោះការចេញប្លង់មួយៗមិនមែនប្រើរយៈពេលខ្លីមួយខែពីខែបានទេ ចង់ចូលរាប់ឆ្នាំទម្រាំហ្នឹងបានប្លង់ហ្នឹងមក។ ចឹងបានន័យថា ដំណើរការចេញប្លង់ហ្នឹង មិនមែនឥឡូវទេ ប្រហែលយូរណាស់ហើយបានចេញមកបច្ចុប្បន្ននេះ » ។
ប្រជាពលរដ្ឋកម្ពុជាបានរងផលបះពាល់ ឬជាប់ពាក់ព័ន្ធនៅក្នុងទំនាស់ដីធ្លីយ៉ាងហោចណាស់ ៩២ករណីនៅទូទាំងប្រទេសក្នុងរយៈពេលបួនឆ្នាំនេះ ចាប់តាំងពីឆ្នាំ២០១៩ ដល់២០២៣។ ករណីទាំងនេះគ្របដណ្តប់ស្ទើរតែទូទាំង ២៥ រាជធានី-ខេត្ត នៃប្រទេសកម្ពុជា ហើយភាគច្រើនពាក់ព័ន្ធនឹងដីរបស់រដ្ឋដែលត្រូវបានផ្ទេរទៅឱ្យក្រុមហ៊ុន ឧកញ៉ា បុគ្គលដែលមានខ្នង និងមន្ត្រីរដ្ឋាភិបាល និងសមាជិកគ្រួសាររបស់ពួកគេ។ នេះបើយោងតាមរបាយការណ៍ចងក្រងរបស់គេហទំព័រកំណាត់ត្រា នៃមជ្ឈមណ្ឌលកម្ពុជា ដើម្បីប្រព័ន្ធផ្សាយឯករាជ(CCIM)៕
……………………………………………
អត្ថបទដោយពលរដ្ឋអ្នកសារព័ត៌មាន លោក សួន វុត្ថា
