មិនមែនមនុស្សគ្រប់គ្នាសុទ្ធតែមានវាសនានិងលទ្ធភាពធ្វើដំណើរតាមយន្ដហោះនោះទេ ព្រោះថា ការធ្វើដំណើរតាមផ្លូវអាកាស គឺត្រូវចំណាយលុយច្រើន និងទាល់តែមានការងារជំនួញ ឬបេសកកម្មទៅបរទេសទៀត ទើបអាចទៅរួច។
បើទោះបីជាពុំធ្លាប់ជិះយន្ដហោះដោយផ្ទាល់សូម្បីតែមួយម្ដង បុរសមេការសំណង់ម្នាក់នៅខេត្តសៀមរាបបានខិតខំសន្សំប្រាក់ និងធ្វើផ្ទះរូបរាងដូចនឹងយន្ដហោះបេះបិទ ហើយរស់នៅក្នុងផ្ទះរបស់គាត់ ដើម្បីបំពេញក្ដីស្រម៉ៃតាំងពីកុមារ។
ក្ដីស្រម៉ៃចង់ជិះយន្ដហោះ
មានដើមកំណើតជាអ្នកខេត្តសៀមរាប លោក ច្រាច់ ពៅ គឺជាម្ចាស់ផ្ទះយន្តហោះដែលប្លែកខុសពីលំនៅឋានរបស់អ្នកភូមិផ្សេងទៀតនៅឃុំសំបួរ ស្រុកសៀមរាប ខេត្តសៀមរាប។
បុរសដែលបច្ចុប្បន្នមានវ័យ៤៣ឆ្នាំរូបនេះរៀបរាប់ថា កាលនៅក្មេង គាត់តែងឃើញយន្ដហោះរំលងផ្ទះគាត់ជារៀងរាល់ថ្ងៃ និងចោទសួរឪពុកគាត់ថា តើរបស់ដែលអាចហោះបាននៅលើមេឃនោះជាអ្វី។ គាត់ទទួលបានចម្លើយពីឪពុកថា នោះគឺជាយាន្ដ ដែលអាចផ្ទុកនិងដឹកមនុស្សបានចន្លោះពី២០ទៅ៣០នាក់ និងអាចហោះហើរទៅគ្រប់ទីកន្លែង។
ប្រសិនបើវាអាចដឹកមនុស្សឱ្យហោះហើរបាន លោក ច្រាច់ ពៅ ស្រម៉ៃថា ថ្ងៃណាមួយ គាត់អាចជិះយន្ដហោះបានម្ដង យ៉ាងហោចណាស់ក៏ជិះពីពីព្រលានយន្ដហោះសៀមរាបទៅរាជធានីភ្នំពេញដែរ។ ប៉ុន្ដែ ស្ទើរពេញមួយជីវិតរបស់គាត់ គឺពុំមានវាសនា និងលទ្ធភាពនោះទេ ព្រោះលោកគិតថា ទាល់តែមានភារកិច្ច ឬជំនួញណាមួយ ទើបគាត់មានសង្ឃឹមបានជិះ។
លោក ច្រាច់ ពៅ បន្ដថា៖«ពីតូចខ្ញុំតែងឃើញយន្ដហោះហោះរំលងតែផ្ទះខ្ញុំ ហោះពីព្រលាននៅសៀមរាបទៅភ្នំពេញ។ ណាមួយយើងអត់មានភារកិច្ចអីត្រូវជិះយន្ដហោះ អញ្ចឹងក៏មានក្ដីស្រម៉ៃថា បើបានផ្ទះយន្ដហោះប្រហែលជាសប្បាយចិត្ត»។
ទីបំផុតទៅ លោកបានសាងសង់ផ្ទះដែលមានរូបរាងដូចនឹងយន្ដហោះ នៅលើដីស្រែដែលលោកបានទិញជាយូរមកហើយ ដោយចំណាយប្រាក់អស់ជាង ២ម៉ឺនដុល្លារអាមេរិក ដែលកើតចេញពីការសន្សំនិងប្រាក់ចំណូល ដែលគាត់ទទួលបានពីការងារជាមេការសំណង់អស់រយៈពេលប្រមាណ ៣០ឆ្នាំ ពោលគឺស្ទើរពេញមួយជីវិតរបស់គាត់។
ទម្រាំតែសាងសង់ផ្ទះយន្ដហោះចេញជារូបរាង លោក ច្រាច់ ពៅ ត្រូវបានអ្នកភូមិរិះគន់ ដៀលថាជាមនុស្សប្លែកខុសពីគេឯង និងខ្លះទៀត មិនឱ្យតម្លៃលើគំនិតច្នៃប្រឌិតនេះទាល់តែសោះ។
លោក ច្រាច់ ពៅ បន្ដថា៖«ប៉ុន្តែសម្រាប់ខ្ញុំ វាជាក្តីស្រមៃ ទោបីវាពិបាក តែមិនមែនធ្វើមិនកើតឯណា យើងនឹងព្យាយាមធ្វើឱ្យបានសម្រេចឱ្យបានមួយរយភាគរយ»។
លោកជឿថា មនុស្សម្នាក់ៗសុទ្ធតែមានក្ដីស្រម៉ៃ មិនថា វាចម្លែក ឬខុសគេខុសឯងនោះទេ។ ឱ្យតែធ្វើឱ្យអ្នកសប្បាយចិត្ត និងរស់នៅដោយក្ដីរីករាយ លោកថា គេ ត្រូវហ៊ានសម្រេចក្ដីស្រម៉ៃ ទោះបានទៅគោលដៅដោយជោគជ័យ ឬគ្រាន់តែបង្កើតរបស់សិប្បនិម្មិតក៏ដោយ។
យន្ដហោះក្នុងក្ដីស្រម៉ៃអាចជួយដល់មុខមាត់សហគមន៍
ក្រោយសាង់សង់រួចហើយ ផ្ទះយន្ដហោះដែលប្លែកខុសគេនេះ បានផ្ទុះការចាប់អារម្មណ៍ខ្លាំងពីអ្នកនៅក្នុងខេត្តសៀមរាប អ្នកមកពីទីក្រុងភ្នំពេញ អ្នកសារព័ត៌មាន និងភ្ញៀវមកពីក្រៅប្រទេសទៀតផង។
បើទោះបីជារៀនបានត្រឹមថ្នាក់ទី៦ និងមិនយល់ដឹងពីច្បាប់ទម្លាប់ច្រើនក្ដី លោក ច្រាច់ ពៅ អាចរកប្រាក់ចំណូលបានពីផ្ទះយន្ដហោះរបស់គាត់ តាមរយៈការដាក់ឱ្យគេចូលទស្សនា និងថតរូបជាដើម។ បន្ថែមពីការងារជាមេការសំណាង់ លោកក៏អាចរកចំណូលពីផ្ទះយន្ដហោះរបស់គាត់ តាមរយៈការលក់ដូរបន្ដិចបន្ដួចនៅផ្ទះ និងភេសជ្ជៈផ្សេងទៀត។ ម្យ៉ាងទៀត លោកគិតថា វាអាចជួយឱ្យអ្នកភូមិ និងសហគមន៍គាត់ កាន់តែទាក់ទាញ និងមានអ្នកមកលេងច្រើន។
ផលលំបាកមួយរបស់គាត់ គឺខ្វះខាតថវិកា ក្នុងការរៀបចំតុបតែងផ្ទះយន្តហោះបន្ថែម និងសង់របងឱ្យបានជិត កុំឱ្យសត្វចូលមកបំផ្លាញរបស់របរដែលមានក្នុងបរិវេណផ្ទះយន្តហោះរបស់គាត់។ ហើយគាត់ក៏ចង់ចាក់ដីរៀបចំជាសួនផ្កា ប៉ុន្តែគ្មានលទ្ធភាព និងថវិកា ដើម្បីអភិវឌ្ឍឱ្យកាន់តែស្រស់ស្អាតជាងនេះនោះទេ។
ទៅថ្ងៃខាងមុខក្តីស្រមៃរបស់គាត់ ប្រសិនបើមានថវិកា គាត់ចង់ធ្វើអ្វីៗដែលប្លែកៗ ដើម្បីឱ្យភ្ញៀវជាតិ និងអន្តរជាតិមកទស្សនា ហើយអ្នកដែលរស់នៅជិតៗភូមិរបស់យើងមានការងារធ្វើនៅតំបន់នេះផងដែរ៕
————————–
ពលរដ្ឋអ្នកសារព័ត៌មាន លោក ជាស ពេទ្យ
