អង្គការសង្គមស៊ីវិលផ្ដល់ជំនួយផ្លូវច្បាប់ដល់កុមារីរងគ្រោះដោយអំពើរំលោភសេពសន្ថវៈ

អង្គការអាហ្វីស៊ីព (Afresip) អះអាងថា ខ្លួនបានជួយដល់កុមារីរងគ្រោះម្នាក់អាយុ៩ឆ្នាំ នៅខេត្តរតនៈគីរី បន្ទាប់ពីទទួលរងការរំលោភបំពានផ្លូវភេទពីសំណាក់បុរសជាឪពុកចុង។
លោកស្រី លីន ស៊ីឡោ មន្ត្រីផ្តល់ព័ត៌មានរបស់អង្គការអាហ្វីស៊ីព (Afresip) មានប្រសាសន៍ថា ខាងអង្គការបានសហការជាមួយខាងមន្ទីរសង្គមកិច្ចខេត្ត និងសមត្ថកិច្ចពាក់ព័ន្ធ ចុះទៅដល់ទីតាំងកើតហេតុដើម្បីជួយជំនួយផ្នែកច្បាប់និងស្វែងមេធាវីជូនជនរងគ្រោះ ដែលអ្នកស្រីសុំមិនបញ្ចេញអត្តសញ្ញាណជនរងគ្រោះឡើយ។

លោកស្រីបន្តថា៖ «ខាងអង្គការអត់មានមេធាវីទេ មានតែអ្នកច្បាប់ ដូច្នេះខាងអង្គការស្វែងរកមេធាវីខាងក្រៅជូនគាត់ ដូចជាមេធាវីសម្តេចដែលនៅតាមខេត្តនិមួយគេចាំជួយយើង ហើយយើងពិភាគ្សារជាមួយអាណាព្យាបាលគាត់និងអាជ្ញាធរបើក្មេងស្រីនោះមិនអាចនៅកន្លែងកើតហេតុបានឬមានការខ្មាស់អៀនគឺយកមកនៅក្នុងមណ្ឌលនៅភ្នំពេញ»។

លោកស្រីបន្ថែមថា នៅក្នុងមណ្ឌល មានគាំពារអប់រំផ្លូវចិត្ត និងមានកន្លែងបណ្តុះបណ្តាលជំនាញផ្សេងៗ ព្រមទាំងជួយរកកន្លែងធ្វើការងារ នៅក្រោយពេលគាត់ចេះជាដើម ហើយប្រសិនបើក្មេងណាមានមូលដ្ឋានគ្រឹះរៀនសូត្រ ខាងអង្គការនឹងបញ្ជូនទៅរៀនបន្តនៅសាលារដ្ឋ តាំងពីថ្នាក់បឋមរហូតដល់មហាវិទ្យាល័យ។ ប៉ុន្ដែ អ្នកស្រីថា ប្រសិនបើក្មេងស្រីស្ងប់អារម្មណ៍ចង់ត្រឡប់ទៅផ្ទះវិញ ខាងអង្គការក៏នឹងជួយសម្របសម្រួលទៅវិញដោយតាមឃ្លាំមើលផងដែរ។
បើតាមប្រភពដដែល ក្មេងស្រីអាយុ៩ឆ្នាំ ត្រូវបានឳពុងចុងរំលោភអស់រយៈពេល៣ឆ្នាំ ប៉ុន្ដែ ក្រោយមក ម្តាយបង្កើតខឹងមិនទទួលស្គាល់ទៀត។ កាលពីកន្លងមកនេះ នាងបានចូលទៅសាលាដំបូងខេត្តរតនគីរី ដោយមានការជ្រោមជ្រែងពីមជ្ឈមណ្ឌលស្តារនីតិសម្បទារ ដើម្បីជួបចៅក្រមស៊ើបសួរឆ្លើយបំភ្លឺ តែម្តាយនាងមិនមកចូលរួមស្តាប់ទេ នាងមកតែម្នាក់ឯងព្រោះម្តាយនាងខឹងថា កូនស្រីជាដើមហេតុធ្វើឲ្យប្តីគាត់ត្រូវជាប់ចោទ។ ក្រៅពីនេះ ម្ដាយជនរងគ្រោះក៏មិនអនុញ្ញាតឲ្យនាងទៅលេងផ្ទះដែរ គឺម្តាយមិនទទួលស្គាល់តែម្តង៕
———————————————
ដោយពលរដ្ឋសារព័ត៌មាន លោក នូ រ៉េន