អង្គការមួយថា ស្ដ្រីម្នាក់ក្នុងចំណោម៥នាក់ប្រឈមរងអំពើហិង្សាផ្លូវកាយនិងផ្លូវភេទអំឡុងកូវីដ-១៩

អង្គការនារីដើម្បីសន្តិភាពអះអាងថា ស្ដ្រីម្នាក់ក្នុងចំនោមស្រ្តី៥នាក់ក្នុងប្រទេសកម្ពុជា បានកំពុងប្រឈមនឹងអំពើហិង្សាទាំងផ្លូវកាយនិងផ្លូវភេទ ខណៈពេលប្រទេសកម្ពុជាប្រឈមការរីករាលនៃជំងឺកូវីដ-១៩។
អង្គការនារីដើម្បីសន្តិភាពអះអាងលើគេហំព័រហ្វេសប៊ុករបស់ខ្លួនថា ស្រ្តីម្នាក់ក្នុងចំនោម ស្រ្តី៣នាក់នៅទូទាំងសកលលោក ឬអាចនិយាយម្យ៉ាងទៀតថា ស្ដ្រីម្នាក់ក្នុងចំណោម៥ នាក់នៅប្រទេសកម្ពុជាកំពុងប្រឈមនឹងអំពើហិង្សាទាំងផ្លូវកាយ និងផ្លូវភេទ ដែលធ្វើឱ្យផ្ទះប្រែក្លាយជាទីកន្លែងដែលគួរឱ្យភ័យខ្លាច។
អង្គការនេះអះអាងថា នេះគឺជាជម្ងឺរាតត្បាតស្រមោលជាសកល ដែលតួលេខនៅបន្តកើនឡើងគួរឱ្យព្រួយបារម្តណ៍នៅទូទាំងសកលលោក។
អង្គការនារីដើម្បីសន្តិភាពបន្ដថា ស្របពេលកម្ពុជាក៏ប្រឈមជំងឺកូវីដ-១៩នេះ អង្គការបានសហការជាមួយក្រសួងកិច្ចការនារី ដោយបានបង្កើតកម្មវិធីវិទ្យុមួយស្តីពីសេវាគាំទ្រសង្គមនិងការថែទាំសុខភាពផ្លូវចិត្តទៅដល់ប្រជាពលរដ្ឋកម្ពុជា ស្ដ្រី និងជនងាយរងគ្រោះផ្សេងទៀត ទទួលបានសេវាគាំទ្រនេះ។
បើតាមសេចក្ដីប្រកាសរបស់ក្រសួងសុខាភិបាល គិតត្រឹមព្រឹកថ្ងៃ៧ ខែសីហា ឆ្នាំ២០២០ មានមនុស្សចំនួន ២៤៣នាក់ហើយ ដែលត្រូវបានរកឃើញឆ្លងវីរុសកូវីដ-១៩ នៅក្នុងប្រទេសកម្ពុជា ក្នុងនោះអ្នកជំងឺ២១៤នាក់ ត្រូវបានព្យាបាលជាសះស្បើយ និងអ្នកសម្រាកកំពុងព្យាបាលនៅក្នុងមន្ទីរពេទ្យរដ្ឋ និងឯកជនចំនួន ២៩នាក់។
ក្រៅពីនេះ ក្នុងសេចក្តីណែនាំចុះថ្ងៃទីថ្ងៃទី៣១ ខែកក្កដា ឆ្នាំ២០២០ រដ្ឋាភិបាលកម្ពុជាបានសម្រេចឧបត្ថម្ភសាច់ប្រាក់ដល់គ្រួសារក្រីក្រ និងងាយរងគ្រោះបន្ដទៀតសម្រាប់រយៈពេល២ខែ គឺខែសីហា និងខែកញ្ញា៕
———————————————
ដោយពលរដ្ឋសារព័ត៌មាន លោក នូ រ៉េន