ប្រជាសហគមន៍រំដួលវាសនា ខេត្តឧត្តរមានជ័យ អះអាងថា ព្រៃសហគមន៍មួយកន្លែងនៅតំបន់នោះនឹងរងការកាប់បំផ្លាញកាន់តែខ្លាំង ប្រសិនបើភាគីពាក់ព័ន្ធមិនរួមគ្នាទប់ស្កាត់បន្ទាន់ឲ្យមានប្រសិទ្ធភាពទេនោះ។
ប្រធានគណៈកម្មការសហគមន៍រំដួលវាសនា លោក ម្លិះ ហឿត លើកឡើងថា សហគមន៍ «រំដួលវាសនា» ស្ថិតនៅក្នុងសង្កាត់បន្សាយរាក់ ក្រុងសំរោង ខេត្តឧត្តរមានជ័យ កំពុងរងការកាប់ទន្រ្ទានយ៉ាងខ្លាំង ដែលសព្វថ្ងៃ នៅសល់ត្រឹមតែទំហំ ៦០៦១ហិកតា ដោយសារតែសកម្មភាពរបស់ពលរដ្ឋចំណាកស្រុក រួមទាំងកម្លាំងទាហានមួយចំនួនផង បានចូលកាប់បំផ្លាញ និងលួចកាត់យកឈើធ្វើអាជីវកម្ម។
លោក ម្លិះ ហឿត លើកឡើងដូច្នេះថា៖ «កន្លងមកមានកម្លាំងទាហានអង្គភាពសឹករងក្រុងសំរោងមួយចំនួនបានចូលមកលួចកាត់អារឈើធ្វើអាជីវកម្ម ហើយប្រជាពលរដ្ឋខ្លះបានលួចឈើមកដុតធ្យូងលក់យ៉ាងអនាធិបតេយ្យ»។
លោក សៀម សាវុធ ជាសមាជិកសហគមន៍ភូមិសំបួរមាស ដែលជាភូមិមួយស្ថិតនៅក្នុងព្រៃសហគមន៍ «រំដួលវាសនា» ផងដែរនោះអះអាងថា បច្ចុប្បន្ននេះព្រៃសហគមន៍រំដួលវាសនា កំពុងត្រូវបានកាប់រានយកធ្វើជាកម្មសិទ្ធិពីសំណាក់អ្នកមានអំណាច និងទាហានមួយចំនួនក្នុងអង្គភាពសឹករងខេត្តនេះ។
លោក សាវុធ និយាយថា៖ «ក្រៅពីការកាប់បំផ្លាញព្រៃឈើ ក៏មានអ្នកមានអំណាចមានលុយនិងទាហានមួយចំនួនក្នុងអង្គភាពសឹករងនេះដែរបានចូលកាប់រុករានទន្រ្ទានព្រៃយកដីធ្វើស្រែ ដាំដំឡូងមី ស្វាយ អស់ផ្ទៃដីប្រមាណ៣០០០ហិកតា»។
មេបញ្ជាការសឹករងខេត្តឧត្តមានជ័យ ហ៊ាន សុខ ច្រានចោលការចោទប្រកាន់នេះ ដោយទម្លាក់កំហុសទៅលើប្រជាពលរដ្ឋដែលរស់នៅអាស្រ័យផលនៅសហគមន៍មួយនេះ។
លោកបន្ដថា៖ «មិនបានដឹងថាមានទាហានរបស់លោកទៅប្រព្រឹត្តបទល្មើសនៅតំបន់នោះទេ ប៉ុន្តែលោកថាមានប្រជាពលរដ្ឋនៅក្បែរតំបន់នោះទេជាអ្នកកាប់ទន្ទ្រានព្រៃនេះ»។
មេភូមិអូបាត់ដាវ ដែលជាភូមិកើតថ្មីស្ថិតក្នុងតំបន់ការពារនេះ លោក ភូង ភឿន អះអាងថា ប្រជាពលរដ្ឋនៅភូមិរបស់គាត់មិនបានកាប់រុករានព្រៃចាប់យកដីថ្មីនោះទេ ដោយថា អ្នកភូមិទាំងនោះបានមករស់នៅតំបន់នេះ តាំងពីឆ្នាំ២០០៨មកម្ល៉េះ។
លោកថា៖ «ភូមិនៅកណ្តាលព្រៃសហគមន៍ ដែលស្រឡះស្រាប់មិនមានកាប់រុករានព្រៃថ្មីទេ»។
រដ្ឋបាលព្រៃឈើសំរោង តាមរយៈលិខិតចុះថ្ងៃទី៧ ខែឧសភា ឆ្នាំ២០២០ បានចេញវិធានការទប់ស្កាត់បញ្ហានេះ ដោយតម្រូវឲ្យអ្នកទៅនៅទីតាំងថ្មីក្នុងសហគមន៍នេះ ទៅចុះឈ្មោះផ្លូវការ ដើម្បីទប់ស្កាត់អ្នកចំណូលថ្មី។
លិខិតលើកឡើងថា៖ «បើជនណាម្នាក់អះអាងថាខ្លួនជាម្ចាស់ដីព្រៃឈើខាងលើនេះ សូមចូលខ្លួនមកកាន់ស្នាក់ការផ្នែករដ្ឋបាលព្រៃឈើសំរោង ក្នុងរយៈពេល៣០ថ្ងៃចាប់ពីថ្ងៃប្រកាសជូនដំណឹងនេះតទៅ ។ បើហួសកាលបរិច្ឆេទដូចបានកំណត់ខាងលើ នៅតែពុំឃើញជនណាមកដោះស្រាយទេនោះផ្នែករដ្ឋបាលព្រៃឈើសំរោងចាត់ទុកថាវត្ថុតាងជាដីព្រៃឈើទាំងអស់នោះជារបស់គ្មានម្ចាស់ ហើយកសាងសំណុំរឿងតាមនីតិវិធីនៃច្បាប់ស្ដីពីព្រៃឈើ »។
មន្ត្រីសម្របសម្របសម្រួលសមាគមអាដហុកការពារសិទ្ធិមនុស្សប្រចាំខេត្តឧត្តមានជ័យ លោក ស្រី ណារ៉េន និយាយថា ការច្រានចោលរបស់អាជ្ញាធរនិងភាគីកងកម្លាំងជាចម្លើយដោះសារគេចចេញពីការទទួលខុសត្រូវ។
លោកបន្ដថា៖ «បើកងកម្លាំងប្រដាប់អាវុធឈរជើងនៅកន្លែងនោះមិនសហការណ៍គ្នាព្រៃឈើនៅទីនោះមិនបាត់បង់ស្ទើរតែអស់ដូចសព្វថ្ងៃនេះទេ»។
អ្នកឃ្លាំមើលរូបនេះជម្រុញឲ្យអាជ្ញាធរពាក់ព័ន្ធចាត់វិធានការបន្ទាន់ ដើម្បីរក្សាព្រៃឈើសហគមន៍ និងចាប់អ្នកប្រព្រឹត្តល្មើលមកទទួលទោស៕
———————————–
ដោយពលរដ្ឋសារព័ត៌មានខេត្តឧត្ដរមានជ័យ
