របាយការណ៍ពលរដ្ឋអ្នកសារព័ត៌មាន
គ្រូបង្រៀននិងសិស្សានុសិស្សវិទ្យាល័យទួលប្រាសាទសែនសុខ រាជធានីភ្នំពេញ បាននាំគ្នាដាក់ញត្ដិប្តឹងទៅក្រសួងអប់រំ យុវជន និងកីឡា កាលពីពេលថ្មីៗនេះ ដើម្បីស្នើសុំឱ្យផ្លាស់ប្តូរនាយកសាលាវិទ្យាល័យទួលប្រាសាទសែនសុខ លោក អ៊ុំ សុកំ ក្រោយរកឃើញភាពមិនប្រក្រតីក្នុងការចាត់ចែង ដឹកនាំបុគ្គលិកសិក្សា និងការចាយវាយថវិកាដោយគ្មានតម្លាភាព។
យោងតាមលិខិតមួយច្បាប់ចុះកាលបរិច្ឆេទថ្ងៃទី១១ ខែកញ្ញា ឆ្នាំ២០២២ ដែលពលរដ្ឋអ្នកសារព័ត៌មានបានទទួលបានឱ្យដឹងថា លោកគ្រូអ្នកគ្រូនិងសិស្សានុសិស្សនៃវិទ្យាល័យទួលប្រាសាទសែនសុខ បានដាក់លិខិតមួយច្បាប់ទៅកាន់រដ្ឋមន្ដ្រីក្រសួងអប់រំ យុវជន និងកីឡា លោក ហង់ ជួនណារ៉ុន កាលពីថ្ងៃទី១១ ខែកញ្ញា ឆ្នាំ២០២២ ដើម្បីស្នើសុំឱ្យក្រសួងផ្លាស់ប្ដូរនាយកសាលារូបនេះចេញ។
ពលរដ្ឋអ្នកសារព័ត៌មានមិនអាចទាក់ទងសុំការឆ្លើយតបបានភ្លាមៗពីលោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បាននៅឡើយទេ។ ប៉ុន្តែអ្នកនាំពាក្យក្រសួងអប់រំ យុវជន និងកីឡា លោក រស់ សុវាចា បានឆ្លើយតបតាមសារតេឡេក្រាមកាលពីថ្ងៃទី៥ ខែតុលាទាក់ទងនឹងករណីវិវាទនៅក្នុងបុគ្គលិកអប់រំនេះថា គណ:គ្រប់គ្រងគ្រឹះស្ថានសិក្សា ត្រូវដោះស្រាយនៅតាមគ្រឹះស្ថានសិក្សា ដោយចាត់វិធានការតាមទិដ្ឋភាពជាក់ស្តែង។
លោកថា បើចាំបាច់គណ:គ្រប់គ្រងគ្រឹះស្ថានសិក្សា អាចសហការជាមួយមន្ទីរអប់រំ យុវជន និងកីឡា ទាំង២៥ខេត្តរាជធានី ដែលជាសេនាធិការតាមឋានានុក្រមនៃក្រសួងអប់រំ យុវជន និងកីឡា។
យ៉ាងណាលោកថា ជម្លោះបុគ្គលិកសិក្សានេះ អាចជះឥទ្ធិពលជាវិជ្ជមានលើគុណភាពអប់រំនៅទូទាំងប្រទេសកម្ពុជា ជាពិសេសការដំឡើងឋានៈវិជ្ជាជីវៈដល់បុគ្គលិកអប់រំជា «នាយកល្អ» និងជា «គ្រូល្អ» ដែលជាកិច្ចការមួយក្នុងចំណោមកិច្ចការផ្សេងទៀត របស់ក្រសួងអប់រំ យុវជន និងកីឡា។
យ៉ាងណា យោងតាមលិខិតដែលមានកម្រាស់៣ទំព័រ ដែលលោកគ្រូអ្នកគ្រូនៅសាលាវិទ្យាល័យទួលប្រាសាទសែនសុខបានប្តឹងទៅកាន់ក្រសួងអប់រំ យុវជន និងកីឡា កាលពីថ្ងៃទី១១ ខែកញ្ញា បានលើកឡើងពីភាពមិនប្រក្រតីជាច្រើនចំណុចដែលក្នុងនោះរួមមាន ការមិនបង្ហាញតម្លាភាពក្នុងការចាយវាយថវិកាដំណើរការសាលារៀន (SOB) និងថវិកាគម្រោង (SIEP ឬ GIEP) ដែលប្រើប្រាស់សម្រាប់អភិវឌ្ឍន៍ការបង្រៀន និងរៀន។ ការមិនប្រកាសពីតម្លាភាពថវិកាចំណូលដែលសាលាទទួលបានពីការដេញថ្លៃ ភាស៊ីកង់ និងតូបផ្សារ នៅក្នុងសាលារៀន, ការឃុបឃិតលាក់បុគ្គលិកអសកម្ម ដែលមិនបានមកបំពេញការងារដោយប្រើពាក្យសម្ដីថា ខ្លួនជាអ្នកមានឆន្ទានុសិទ្ធិ, ការអនុញ្ញាតឱ្យកូនប្រុសរបស់ខ្លួនដែលគ្មានវិជ្ជាជីវៈជាគ្រូបង្រៀន មកបង្រៀនជំនួសបុគ្គលិកអសកម្ម ជាថ្នូរការបើកយកប្រាក់បៀវត្សពីបុគ្គលិកដែលអសកម្មទាំងនោះ, ការតម្រូវឱ្យលោកគ្រូអ្នកគ្រូបង់ប្រាក់លើការបង់ថ្លៃជួលអ្នកយាមសាលា ១០០០០ រៀលក្នុងមួយខែ និងការចំណាយលើការធ្វើឯកសារផ្សេងៗ ដូចជា ការទិញសម្ភារៈសិក្សាដូចជា ហ្វឺត និងទឹកហ្វឺតជាដើម។
ក្រៅពីនេះ ក្នុងពាក្យបណ្តឹងនេះ ក៏បានលើកឡើងដែរថា សាលាបានទារប្រាក់ពីអាណាព្យាបាលសិស្សដែលសុំផ្ទេរការសិក្សា ការទារប្រាក់ពីការស្នើសុំដកសញ្ញាប័ត្រប្រឡង និងការកាត់យកប្រាក់ពីគណៈកម្មាការមេប្រយោគពេលចេញបេសកម្មប្រឡង រួមទាំងការប្រើប្រាស់អំណាចគាប់សង្កត់ គំរាមកំហែង អសីលធម៌ ដែលធ្វើឱ្យប៉ះពាល់ដល់សតិអារម្មណ៍ លោកគ្រូ អ្នកគ្រូ ដែលកំពុងបំពេញការងារបង្រៀនដល់សិស្សានុសិស្សជាដើម។
យ៉ាងណាក្ដីលោកគ្រូអ្នកគ្រូនិងសិស្សានុសិស្សនៃវិទ្យាល័យទួលប្រាសាទសែនសុខ បានថ្លែងឱ្យដឹងតាមរយៈលិខិតនេះទៀតថា៖ «យើងខ្ញុំទាំងអស់គ្នា មានការមិនពេញចិត្តជាខ្លាំងចំពោះលោក អ៊ុំ សុកំ ដែលជាមនុស្សអសីលធម៌ដោយគាត់តែងដើរញុះញង់ លាបពណ៌ ឆ្កិះឆ្កៀល បំបែកបំបាក់សាមគ្គីផ្ទៃក្នុងនៅក្នុងអង្គភាព ខ្វះគុណធម៌ អាត្មានិយម ប្រកាន់បក្ខពួក នៅតែផ្ទះ មកធ្វើការមិនដែលទៀងទាត់ឡើយ»។
គោលបំណងក្នុងលិខិតនេះ បានស្នើទៅក្រសួងអប់រំ យុវជន និងកីឡា ដោយទទូចសុំឱ្យរដ្ឋមន្ដ្រីក្រសួងអប់រំ លោក ហង់ ជួនណារ៉ុន ជួយត្រួតពិនិត្យ និងធ្វើការសម្រេចករណីខាងលើនេះ ជូនដល់លោកគ្រូអ្នកគ្រូ ដោយសារ លោកគ្រូអ្នកគ្រូនៅក្នុងគ្រឹះស្ថានអប់រំមួយនេះ មិនអាចធ្វើការងារក្រោមការគាប់សង្កត់ផ្លូវចិត្តរបស់លោក អ៊ុំ សុកំ បន្ដទៀតបានឡើយ។
ពាក់ព័ន្ធនិងរឿងនេះ គ្រូបង្រៀននៅក្នុងវិទ្យាល័យទួលប្រាសាទសែនសុខ បានថ្លែងបន្ថែមដោយសុំមិនបញ្ចេញឈ្មោះថា ករណីនេះមានភាពអយុត្តិធម៌ខ្លាំងណាស់ចំពោះពួកលោក។ លោកបន្តថា កន្លងមកនាយកសាលារូបនេះ តែងតែកោះហៅគ្រូបង្រៀនណា ដែលមិនព្រមបង់លុយយាម និងបង្ខំសិស្សសាលាមួយចំនួន ឱ្យផ្ដិតមេដៃ ដើម្បីប្ដឹងគ្រូបង្រៀនវិញទៀតផង។
លោកថា លោកគ្រូអ្នកគ្រូដែលបង្រៀននៅក្នុងសាលារៀនមួយនេះ បានរងនូវការគំរាមកំហែងពីនាយកសាលា និងបានប្រើពាក្យអសុរសជាច្រើនទៀតមកលើលោកគ្រូអ្នកគ្រូនិងសិស្សានុសិស្សថែមទៀតផង។
មិនខុសគ្នានោះទេ លោកគ្រូបង្រៀនម្នាក់ទៀតដែលសុំមិនបញ្ចេញឈ្មោះបានចាត់ទុកថា វាជាអំពើពុករលួយ បក្ខពួកនិយម ដែលមិនគួរកើតមានឡើយនៅក្នុងគ្រឹះស្ថានអប់រំរបស់រដ្ឋនោះទេ។ លោកបានស្នើសុំឱ្យរដ្ឋមន្ត្រីក្រសួងអប់រំ ចុះមកស៊ើបអង្កេត ឬធ្វើអធិការកិច្ចនៅក្នុងគ្រឹះស្ថានអប់រំមួយនេះជាបន្ទាន់ដើម្បីដឹងការពិត។
លោកថ្លែងយ៉ាងខ្លីថា៖«សុំក្រសួងមេត្ដាជួយដោះស្រាយបញ្ហាហ្នឹងផង ពួកខ្ញុំមិនពេញចិត្តនាយកសាលាចឹងទេ»។
គួរំលឹកជូនដែរថា កាលពីថ្ងៃទី២៤ ខែសីហា ឆ្នាំ២០២២ កន្លងទៅ លោក អ៊ុំ សុកំ ក៏ត្រូវបានអង្គភាពប្រឆាំងអំពើពុករលួយ (ACU) កោះហៅដើម្បីដោះស្រាយបញ្ហាមិនប្រក្រតីមួយចំនួន ដែលលោកបានប្រព្រឹត្ដទៅតាមបណ្ដឹងរបស់លោកគ្រូអ្នកគ្រូ និងសិស្សានុសិស្សនៃវិទ្យាល័យទួលប្រាសាទសែនសុខផងដែរ។ ប៉ុន្ដែអង្គភាពប្រឆាំងអំពើពុករលួយ នៅមិនទាន់សម្រេចជាផ្លូវការយ៉ាងណាមួយនៅឡើយ ទើបលោកគ្រូអ្នកគ្រូសម្រេចប្ដឹងទៅរដ្ឋមន្ដ្រីក្រសួងអប់រំ យុវជន និងកីឡា ដែលជាអាណាព្យាបាលរបស់លោកគ្រូអ្នកគ្រូបន្ថែមទៀត។
ជុំវិញរឿងនេះ នាយកសាលាវិទ្យាល័យទួលប្រាសាទសែនសុខ លោក អ៊ុំ សុកំ បានឆ្លើយដោយបដិសេធទាំងស្រុង ចំពោះការចោទប្រកាន់លើរូបលោកនេះ។ លោក អ៊ុំ សុកំ បានឆ្លើយបំភ្លឺយ៉ាងខ្លីថា រឿងរបស់លោក កំពុងស្ថិតនៅដែនសមត្ថកិច្ចរបស់អង្គភាពប្រឆាំងអំពើពុករលួយនៅឡើយ ដែលក្នុងសេចក្ដីប្រកាសរបស់អង្គភាពប្រឆាំងអំពើពុករលួយ ក៏បានបិទផ្សព្វផ្សាយនៅក្នុងសាលារៀនរួចហើយដែរ។
លោកនាយកបន្ដថា៖«ខ្ញុំបានឆ្លើយបំភ្លឺនៅACUហើយ ហើយបិទសេចក្ដីប្រកាសពេញសាលាតែពួកគាត់មិនមើល ហើយចេះតែដើរប្ដឹងខ្ញុំ វាអាចខូចកិត្ដិយសខ្ញុំដែរ»។
យ៉ាងណា នៅក្នុងលិខិតរបស់លោកគ្រូអ្នកគ្រូសាលាវិទ្យាល័យទួលប្រាសាទសែនសុខបានគូសបញ្ជាក់បន្ថែមថា ពួកគាត់ក៏ធ្លាប់បានស្នើសុំឱ្យមានការបើកកិច្ចប្រជុំមួយ ដើម្បីសុំការបកស្រាយពីលោកនាយក អ៊ុំ សុកំ ទាក់ទងបញ្ហាមិនប្រក្រតីខាងលើនេះដែរ ក៏ប៉ុន្តែលោកបានបដិសេធ៕
………………
អត្ថបទដោយពលរដ្ឋអ្នកសារព័ត៌មាន លោក ឃាង សុខមាន
