ថ្ងៃនេះ យើងសូមនាំបងប្អូនមិត្តអ្នកទស្សនាទាំងឡាយឱ្យស្គាល់ពីទីតាំងផ្សោតមួយកន្លែង ដែលមានវត្តមាននៅតាមដងទន្លេមេគង្គផ្នែកខាងលើ ក្នុងតំបន់អន្លង់កោះផ្តៅ នៃសហគមន៍កោះស័ក្តិសិទ្ធ ស្ថិតនៅភូមិកោះផ្តៅ ឃុំកំពង់ចាម ស្រុកសំបូរ ខេត្តក្រចេះ។
តំបន់នេះ ជាទីតាំងគួរឱ្យចាប់អារម្មណ៍មួយ ដ្បិតកាលពីដើមឆ្នាំ២០២៤ មានកូនផ្សោតមួយបានកើតឡើងនៅអន្លង់កោះផ្តៅនេះ ហើយបើតាមសហគមន៍ចំនួនផ្សោតកើតថ្មីនោះ បានធ្វើឱ្យចំនួនផ្សោតនៅទីតាំងនេះមានប្រមាណ១០ក្បាល។
ចំនួនផ្សោត និងវត្តមានផ្សោតថ្មីនៅឆ្នាំមុននោះហើយ បានធ្វើឱ្យមានភ្ញៀវទេសចរជាតិ និងអន្តរជាតិជាច្រើនបានមកលេងសហគមន៍កោះស័ក្តិសិទ្ធនេះ ដោយក្នុងគោលបំណងដើម្បីបានឃើញផ្សោតផង និងដើម្បីបានទស្សនាទេសភាពដ៏ស្រស់ស្អាត ព្រមទាំងឈ្វេងយល់ពីជីវភាពរស់នៅរបស់អ្នកស្រុកផង។
លោក អ៊ឹម យាត្រា បច្ចុប្បន្នរស់នៅក្នុងភូមិកោះផ្ដៅ ឃុំកំពង់ចាម ស្រុកសំបូរ ខេត្តក្រចេះ បានក្លាយជាប្រធានសហគមន៍អន្លង់កោះស័ក្កិសិទ្ធតាំងពីឆ្នាំ២០១៨។ ជាតួនាទីដែលប្រជាសហគមន៍ផ្តល់ឱ្យ និងជាប្រភេទការងារស្មគ្រចិត្តដោយមិនមានប្រាក់កម្រៃនោះ លោក យាត្រា បានបំពេញការងារនេះដោយរីករាយ ប៉ុន្តែក៏ត្រូវជួបបញ្ហាប្រឈមមួយចំនួនដែរ ដូចជា ការរើសអើងពីមនុស្សមួយចំនួន កង្វះការគាំទ្រជាថវិកា សម្ភារៈ ក្នុងពេលបំពេញការងារចុះល្បាត ពិសេសទប់ស្កាត់សកម្មភាពនេសាទនានាដែលបណ្តាលប៉ះពាល់ដល់ផ្សោត និងត្រីមេពូជ។ លោកនៅចាំបានថា នៅឆ្នាំ២០២៤ ផ្សោតឧស្សាហ៍ផូស ឬបង្ហាញខ្លួននៅលើផ្ទៃទឹក ពិសេសគ្រាលដែលកូនផ្សោតថ្មីបានកើតឡើងកាលពីខែមីនានោះ មានភ្ញៀវទេសចរជាច្រើនមកលេងកម្សាន្តនៅក្នុងសហគមន៍របស់លោក។
««««««វីដេអូ លោក អ៊ឹម យាត្រា រៀបរាប់ពីពេលផ្សោតបង្ហាញវត្តមានច្រើន»»»»»»
ប្រធានសហគមន៍ដដែលចេះតែបន្តការងារស្មគ្រចិត្តនេះជាធម្មតា ពិសេសឃ្លាំមើលសកម្មភាពវត្តមានសត្វផ្សោតនៅតំបន់អន្លង់កោះផ្តៅ និងសកម្មភាពនេសាទនានា។ ក៏ប៉ុន្តែនៅឆ្នាំនេះ វត្តមានសត្វផ្សោតមិនបានផូស ឬបង្ហាញខ្លួននៅលើផ្ទៃទឹកដូចឆ្នាំមុនទៀតឡើយ។ ការមិនបង្ហាញខ្លួននៅលើផ្ទៃទឹកដូចកាលពីឆ្នាំមុន អាចដោយសារសត្វផ្សោតទាំងនោះបាននាំគ្នាបំលាស់ទីឬ ចល័តទៅកាន់តំបន់ផ្សេង ដែលស្ងប់ស្ងាត់ ដ្បិតតំបន់របស់លោក តែងមានសកម្មភាពនេសាទផ្សេងៗ ពិសេសការលួចនេសាទនៅតំបន់អន្លង់ផ្សោតរស់នៅដែលបង្កផលប៉ះពាល់ និងរំខានដល់ផ្សោតតែម្តង។
««««««វីដេអូ លោក អ៊ឹម យាត្រា រៀបរាប់ពីមូលហេតុផ្សោតលែងបង្ហាញវត្តមាន»»»»»»
ប្រធានសហគមន៍កោះអន្លង់ស័ក្តិសិទ្ធ លោក អ៊ឹម យាត្រា មើលឃើញអំពីផលប្រយោជន៍ជាច្រើនទាំងផលប្រយោជន៍ដែលផ្តល់ដល់សហគមន៍ និងសង្គមជាតិ ទាំងផលប្រយោជន៍ដោយផ្ទាល់ និងប្រយោល ប្រសិនបើវត្តមានផ្សោតនៅតំបន់អន្លង់កោះផ្តៅនៅតែមាន។ ផលប្រយោជន៍ផ្ទាល់ដូចជាសហគមន៍អាចរកកម្រៃពីការជូនភ្ញៀវទៅលេងកម្សាន្តក្នុងតំបន់សហគមន៍ តាមរយៈការមើលផ្សោត មើលទេសភាព ការទស្សនាពីជីវិតសហគមន៍តាមដងទន្លេមេគង្គជាដើម។
ចំណែកផលប្រយោជន៍ដោយប្រយោលវិញ គឺសហគមន៍របស់ពួកគាត់ រួមទាំងកេរ្តិ៍ឈ្មោះខេត្តក្រចេះ នឹងកាន់តែត្រូវបានមនុស្សជាច្រើនស្គាល់ ហើយការយកចិត្តទុកដាក់ក្នុងការអភិរក្ស និងថែរក្សាធនធានផ្សោត ព្រមទាំងធនធានធម្មជាតិនៅតំបន់នេះនឹងកើតមានកាន់តែច្រើនថែមទៀត។
««««««វីដេអូ លោក អ៊ឹម យាត្រា រៀបរាប់ពីផែនការក្នុងការថែរក្សាការពារផ្សោត »»»»»»
សត្វត្រីផ្សោតទន្លេមេគង្គ គឺជាប្រភេទសត្វត្រីដែលពពោះកូនក្នុងផ្ទៃ រយៈពេល១៤ខែ។ សត្វត្រីផ្សោតញី អាចបង្កើតកូនបានតែម្តងទេ គឺក្នុងរវាងពី២ទៅ៣ឆ្នាំម្តង ហើយត្រីផ្សោតដែលអាចឈានដល់វ័យបន្តពូជ បាន លុះត្រាត្រីផ្សោតនោះពេញវ័យអាយុប្រមាណពី ៧ ទៅ ៩ឆ្នាំ។
សត្វផ្សោតទន្លេមេគង្គ ត្រូវបានចាត់ទុកជារតនសម្បត្តិជាតិមានជីវិតនៃប្រទេសកម្ពុជា ហើយជាសត្វមានតម្លៃស្ថិតនៅក្នុងបញ្ជីក្រហមរបស់អង្គការ អាយយូស៊ីអិន(IUCN) ដែលជាប្រភេទសត្វរងគ្រោះថ្នាក់ជិតផុតពូជបំផុត។ បើតាមការប៉ាន់ស្មាន សព្វថ្ងៃនេះផ្សោតដែលរស់នៅតាមដងទន្លេមេគង្គ ក្នុងខេត្តស្ទឹងត្រែង និងក្រចេះ មានចំនួនប្រមាណ ៩០ ក្បាលរាប់ទាំងផ្សោតមេពូជ និងផ្សោតវ័យជំទង់ផងដែរ។
តួលេខពីក្រសួងកសិកម្ម រុក្ខាប្រមាញ់ និងនេសាទ អំពីចំនួនផ្សោតកើត និងស្លាប់ពីឆ្នាំ២០២១ ដល់ខែមីនា ឆ្នាំ២០២៤ បង្ហាញថា នៅឆ្នាំ២០២១ មានសត្វផ្សោតកើតចំនួន ៦ក្បាល ប៉ុន្តែផ្សោតងាប់ទៅវិញមានចំនួន៩ក្បាល។ ដោយឡែកនៅឆ្នាំ២០២២ មានផ្សោតកើតចំនួន ៦ក្បាល ប៉ុន្តែផ្សោតងាប់មានចំនួនរហូតដល់១១ក្បាល។ រីឯឆ្នាំ២០២៣ ផ្សោតកើតថ្មីមានចំនួន ៨ក្បាល ខណៈផ្សោតងាប់មានចំនួន៥ក្បាល។ ចុងក្រោយរយៈពេល៣ខែ ដើមឆ្នាំ២០២៤ មានសត្វផ្សោតកើតថ្មីចំនួន ២ក្បាល ប៉ុន្តែមិនមានតួលេខផ្សោតងាប់នោះឡើយ៕
…………………………………………………..
ផលិតដោយសិក្ខាកាមជំនាន់ទី៣ នៃវគ្គបណ្តុះបណ្តាលស្តីពីការនិទានរឿងបែបទំនើប កញ្ញា សាន មេត្តា
