កើតក្នុងគ្រួសារដែលមានជីវភាពក្រខ្សត់ និងមានពិការភាពភ្នែកខាងស្តាំតាំងពីកំណើត ព្រមទាំងបានឆ្លងកាត់ជីវិតជូរចត់ជាច្រើន ប៉ុន្តែមិនអស់សង្ឃឹមក្នុងជីវិតជម្នះរាល់ឧបសគ្គទាំងនោះ ក្រាញ់ននៀលដើរទៅមុខដោយបានតស៊ូរៀនសូត្ររហូតបញ្ចប់ថ្នាក់បរិញ្ញាបត្រផ្នែកព័ត៌មានវិទ្យា និងបានក្លាយជាគ្រូបង្រៀនម្នាក់នៅក្នុងសហគមន៍ ព្រមទាំងក្លាយជាអ្នកផលិតមាតិកាអប់រំម្នាក់លើបណ្តាញសង្គមផងដែរ។
ជីវប្រវត្តិយុវជន ហ៊ាត សាត
កើតនៅឆ្នាំ១៩៩៨ នៅភូមិត្បែង ឃុំត្បែង ស្រុកកំពង់ស្វាយ ខេត្តកំពង់ធំ។ មានឪពុកម្តាយជាកសិករ ដោយប្រកបមុខរបរធ្វើស្រែចម្ការ និងនេសាទតាមបឹងស្ទឹងពេលទំនេរពីការងារធ្វើស្រែចម្ការ។ ក្នុងចំណោមបងប្អូន១០នាក់ លោក ហ៊ាត សាត ជាកូនប្រុសពៅ ប៉ុន្តែលោកអភ័ព្វជាងគេក្នុងចំណោមកូនៗទាំងអស់ដ្បិតភ្នែកខាងស្តាំរបស់លោកបានបិទជិតពីកំណើត ដែលធ្វើឱ្យលោកពិការ ខណៈបងៗផ្សេងមិនមានអ្នកពិការភាពឡើយ។
លោកមិនបានដឹងមូលហេតុពីម្តាយដែលធ្វើឱ្យលោកពិការភ្នែកម្ខាងពីកំណើតទេ គ្រាន់តែដឹងថា ពេលលោកចាប់កំណើតនោះដោយសារជីវភាពក្រលំបាក និងមានសមាជិកច្រើនក្នុងគ្រួសារផង ម្តាយរបស់លោកមានបំណងមិនចង់ទុករូបលោកឡើយ ដោយប្រើវិធីបុរាណដើម្បីបញ្ចប់ជីវិតលោកក្នុងពោះពេលនោះ។ ដោយសារជីវិតថ្លៃលោកមិនបានទៅណាឡើយ ក៏ប៉ុន្តែពេលលោកចាប់កំណើតមកមានបញ្ហាផ្នែករាយកាយ គឺភ្នែកម្ខាងរបស់លោកត្រូវបានបិទជិតទៅវិញ។
ដំណើរជីវិតចេះតែបន្តទៅមុខ ដោយក្នុងវ័យសិក្សាលោកបានចូលរៀននៅសាលាបឋមសិក្សាបាគង។ ក្រោយចប់បឋមសិក្សា កុមារារូបនេះ ក៏បានបន្តចូលរៀនវិទ្យាល័យ ហ៊ុន សែន ត្បែង។ ការសិក្សាចេះតែបន្តពីមួយឆ្នាំទៅមួយឆ្នាំ ប៉ុន្តែជាអកុសលនៅថ្នាក់ទី១០ ម្តាយរបស់លោកដែលជាបង្គោលសំខាន់នៅក្នុងគ្រួសារនោះក៏បានទទួលអនិច្ចកម្ម។ នោះជាពេលវេលាលំបាកបំផុត រហូតធ្វើឱ្យលោកបាក់ទឹកចិត្តស្ទើរតែលែងចង់បន្តការសិក្សាតែម្តង។
««««««««« រៀបរាប់ពីភាពលំបាក »»»»»»»»
ជីវិតក្មេងវត្ត
ដោយសារជីវភាពខ្វះខាត មិនមានថវិកាសម្រាប់ចំណាយលើការរៀនសូត្រផង ហើយបងៗរបស់លោកសុទ្ធតែមានគ្រួសារទាំងអស់ និងមិនមានជីវភាពធូរធារឡើយ ម្យ៉ាងឪពុកលោកក៏កាន់តែមានវ័យជរាទៅហើយ។ បញ្ហាសំខាន់ជាងគេទៀតនោះ គឺម្តាយទើបតែមរណភាព ដែលធ្វើឱ្យគ្រួសារលោកកាន់តែបាត់បង់ជំហរក្នុងគ្រួសារ។
បញ្ហាប្រឈមក្នុងគ្រួសារទាំងនេះហើយ ទើបកុមារារូបនេះសុំឪពុកដើម្បីបានទៅស្នាក់នៅវត្តអារាម ដែលជាកន្លែងមានឱកាសរៀនសូត្រ និងដើម្បីកាត់បន្ថយបន្ទុកក្នុងគ្រួសារផងដែរ។ ជីវភាពជាក្មេងវត្តក៏មិនខុសអ្វីទៅនឹងកុមារឬកូនសិស្សលោកផ្សេងទៀតដែរ គឺត្រូវបម្រើព្រះសង្ឃ និងប្រតិបត្តិធម៌ វិន័យតាមបែបព្រះពុទ្ធសាសនា។ ពេលទំនេរពីរៀនសូត្រ ត្រូវដើរយួរចានស្រាក់ឱ្យព្រះសង្ឃ នៅពេលលោកនិមន្តបិណ្ឌបាត្រតាមភូមិ ជួយរៀបចំពិធីតូចធំ ក្នុងវត្ត ជួយបោសសម្អាត លាងចានឆ្នាំងនៅក្នុងវត្តបាគង។ ចំណែកពេលយប់មកដល់ ក៏ស្វាធ្យាយរៀនសូត្រទាំងមេរៀនសាលា និងធម៌វិន័យផង។ ដោយសារតែផ្ទះនៅមិនឆ្ងាយពីវត្តអារាមដែលលោកស្នាក់អាស្រ័យ កុមារ ហ៊ាត សាត ក៏តែងតែទៅលេងផ្ទះជាញឹកញាប់ដែរ។
«««««««««ការរស់នៅក្នុងវត្តអារាម »»»»»»»»
បរាជ័យតែមិនអស់សង្ឃឹម
ដំណើរការសិក្សាចេះតែបន្ត ហើយពេលវេលានៃការប្រឡងមធ្យមសិក្សាទុតិយភូមិ ឬប្រឡងបាក់ឌុបក៏បានមកដល់។ តែគួរឱ្យនៅក្នុងការប្រឡងបាក់ឌុបឆ្នាំ២០១៨ លទ្ធផលដែលលោក ហ៊ាត សាត ទទួលបានគឺបរាជ័យដោយសាររូបគាត់មិនមានថវិកាដើម្បីរៀនគួរបន្ថែម ម្យ៉ាងខួរក្បាលរបស់គាត់ខ្សោយ ពិបាកនឹងចាប់យកមេរៀនសិក្សាបាន។ ស្របពេលការសិក្សាបរាជ័យពេលនោះ ការចេញផលិតមាតិកាអប់រំផ្សព្វផ្សាយលើបណ្តាញសង្គមក៏ទទួលរងភាពបរាជ័យដែរ។
«««««««««បរាជ័យក្នុងការសិក្សា»»»»»»»»
ក្រោយពីធ្លាក់បាក់ឌុប យុវជនដែលមានពិការភាពភ្នែកខាងស្តាំរូបនេះ ក៏បានទៅធ្វើការជាអ្នកព្រីនឯកសារនៅខេត្តសៀមរាប ដោយធ្វើការបានមួយរយៈពេលខ្លី លោកក៏បានសម្រេចឈប់ធ្វើការ ហើយត្រឡប់មកនៅវត្តវិញ ដើម្បីដាក់ស្វ័យរិន ព្រមទាំងជួយការងារព្រះសង្ឃ នឹងការងារកសិកម្មរបស់ឪពុកផងដែរ។ នៅឆ្នាំ២០១៩ លោកក៏បានប្រឡងបាក់ឌុបជាប់ និងចាប់យកជំនាញផ្នែកព័ត៌មានវិទ្យា ដើម្បីបន្តសិក្សារហូតដល់ចប់ថ្នាក់បរិញ្ញាបត្រនៅសាកលវិទ្យាល័យមួយក្នុងខេត្តកំពង់ធំ ។ បន្ទាប់ពីជួបនូវរឿងរ៉ាវបរាជ័យមួយចំនួន បានធ្វើឲ្យយុវជនរូបនេះ មានគំនិតមួយ ចង់ចាប់យករបរណាមួយដែលអាចផ្គត់ផ្គង់ជីវភាពខ្លួនឯង និងគ្រួសារបាន។ ដោយខ្លួនមានចំណេះដឹងផ្នែកព័ត៌មានវិទ្យា ហើយវត្តគង ក៏ត្រូវការអ្នកបង្រៀនដល់ព្រះសង្ឃផងនោះ ទើបព្រះសង្ឃបានអនុញ្ញាតឲ្យយុវជនរូបនេះសាកល្បងក្នុងការបង្រៀនលើផ្នែកកុំព្យូទ័រនៅក្នុងវត្តនេះតែម្តង។
ចាប់ពីឆ្នាំ២០២០ រហូតមកដល់ពេលបច្ចប្បុន្ននេះ លោក ហ៊ាត សាត បានបំពេញការងារជាអ្នកបង្រៀនដល់ព្រះសង្ឃ និងសិស្សានុសិស្ស ដែលមករៀនបន្ថែមប្រមាណ ៤ឆ្នាំមកហើយ ដែលអាចរកចំណូលពីថ្លៃបង្រៀនក្នុង១ខែៗបានគួរសមសម្រាប់ផ្គត់ផ្គង់ជីវភាពខ្លួនឯង និងចិញ្ចឹមឪពុកចាស់បាន។ ចំណែកកូនសិស្សបច្ចុប្បន្នទាំងព្រះសង្ឃ និង សិស្សានុសិស្ស មានចំនួនប្រមាណ៥០អង្គ/នាក់។
«««««««ភាពជោគជ័យពេលបច្ចុប្បន្ន»»»»»»»»
ព្រះតេជព្រះគុណព្រះនាម ឡាន់ ឡាច ជាសិស្សរៀនជំនាញកុំព្យូទ័រ មានថេរដីការៀបរាប់ពីផលប្រយោជន៍ដែលទទួលបានពីការបង្រៀនរបស់លោកគ្រូ ហ៊ាត សាត ដល់ព្រះសង្ឃ ក៏ដូចជាសិស្សានុសិស្សផ្សេងទៀតលើជំនាញព័ត៌មានវិទ្យាឬ កុំព្យូទ័រនេះ។ ព្រះអង្គ ក៏បានវាយពីអត្តចរឹករបស់លោក ហ៊ាង សាត ដែលជាមនុស្សល្អ ចេះជួយទុកធុរៈគ្រួសារ និងវត្តអារាម។ ដោយកន្លងមក នៅពេលដល់រដូវធ្វើស្រែ យុវជនរូបនេះតែងតែទៅជួយអ្នកផ្ទះ ភ្ជួររាស់ ធ្វើស្រែ និងមានកម្មវិធីបុណ្យទាននៅវត្តគាត់តែងតែជួយរៀបចំតុបតែងវត្ត ជាពិសេសនោះលើការ ថតរូប ផលិតវីដេអូជូនវត្តដែលអាចជួយលើកតម្កើងផ្នែកព្រះពុទ្ធសាសនាផងដែរ។
««««««««ព្រះសង្ឃមានថេរដីកា»»»»»»»»»
ត្រឡប់មកលោក ហ៊ាត សាត វិញ ។ ទោះរូបលោកកើតមកមានពិការភាពពីកំណើតក៏ពិតមែន តែរូបលោកមិនដែលអន់ចិត្តនឹងខ្លួនឯងទេ តែរីករាយដ្បិតកើតមក បានឃើញពន្លឺថ្ងៃនៃពិភពលោកទាំងមូល និងបានជម្នះរាល់ឧបសគ្គនានា រហូតមកទល់ពេលនេះក៏ទទួលបានជាផ្កែផ្កាខ្លះនៃការខិតខំប្រឹងប្រែងឥតឈប់ឈរបស់ខ្លួន។ មនុស្សម្នាក់ៗមានតែកាយសម្បទានតែមួយមុខមិនគ្រប់គ្រាន់ទេ តែត្រូវមាននូវចំណេះដឹង ជំនាញ សីលធម៌ក្នុងការរស់នៅ ការយោគយល់អាធ្យាស្រ័យឲ្យគ្នាទៅវិញទៅមក គឺជារឿងចាំបាច់មួយផ្នែកទៀត។
សម្រាប់ក្តីស្រម៉ៃទៅថ្ងៃអនាគតនោះ លោក ហ៊ាត សាត ចង់មានសាលានៅតាមភូមិ ដែលអាចបង្រៀនក្មេងៗ ពិសេសយុវជនជំនាន់ក្រោយនូវចំណេះជំនាញដែលលោកមាន ដើម្បីជាទុនដល់ពួកគេមុនឈានចូលថ្នាក់វិទ្យាល័យ ឬមហាវិទ្យាល័យ។
««««««««««សារចុងក្រោយ »»»»»»»»»
…………………………………………….
អត្ថបទនិទានរឿងបែបទំនើបផលិតដោយសិក្ខាកាមជំនាន់ទី២ លោក សេង ឡង់ឌី
