របាយការណ៍ពលរដ្ឋអ្នកសារព័ត៌មាន
តំណាងសហគមន៍ជាំក្រវៀនលោក ផុន សុផល អាយុ ៣២ ឆ្នាំ រស់នៅភូមិជាំក្រវៀន ឃុំជាំក្រវៀន ស្រុកមេមត់ ខេត្ដត្បូងឃ្មុំ បានថ្លែងបដិសេធចំពោះការចោទប្រកាន់របស់អភិបាលស្រុកមេមត់ដែលថា ការដាក់ញត្ដិរបស់ពលរដ្ឋ គឺមានអង្គការចាត់តាំង និងមានអ្នកនៅពីក្រោយខ្នង។
លោកបន្ដឱ្យដឹងទៀតថា ការដាក់ញត្ដិគ្រាន់តែចង់ឱ្យអាជ្ញាធរចេញប្លង់រឹងស្របច្បាប់ត្រឹមត្រូវមួយ ក្រោយពីមានអនុក្រឹត្យពីលោកនាយករដ្ឋមន្ដ្រី ហ៊ុន សែន កាត់ឆ្វៀលដីអាស្រ័យផលឱ្យពលរដ្ឋកាន់កាប់ស្របច្បាប់។ ប៉ុន្ដែបែរជាមន្ត្រីមន្ទីររៀបចំដែនដីខេត្ត មិនបានចេញប្លង់រឹងឱ្យប្រជាពលរដ្ឋទៅវិញ។
តំណាងសហគមន៍រូបនេះបន្ដថា៖ «អ្វីដែលចៅហ្វាយស្រុកនិយាយចឹង គឺខ្ញុំមិនអាចទទួលយកបានទេ ព្រោះការដែលគាត់និយាយនេះ គឺគាត់ចង់ចោទឬក៏ដាក់បន្ទុកទៅលើអ្នកណាម្នាក់តែម្ដង របៀបនេះគឺពហិកាមិនចង់ដោះស្រាយជូនប្រជាពលរដ្ឋ ខ្ញុំគិតថាគាត់និយាយចឹងអត់សមជាអ្នកដឹងនាំហ្អេ»។
កាលពីថ្ងៃទី២៩ ខែកញ្ញាម្សិលមិញនេះ ប្រជាពលរដ្ឋជាង១០០គ្រួសារ រស់នៅឃុំជាំក្រវៀន ស្រុកមេមត់ ខេត្តត្បូងឃ្មុំ បាននាំគ្នាដាក់ញត្តិសុំឱ្យអាជ្ញាធរចេញប្លង់កម្មសិទ្ធិដីធ្លី ប៉ុន្តែអាជ្ញាធរបានចោទប្រកាន់ពលរដ្ឋវិញថា មានអ្នកញុះញង់នៅពីក្រោយខ្នង។
លោក ផុន សុផល បានប្រាប់ពលរដ្ឋថា កាលពីថ្ងៃ២៨ ខែសីហា ឆ្នាំ២០២២ មេឃុំទន្លូង បានហៅពួកគាត់ទៅប្រជុំនៅសាលាឃុំ និងបានប្រាប់ថា ដីរបស់ពួកគាត់ មិនអាចចេញប្លង់កម្មសិទ្ធិជូនបានទេ ដោយសារដីជាប់បណ្ដឹង។ ពលរដ្ឋបានអះអាងថា បើសិនជាចង់បានប្លង់រឹង ទាល់តែកាត់ដីខ្លះ ឬក៏ឱ្យបង់ប្រាក់១ហិកតា ១០០ ០០០ រៀលទៅឱ្យភាគីដើមបណ្ដឹង ទើបអាចចេញជាប្លង់រឹងបាន។ ប៉ុន្ដែពួកគាត់បានបដិសេធនិងបន្ដដាក់ញត្ដិនៅសាលាស្រុកមេមត់ កាលពីថ្ងៃទី២៩ ខែកញ្ញា ឆ្នាំ២០២២ ដើម្បីសុំឱ្យអាជ្ញាធរជួយដោះស្រាយនិងចេញប្លង់រឹងឱ្យពួកគាត់។
បើតាមលោក ផុន សុផល បានឱ្យដឹងថា បើការប្រាប់របស់មេឃុំទន្លូង កាលពីថ្ងៃទី២៨ ខែសីហា ឆ្នាំ២០២២ ថាមានដើមបណ្ដឹងឈ្មោះ តោង សំអាត (យាយ ហ៊ុម) បានដាក់ពាក្យបណ្ដឹងនិងមិនឱ្យមានការចេញប្លង់រឹងជូនដល់ប្រជាពលរដ្ឋនោះទេ ពោលគឺទាល់តែពលរដ្ឋព្រមកាត់ដី ឬក៏បង់ប្រាក់ ១០០ ០០០ រៀល ក្នុង១ហិកតា ទើបអាចចេញប្លង់បាន។ ប៉ុន្ដែលោកថា តាំងពីដើមមកពួកលោកមិនដែលបានឃើញក៏ដូចជាស្គាល់បុគ្គលឈ្មោះ តោង សំអាត នោះទេ។
លោកបន្ដថា៖ «ពួកខ្ញុំមិនដែលបានជួបឈ្មោះ តោង សំអាត ហ្នឹងទេតាំងពីមុនមក ទើបតែថ្មីៗនេះ បែរជាមេឃុំទន្លូងបា្រប់ថា ឈ្មោះ តោង សំអាត បានដាក់ពាក្យបណ្ដឹងនិងមិនឱ្យចេញប្លង់រឹងឱ្យពួកខ្ញុំទៅវិញ»។
ចំណែកឯពលរដ្ឋរងគ្រោះម្នាក់ទៀតលោក ឈឺន ងឿន អាយុ៥១ឆ្នាំ រស់នៅឃុំជាំក្រវៀន ស្រុកមេមត់ បានឱ្យដឹងថា ដើមឡើយដីដែលពួកលោកបានទៅដាក់ញត្ដិម្សិលមិញជាដីរបស់ក្រុមហ៊ុន ម៉ែន សារុន បន្ទាប់មកពួកលោកបាននាំគ្នាទៅកាប់ឆ្ការ រហូតមានជម្លោះនិងក្រុមហ៊ុនប្ដឹងផ្ដល់គ្នា តែក្រោយមកនៅឆ្នាំ២០១៦ លោកនាយករដ្ឋមន្ត្រី ហ៊ុន សែន បានអនុវត្តន៍នូវយុទ្ធសាស្រ្ដស្បែកខ្លា ដោយបានកាត់ឆ្វៀលដីជាង១ ០០០ហិកតា មកឱ្យប្រជាពលរដ្ឋចំនួន៦ឃុំ អាស្រ័យផល និងបានឱ្យនិស្សិតចុះវាសវែង និងចេញប្លង់រឹងជូនពលរដ្ឋ ប៉ុន្ដែមកដល់ពេលនេះ បែរជាមិនទាន់បានប្លង់រឹងហើយថែមទាំងថា មានជនទី៣បានប្ដឹងរក្សាទុកទៅវិញ។
លោកបន្ដថា៖ «ពេលសម្ដេចកាត់ដីហ្នឹងឱ្យពួកខ្ញុំ ពួកខ្ញុំសប្បាយចិត្តណាស់ ពីព្រោះបានដីអាស្រ័យផលនិងអាចខ្ចីលុយអង្គការខ្លះគ្រាន់ធ្វើដើមទន់រកស៊ី តែមកដល់ឥឡូវនៅតែមិនទាន់បានប្លង់រឹង ហើយថែមទាំងចោទពួកខ្ញុំថា មានអ្នកនៅពីក្រោយខ្នងទៀត ការលើកឡើងរបស់គាត់ [អភិបាលស្រុកមេមត់] មិនត្រឹមត្រូវទេខ្ញុំសុំបដិសេធ»។
លោកបានបន្ថែមទៀតថា ការដាក់ញត្ដិគ្រាន់តែចង់ស្នើសុំឱ្យខាងអាជ្ញាធរជួយចេញប្លង់រឹងទៅលើដីដែលលោកនាយករដ្ឋមន្ដ្រីបានកាត់ឆ្វៀលឱ្យពួកលោកប៉ុណ្ណោះ ហើយទៅក្នុងនាមពួកលោក ជាម្ចាស់ដី ប៉ុន្ដែបែរជាអភិបាលស្រុកមិនព្រមទទួលយកញត្ដិទៅវិញ។
លោកថា៖ «មិនមានអ្នកណាចាត់តាំងឱ្យខ្ញុំទៅទេ ពីព្រោះពួកខ្ញុំជាម្ចាស់ដី ពួកខ្ញុំវាអត់ឃ្លាន ចង់បានប្លង់រឹងឬចង់បានដីធ្វើស្រែស៊ី កាលណាបានប្លង់រឹងវាងាយស្រួលពួកខ្ញុំប្រកបមុខរបរអីទៅ អាចខ្ចីលុយគេបានខ្លះគ្រាន់ចិញ្ចឹមជីវិត ចុះបើពួកខ្ញុំអត់បាន តើឱ្យពួកខ្ញុំពឹងអី បានអីចិញ្ចឹមគ្រួសារ។ ខ្ញុំស្នើដល់សម្ដេចមេត្ដាជួយកូនចៅផង ឱ្យចេញប្លង់រឹងឆាប់ៗមក ដើម្បីបានដីចិញ្ចឹមជីវិតបន្ដទៀត»។
មេឃុំទន្លូងលោក ប៊ឹង ថន បានថ្លែងប្រាប់ពលរដ្ឋអ្នកសារព័ត៌មានCCIMថា លោកកំពុងតែសម្របសម្រួលដើម្បីបញ្ចប់បញ្ហាទាំងអស់នៅក្នុងអាណត្ដិរបស់លោក ដោយថា ការដែលបញ្ហាទាំងអស់នេះ មិនទាន់ចប់ដោយសារមានមេខ្យល់ ៣ ទៅ ៤នាក់ ជានៅអ្នកនៅក្រោយខ្នង ទើបបញ្ហាចេះតែមិនចប់ លោកថា លោកខំដោះស្រាយតែពួកមេខ្យល់ខំបង្ករឿង។
លោកបន្ដថា៖ «ខ្ញុំនិយាយឱ្យចំតែម្ដង អាពួកមេខ្យល់ គឺពួកអាប្រឆាំងហ្មង ពិបាកនិយាយគ្នាណាស់ ខ្ញុំខំសម្របសម្រួល ពួកវាដើរប្រមូលប្រជាពលរដ្ឋឡើងតវ៉ាដល់ណាដល់ណីវិញ និយាយរួមពិបាកនិយាយគ្នាណាស់»។
មេឃុំបន្ដពន្យល់ទៀតថា មូលហេតុដែលប្លង់មិនទាន់ចេញបាន ដោយសារតែឈ្មោះ តោង សំអាត បានប្ដឹងជំទាស់ និងអនុក្រឹត្យរបស់រដ្ឋាភិបាល ទើបមិនអាចចេញបានពីព្រោះថា ដីនៅក្នុងអនុក្រឹត្យទំហំជិត ២០០០ហិកតានេះ មានដីរបស់ តោង សំអាត ជិត៤០០ហិកតា ប៉ុន្ដែលោកថា ដើម្បីឱ្យបញ្ចប់បញ្ហាអស់ហ្នឹង គឺខាងដើមបណ្ដឹងសូមកាត់ ៣% ឬ ២% នៃទំហំដីជិត៤០០ហិកតា ប៉ុន្ដែពលរដ្ឋមិនព្រម រហូតដល់មានការឡើងដាក់ញត្ដិទៅសាលាស្រុកកាលពីម្សិលមិញនេះ។
យ៉ាងណាក្តី លោកមេឃុំមិនបានបញ្ជាក់ប្រាប់ថា តើបុគ្គលឈ្មោះ តោង សំអាត នេះជានណានោះទេ បើទោះបីជាមានការសួរនាំក៏ដោយ។
ម្យ៉ាងវិញទៀតលោកថា លោកបាននិយាយជាមួយអភិបាលរងស្រុកមេមត់ថា បើសិនជាពលរដ្ឋព្រមឱ្យប្រាក់ក្នុង១ហិកតា ១០០ ០០០ រៀល លោកអាចនិងនិយាយជាមួយដើមបណ្ដឹង ដើម្បីដកពាក្យបណ្ដឹង រួចធ្វើប្លង់រឹង បានទាំងអស់គ្នា។ ប៉ុន្ដែពេលលោកហៅប្រជាពលរដ្ឋមកនិយាយពីរឿងហ្នឹង ពលរដ្ឋខ្លះក៏យល់ព្រម ពលរដ្ឋខ្លះក៏មិនព្រមទើបបញ្ហាមិនអាចបញ្ចប់បាន។
មេឃុំរូបនេះបន្ដថា៖ «ពលរដ្ឋខ្លះគាត់ព្រមឱ្យ១០ម៉ឺនរៀលក្នុង១ហិកតាទៅឱ្យ តោង សំអាត អ្នកខ្លះគាត់មិនព្រម ខ្ញុំថាបើពលរដ្ឋទាំងអស់គាត់ព្រមឱ្យ១០ម៉ឺនរៀលក្នុង១ហិកតា ខ្ញុំអាចនិយាយ តោង សំអាត ប្រហែលគាត់ដកពាក្យបណ្ដឹង ចឹងអាចចេញប្លង់រឹងបានគ្រប់គ្នាហើយ យ៉ាងណាខ្ញុំនឹងដោះស្រាយបញ្ហាអស់ហ្នឹងឱ្យចប់ក្នុងអាណាត្ដិរបស់ខ្ញុំ»។
យ៉ាងណាក៏ដោយលោកក៏បានជម្រុញឱ្យភាគីទាំង២សម្របសម្រួលគ្នា ដើម្បីបញ្ចប់បញ្ហាទាំងអស់ កុំនៅតែបន្ដ វាមិនបានផ្ដល់ផលចំណេញអ្វីនោះទេ ហើយលោកសង្ឃឹមថា ពលរដ្ឋនឹងព្រមទទួលសំណើររបស់លោកក្នុងការបញ្ចប់រឿងជម្លោះដីធ្លីនេះ។
ជាមួយគ្នានេះដែរ អភិបាលស្រុកមេមត់ លោក ស្រេង លី បានឆ្លើយតបដោយបដិសេធនៅព្រឹកថ្ងៃព្រហស្បតិ៍ថា លោកមិនបានហាមឃាត់ពលរដ្ឋមិនឱ្យដាក់ញត្ដិទាមទារអ្វីផ្សេងនោះទេ ប៉ុន្ដែការដែលពលរដ្ឋមកនេះ គ្រាន់តែលោកចង់ឱ្យមានតំណាងច្បាស់លាស់ប៉ុណ្ណោះ ទើបលោកទទួលញត្ដិ ហើយមកដល់ពេលនេះ លោកថា លោកមិនបានដឹងពីការចង់បានរបស់ពលរដ្ឋដែលមកសាលាស្រុកទេ។
លោកថា៖ «ខ្ញុំអត់មានឆ្លើយតបអីផង ហើយបំណងដែលមកក៏ខ្ញុំអត់ដឹងមកធ្វើអីឬមានបំណងអីដែរ ពេលឃើញគេមកទាំងហ្វូងចឹង ខ្ញុំក៏ចេញមកសួរថា មកមានការអី? ហើយអ្នកណាជាតំណាង ពួកគាត់ឆ្លើយថា អត់មានតំណាង ឬក៏អ្នកណានាំមកទេ ខ្ញុំក៏ថាចុះបើអត់មានអ្នករៀបចំ មិចបានមកគ្នាច្រើនជាង១០០នាក់ ហើយវាមិនដែលនឹកឃើញសុខៗនាំគ្នាមកទេ ហើយខ្ញុំសួរនាំ មិនមែនដើម្បីទៅរករឿងអ្នកដែលនាំមកដែរ គ្រាន់តែចង់ដឹងថា ពួកគាត់មានតំណាងអត់ ដើម្បីធ្វើការជជែកនិងដោះស្រាយគ្នា បើអត់ទេសុំអញ្ជើញទៅវិញចុះ»។
លោកអភិបាលស្រុកបានបញ្ជាក់ថា ការដែលលោកមិនទទួលញត្ដិ ព្រោះចង់ឱ្យពលរដ្ឋមានតំណាងដើម្បីដោះស្រាយគ្នា លោកមិនមានចេតនាណាមួយក្នុងការគេចវេសពីប្រជាពលរដ្ឋឡើយ។
លោកបន្ដថា៖ «ឱ្យតែពួកគាត់មានតំណាងត្រឹមត្រូវឬក៏ចាត់គ្នា៥នាក់ដែលមានសិទ្ធិក្នុងការសម្រេចណាមួយ គឺខ្ញុំចាំទទួលនិងដោះស្រាយជូនពួកគាត់»។
យ៉ាងណាក៏ដោយមុននឹងចេញផ្សាយនេះCCIMមិនអាចសុំការបំភ្លឺពីឈ្មោះ តោង សំអាត ដែលជាដើមបណ្ដឹងបាននោះទេ ពាក់ព័ន្ធនិងបញ្ហាខាងលើ។
បើតាមមន្ដ្រីសម្របសម្រួលសហគមន៍នៃសមាគមសម្ព័ន្ធកសិករកម្ពុជាប្រចាំខេត្តត្បូងឃ្មុំ លោក គឹម ពិសិដ្ឋ បានចាត់ទុកថា អភិបាលស្រុកហាក់មានចេតនាក្នុងការបង្ហាញពលរដ្ឋនៅក្រោមការគ្រប់គ្រង់របស់លោក គឺមិនមានចំណេះដឹងណាមួយឡើយ បានជាលោកនិយាយដូច្នេះ។
លោកបន្ដថា៖ «ការនិយាយរបស់អភិបាលស្រុក គឺចង់បង្ហាញថា ប្រជាពលរដ្ឋគ្មានចំណេះដឹងអីទេ ទើបបានជាគាត់ចោទថា មានអ្នកនៅពីក្រោយខ្នងពលរដ្ឋដូច្នេះ»។
មន្ដ្រីសម្របសម្រួលរូបនេះបន្ដថា ដើម្បីបញ្ចប់បញ្ហានេះ អាជ្ញាធរគួរតែបើកវេទិកាសាធារណៈមួយ សម្រាប់ឱ្យពលរដ្ឋសួរដេញដោលទើបជាវិធីសាស្ដ្រល្អៗ។
ចំណែកមន្ដ្រីសម្របសម្រួលនៃអង្គការអាដហុកប្រចាំខេត្តត្បូងឃ្មុំអ្នកស្រី ធីម ណារិន បានមើលឃើញថា អ្វីដែលប្រជាពលរដ្ឋតវ៉ាវាជាផលប្រយោជន៍ និងជាការចង់បានដែលវាកើតចេញពីផលលំបាកនៃកត្ដាជីវភាព និងជាភាពចាំបាច់ក្នុងការទាមទារប្លង់រឹង ដើម្បីបានជាម្ចាស់កម្មសិទ្ធិ ជាពិសេសក្នុងនាមជាអាជ្ញាធរ គួរតែគិតគូរពីបញ្ហាលំបាក និងកត្ដាប្រឈមផ្សេងៗរបស់ប្រជាពលរដ្ឋដែលនៅក្នុងមូលដ្ឋាន ជាជាងការគេចវេស និងមិនហ៊ានប្រឈមនិងប្រជាពរដ្ឋរបស់ខ្លួន។
អ្នកស្រីបន្ដថា៖ «ខ្ញុំនិយាយថា អាជ្ញាធរពាក់ព័ន្ធគួរចុះត្រួតពិនិត្យឱ្យដល់ទីកន្លែងនិងពិនិត្យទៅលើឯកសារកាន់កាប់របស់គាត់់ឱ្យបានត្រឹមត្រូវ ពីព្រោះឯកសារយើងដឹងហើយថា ដើម្បីឱ្យបានជាក់លាក់ថា ពួកគាត់កាន់កាប់ស្របច្បាប់ ឬមិនស្របច្បាប់ ទាល់តែយើងទៅដល់ទីកន្លែង ហើយយើងមានសាក្សីជាភស្ដុតាង ក្នុងការកំណត់ច្បាស់លាស់។ ម្យ៉ាងវិញទៀត ការដែលអាជ្ញាធរមិនព្រមទទួលយកញត្ដិរបស់ពលរដ្ឋដែលបានដាក់ទៅវាបង្ហាញផងដែរថា អាជ្ញាធរគ្មានការទទួលខុសត្រូវចំពោះការដោះស្រាយបញ្ហានៅក្នុងមូលដ្ឋានរបស់ខ្លួន»។
មន្ដ្រីរូបនេះបន្ដថា អ្នកស្រីសុំបដិសេធចំពោះការចោទប្រកាន់របស់អាជ្ញាធរថា មានអង្គការចាត់តាំងនៅពីក្រោយខ្នង នៃការដាក់ញត្ដិរបស់ពលរដ្ឋដោយគ្មានមូលដ្ឋានច្បាស់លាស់ ពីព្រោះពលរដ្ឋទាំងអស់ហ្នឹងជាពលរដ្ឋរបស់អាជ្ញាធរ មិនមែនជាពលរដ្ឋរបស់អង្គការសង្គមស៊ីវិលនោះទេ។ ក្រៅពីនេះអ្នកស្រីបន្ថែមថា អាជ្ញាធរគួរតែពន្លឿនការចេញប្លង់រឹងឱ្យពលរដ្ឋឱ្យបានឆាប់ ដើម្បីឱ្យពលរដ្ឋអាចយកទៅប្រើប្រាស់សម្រាប់ប្រកបមុខរបរប្រចាំថ្ងៃពួកគាត់បាន បើមិនអ៊ីចឹងទេពលរដ្ឋនឹងជួបបញ្ហាប្រឈមច្រើនថែមទៀត៕
…………………….
អត្ថបទដោយពលរដ្ឋអ្នកសារព័ត៌មានលោក ឃាង សុខមាន