ម្ចាស់ផ្ទះដែលបាក់ស្រុតចូលទៅក្នុងទន្លេ កាលពីថ្ងៃទី២ ខែមករា ស្ថិតនៅស្រុកពារាំង ខេត្តព្រៃវែង បានស្នើសុំឱ្យអាជ្ញាធរជួយឧបត្ថម្ភជាថវិកា ឬដីសម្រាប់ការសាងសង់លំនៅឋានថ្មី ខណៈប្រជាពលរដ្ឋជាច្រើនគ្រួសារផ្សេងទៀត កំពុងដេកភ័យ ដោយសារតែបាក់ច្រាំងទន្លេជាបន្តបន្ទាប់។
អ្នកស្រី កូវ វណ្ណៈ អាយុ ៤៧ឆ្នាំ មានមុខរបរធ្វើស្រែ និងជាម្ចាស់ផ្ទះថ្មមួយខ្នង ដែលរអិលធ្លាក់ចូលទន្លកាលពីពេលថ្មីៗនេះបាននិយាយថា រាល់ថ្ងៃនេះគ្រួសាររបស់អ្នកស្រីកំពុងស្នាក់នៅជាបណ្តោះអាសន្នជាមួយប្អូន។ អ្នកស្រីបន្តថា ផ្ទះរបស់អ្នកស្រីសាងសង់អស់ប្រាក់ជាង ៣០ ០០០ ដុល្លារអាមេរិក ដែលទើបសាងសង់បានរយៈពេល៧ឆ្នាំបានធ្លាក់ចូលទៅក្នុងទន្លេកាលពីពេលថ្មីៗនេះ។ អ្នកស្រីបន្តថា ប្រាក់ដែលសាងសង់ផ្ទះនេះ គឺអ្នកស្រីបានខ្ចីប្រាក់ពីធនាគារអេស៊ីលីដា និងចងការប្រាក់ឯកជនសម្រាប់សាងសង់។
អ្នកស្រី វណ្ណៈ និយាយថា៖ «ស្នើសុំថា បើសិនជាចង់ជួយខ្ញុំ ខ្ញុំស្នើសុំដីមក ដល់ពេលផ្ទះ ខ្ញុំអាចរកសន្សំលុយខ្លួនឯង សង់ជាផ្ទះដែកនៅក៏បាន ឱ្យតែថាជ្រកភ្លៀង កុំឱ្យទទឹកកូន ព្រោះកូននៅតូចៗណាស់អូន»។
ស្រ្តីមានកូន២រូបនេះ ឱ្យដឹងថា អ្នកស្រីបានរស់នៅភូមិជំនីក ឃុំកំពង់ពពិល ស្រុកពារាំង ខេត្តព្រៃវែងនេះ តាំងពីកើតមក ប៉ុន្តែមិនដែលធ្លាប់មានការរអិលបាក់ដីពីមុនឡើយ។
អ្នកស្រី វណ្ណៈ និយាយថា៖ «បងអត់ដឹងទេ(ថាអាចបាក់ស្រុត) ពីដំបូងដែលបងដឹងក្ដីមកកន្លែងហ្នឹង ដីស្មើធេង អត់មានស្រុត អត់មានអីទាំងអស់ ពេលបងសាងសង់ចាស់ៗថា វាមិនទៅណាទេ»។
អ្នកស្រី អឿន សៀកងីង អាយុ៥១ឆ្នាំ ដែលផ្ទះបាយនិងបន្ទប់ទឹករបស់អ្នកស្រីកំពុងមានស្នាមប្រេះបាននិយាយថា ជារៀងរាល់ថ្ងៃអ្នកស្រីដេកភ័យ ដោយសារបារម្ភថា ថ្ងៃណាមួយ ផ្ទះអ្នកស្រីនឹងរអិលធ្លាក់ចូលទៅក្នុងទន្លេ។
អ្នកស្រី សៀកងីង និយាយថា៖ «គ្មានគេងណាលក់ ព្រោះអីភ័យខ្លាចវាបាក់ទៅអាបឹង (ទន្លេ) អត់ដឹងខ្លួន ឥឡូងកំពុងភ័យថា មេឃរលឹមប៉្រុយៗមកទៀតខ្លាចថា ភ្លៀងមកដីវាស្រុតថែមទៅទៀត។…មិនដឹងធ្វើម៉េច ខ្ញុំអត់មានលុយដូចគេ គេមានលុយគេចាក់គ្រឹះចាក់អី»។
យោងតាមសេចក្ដីជូនដំណឹងរបស់រដ្ឋបាលឃុំកំពង់ពពិល ឱ្យដឹងថា កាលពីថ្ងៃទី០២ ខែមករា ឆ្នាំ ២០២៣ មានករណីបាក់ស្រុតដីមាត់ទន្លេតូច ដែលបណ្ដាលឱ្យខូចខាតផ្ទះទាំងស្រុងចូលក្នុងទន្លេចំនួន៤គ្រួសារ នៅភូមិព្រែកកាំភ្លើង និងភូមិជំនីក នៃឃុំកំពង់ពពិល ស្រុកពារាំង ខេត្តព្រៃវែង។
សេចក្ដីជូនដំណឹងដដែល បានគូសបញ្ជាក់ថា ជារៀងរាល់ឆ្នាំនៅរដូវទឹកស្រក ទន្លេតូចនេះតែងតែមានការបាក់ស្រុតដីនៅមាត់ច្រាំង ដែលបណ្ដាលឱ្យរងផលប៉ះពាល់លំនៅឋាននិងទ្រព្យសម្បត្តិប្រជាពលរដ្ឋយ៉ាងច្រើន។
អាជ្ញាធរមូលដ្ឋានថា ករណីបាក់ច្រាំងទន្លេកើតឡើងនៅដើមឆ្នាំ២០២៣នេះ ពុំបានបណ្ដាលឱ្យមានមនុស្សស្លាប់ឡើយ ប៉ុន្តែមានផ្ទះប្រជាពលរដ្ឋចំនួន៣ខ្នង បានរអិលស្រុតចូលទៅក្នុងទន្លេ ខណៈផ្ទះប្រជាពលរដ្ឋចំនួន២០ខ្នងផ្សេងទៀត កំពុងរងការខូចខាតដោយមានស្នាមប្រេះផ្សេងៗ។
លោក ឈាង ស៊ាវី មេឃុំកំពង់ពពិល និយាយថា អាជ្ញាធរមូលដ្ឋានមិនមានលទ្ធភាពជួយពលរដ្ឋដែលរងផលប៉ះពាល់ទាំងនោះឡើយ។ ដោយឡែកអាជ្ញាធរក៏មិនទាន់មានវិធានការអ្វី ដែលអាចជួយទប់ស្កាត់ ករណីបាក់ស្រុតដីច្រាំងទន្លេតូចនេះដែរ។
លោក ស៊ាវី៖ «ខ្ញុំគ្មានលទ្ធភាពជួយគាត់ទេ [ចុះលុយអភិវឌ្ឍន៍ភូមិឃុំ?] លុយអភិវឌ្ឍន៍ភូមិឃុំទុកអភិវឌ្ឍន៍ផ្លូវ បើសិនជាជួយ៣នាក់ហ្នឹង [និងពលរដ្ឋខូចខាតប្រេះដីផ្សេងទៀត] ដល់ពេលអ្នកផ្សេងទៀតចឹងដែរបានលុយណាទៅជួយគ្រប់គ្នា។ អត់មានលទ្ធភាពធ្វើទេ ព្រោះគេកំពុងហាមឃាត់ធ្វើនៅមាត់ (ទន្លេ) ចឹង វាអត់មានថវិកាទេ។…អាហ្នឹងអត់មានទេ [ទប់ច្រាំងទន្លេ] វិធានការទប់មិនបានទេអាហ្នឹង»។
លោកបន្តថា ផ្ទះចំនួនបីខ្នងដែលលិចចូលទន្លេ ក្នុងនោះមានផ្ទះថ្ម និងពីរទៀត គឺផ្ទះឈើប្រកក្បឿង ដែលគិតជាទំហំខូចខាតប្រមាណ ១០០ ០០០ ដុល្លារអាមេរិក។
លោកនិយាយថា៖ «ប្រហាក់ប្រហែលជា២០ខ្នង វាប្រេះអាផ្ទៃក្រោយ វាបាក់អាដីខាងក្រោយ វាប្រេះផ្ទះតិចតួចចឹង ប្រេះកន្ទុយផ្ទះ ផ្ទះបាយ បន្ទប់ទឹក។ [ការជួយ] កាកបាទក្រហមខេត្តចែកអំណោយនៅណុង»។
លោក ស៊ាង មួយឡៃ ប្រធានគម្រោងសិទ្ធិលំនៅឋាន និងស្រាវជ្រាវនៃអង្គការសមាគមធាងត្នោត មានប្រសាសន៍ថា អាជ្ញាធរត្រូវតាមដាននិងវាយតម្លៃពីហានិភ័យដែលអាចបណ្ដាលឱ្យមានការបាក់ច្រាំងកើតឡើង រួចត្រូវជូនដំណឹងដល់ពលរដ្ឋទុកជាមុន។
លោក មួយឡៃ និយាយថា៖ «អាជ្ញាធរគួរតែមានការសិក្សាវាយតម្លៃជាប្រចាំ ប្រកបដោយភាពច្បាស់លាស់ និងការទទួលខុសត្រូវ រួចធ្វើការជូនដំណឹងដល់ប្រជាពលរដ្ឋឱ្យគាត់បានដឹងទាន់ពេលវេលា។ ក្រៅពីនេះ សម្រាប់ប្រជាជនមួយចំនួនដែលមិនមានលទ្ធភាពក្នុងការសាងសង់លំនៅឋាន អាជ្ញាធរគួរតែមានការរៀបចំជាដីសម្បទានសង្គមកិច្ចទៅឱ្យប្រជាពលរដ្ឋផងដែរ»។
បើតាមរដ្ឋបាលឃុំកំពង់ពពិល គិតត្រឹមចុងឆ្នាំ២០២២កន្លងទៅនេះ ក៏មានការបាក់ស្រុតដីនៅមាត់ច្រាំងទន្លេតូច ស្ថិតនៅឃុំកំពង់ពពិល ស្រុកពារាំង ខេត្តព្រៃវែង ដែលបណ្តាលឱ្យខូចខាតផ្ទះសម្បែងប្រជាពលរដ្ឋចំនួន៥គ្រួសារ ដែលរស់នៅតាមបណ្ដោយមាត់ទន្លេនេះ។ អាជ្ញាធរបានអះអាងថា ករណីបាក់ស្រុតនេះ គឺជាករណីធម្មជាតិ៕
…………………….
អត្ថបទដោយពលរដ្ឋអ្នកសារព័ត៌មាន លោក វ៉ា សុភានុត
