ក្នុងរយៈពេលប្រមាណ ៥ឆ្នាំមកហើយ ដំណើរការទាមទារយុត្តិធម៌ដើម្បីឱ្យមានការគោរពសិទ្ធិការងារនៅកន្លែងល្បែងស៊ីសងនិងសណ្ឋាគារមួយនាកណ្តាលរាជធានីភ្នំពេញចេះតែបន្ត ខណៈសមាជិកអ្នកតវ៉ាខ្លះបានជួបឧបសគ្គជាច្រើន ទាំងក្នុងការទាមទារលក្ខខណ្ឌការងារ និងក្នុងស្ថានភាពគ្រួសារ។ កូដការិនីម្នាក់ដែលជាអតីតបុគ្គលិកក្រុមហ៊ុនណាហ្គាវើលដ៍(NagaWorld) ត្រូវមានឈ្មោះក្រុមហ៊ុនបញ្ឈប់ពីការងារកាលពី៤ឆ្នាំមុនម្នាក់ក្នុងចំណោមបុគ្គលិកដែលត្រូវបញ្ឈប់ជាច្រើនរយនាក់ទៀត គឺអ្នកស្រី ពៅ រស្មី។ កាលនៅមានកម្លាំងម៉ាំមួនគាត់បានចូលរួមតស៊ូមតិ ដោយទាមទារឱ្យក្រុមហ៊ុនទទួលយកសមាជិកសហជីពដែលត្រូវបានបញ្ឈប់ពីការងារឱ្យបានចូលបំពេញការងារឡើងវិញ និងឱ្យក្រុមហ៊ុនបញ្ឈប់ការរើសអើងសហជីពជាដើម។
=== Break with Pov Reaksmey video clips ==
អ្នកស្រី ពៅ រស្មី ជាសមាជិកសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍។ ការបាត់បង់ការងារនៅណាហ្គាវើលដ៍ មិនមែនគ្រាន់តែជាការបាត់បង់ប្រាក់ខែប៉ុណ្ណោះទេ ប៉ុន្តែជាចំណុចចាប់ផ្ដើមនៃវិបត្តិសេដ្ឋកិច្ចសម្រាប់គ្រួសារអ្នកស្រីផងដែរ។ ចាប់តាំងពីឆ្នាំ ២០២១ មក អ្នកស្រីត្រូវឆ្លងកាត់ការរើសអើងក្នុងការស្វែងរកការងារថ្មី ដោយសារប្រវត្តិជាកូដករចេញមុខតវ៉ា ដែលធ្វើឱ្យជីវភាពកាន់តែដុនដាប។ កញ្ចប់ប្រាក់សន្សំ ដែលធ្លាប់គ្រោងទុកសម្រាប់បើកហាងកាហ្វេតូចមួយក្នុងក្ដីស្រមៃ ត្រូវបានដកមកប្រើប្រាស់ដើម្បីដោះស្រាយជីវភាពប្រចាំថ្ងៃ និងថ្លៃផ្ទះជួលបន្តិចម្ដងៗ រហូតអស់រលីងពីខ្លួន។
ពីស្ត្រីដែលធ្លាប់មានកម្លាំងមាំមួន ស្វាហាប់តស៊ូមតិដើម្បីសិទ្ធិការងារឥតឈប់ឈរ ប៉ុន្តែបច្ចុប្បន្នបែរជាត្រូវការអ្នកមើលថែជាប្រចាំ ក្រោយរងរបួសធ្ងន់ធ្ងរដោយសារគ្រោះថ្នាក់ចរាចរណ៍កាលពីឆ្នាំមុន។
=== Break with Pov Reaksmey video clips ==
កាលពីថ្ងៃទី២៨ ខែឧសភា ឆ្នាំ២០២៥ គ្រោះថ្នាក់ចរាចរណ៍មួយបានធ្វើឱ្យអ្នកស្រី ពៅ រស្មី ធ្លាក់ក្នុងស្ថានភាពយ៉ាប់យឺន ដែលវាហាក់ជាការបន្ថែមនូវឧបសគ្គដ៏ធំមួយទៀតពីលើការលំបាករាប់ជំពូកដែលគ្រួសារគាត់កំពុងជួបប្រទះ។ របួសឈាមកកក្នុងខួរក្បាល បានធ្វើឱ្យអ្នកស្រីប្រែជាមនុស្សភ្លេចភ្លាំង និងពិបាកសូម្បីតែនិយាយស្ដីឱ្យចេញជាពាក្យពេចន៍។ ស្ថានភាពជំងឺទាមទារឱ្យមានការវះកាត់ជាបន្ទាន់ ខណៈបច្ចុប្បន្នស្ថានភាពសុខភាពរបស់អ្នកស្រីនៅមិនទាន់បានដូចដើមនៅឡើយ។
=== Break with Pov Reaksmey video clips ==
បច្ចុប្បន្ន ស្ថានភាពជីវភាពរបស់គ្រួសារនេះកំពុងស្ថិតក្នុងភាពខ្វះខាតយ៉ាងខ្លាំង។ អ្នកស្រី រស្មី ទើបតែបានឆ្លងកាត់ការវះកាត់ដាក់លលាដ៍ក្បាលថ្មីៗនេះ ដែលធ្វើឱ្យគ្រួសារត្រូវរែកពន់បំណុលចំនួន ៥,០០០ដុល្លារ យកមកព្យាបាលភរិយា ខណៈដែលគ្រួសារទាំងមូលកំពុងតែគ្មានចំណូលផង។ ក្រៅពីបំណុលវះកាត់ ការចំណាយលើថ្នាំសង្កូវប្រចាំខែ និងការហូបចុកប្រចាំថ្ងៃ បានក្លាយជាបន្ទុកដ៏ធ្ងន់ក្នុងគ្រួសារ ។
លោក ឡិច ជូឡាយ ដែលជាស្វាមី គឺជាបង្អែកតែមួយគត់។ លោកត្រូវមើលថែភរិយាជាប់ជានិច្ច តាំងពីការស្លៀកពាក់ ងូតទឹក បត់ដៃបត់ជើង រហូតដល់ការដាំស្លឱ្យភរិយាញ៉ាំ ព្រោះបច្ចុប្បន្នអ្នកស្រី រស្មី នៅមិនទាន់អាចដើររួចនៅឡើយ។
«ពួកខ្ញុំយ៉ាប់យឺនខ្លាំងណាស់បង ដោយសារអីវាយើងអត់លុយផង គាត់ត្រូវចំណាយក្នុងការព្យាបាលគាត់ ពីដំបូងវះកាត់អស់ច្រើន ហើយក្រោយមក យើងវះដាក់លលាដ៍មួយតង់ទៀត យើងត្រូវខ្ចីលុយគេទៀត ឥឡូវយើងជំពាក់គេ»។
ភក្តីភាព និងការតស៊ូដើរលើវិថីជាមួយគ្នារបស់អ្នកទាំងពីរ បានចាប់ផ្តើមសាងឡើងតាំងពីឆ្នាំ ២០១៣។ ពួកគាត់គឺជាកូដករណាហ្គាវើលដ៍ដែលបានស្គាល់គ្នា និងផ្ដើមសាងស្នេហានៅក្នុងអំឡុងពេលចេញតវ៉ាទាមទារសិទ្ធិការងារ។ ក្នុងអំឡុងពេលតស៊ូ ៤ឆ្នាំមកនេះ លោក ជូឡាយ ធ្លាប់ធ្វើជាអ្នកដឹកជញ្ជូនម្ហូប ជាអ្នកជួយលក់ដូរបងប្អូន។ រីឯអ្នកស្រី រស្មី ក៏ធ្លាប់ព្យាយាមធ្វើជាជាងសាឡនក្រៅម៉ោង ជួយមិត្តភក្តិលក់ឡេតាមអនឡាញ និងជួយលក់បាយម្ហូបឱ្យគេ ដើម្បីទប់ទល់នឹងការចំណាយ។
អ្នកស្រី រស្មី អតីតបុគ្គលិកផ្នែកចែកបៀរ ត្រូវបានក្រុមហ៊ុនបញ្ឈប់ក្រោមលេសវិបត្តិកូវីដ-១៩។ ចំណែកឯលោក ជូឡាយ អតីតបុគ្គលិកផ្នែកលក់កាក់ក្នុងការស៊ីណូ មិនមានឈ្មោះក្នុងបញ្ជីកាត់បុគ្គលិកទេ តែលោកក៏ចេញតវ៉ាជាមួយអ្នកដែលត្រូវបានបញ្ឈប់ដែរ ព្រោះលោកមិនអាចទទួលយកនូវការបំពានសិទ្ធិការងារពីសំណាក់ថៅកែឡើយ។
=== Break with Naga workers protesting ===
នៅក្នុងសេចក្តីថ្លែងការណ៍មួយកាលពីថ្ងៃទី១៣ ខែមករា ឆ្នាំ២០២៦ សហជីពទ្រទ្រង់សិទ្ធិការងារបុគ្គលិកកម្មករខ្មែរ ហៅកាត់ LRSU បានលើកឡើងថា កូដករដែលចេញធ្វើកូដកម្មទាមទារឱ្យក្រុមហ៊ុនគោរពសិទ្ធិការងារ និងបញ្ឈប់ការរើសអើសសហជីពភាគច្រើនជាស្ត្រី។ កូដករទាំងនោះ បានប្រឈមមុខនឹងការយាយី ការចាប់ខ្លួនដាក់ពន្ធនាគារ និងការបង្ក្រាបដោយហិង្សាពីអាជ្ញាធរ ដែលបណ្តាលឲ្យមានរបួស រួមទាំងកម្មការិនីមានផ្ទៃពោះម្នាក់បានរលូតកូនក្នុងអំឡុងពេលបណ្ដេញចេញដោយបង្ខំទៀតផង។
ប្រមាណ ៥ឆ្នាំនៃការបាត់បង់ការងារ និងគ្មានប្រាក់ចំណូលទៀងទាត់ មិនត្រឹមតែមិនអាចបំបែកចំណងស្នេហាពួកគាត់ទេ តែវាបានជួយឱ្យពួកគាត់កាន់តែស្រឡាញ់គ្នា និងតស៊ូដើម្បីយុត្តិធម៌រួមគ្នា ទោះជាពេលនេះស្ថិតក្នុងភាពទាល់ច្រកគ្មានសូម្បីតែប្រាក់សម្រាប់ព្យាបាលជំងឺក៏ដោយ។ បច្ចុប្បន្ន លោក ជូឡាយ នៅតែបន្តស្វែងរកការងារថ្មី ដើម្បីដោះស្រាយជីវភាព និងបន្តក្ដីសង្ឃឹមសម្រាប់អនាគត។
ទោះបីជាការនិយាយស្តីមានការលំបាក ក៏បេះដូងរបស់អ្នកស្រី រស្មី នៅតែបន្តស្រែករកយុត្តិធម៌តាមរយៈស្វាមី។ លោក ជូឡាយ នៅតែមានជំហរមុតមាំ ដោយចង់ឱ្យថៅកែ NagaWorld គោរពច្បាប់ប្រទេសកម្ពុជា និងបញ្ឈប់ការយកលេសដើម្បីកម្ចាត់សហជីពក្នុងក្រុមហ៊ុនបន្តទៀត។
«ពួកខ្ញុំមានឆន្ទៈឱ្យថៅកែណាហ្គាវើលគោរពច្បាប់ប្រទេសកម្ពុជា ចង់ឱ្យគាត់ដោះស្រាយ កុំឱ្យយកលេសកូវីដ-១៩… ទទួលយករចនាសម្ព័ន្ធសហជីពដែលនៅសេសសល់ចូលធ្វើការវិញ អ្នកមានឈ្មោះកាត់តាមសំណងតាមច្បាប់ឱ្យគ្រប់ឱ្យគាត់ ដោយសារអីកន្លងមកឱ្យអត់គ្រប់ទេ»។
វិវាទការងាររវាងអតីតបុគ្គលិកក្រុមហ៊ុនកាស៊ីណូណាហ្គាវើលដ៍រហូតដល់មានកូដកម្មរយៈពេលប្រមាណ៥ឆ្នាំមកនេះ កើតឡើងបន្ទាប់ពីកម្មករនិយោជិតប្រមាណ ១ ៣០០ នាក់ ដែលភាគច្រើនជាសមាជិកសហជីពទ្រទ្រង់សិទ្ធិបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ត្រូវបានបញ្ឈប់ពីការងារ អំឡុងខែមេសា ឆ្នាំ ២០២១។
ប្រមាណ ៥ ឆ្នាំនៃការរង់ចាំដំណោះស្រាយ និងយុត្តិធម៌សម្រាប់ពួកគាត់មួយចំនួនមិនទាន់មានក្តី តែយ៉ាងហោចណាស់សកម្មភាពពួកគាត់បានបង្ហាញពិភពលោកឱ្យឃើញពីអំណាចនៃភាពអត់ធ្មត់ និងភក្តីភាពរវាងប្តីប្រពន្ធ។ យុត្តិធម៌សម្រាប់ពួកគាត់ មិនមែនគ្រាន់តែជាការឈ្នះក្តីនោះទេ តែវាគឺជាការទទួលស្គាល់នូវតម្លៃនៃភាពជាមនុស្សក្នុងប្រព័ន្ធការងារនៅកម្ពុជា។
«ពួកខ្ញុំជាកូដករណាហ្គាវើល លើម្រាមដៃដប់សូមណូមពរទៅរដ្ឋាភិបាល និងក្រសួងពាក់ព័ន្ធទាំងអស់… តវ៉ា ៤ ឆ្នាំជិត ៥ ឆ្នាំ គឺអត់ទាន់មានដំណោះស្រាយទេ»៕
…………………………………………………………….
អត្ថបទដោយពលរដ្ឋអ្នកសារព័ត៌មាន អ្នកស្រី នឿន ដាវីន