សហរដ្ឋអាមេរិកបានប្រកាសយកពន្ធលើទំនិញនាំចូលពីកម្ពុជាជាផ្លូវការក្នុងទំហំ ៤៩ភាគរយ ដែលជាចំនួនច្រើនជាងគេក្នុងចំណោមបណ្តាប្រទេសផ្សេងទៀត ពិសេសប្រទេសនៅក្នុងតំបន់អាស៊ីអាគ្នេយ៍។
យោងតាមសារព័ត៌មានល្បីរបស់អាមេរិក NBC News របស់អាមេរិកនៅថ្ងៃទី២ ខែមេសា ដែលត្រូវនឹងថ្ងៃទី៣ ខែមេសានៅកម្ពុជានេះ បានឱ្យដឹងថា ប្រធានាធិបតីសហរដ្ឋអាមេរិកលោក ដូណាល់ ត្រាំ(Donald Trump) បានចុះហត្ថលេខាលើគោលនយោបាយ “ពន្ធគយ” ដ៏ខ្លាំងក្លានិងទូលំទូលាយនៅសេតវិមាន។
លោក បានប្រកាសដាក់ពន្ធលើទំនិញនាំចូលពីកម្ពុជារហូតដល់ ៤៩ភាគរយ ដើម្បីឆ្លើយតបនឹងពន្ធរបស់កម្ពុជាដែលបានយកពន្ធលើទំនិញអាមេរិកនាំចូលចំនួន ៩៧ភាគរយ។
វីដេអូដែល CNB NEWS បានការប្រកាសយកពន្ធលើកម្ពុជា និងបណ្តាប្រទេសជាច្រើនផ្សេងទៀតនេះ ធ្វើឡើងនៅសេតវិមានប្រធានាធិបតីសហរដ្ឋសហរដ្ឋអាមេរិក ដោយលោក ដូណាល់ ត្រាំ ថែមទាំងកាន់បដាជាតារាងបញ្ជីឈ្មោះប្រទេសដែលត្រូវបានកំណត់យកពន្ធទាំងនោះ។
លោក ត្រាំ បានអានបញ្ជីឈ្មោះទាំងនោះនៅមុខមន្ត្រី និងអ្នកសារព័ត៌មាន ហើយដល់ឈ្មោះកម្ពុជាដែលជាប្រទេសមួយត្រូវយកពន្ធច្រើនជាងគេរហូតដល់៤៩ភាគរយនោះ អានហើយក៏មានការផ្ទុះសំណើចថែមទៀតផង។
លោក ដូណាល់ ត្រាំ និយាយថា៖ «អូហ៍! មើលមកប្រទេសកម្ពុជា វាមានតួលេខយកពន្ធ(ពីអាមេរិក)ដល់ទៅ៩៧ភាគរយ ហើយយើងពិចារណាកាត់ពន្ធមកត្រឹម៤៧ភាគរយវិញ។ កម្ពុជាបានរកស៊ីចំណេញច្រើនពីសហរដ្ឋអាមេរិកណាស់ដែរ» ។
ក្រៅពីកម្ពុជា គោលនយោបាយ ពន្ធគយ របស់អាមេរិកនេះ ក៏បានប្រកាសដាក់ទៅប្រទេសនិងតំបន់គោលដៅចំនួន ១៨០ នៅជុំវិញពិភពលោក ដោយរួមមាន ចិន ជប៉ុន សហភាពអឺរ៉ុប ឥណ្ឌូណេស៊ី ម៉ាឡេស៊ី និងថៃ វៀតណាម ព្រមទាំងបណ្តាប្រទេសនៅអាស៊ីខាងត្បូងជាដើម។
យ៉ាងណា ក្នុងចំណោមបណ្តាប្រទេសទាំងនោះ កម្ពុជាត្រូវបានមើលឃើញថា ជាប្រទេសដែលសហរដ្ឋអាមេរិកសម្រេចដាក់ពន្ធត្រឡប់វិញ ៤៩ភាគរនេះ ជាចំនួនច្រើនជាងគេ។ ប្រទេសនៅតំបន់អាស៊ានដែលតាមពីក្រោយកម្ពុជា រួមមានឡាវ ៤៨ ភាគរយ វៀតណាម ៤៦ភាគរយ ភូមា ៤៤ភាគរយ ថៃ ៣៦ ភាគរយ ឥណ្ឌូណេស៊ី ៣២ ភាគរយ។
ពលរដ្ឋអ្នកសារព័ត៌មានមិនអាចទាក់ទងប្រធានអង្គភាពអ្នកនាំពាក្យភាពរាជរដ្ឋាភិបាលលោក ប៉ែន បូណា បានទេនៅថ្ងៃនេះ។
អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន្ត មានប្រសាសន៍ប្រាប់កាសែតក្នុងស្រុកមួយនៅថ្ងៃទី៣ខែមេសានេះថា រាជរដ្ឋាភិបាលកំពុងវាយតម្លៃអំពីផលវិបាក និងវិធានការដើម្បីដោះស្រាយនៃការដាក់ពន្ធគយរបស់អាមេរិកនេះ។
លោក ឃុន ថារ៉ូ មន្ត្រីកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថាសង់ត្រាល់ លើកឡើងថា ករណីខ្លះយើងត្រូវផ្ទៀងផ្ទាត់ទិន្ន័យរបស់ត្រាំ។ លោកបន្តថា ជាការពិតការសម្រេចរបស់សហរដ្ឋអាមេរិកនាំការយកពន្ធនាំចូលពីកម្ពុជា ៤៩ភាគរយនេះ នឹងអាចជះឥទ្ធិពល អវិជ្ជមានដល់វិស័យវាយនភណ្ឌកាត់ដេរ ដេរស្បែកជើង និង ផលិតផលធ្វើដំណើរ និងទំនិញផ្សេងទៀត ស្ថិតក្រោមភាពអនុគ្រោះពន្ធទូទៅGSPរបស់អាមេរិកផងដែរ។
លោក ឃុន ថារ៉ូ មានប្រសាសន៍ថា៖« តែវាក៏ជាមធ្យោបាយ និងជាវិធីសាស្ត្ររបស់ ត្រាំក្នុងការដាក់សម្ពាធ និង ស្វែងរកការចរចារណាមួយ ដើម្បីតែផលប្រយោជន៍សេដ្ឋកិច្ច។ ករណីនេះទាមទារអោយរដ្ឋាភិបាលត្រូវត្រៀមខ្លួន ចរចារជាមួយអាមេរិក ដើម្បីបន្ធូរបន្ថយ រនាំងពន្ធ រក្សាការប្រគួតប្រជែងរបស់វិស័យ ជាពិសេសផ្តាស់ប្តូរឥរិយាបទ និងគោលនយោបាយការទូតផ្នែកពាណិជ្ជកម្ម»។
មន្ត្រីជាន់ខ្ពស់អង្គការសង់ត្រាល់រូបនេះបន្ថែមថា វិស័យ កាត់ដេរ ដេរស្បែកជើង និង ផលិតផលធ្វើដំណើរ ស្នើប្រមាណ ៥០ ភាគរយនៃផលិតផលនាំចេញសរុបរបស់កម្ពុជា ការនាំចេញទៅអាមេរិកមានចំណែកទីផ្សារប្រមាណ ៤៤ ភាគរយ។ លោកយល់ថា ក្នុងករណីដែលរារដ្ឋាភិបាលមិនមានវិធានជាក់លាក់ និងបន្ទាន់នោះទេ វានឹងកាន់តែជះឥទ្ធិពលកាន់តែអាក្រក់មកលើសេដ្ឋកិច្ចកម្ពុជា ដូចជា រោងចក្រអាចបិទទ្វារ កម្មករនិងប្រឈមការបាត់បង់ការងារ និងប្រាក់ចំណូល ហើយកំណើនសេដ្ឋកិច្ចប្រចាំឆ្នាំរបស់កម្ពុជានិងធ្លាក់ចុះ ដែលនាំអោយមានវិបត្តិសេដ្ឋកិច្ច។
អគ្គនាយកដ្ឋានគយ និងរដ្ឋាករ បានចេញរបាយការណ៍កាលពីចុងឆ្នាំ២០២៤ បង្ហាញថា ក្នុងឆ្នាំ២០២៤ កម្ពុជានាំចេញទៅអាមេរិកក្នុងទឹកប្រាក់ជិត១ម៉ឺនលានដុល្លារ(៩,៩២ ពាន់លានដុល្លារ) កើន ១១,៤ ភាគរយ។ ចំណែកទំនិញអាមេរិកនាំចូលវិញ មានចំនួនជាង២០០លានដុល្លារ( ២៦៤,១៥ លានដុល្លារ) កើន ២,៧ ភាគរយ។ ភាគច្រើនលើសលប់នៃទំនិញកម្ពុជានាំទៅទីផ្សារអាមេរិក រួមមានផលិតផលសម្លៀកបំពាក់ កាបូបធ្វើដំណើរ និងស្បែកជើងជាដើម។
សហរដ្ឋអាមេរិក គឺជាទីផ្សារដ៏ធំមួយដែលទទួលទិញទំនិញពីកម្ពុជាច្រើនជាងគេចំនួន ៣៧,៩ភាគរយ ។ ដោយឡែក ទិផ្សារនាំចេញរបស់កម្ពុជាទៅវៀតណាម ១៣,៨ ភាគរយ, ចិន ៦,៧ ភាគរយ និងប្រទេសជប៉ុន ៥,៤ ភាគរយ៕
……………………………………..
អត្ថបទដោយពលរដ្ឋអ្នកសារព័ត៌មាន ស៊ុន អ៊ូរ
