ទីប្រឹក្សាគណបក្សកម្លាំងជាតិ លោក រ៉ុង ឈុន សង្ឃឹមថា សាលាដំបូងរាជធានីភ្នំពេញ នឹងទម្លាក់ចោលបទចោទនាពេលប្រកាសសាលក្រម នៅដើមខែឧសភា ក្រោយតុលាការបានបើកសវនាការលើសំណុំរឿង «ញុះញង់បង្កឱ្យមានភាពវឹកវរដល់សន្តិសុខសង្គម(ការមិនរាងចាលក្នុងបទមជ្ឈឹមបន្ទាប់ពីការផ្តន្ទាទោសបទមជ្ឈឹម)» នៅថ្ងៃទី២៣ ខែមេសា ឆ្នាំ២០២៥នេះ។
លោក រ៉ុង ឈុន បានរងការចោទប្រកាន់ក្នុងសំណុំរឿងនេះ ក្រោយពីរូបលោកបានធ្វើសកម្មភាពយ៉ាងសកម្មក្នុងការចុះជួបពលរដ្ឋរងគ្រោះដីធ្លី ដែលរស់នៅជុំវិញបឹងតាម៉ោក និងពលរដ្ឋរងគ្រោះដោយសារគម្រោងប្រលានយន្តហោះថ្មីនៅខេត្តកណ្តាល និងការចុះជួបសមាជិកគណបក្ស កម្លាំងជាតិតាមមូលដ្ឋាន ប្រព្រឹត្តនៅប្រទេសកម្ពុជា កាលពីអំឡុងឆ្នាំ២០២៤។
ក្រោយចូលរួមសវនាការនៅព្រឹកនេះ លោក រ៉ុង ឈុន បានថ្លែងប្រាប់ក្រុមអ្នកសារព័ត៌មានថា នៅក្នុងសវនាការ លោកបានបដិសេធបទចោទ ដោយថា លោកគ្រាន់តែប្រើប្រាស់សិទ្ធិក្នុងការលើកឡើង និងស្វែងរកយុត្តិធម៌ជូនពលរដ្ឋ និងសង្គមជាតិតែប៉ុណ្ណោះ។ ករណីនេះ លោកបានស្នើដល់តុលាការ ពិចារណាក្នុងការទម្លាក់បទចោទប្រកាន់ទៅលើរូបលោក ខណៈលោកពុំបានប្រព្រឹត្តកំហុសដូចការចោទ។
លោកថា៖ «បើខ្ញុំមើលទិដ្ឋភាពសវនាការនៅព្រឹកនេះ ខ្ញុំមានសង្ឃឹមថា តុលាការនឹងផ្ដល់យុត្តិធម៌ឱ្យខ្ញុំ ហើយបើយើងពិនិត្យមើលអង្គហេតុ អង្គច្បាប់ វាអត់មានអ្វីដែលកើតឡើងដូចការលើកឡើងនោះទេ។ អ៊ីចឹងខ្ញុំសង្ឃឹមថាថ្ងៃ៥ [ខែឧសភា]ម៉ោង ៨ព្រឹកហ្នឹង លទ្ធផលនឹងផ្ដល់យុត្តិធម៌ ផ្ដល់សេរីភាពដល់ខ្ញុំ ហើយនិងទម្លាក់បទចោទៗដល់រូបខ្ញុំបាទ»។
ការបើកសវនការនេះ ក៏មានសមាជិកសមាជិការបស់គណបក្សកម្លាំងជាតិប្រមាណជា ៥០នាក់បានទៅគាំទ្រ និងលើកទឹកចិត្ត។ ទន្ទឹមនឹងនេះ ក៏មានការរឹតបន្តឹងសណ្តាប់ធ្នាប់ ដោយមានការដាក់របាំងលើផ្លូវឆ្លងកាត់ខាងមុខតុលាការ និងមានកងកម្លាំងនគរបាលឯកសណ្ឋាន និងនគបាលស៊ីវិលប្រមាណ ៥០នាក់ នៅឃ្លាំមើលផងដែរ។
ប្រធានគណបក្សកម្លាំងជាតិ លោក ជា មុនី មានប្រសាសន៍ថា លោកមិនអាចប៉ាន់ស្មានបានទេ ពីការសម្រេចរបស់តុលាការនៅថ្ងៃទី៥ ខែឧសភា ឆ្នាំ២០២៥ ខាងមុខនេះ ដែលជាថ្ងៃប្រកាសសាលក្រមលើសំណុំរឿងនេះ។ តែយ៉ាងណា លោកយល់ថា បើតុលាការសម្រេចដោយផ្អែកលើច្បាប់ នោះលោក រ៉ុង ឈុន នឹងអាចរួចផុតពីបទចោទនេះ។
លោកបន្តថា៖ «ជាទស្សនៈ និងជាយោបល់ខ្ញុំ មើលឃើញថា ជាទូទៅសង្គមស៊ីវិល គណបក្សប្រឆាំងក្តីមិនដែលមានកំហុស មិនដែលមានទង្វើអ្វីខុសច្បាប់ទេ យើងតែងតែសង្ឃឹមអញ្ចឹង សង្ឃឹមថាមិនអីទេ មិនអីទេ កាពិតវាអី អញ្ចឹងខ្ញុំអត់ធ្វើអត្ថាធិប្បាយជួសតុលាការបានទេ ចង់និយាយអញ្ចេះបើសិនណាជាយកផ្លូវច្បាប់ បើយកការកាត់សេចក្តីដោយពឹងផ្អែកលើច្បាប់ លើអីត្រឹមត្រូវគាត់មិនអីទេ តែខ្លាចតែគេមិនយកអ្វីៗដែលមានក្នុងច្បាប់យកមកអនុវត្ត»។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ មានប្រសាសន៍យ៉ាងខ្លីថា សវនាការលើសំណុំរឿង លោក រ៉ុង ឈុន នៅព្រឹកនេះបានដំណើរការធម្មតា ហើយនឹងប្រកាសសាលក្រមនៅដើមខែឧសភាខាងមុខនេះ។
លោកថា៖ «បាទ[សវនាការ]ដំណើរការធម្មតាទេទៅតាមនិតិវិធី ហើយគេបានបញ្ចប់សវនាការហើយ ហើយនឹងប្រកាសសាលក្រមនៅថ្ងៃទី៥ ខែ៥ អូខេប៉ុណ្ណឹងហើយ»។
លោក នី សុខា ប្រធានសមាគមការពារសិទ្ធិមនុស្សអាដហុក(ADHOC) បានប្រាប់ក្រុមអ្នកសារព័ត៌មានថា អ្វីដែលលោក រ៉ុង ឈុន បានធ្វើនោះគ្រាន់តែជាការបញ្ចេញមតិ ក្នុងនាមជាអ្នកនយោបាយតែប៉ុណ្ណោះ ដោយលោកពុំបានឃើញនូវចំណុចណាដែលឈានដល់ការចោទប្រកាន់ ពីបទញុះញង់នោះទេ។
លោកនិយាយថា៖ «ខ្ញុំគិតថា វាគ្រាន់តែជារឿងមួយដែលការប្រើប្រាស់នូវសិទ្ធិសេរីភាព ក្នុងការបញ្ចេញមតិ នៅក្នុងការប្រើប្រាស់ទស្សនៈ ក្នុងនាមជាអ្នកនយោបាយទេ ខ្ញុំមិនមានមើលឃើញចំណុចណាមួយដែលឈានទៅដល់ធ្វើការចោទប្រកាន់បទចោទប្រកាន់ញុះញង់ហ្នឹងទេ ជារួមដែលយើងមើលឃើញហ្នឹង»។
លោក នី សុខា យល់ថា តុលាការគួរទម្លាក់បទចោទលើ លោក រ៉ុង ឈុន ដើម្បីឱ្យគាត់ទទួលបានសេរីភាពចូលរួមសកម្មភាពនយោបាយឡើងវិញ ខណៈប្រទេសកម្ពុជា ជាប្រទេសដែលប្រកាន់ខ្ជាប់នូវលទិ្ធប្រជាធិបតេយ្យ។
លោកថា៖ «ដើម្បីលើកកម្ពស់នូវសិទ្ធិសេរីភាព ក៏ដូចជាសង្គមយើងជាសង្គមប្រជាធិបតេយ្ស សេរីពហុបក្សដូច្នេះខ្ញុំគិតថាដំណោះស្រាយដែលល្អ គឺមានតែការទម្លាក់ចោលនូវបទចោទប្រកាន់ទៅលើ លោក រ៉ុង ឈុន ឱ្យគាត់មានសេរីភាព ដើម្បីរួមចំណែកក្នុងការធ្វើនយោបាយ ហើយក៏បង្ហាញអំពីការស្ដារឡើងវិញនូវសេរីភាពរបស់ប្រជាពលរដ្ឋនៅសង្គមប្រជាធិបតេយ្យ ដែលយើងឃើញហើយថា កំពុងតែមានបញ្ហារិះគន់ច្រើនពីមតិជាតិ សាធារណៈ និងអន្តរជាតិ យើងឃើញថាកំពុងតែមានការធ្លាក់ចុះ»។
កាលពីថ្ងៃទី១៨ ខែសីហា ឆ្នាំ២០២១ សាលាដំបូងរាជធានីភ្នំពេញ បានផ្ដន្ទាទោស លោក រ៉ុង ឈុន ឱ្យជាប់ពន្ធនាគារចំនួន ២ឆ្នាំ ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ពិន័យជាប្រាក់ចំនួន២លានរៀល និងសងទៅគណៈកម្មាធិការចម្រុះកិច្ចការព្រំដែនចំនួន ៤០០លានរៀល។ តែយ៉ាងណា សាលាឧទ្ធរណ៍ បានកាត់តម្រឹមទោសពី ២ឆ្នាំមកឱ្យអនុវត្តតែ ១៥ខែ ១១ថ្ងៃ ក្នុងពន្ធនាគារ ដែលទោសនៅសេសសល់ចំនួន៨ខែ ១៩ថ្ងៃត្រូវបានព្យួរ ក៏ប៉ុន្តែលោក រ៉ុង ឈុន ត្រូវបានដាក់ឱ្យស្ថិតនៅក្រោមការត្រួតពិនិត្យរបស់តុលាការរយៈពេល៣ឆ្នាំ និងជាប់បម្រាមតុលាការមួយចំនួន៕
…………………………………..
អត្ថបទដោយ៖ ហុង សេរីហ្វុង
