ដោយយកបាយមួយថង់តូចដាក់នៅចំពីមុខ និងម្ហូបអាហារមួយចំនួនដាក់ចំកណ្តាល ដើម្បីចែករំលែកជាមួយគ្នា អ្នកស្រី ណៃ គុយ អាយុ៤០ឆ្នាំ បានអង្គុយក្រោមម្លប់ដើមឈើជាមួយសហសេវិក ៣នាក់ផ្សេងទៀត ដើម្បីបរិភោគអាហារនៅលើចិញ្ចើមផ្លូវ ខាងមុខរោងចក្រកាត់ដេរសម្លៀកបំពាក់និងស្បែកជើង ញូអេសថ៍ហ្គាម៉ិនខេមបូឌា ក្នុងរាជធានីភ្នំពេញ។
អ្នកស្រីមើលទៅហាក់ដូចជាមនុស្សដែលមានភាពរឹងមាំ ដោយយូរៗម្តងបានបញ្ចេញស្នាមញញឹម ខណៈពេលអ្នកស្រីជជែកលេងយ៉ាងសប្បាយរីករាយជាមួយមិត្តភក្តិ អំឡុងពេលសម្រាកទទួលទានអាហារថ្ងៃត្រង់។ ប៉ុន្តែនៅពីក្រោយស្នាមញញឹមនេះ ក៏មានរឿងជាច្រើនទៀតដែលអ្នកស្រីកំពុងគិត។
អ្នកស្រីកំពុងបារម្ភអំពីអនាគតរបស់អ្នកស្រី ជាពិសេសពាក់ព័ន្ធការសម្រេចចិត្តរបស់រដ្ឋាភិបាលអាមេរិក នាពេលថ្មីៗនេះ ដោយបានដំឡើងអត្រាពន្ធ៤៩% ដល់ប្រទសកម្ពុជា លើការនាំ ទំនិញទៅលក់ក្នុងទឹកដីអាមេរិក។ អត្រាពន្ធដ៏ខ្ពស់ដែលអាចនឹងចូលជាផ្លូវការនេះ បានធ្វើឱ្យអ្នកស្រី ណៃ គុយ និងមិត្តភក្តិរបស់អ្នកស្រីព្រួយបារម្ភអំពីការបាត់បង់ការងារ បាត់ចំណូល និងគិតថាពួកគាត់នឹងត្រូវដោះស្រាយជីវភាពគ្រួសាររបស់ខ្លួនដោយរបៀបណា។
ការប្រកាសដំឡើងអត្រាពន្ធ៤៩%លើទំនិញកម្ពុជាដែលនាំចេញទៅកាន់សហរដ្ឋអាមេរិក បានធ្វើឱ្យមានការព្រួយបារម្ភច្រើន ក្នុងចំណោមកម្មករនៅក្នុងវិស័យកាត់ដេរកម្ពុជា។
ស្របពេលដែលពួកគេភាគច្រើនពឹងផ្អែកលើការងាររោងចក្រកាត់ដេរ ដើម្បីផ្តត់ផ្គង់ខ្លួនឯង និងក្រុមគ្រួសារ ការដំឡើងអត្រាពន្ធនេះ បានធ្វើឱ្យពួកគេបារម្ភអំពីបញ្ហាជីវភាពប្រចាំថ្ងៃ ភាពមិនច្បាស់លាស់នៃអនាគត និងស្ថានភាពសេដ្ឋកិច្ចដែលកំពុងមានបញ្ហាប្រឈមស្រាប់។
អ្នកស្រី ណៃ គុយ ដែលមានស្រុកកំណើតក្នុងខេត្តតាកែវ តែងតែតាមដានព័ត៌មានអំពីការប្រកាសដំឡើងពន្ធរបស់សហរដ្ឋអាមេរិកមកលើកម្ពុជា និយាយថា ការធ្វើបែបនេះនឹងបង្កផលលំបាកសម្រាប់កម្មករ ដោយសារនៅពេលមានការប៉ះពាល់ជាមួយការបញ្ជាទិញពីសហរដ្ឋអាមេរិក នោះរោងចក្រអាចឈានដល់ការផ្អាកការងារ ឬបញ្ឈប់កម្មករ។
អ្នកស្រីបានប្រាប់Newsroom Cambodia ថា៖ «ពន្ធថ្លៃខ្លាចមានបញ្ហា [គឺ]ពិបាកសម្រាប់កម្មករយើង។ ខ្លាចអត់មានការងារធ្វើ ខ្លាចអីអ៊ីចឹង ព្រោះកម្មករយើងឥឡូវប្រឈមច្រើន ព្រោះជាប់បង់ធនាគារផង ចិញ្ចឹមកូនផង ទឹកភ្លើងផង។ ដល់ពេលយើងអត់ការងារធ្វើ យើងពិបាកដែរ»។
អ្នកស្រីរៀបរាប់បន្ថែមថា បច្ចុប្បន្ននេះ ការចំណាយក្នុងគ្រួសារខ្ពស់ ដោយត្រូវចំណាយថ្លៃបន្ទប់ជួល ថ្លៃទឹងភ្លើង បង់សងធានាគារ ទិញម្ហូបអាហារប្រចាំថ្ងៃ និងទិញទឹកដោះគោឱ្យកូនអាយុ២ឆ្នាំ ដូច្នេះបើសិនជាគ្មានការងារធ្វើ នោះវានឹងធ្វើឱ្យអ្នកស្រីកាន់តែពិបាករកចំណូល ដើម្បីដោះស្រាយជីវភាពប្រចាំថ្ងៃ។
អ្នកស្រីព្រួយបារម្ភថា ប្រសិនបើរោងចក្របិទ ឬព្យួរការងារ ដោយសារតែការធ្លាក់ចុះនៃការបញ្ជាទិញពីអាមេរិក នោះនឹងធ្វើឱ្យអ្នកស្រីគ្មានជម្រើសអ្វីផ្សេង ក្រៅពីវិលត្រឡប់ទៅស្រុកកំណើតធ្វើស្រែចម្ការវិញតែប៉ុណ្ណោះ។
ទាក់ទងបញ្ហាដំឡើងពន្ធរបស់សហរដ្ឋអាមេរិកវិញ អ្នកស្រីថា រដ្ឋបាលរោងចក្រមិនទាន់ជូនដំណឹងអ្វីនៅឡើយទេ។ អ្នកស្រីថា នឹងរង់ចាំមើលការវិវត្តនៃអត្រាពន្ធនេះ ជាបន្តបន្ទាប់ទៀតផងដែរ។
កម្មារិនីម្នាក់ទៀត ដែលកំពុងធ្វើការក្នុងរោងចក្រខ្វាន់ទុមអឹភែរីល ដែលជារោងចក្រកាត់ដេរសម្លៀកបំពាក់ ក្នុងសង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ គឺកញ្ញា ប៉ី សារឿន អាយុ៣៦ឆ្នាំ ក៏ព្រួយបារម្ភស្រដៀងនឹងអ្នកស្រី ណៃ គុយ ផងដែរ ពាក់ព័ន្ធស្ថិរភាពការងារនៅរោងចក្រកាត់ដេរ។
ស្ត្រីដែលមានស្រុកកំណើតនៅខេត្តព្រៃវែងរូបនេះ បាននិយាយថា៖ «ខ្ញុំបារម្ភដែរ ដឹងស្រាប់ហើយ ពេលដំឡើងពន្ធ ខ្លាចឈានដល់ការបិទរោងចក្រ ព្យួរការងារ ព្រោះកម្មករ ពឹងផ្អែកលើរោងចក្រ។ បើសិនជាការបញ្ជាទិញពន្ធថ្លៃពេក ពន្ធខ្ពស់ពេក ខ្លាចគេលែងបញ្ជាទិញ»។
ដៃកំពុងកាន់កញ្ចប់បាយម្អូប ដែលបានទិញនៅខាងមុខរោងចក្រ លោក ហិន ហួន អាយុ២៨ឆ្នាំ ដែលជាកម្មករនៅរោងចក្រផលិតស្បែកជើងនៅរោងចក្រឌីអេសអិល២អេនធើប្រាយ ក្នុងសង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ ប្រាប់Newsroom Cambodiaថា៖ «ដំឡើងពន្ធច្រើន អាចប៉ះពាល់ច្រើនដល់កម្មករ ព្រោះកម្មករអត់មានអីឥវ៉ាន់[ការងារ]ធ្វើ»។
កាលពីថ្ងៃទី២ ខែមេសា ឆ្នាំ២០២៥ រដ្ឋបាលលោក ដូណាល់ ត្រាំ បានប្រកាសដំឡើងពន្ធលើការនាំទំនិញទៅលក់លើទីផ្សារសហរដ្ឋអាមេរិក ចំពោះប្រទេសជាច្រើនដែលជាដៃគូពាណិជ្ជកម្មរបស់ខ្លួនចាប់ពី១១% រហូតដល់១០៤% ហើយគោលនយោបាយពន្ធថ្មីនេះ បានចូលជាធរមាន នៅថ្ងៃទី៩ ខែមេសា ឆ្នាំ២០២៥។ ទោះបីជាយ៉ាងណា ប៉ុន្មានម៉ោងក្រោយមក លោក ដូណាល់ ត្រាំ បានប្រកាសផ្អាកការយកពន្ធថ្មីនេះ ក្នុងរយៈពេលចំនួន៩០ថ្ងៃ ដោយទុកពេលឱ្យប្រទេសជាង ៧៥ប្រទេស ដែលបានដាក់លិខិតសុំចរចាជាមួយសហរដ្ឋអាមេរិក ដើម្បីបានចរចាអំពីការដំឡើងពន្ធនេះ។
ប៉ុន្តែអំឡុងរយៈពេល៩០ថ្ងៃនេះ ប្រទេសទាំងអស់ បូករួមទាំងកម្ពុជាដែរ ត្រូវជាប់ពន្ធ១០% លើកលែងតែប្រទេសចិន ដែលអាមេរិកបានដំឡើងពន្ធថែម រហូតដល់១២៥% កាលពីថ្ងៃទី១០ ខែមេសា។ ប៉ុន្តែបើតាមសេចក្តីរាយការណ៍របស់សារព័ត៌មាន The New York Times ចេញផ្សាយនៅថ្ងៃព្រហស្បតិ៍ នៅសហរដ្ឋអាមេរិក ត្រូវនឹងថ្ងៃសុក្រ ទី១១ ខែមេសា ម៉ោងនៅកម្ពុជា ឱ្យដឹងថា អាមេរិក បានបន្តដំឡើងពន្ធនាំចូលពីចិន រហូតដល់ ១៤៥%។
ចំណែកប្រទេសចិន ក៏បានដំឡើងអាពន្ធទំនិញនាំចូលពីអាមេរិកយកទៅលក់លើទីផ្សារចិន ៨៤%វិញផងដែរ។ នេះបើតាមការចុះផ្សាយរបស់បណ្តាញសារព័ត៌មានបរទេសជាច្រើន។
ក្នុងចំណោមបណ្តាប្រទេសអាស៊ាន គឺកម្ពុជាជាប្រទេសមួយ ដែលអាមេរិកដាក់អាត្រាខ្ពស់ជាងគេរហូតដល់ ៤៩% ខណៈប្រទេសឡាវ ៤៨% វៀតណាម ៤៦% មីយ៉ាន់ម៉ា ៤៤% ថៃ៣៦% ឥណ្ឌូនេស៊ី ៣២% ព្រុយណេ ២៤% ម៉ាឡេស៊ី ២៤% ហ្វីលីពីន ១៧% សិង្ហបុរី ១០%។
បើទោះបីជាមានក្តីបារម្ភភ្លាមៗបែបនេះក៏ដោយ ក៏កម្មករនិងមន្ត្រីរដ្ឋាភិបាល កំពុងតាមដានមើលស្ថានភាពនេះយ៉ាងយកចិត្តទុកដាក់។
កាលពីថ្ងៃទី៤ ខែមេសា ឆ្នាំ២០២៥ រដ្ឋាភិបាលកម្ពុជា បានផ្ញើលិខិតទៅកាន់ប្រធានាធិបតេយ្យសហរដ្ឋអាមេរិក លោក ដូណាល់ ត្រាំ ដើម្បីស្នើសុំចរចាលើការអនុវត្តពន្ធលើការនាំចេញរបស់កម្ពុជាទៅសហរដ្ឋអាមេរិក។ ក្នុងលិខិតនោះ កម្ពុជា បានសម្រេចបន្ថយភ្លាមៗនូវអត្រាពន្ធនាំចូលទំនិញពីអាមេរិកមកកម្ពុជាលើ១៩ក្រុមទំនិញ (ប្រមាណជាង៨០ផលិតផល) ពីអត្រាអតិបរមា៣៥% មកត្រឹមអត្រា ៥%។ នេះបើតាមលិខិតមួយច្បាប់ ដែលផ្សព្វផ្សាយដោយលោកនាយករដ្ឋមន្ត្រី ហ៊ុន ម៉ាណែត តាមបណ្តាញសង្គមហ្វេសប៊ុកកាលពីថ្ងៃទី៤ ខែមេសា។
លិខិតនេះ បញ្ជាក់ថា៖ «កម្ពុជាប្តេជ្ញាចិត្តខ្ពស់ក្នុងការបន្តកិច្ចសន្ទនា ក្នុងន័យស្ថាបនា និងប្រកបដោយលទ្ធផលផ្លែផ្កា ជាមួយរដ្ឋាភិបាលអាមេរិក ដើម្បីជំរុញឱ្យទំនាក់ទំនងពាណិជ្ជកម្ម រវាងប្រទេសយើងទាំងពីរឱ្យកាន់តែស៊ីជម្រៅបន្ថែមទៀត សំដៅឱ្យប្រជាជាតិនិងប្រជាជននៃប្រទេសទាំងពីរ អាចទទួលបានផលប្រយោជន៍ជាក់ស្តែង ពីទំនាក់ទំនងពាណិជ្ជកម្មដ៏សំខាន់នេះ»។
ថ្លែងក្នុងពិធី«សម្ពោធដាក់ឱ្យប្រើប្រាស់ជាផ្លូវការស្ពានអាកាសមរតកតេជោ» កាលពីថ្ងៃទី៧ ខែមេសា ឆ្នាំ២០២៥ លោកនាយករដ្ឋមន្ត្រី ហ៊ុន ម៉ាណែត មានប្រសាសន៍ថា រដ្ឋាភិបាលបានគិតគូរល្អិតល្អន់ពីមួយជំហានទៅមួយជំហាន និងបានចាត់តាំង លោក ស៊ុន ចាន់ថុល អនុប្រធានទី១នៃក្រុមប្រឹក្សាអភិវឌ្ឋន៍កម្ពុជា និងលោកស្រី ចម និម្មល រដ្ឋមន្ត្រីក្រសួងពាណិជ្ជកម្ម ត្រៀមដឹកនាំក្រុមការងារចរចាជាមួយសហរដ្ឋអាមេរិក។
បើតាមលោក ហ៊ុន ម៉ាណែត កម្ពុជាបានក្លាយជាសមាជិកអង្គការពាណិជ្ជកម្មពិភពលោក (WTO) កាលពីឆ្នាំ២០០៤ ដូច្នេះអាត្រាពន្ធនាំចូលពីប្រទេសទាំងអស់ ត្រូវកំណត់មិនឱ្យលើស៣៥%នោះទេ ដោយកម្ពុជាបានយកពន្ធលើទំនិញអាមេរិកចូលមកលក់លើទីផ្សារកម្ពុជា ជាមធ្យម ២៩,៤% ខណៈកម្ពុជាក៏ត្រូវបង់ពន្ធជាមធ្យមជាង ១១% លើទំនិញដែលនាំពីកម្ពុជាទៅលក់នៅសហរដ្ឋអាមេរិកផងដែរ។
ក្នុងឆ្នាំ២០២៤ ទំហំពាណិជ្ជកម្មរវាងកម្ពុជា អាមេរិកមានទំហំ ១០,១៨ពាន់លានដុល្លារអាមេរិក កើនឡើង ១១,២% បើធៀបនឹងឆ្នាំ២០២៣ ដោយក្នុងនោះ កម្ពុជានាំទំនិញទៅកាន់ទីផ្សារសហរដ្ឋអាមេរិកមានទំហំទឹកប្រាក់ ៩,៩២ពាន់លានដុល្លារ ខណៈការនាំទំនិញពីអាមេរិកមកកម្ពុជា មានទំហំ ២៦៤,១៤លានដុល្លារអាមេរិក។ នេះយោងតាមរបាយការណ៍ស្ថិតិជញ្ជីងពាណិជ្ជកម្មទំនិញជាមួយប្រទេសសំខាន់ៗ ពីខែមករា ដល់ខែធ្នូ ឆ្នាំ២០២៤ (បណ្តោះអាសន្ន) ដែលចេញផ្សាយដោយរបស់ក្រសួងសេដ្ឋកិច្ច និងហិរញ្ញវត្ថុ។
សហរដ្ឋអាមេរិក គឺជាទីផ្សារធំជាងគេរបស់កម្ពុជា ក្នុងចំណោមទីផ្សារនៃបណ្តាប្រទេសសំខាន់ៗទាំង២០ ដែលកម្ពុជានាំទំនិញចេញ។ ប្រទេសវៀតណាម គឺជាទីផ្សារធំទី២របស់កម្ពុជា ដែលមានទំហំ ៦,៥៨ពាន់លានដុល្លារក្នុងឆ្នាំ២០២៤ ខណៈចិនជាទីផ្សារធំទី៣របស់កម្ពុជា ដែលមានទំហំ ១,៧៥ពាន់លានដុល្លារ ហើយកម្ពុជានាំទំនិញពីចិនមកកាន់ទីផ្សារកម្ពុជាទំហំ១៣,៤៣ពាន់លានដុល្លារអាមេរិក។ នេះបើយោងតាមរបាយការណ៍ស្ថិតិជញ្ជីងពាណិជ្ជកម្មដដែលនេះ។
រហូតមកដល់ពេលនេះ គេមិនទាន់ដឹងថា អាមេរិក ផ្តល់ដំណឹងអំពីការចរចាការដំឡើងពន្ធជាមួយកម្ពុជានាពេលណានោះទេ។
លោក អាត់ ធន់ អនុប្រធានសហព័ន្ធសហជីពប្រជាធិបតេយ្យកម្មករកាត់ដេរកម្ពុជា (CCAWDU) ប្រាប់ Newsroom Cambodia ថា ការដំឡើងពន្ធនេះ អាចជាការលំបាកមួយសម្រាប់រដ្ឋាភិបាលកម្ពុជា ដោយសារកម្ពុជាបាននាំទំនិញពីរោងចក្រកាត់ដេរ ទៅសហរដ្ឋអាមេរិកប្រមាណ៤០%។
លោកបន្តថា ប្រទេសវៀតណាម ប្រទេសបង់ក្លាដេស និងប្រទេសភូមា គឺជាគូប្រជែងរបស់កម្ពុជា ក្នុងការនាំចេញវាយនភណ្ឌកាត់ដេរទៅលើទីផ្សារអន្តរជាតិ ដូច្នេះពេលនេះមិនទាន់អាចសន្និដ្ឋានបែបណាបាននោះទេ ដោយសារប្រទេសទាំងនោះ ក៏សុទ្ធតែត្រូវបានអាមេរិកដំឡើងពន្ធនាំដូចគ្នា។
លោកលើកឡើងថា៖ «ខ្ញុំគិតថា ជាការលំបាកសម្រាប់រដ្ឋាភិបាលកម្ពុជា ហើយក៏លំបាកសម្រាប់កម្មករ និងនិយោជកដែរ ពេលបច្ចុប្បន្ននេះ។ ម្នាក់ៗ រង់ចាំមើលភាពប្រសើរឡើង ហើយអាចប្រសើរឡើងយ៉ាងម៉េច។ បើសិនជាវាមិនរួចទេ គឺកម្ពុជា អាចប្រឈមនឹងការលំបាក កាត់បន្ថយការនាំចេញ ប៉ុន្តែអាចជាជម្រើសនឹងបង្កើតរកទីផ្សារផ្សេងៗទៀត នៅលើពិភពលោក»។
លោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ យល់ថា បើកម្ពុជាត្រូវបានសហរដ្ឋអាមេរិកដាក់ពន្ធស្មើប្រទេសដទៃ នោះកម្ពុជានឹងមិនអាចរស់បានទេ ដូច្នេះរដ្ឋាភិបាលត្រូវបង្ហាញថា កម្ពុជាអនុវត្តពាណិជ្ជកម្មត្រឹមត្រូវ ដើម្បីឱ្យអាមេរិក ទម្លាក់អាត្រាពន្ធមកក្នុងកម្រិតទាប។ លោកថា បើសិនកម្ពុជាអាចស្នើឱ្យអាមេរិក ផ្តល់ប្រព័ន្ធអនុគ្រោះពន្ធ GSP ដែលបាត់បង់ជាង២ឆ្នាំមុននោះមកវិញ គឺកាន់តែល្អ ដើម្បីជួយសេដ្ឋកិច្ចកម្ពុជា។
លោកនិយាយថា៖ «រឿងមួយដែលសំខាន់ ដែលអាមេរិកបារម្ភជាងគេ គឺខ្លាចកម្ពុជាយើងធ្វើជាឈ្មួញកណ្តាលឱ្យចិន ខ្លាចកម្ពុជានាំយកទំនិញចិនមកវាយស្លាកកម្ពុជា ដើម្បីបានបន្ធូរបន្ថយពន្ធ ហើយយកទៅលក់លើទីផ្សារអាមេរិក។ អាហ្នឹងកម្ពុជាត្រូវត្រៀមខ្លួន បង្ហាញថា កម្ពុជាមិនអនុវត្តពាណិជ្ជកម្មបែបហ្នឹងទេ»។
ឧស្សាហកម្មវាយនភណ្ឌ សម្លៀកបំពាក់ និងស្បែកជើង (GFT) គឺជាវិស័យអាទិភាពរបស់កម្ពុជា ដែលបានរួមចំណែកយ៉ាងសំខាន់ក្នុងការអភិវឌ្ឍន៍សេដ្ឋកិច្ច និងសង្គម។ នេះបើតាមលោកស្រី ចម និម្មល រដ្ឋមន្រ្តីក្រសួងពាណិជ្ជកម្ម ដែលថ្លែងក្នុងព្រឹត្តិការណ៍ពិព័រណ៍មួយ កាលពីថ្ងៃទី១៨ ខែវិច្ឆិកា ឆ្នាំ២០២៤។
បច្ចុប្បន្ននេះ កម្ពុជាមានរោងចក្រកាត់ដេរចំនួន ១៥៨៨ ដែលមានកម្មករនិយោជិតជាង ៩១ម៉ឺននាក់ (៩១៨ ៦៧០នាក់)។ នេះបើតាមលោក កត្តា អ៊ន ប្រាប់ Newsroom Cambodia នៅថ្ងៃទី១០ ខែមេសាឆ្នាំ២០២៥។
Newsroom Cambodia មិនទាន់អាចសុំការបញ្ជាក់ពី លោក ខេន លូ អគ្គលេខាធិការ នៃសមាគមវាយនភណ្ឌ សម្លៀកបំពាក់ ស្បែកជើង និងទំនិញធ្វើដំណើរ (TAFTAC) បាននៅឡើយទេ។
លោកបណ្ឌិត គី សេរីវឌ្ឍ អ្នកជំនាញសេដ្ឋកិច្ច នៃរាជបណ្ឌិត្យសភាកម្ពុជា ប្រាប់ Newsroom Cambodia ថា ការដំឡើងពន្ធថ្មីរបស់អាមេរិក មិនទាន់ដឹងច្បាស់ថា មានឥទ្ធិពលបែបណាមកលើសេដ្ឋកិច្ចកម្ពុជានៅឡើយទេ ហើយថា ប្រសិនបើអាមេរិកនៅបន្តដំឡើងពន្ធសម្រាប់ប្រទេសនានាលើពិភពលោក គឺវាមិនមែនប៉ះទីផ្សារនាំចេញទំនិញកម្ពុជាតែឯងនោះទេ គឺវានឹងនាំឱ្យសេដ្ឋកិច្ចសកលលោកទាំងមូលមានការថមថយ។
លោកថ្លែងថា៖ «ក្នុងករណីពិភពលោក ឡើងពន្ធទាំងអស់នោះ វានឹងមានការថមថយទីផ្សារសហរដ្ឋអាមេរិកមកដល់កម្ពុជា ហើយវាក៏ជះឥទ្ធិពលទៅដល់ទីផ្សារបណ្តាប្រទេសផ្សេងៗដែរ ខណៈប្រទេសផ្សេងៗទៀត ដែលនាំទៅសហរដ្ឋអាមេរិកនោះ មានការថមថយទីផ្សារដូចគ្នា”។
លោក គី សេរីវឌ្ឍ បន្ថែមថា បើសិនជាអាមេរិកដាក់បន្ទុកពន្ធតែលើប្រទេសចិន១២៥% ខណៈប្រទេសផ្សេងត្រូវបានបន្ធូរបន្ថយ នោះវានឹងធ្វើឱ្យឧស្សាហកម្មប្រទេសចិន នឹងងាកទៅកាន់ប្រទេសផ្សេងៗ ជាពិសេសប្រទេសកម្ពុជាក៏អាចជាប្រទេសមួយ ទទួលបានការវិនិយោគពីប្រទេសចិនផងដែរ។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជា ប្រាប់ Newsroom Cambodia ថា ការប្រើចំណាត់ពាណិជ្ជកម្មអន្តរជាតិ គឺជាយុទ្ធសាស្ត្រមួយ ដើម្បីធ្វើឱ្យអាមេរិកមានប្រៀប និងដើម្បីពង្រឹងសេដ្ឋកិច្ចផ្ទៃក្នុងរបស់សហរដ្ឋអាមេរិក ហើយការដាក់សម្ពាធលើប្រទេសដទៃ ក៏ដូចជាការរៀបចំសណ្តាប់ធ្នាប់ពាណិជ្ជកម្មឡើងវិញផងដែរ។
ដោយឡែកចំពោះកម្ពុជា លោកថា ការដំឡើងពន្ធថ្មីនេះ វាអាចប៉ះពាល់ក្នុងកម្រិតណាមួយទៅលើការចំណាយថ្លៃដើម និងចំណាយខ្ពស់លើការនាំចេញ។
លោកថ្លែងថា៖ «ការដំឡើងពន្ធថ្មីនេះ តិចឬច្រើន វាអាចប៉ះពាល់ទាំងការចំណាយថ្លៃដើម និងចំណាយខ្ពស់បន្ថែមទៀតទាក់ទងសង្វាក់ផលិតកម្មនៃការនាំទំនិញចេញទៅសហរដ្ឋអាមេរិក»។
ក្រសួងពាណិជ្ជកម្មកម្ពុជា នៅថ្ងៃទី១០ ខែមេសានេះ បានចេញសេចក្តីប្រកាសព័ត៌មានមួយ ដោយបញ្ជាក់ថា ភាគីកម្ពុជា និងភាគីសហរដ្ឋអាមេរិក នឹងបើកការចរចាពេលឆាប់ៗខាងមុខ។ប៉ុន្តែក្រសួងពាណិជ្ជកម្ម មិនបានបញ្ជាក់ពេលវេលាជាក់លាក់អំពីការចរចានេះនៅឡើយទេ៕
…………………………….
អត្ថបទដោយ៖ លាស់ លីបលីប
