មន្ត្រីរដ្ឋាភិបាលកម្ពុជា ឱ្យដឹងថា ក្រសួងការងារ បាននិងកំពុងបន្តសហការជាមួយអាជ្ញាធរថៃ ក្នុងការស្វែងរកពលករខ្មែរចំនួន ២នាក់ទៀត ដែលបាត់ខ្លួនក្នុងគ្រោះរញ្ជួយដីនៅទីក្រុងបាងកក ក្រោយអាជ្ញាធរថៃ បានរកឃើញពលករខ្មែរម្នាក់បានស្លាប់ និងម្នាក់ទៀតរងរបួសក្នុងគំនរអគារដែលរលំបាក់ គិតត្រឹមថ្ងៃទី០១ ខែមេសានេះ។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក កត្តា អ៊ន បានប្រាប់ Newsroom Cambodia ថា គិតត្រឹមថ្ងៃ១ ខែមេសា នេះមានពលករម្នាក់ឈ្មោះ មាស សាវ៉ាង ដែលមានទីលំនៅក្នុងស្រុកម៉ាឡៃ ខេត្តបន្ទាយមានជ័យ ត្រូវបានទទួលមរណភាពក្នុងហេតុការណ៍រលំអគារ ដោយសារគ្រោះរញ្ជួយដីនៅប្រទេសថៃ និងពលការនីម្នាក់ដែលមានលំនៅឋាននៅស្រុកប្រាសាទបល្ល័ង្គ ខេត្តកំពង់ធំ បានរងរបួសជើង។
លោកបន្តថា ក្រសួងការងារ ក៏បានទទួលដំណឹងពីសាច់ញាតិថា នៅមានពលករខ្មែរចំនួន ២នាក់ទៀត បានបាត់ខ្លួន ប៉ុន្តែក្រសួងនៅពុំមានព័ត៌មានជាក់លាក់ជុំវិញរឿងនេះនៅឡើយ។ តែយ៉ាងណា លោកបន្តថា ក្រសួងនឹងបន្តទាក់ទងអាជ្ញាធរថៃ ដើម្បីបន្តស្វែងរក និងធ្វើតេស្តកោសល្យវិច័យលើសពជនរងគ្រោះដែលបានរកឃើញ ដើម្បីបញ្ជាក់អត្តសញ្ញាណពួកគេ។
លោកមានប្រសាសន៍ថា៖ «យើងនឹងរៀបចំទំនាក់ទំនងជាមួយភាគីថៃ ដើម្បីធ្វើកោសល្យវិច័យ DNA មានអីប្រសិនបើការលទ្ធផលនៃការធ្វើDNAអីយ៉ាងណាទៀតទេ ចាំពេលក្រោយជូនដំណឹងតាមក្រោយ។ ប្រសិនការធ្វើ DNA ឃើញថាគាត់ពិតជាសាច់ញាតិរបស់ពលករខ្មែរ ជាជាតិខ្មែរយើងហើយនោះ ការបំពេញតួនាទីកាតព្វកិច្ច គឺយើងអនុវត្តដូចការធ្វើចំពោះ លោក សាវ៉ាង កន្លងមកនេះដែរ គឺថាមានភាពស្មើគ្នា និងធានាការរៀបចំបុណ្យសពតាមប្រពៃណីសាសនា ក៏ដូចជាការឧបត្តមផ្សេងៗ»។
លោក កត្តា អ៊ន ក៏បានសំណូមពរដល់ពលរដ្ឋខ្មែរ ដែលស្នាក់នៅក្នុងប្រទេសថៃ ឱ្យអនុវត្តតាមការណែនាំរបស់អាជ្ញាធរថៃ ដើម្បីសុវត្ថិភាព ក្នុងករណីមានគ្រោះរញ្ជួយដីកើតឡើងជាយថាហេតុ នាពេលខាងមុខ។
លោកថា៖ «ក្រសួងបានណែនាំ និងក្រើនរំឭកជាប្រចាំដល់ប្រជាពលរដ្ឋខ្មែរ ដែលបានស្នាក់នៅនិងធ្វើការនៅប្រទេសថៃ ទី១ត្រូវតែគោរពតាមការណែនាំពីសមត្ថកិច្ចថៃក្នុងអំឡុងពេលដែលមាន ឧប្បត្តិហេតុគ្រោះរញ្ជួយដីកើតឡើង ទី២ត្រូវស្វែងរកទីសុវត្ថិភាព និងអនុវត្តតាមការណែនាំ ក្នុងលក្ខណៈការពារខ្លួនក្នុងកាលៈទេសៈនៃការរញ្ជួយដីនេះ»។
ស្របពេលនៅប្រទេសថៃ នៅមានសញ្ញាព្រមានពីការរញ្ជួយដី និងស្របពេលដែលជិតដល់រដូវចូលឆ្នាំខ្មែរប្រពៃណីជាតិផងនោះ លោក កត្តា អ៊ន ក៏បានឱ្យដឹងដែរថា រដ្ឋាភិបាលថៃបានផ្តល់ការលើកលែងទិដ្ឋាការសម្រាប់ការចូលនិងចេញមកកម្ពុជា ចាប់ពីថ្ងៃទី១ ខែមេសា ដល់ថ្ងៃទី១៥ ខែឧសភា។ ជាមួយគ្នានេះ លោកថា ចាប់តាំងពីថ្ងៃទី២៨ ខែមិនា ដល់ថ្ងៃទី១ ខែមេសា ឆ្នាំ២០២៥ ក្រោយពីមានគ្រោះរញ្ជួយដីនេះកើតឡើង មានពលករខ្មែរប្រមាណ ១ ២០០នាក់ បានចូល និងចេញពីកម្ពុជា។
អ្នកស្រី សឿន សំណាង វ័យ៤៤ឆ្នាំ ជាពលករខ្មែររងគ្រោះម្នាក់ក្នុងហេតុការណ៍រលំអគារដោយសារគ្រោះរញ្ជួយដី នៅប្រទេសថៃ បានឱ្យដឹងថា នៅពេលរញ្ជួយដី អ្នកស្រីកំពុងធ្វើការនៅជាន់ទី៥នៃអគារនោះ ហើយអ្នកស្រីបានព្យាយាមរត់ចុះ និងលោតតាមជណ្ដើរ និងបានបាក់ជើងឆ្វេងនៅជាន់ទី៣។ អ្នកស្រីថា នៅពេលនោះមានអ្នកធ្វើការជាមួយបានជួយអ្នកស្រីផងដែរ ទើបគាត់បានរួចជីវិតពីហេតុការណ៍នោះ។
ពលករខ្មែរដែលជាកម្មករសំណង់រូបនេះ បន្តថា គាត់មិនគិតថាអាចរួចជីវិតពីហេតុការណ៍បាក់អគារពេលរញ្ជួយដីនោះឡើយ ដោយពេលនោះអ្នកស្រីភ័យតក់ស្លុត។
អ្នកស្រីថា៖«ភ័យណាស់ នឹកឃើញថាមិនបានយកជីវិតមកផ្ទះវិញទេ[…]ប៉ុន្តែដូចថា ដូចជាមានអីមកទប់ទល់តាំងពីក្រោមមក[…]មិនសង្ឃឹមទេ មិនសង្ឃឹម គិតថាចប់ជីវិតទាំងអស់គ្នា គ្មាននរណាសង្ឃឹមថារត់រួចទេ »។
អ្នកស្រី សំណាង បានឱ្យដឹងទៀតថា នៅពេលមានហេតុការណ៍រញ្ជួយដីកើតឡើង ស្វាមី និងកូនប្រុសទី២ ក៏កំពុងនៅអគារមួយទៀតនៅក្បែរទីនោះដែរ។ អ្នកស្រីថា ដោយសារតែជីវភាពរបស់គ្រួសារអ្នកស្រីមានភាពខ្វះខាត ទើបអ្នកស្រីនិងគ្រួសារ បានសម្រេចចិត្តចំណាកស្រុកជាមួយគ្នាទៅធ្វើការនៅថៃ កាលពីថ្ងៃទី១៥ ខែមីនា ឆ្នាំ២០២៥នេះ ដើម្បីដោះបំណុល។
អ្នកស្រីប្រាប់ថា៖«ខ្ញុំជំពាក់អង្គការ ក៏ខ្ញុំសម្រេចចិត្តថាខ្ញុំតស៊ូទៅរកតាមគេ […] ដូចថាបងប្អូននេះឯងគេថាទៅនោះគេថាឆាប់បានកន្លះខែគេបើក បានជាខំតស៊ូទៅ សង្ឃឹមថាបានបង់ឲ្យគេហើយ នឹកឃើញថាកន្លះខែគេបើកម្តងៗ ខ្ញុំអាចសងគេ ទៅបីនាក់ ខ្ញុំអាចដោះស្រាយបានស្រួលឲ្យកូនរៀនស្រួលផង កូនចូលរៀនបានឲ្យកូនចាយផង ហើយដោះស្រាយអង្គការផង បានខ្ញុំសម្រេចចិត្តទៅ»។
ជាមួយគ្នានេះ អ្នកស្រីអំពាវនាវដល់រដ្ឋាភិបាល និងសប្បុរសជនផ្សេងៗទៀត បន្តជួយដល់អ្នកស្រី ដើម្បីដោះស្រាយជីវភាព និងព្យាបាលជើងដែលរបួស។
លោក លឹង សុផុន មន្ត្រីសម្របសម្រួលទទួលបន្ទុកពលករចំណាកនៅអង្គការសង់ត្រាល់ប្រចាំប្រទេសថៃ ប្រាប់ Newsroom Cambodia ថា ការរញ្ជួយដីនៅប្រទេសថៃ បង្កឱ្យមានការព្រួយបារម្ភ និងរន្ធត់ខ្លាំងមិនថាជាជនជាតិថៃ ភូមា ឬខ្មែរ ដែលកំពុងធ្វើការនៅទីក្រុងបាងកក ប្រទេសថៃ ជាពិសេសអ្នកនៅកន្លែងដែលមានអគារបាក់រលំ។
លោកបន្តថា៖ «យើងមើលឃើញថានៅកន្លែង សាងសង់ផ្សេងៗនៅទីក្រុងបាងកក នៅតាមអគារខ្ពស់ៗ ហើយកាលពីថ្ងៃទី២៨ កន្លែងរញ្ជួយផែនដីហ្នឹង ឃើញថា អគារមួយនៅតំបន់ ចាក់តុចាក់ មានការបាក់រលំអគារ ហើយគេសន្និដ្ឋានថា បងប្អូនពលករបរទេស មានទាំងខ្មែរ មានទាំងភូមា និងពលរដ្ឋរបស់ថៃដែលធ្វើនៅកន្លែងហ្នឹង ចំនួនជាង៣០០នាក់ ធ្វើការនៅទីនោះ។ ដំបូងគេសន្និដ្ឋានថា បាត់ខ្លួន៩៦នាក់ តែគេរកឃើញជាបន្តបន្ទាប់ដែរមានអ្នកខ្លះរបួស ហើយគេរកឃើញសាកសពចំនួន១១ តែគេមិនទាន់បញ្ជាក់ទេថាសាកសពពលករខ្មែរអី គឺគេអត់ទាន់ដឹងច្បាស់ទេ គេអត់ទាន់បញ្ជាក់ភិនភាគ ណាមួយគេនៅដឹកសាកសពទៅធ្វើកោសលវិច័យនៅក្នុងមន្ទីរពេទ្យ»។
គួរជម្រាបជូនថា កាលពីថ្ងៃទី២៨ ខែមីនា ឆ្នាំ២០២៥ មានគ្រោះរញ្ជួយដីកម្រិត ៧.៧ រ៉ិចទ័រ កើតឡើងនៅទីក្រុងបាងកក ប្រទេសថៃ បណ្តាលឱ្យមនុស្ស ១៣នាក់ បានស្លាប់ និងជាង ៧០នាក់ បាត់ខ្លួន។ នេះបើតាមសារព័ត៌មាន The Nation news ផ្សព្វផ្សាយនៅថ្ងៃទី០១ ខែមេសានេះ។
ចំណែក នៅប្រទេសមីយ៉ាន់ម៉ា ដែលមានគ្រោះរញ្ជួយដីដូចគ្នានេះ ក៏បានបណ្តាលឱ្យមនុស្សយ៉ាងហោចណាស់ជាង ២៧០០នាក់ បានស្លាប់ និងជាង ៤៥០០នាក់ រងរបួស និង ៤៤១នាក់ទៀតបាត់ខ្លួន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters៕
………………………………
អត្ថបទដោយ៖ ហុង សេរីហ្វុង
