ប្រជាពលរដ្ឋមួយចំនួន បង្ហាញការសាទរដែលក្រសួងសុខាភិបាល គ្រោងនឹងបង្កើតច្បាប់ស្តីពីផលិតផលឱសថថ្មីមួយ ដើម្បីទប់ស្កាត់ការនាំចូលឱសថក្លែងក្លាយ និងឱសថអន់គុណភាព ខណៈការប្រើប្រាស់ឱសថក្លែងក្លាយ និងឱសថអន់គុណភាព បង្កហានិភ័យដល់សុខមាលភាពរបស់អ្នកប្រើប្រាស់។
កាលថ្ងៃទី១២ ខែមីនា ឆ្នាំ ២០២៥ ក្រសួងសុខាភិបាលបានបើកសិក្ខាសាលាពិគ្រោះយោបល់លើសេចក្តីព្រាងច្បាប់ ស្តីពី ផលិតផលឱសថ(ថ្មី) ដោយមានការចូលរួមពីគ្រប់ភាគីពាក់ព័ន្ធ ព្រមទាំងតំណាងអង្គការជាតិ និងអន្តរជាតិ។ បើតាមទំព័រហ្វេសប៊ុករបស់ក្រសួង សិក្ខាសាលាពិគ្រោះយោបល់នេះ គឺដើម្បីប្រមូលយោបល់ និងធាតុចូលពីភាគីពាក់ព័ន្ធ ព្រមទាំងកំណត់អំពីផលប៉ះពាល់ និងអត្ថប្រយោជន៍ ដល់ការអភិវឌ្ឍសេដ្ឋកិច្ច និងសង្គម សំដៅធានាថាច្បាប់នេះអាចឆ្លើយតបទៅនឹងបញ្ហា និងតម្រូវការជាក់ស្តែង ចំពោះការគ្រប់គ្រងផលិតផលឱសថ ក្នុងព្រះរាជាណាចក្រកម្ពុជា ដែលអាចការពារផលប្រយោជន៍សុខភាពសាធារណៈ។
ក្នុងសិក្ខាសាលានោះ លោក ឈាង រ៉ា រដ្ឋមន្ត្រីក្រសួងសុខាភិបាល បានថ្លែងថា គោលនយោបាយឱសថ នៃព្រះរាជាណាចក្រកម្ពុជា ត្រូវបានណែនាំជាលើកដំបូងក្នុងឆ្នាំ១៩៩៥ និងត្រូវបានធ្វើបច្ចុប្បន្នភាព ក្នុងឆ្នាំ ២០១០ ដែលផ្តល់នូវការណែនាំ ស្តីពី ការធានាឱ្យប្រជាជនគ្រប់រូប ទទួលបាននូវផលិតផលឱសថដែលមានតំលៃសមរម្យ មានគុណភាព សុវត្ថិភាព និងប្រសិទ្ធភាពគ្រប់គ្រាន់។
លោកបន្តថា ក្របខ័ណ្ឌបទប្បញ្ញត្តិសម្រាប់ឱសថ គឺច្បាប់ស្តីពីការគ្រប់គ្រងឱសថ ត្រូវបានអនុម័តដំបូងក្នុងឆ្នាំ១៩៩៦ និងធ្វើវិសោធនកម្មក្នុងឆ្នាំ ២០០៧ ដែលតម្រូវឱ្យក្រសួងសុខាភិបាលរៀបចំសេក្តីព្រាងច្បាប់ស្តីពីផលិតផលឱសថថ្មីនេះ ឱ្យស្របតាមស្ថានភាពជាក់ស្តែងនាពេលបច្ចុប្បន្ន។
លោករដ្ឋមន្ត្រី បានគូសបញ្ជាក់ថា៖ «ការធានាបាននូវផលិតផលឱសថមានគុណភាព និងប្រសិទ្ធភាព ក៏ជាកត្តាចម្បង ក្នុងការថែទាំសុខភាពរបស់ប្រជាពលរដ្ឋ ការការពារប្រឆាំងនឹងការគំរាមកំហែងសុខភាពសាធារណៈ ទប់ស្កាត់ភាពស៊ាំនឹងឱសថប្រឆាំងមេរោគ និងរួមចំណែកដល់ការត្រៀមខ្លួនជានិច្ច ដើម្បីឆ្លើយតបទៅនឹងគ្រោះអាសន្ន នៃសុខភាពសាធារណៈ»។
លោកបន្តថា ការលើកកំពស់គុណភាព សុវត្ថិភាព និងប្រសិទ្ធភាពផលិតផលឱសថ ក៏ជាដូចការឆ្លើយតបទៅនឹងការប្រយុទ្ធប្រឆាំងនឹងឱសថក្លែងបន្លំ និងអន់គុណភាព ត្រូវមានច្បាប់ និងបទបញ្ញត្តិគ្រប់ជ្រុងជ្រោយ និងមានការចូលរួមពីអាជ្ញាធរមានសមត្ថកិច្ចគ្រប់លំដាប់ថ្នាក់ដែលមានសមត្ថភាព ដើម្បីធានាថាការផលិត ការធ្វើពាណិជ្ជកម្ម និងការប្រើប្រាស់ផលិតផលឱសថត្រូវបានអនុវត្តត្រឹមត្រូវ ក្នុងគោលដៅឱ្យសាធារណជនទទួលបាននូវផលិតផលឱសថដែលមានគុណភាព សុវត្ថិភាព និងប្រសិទ្ធភាព ព្រមទាំងទទួលបានព័ត៌មានត្រឹមត្រូវ ស្តីពីផលិតផលឱសថ។
អ្នកស្រី ស៊ី នួន ជាប្រជាពលរដ្ឋរស់នៅក្នុងរាជធានីភ្នំពេញ បានបង្ហាញការគ្រាំទ្រ ដែលក្រសួងបានរៀបចំធ្វើសេចក្ដីព្រាងច្បាប់នេះឡើង ដែលជាការគិតគូរអំពីសុខមាលភាពរបស់ប្រជាពលរដ្ឋ។ អ្នកស្រីសង្កេតឃើញថា បច្ចុប្បន្ន ឱសថនាំចូលមកពីគ្រប់ប្រភពទាំងអស់ ដែលពលរដ្ឋមិនបានដឹងថាឱសថណាជាឱសថក្លែងក្លាយ និងអន់គុណភាព ហើយបើមានការនាំចូលឱសថទាំងនេះមកកាន់កម្ពុជា ដោយមិនមានច្បាប់គ្រប់គ្រងច្បាស់លាស់ទេ នឹងបង្កឱ្យមានផលប៉ះពាល់ដល់សុខភាពរបស់ប្រជាពលរដ្ឋ។
អ្នកស្រីបន្តថា៖ «ថ្នាំចូលគ្រប់ប្រភពទាំងអស់ គឺយើងអត់ដឹងថាថ្នាំហ្នឹងមកពី កាលណា[កាលបរិច្ឆេទ] យើងអត់ដឹងមកខាងណា ពួកយើងអត់ចេះអក្សរផង ហើយពួកយើងមិនមែនជាវិជ្ជាជីវៈជាពេទ្យទៀត»។
ជាមួយគ្នានេះដែរ អ្នកស្រីបានជំរុញឱ្យក្រសួងសុខាភិបាល ជូនដំណឹងដល់សាធារណជន អំពីច្បាប់ និងព័ត៌មាននានា ទាក់ទងនឹងឱសថក្លែងក្លាយឱ្យបានទូលំទូលាយ ដើម្បីបញ្ជ្រាបការយល់ដឹងដល់ប្រជាពលរដ្ឋនៅមូលដ្ឋាន។
អ្នកស្រីមានប្រសាសន៍ថា៖ «សំណូមពរធ្វើអ្វីក៏ដោយ ក្រសួងសុខាភិបាល បើសិនជាគិតពលរដ្ឋជាធំ សូមឱ្យពលរដ្ឋដឹងពីច្បាប់របស់លោកដែលធ្វើនោះ ឱ្យបានដឹង ហើយថាតើថ្នាំនៅក្នុងប្រទេសកម្ពុជាហ្នឹង មានថ្នាំក្លែងក្លាយ ច្រើនមែនឬមួយក៏អត់ ជួនកាលពេលខ្លះអត់ដឹងទេ កន្លែងហ្នឹងអ៊ីចឹងសុំឱ្យក្រសួងសុខាភិបាល ធ្វើអ្វីក៏ដោយឱ្យពិតប្រាកដ ហើយសំណូមពរឱ្យចែករំលែកព័ត៌មានទាំងហ្នឹង មកប្រជាពលរដ្ឋគ្រប់រូបឱ្យបានដឹងជ្រាបគ្រប់គ្រប់គ្នា»។
រីឯអ្នកស្រី ម៉ិច សៀងហី ជាពលរដ្ឋម្នាក់ទៀតរស់នៅរាជធានីភ្នំពេញដែរនោះ បាននិយាយថា ជារឿងល្អដែលក្រសួងកំពុងធ្វើច្បាប់ប្រឆាំងឱសថក្លែងក្លាយនេះ ព្រោះកាលណាពលរដ្ឋមិនចេះសំគាត់ឱសថណាថាជាឱសថពិតឬក្លែងក្លាយនោះ នឹងអាចទិញប៉ះឱសថក្លែងក្លាយដែលបណ្ដាលឱ្យប៉ះពាល់សុខភាពពលរដ្ឋ។
អ្នកស្រីលើកឡើងពីការព្រួយបារម្ភអំពីគុណភាពថ្នាំនាពេលបច្ចុប្បន្ន ព្រោះនៅពេលដែលអ្នកស្រីឈឺ ត្រូវការទិញឱសថមកព្យាបាល ដោយបារម្ភអំពីប្រភព និងផលប៉ះពាល់ដែលអាចកើតមានលើសុខភាព។
អ្នកស្រីថា៖ «សម្រាប់ខ្ញុំពេលឈឺពេលអីទៅទិញថ្នាំយកមកហូប តែងតែមានការព្រួយបារម្ភដែរ ខ្លាចប្រភេទថ្នាំខ្លះវាអត់មានគុណភាព ពេលដែលយើងហូបហើយ វាប៉ះពាល់ទៅជំងឺយើងមួយមុខទៀត អីចឹងមានការបារម្ភដែរ តែអត់ដឹងធ្វើម៉េច បើយើងត្រូវការប្រើថ្នាំ មិនដឹងថាប្រភពថ្នាំហ្នឹងនាំចេញមកពីណាពីណីអត់ដែរដឹងទេ សំខាន់ឱ្យតែយើងហូបទៅបានធូរបានស្រួលខ្លួនចឹងទៅណា»។
បន្ថែមពីនេះទៅទៀត អ្នកស្រីសំណូមពរឱ្យរដ្ឋាភិបាល និងក្រសួងសុខាភិបាល អនុវត្តច្បាប់ឱ្យបានតឹងរឹងទាក់ទងនឹងការនាំចូល និងនាំចេញឱសថ ដោយផ្តោតលើសារៈសំខាន់នៃការត្រួតពិនិត្យគុណភាពឱ្យបានហ្មត់ចត់ ដើម្បីការពារសុខភាពប្រជាពលរដ្ឋ។
អ្នកស្រី ម៉ិច សៀងហី បន្តថា៖ «ចំពោះខ្ញុំប្រសិនជារាជរដ្ឋាភិបាល ក៏ដូចជាក្រសួងសុខាភិបាលគាត់តាក់តែងច្បាប់ហ្នឹងមកហើយ គួរតែអនុវត្តឲ្យបានខ្ជាប់ខ្ជួន មានន័យថា ការនាំចេញនាំចូលឱសថពីប្រទេសណាៗ សូមពិនិត្យមើលទៅលើគុណភាពឱ្យបានត្រឹមត្រូវ ដើម្បីកុំឱ្យប៉ះពាល់ដល់ប្រជាពលរដ្ឋយើង»។
លោក គុយ វ៉ាន់នី អ្នកនាំពាក្យក្រសួងសុខាភិបាល បានបដិសេធឆ្លើយតបលម្អិតជុំវិញខ្លឹមសារនៅក្នុងសេចក្តីព្រាងច្បាប់ថ្មីនេះ។
លោក អ៊ូច វុទ្ធី ប្រធានសមាគមគ្រូពេទ្យគុណធម៌កម្ពុជា ក៏បានសាទរការតាក់តែងសេចក្ដីព្រាងច្បាប់ប្រឆាំងឱសថក្លែងក្លាយនេះ ដែលបង្ហាញថា ថ្នាក់ដឹកនាំយកចិត្តទុកដាក់ចំពោះសុខុមាលភាពរបស់ប្រជាពលរដ្ឋ។
លោកបន្តថា៖ «តាមខ្ញុំដឹងក៏បង្កើននូវថវិកាជាតិជាច្រើន ដើម្បីជួយទៅដល់ផ្នែកសុខភាពទៅដល់ប្រជាពលរដ្ឋយើង នៅក្នុងទីក្រុង ក៏ដូចជាតំបន់ដាច់ស្រយាល ដូច្នេះហើយយើងត្រូវយកចិត្តទុកដាក់ទាំងអស់គ្នាជាមួយនឹងប្រមុខរដ្ឋាភិបាល ក៏ដូចជាក្រសួងសុខាភិបាលដែលលោកខំលើកឡើង ហើយខំធ្វើច្បាប់ប្រឆាំងនឹងឱសថក្លែងក្លាយ ឱសថដែលគ្មានគុណភាព។ ទាំងនេះហើយជារឿងមួយដែលកាត់បន្ថយការចំណាយខុស ចំណាយដែលទិញថ្នាំទៅវាធ្វើឲ្យខាតបង់ ហើយឱសថហ្នឹងប្រើទៅវាអត់ប្រសិទ្ធភាព»។
លោកបន្ថែមថា ក្រសួងមានកាតព្វកិច្ចពង្រឹងបន្ថែមផ្នែកផ្លូវច្បាប់ ចំពោះឱសថស្ថានណាដែលមានដាក់លក់ឱសថក្លែងក្លាយ ឬឱសថអន់គុណភាព ព្រោះបញ្ហានេះអាចបង្កឱ្យមានបញ្ហាជាច្រើនទៀត។ លោកថា នៅពេលដែលប្រជាពលរដ្ឋមិនបានយល់ដឹង ហើយគាត់ប្រើប្រាស់ថ្នាំក្លែងក្លាយ គឺមិនត្រឹមតែមិនជាពីជំងឺទេ បែរជាបង្កឱ្យមានជំងឺផ្សេងៗថែមទៀត។
លោក អ៊ូច វុទ្ធី ថ្លែងថា៖ «ក្រសួងគួរណាតែមានវិធានការច្បាប់ឱ្យបានតឹងរឹងចំពោះ Pharmacy[ឱសថស្ថាន] មួយចំនួន ដែលគាត់បើកលក់នូវឱសថជាច្រើន ប៉ុន្តែនៅក្នុងឱសថនោះគាត់បង្កប់នូវឱសថក្លែងក្លាយ ហើយនិងឱសថអន់គុណភាព អញ្ចឹងនេះជាករណីមួយជាកាតព្វកិច្ចមួយរបស់ក្រសួង[…] កាលដែលបងប្អូនប្រជាពលរដ្ឋ យើងអត់ដឹងហើយយកឱសថក្លែងក្លាយ ឱសថគ្មានគុណភាព ឱសថទាំងនេះហើយគឺជាឱសថសម្លាប់បងប្អូនទៅវិញទេ ហើយមិនធ្វើឱ្យបងប្អូនជាពីជំងឺ វាអាចទៅជាជំងឺផ្សេងៗបង្កអាចទៅជាជំងឺមហារីក ជំងឺផ្សេងៗដែលយើងមិនអាចមើលឃើញ»។
កាលពីឆ្នាំ២០០៣ ក្រសួងសុខាភិបាល ក៏បានចេញនូវសារាចរស្តីពីការហាមលក់ឱសថក្លែងក្លាយ ដើម្បីទប់ស្កាត់ការចរាចរនូវឱសថក្លែងក្លាយ និងការនាំចូលដោយខុសច្បាប់ផងដែរ ដោយសារនៅលើទីផ្សារនៅកម្ពុជា មានការលក់នូវឱសថផលិតក្នុងស្រុក និងឱសថនាំចូលខុសច្បាប់មួយចំនួន ដែលពុំបានចុះលេខទិដ្ឋាការ-បញ្ជិកា នៅក្រសួងសុខាភិបាល។ សារាចរណែនាំនេះ គឺរៀបចំឡើងអនុលោមតាមច្បាប់ស្តីពី ការគ្រប់គ្រងឱសថ ដោយក្នុងនោះ ក្រសួងបានចាត់ទុកឱសថក្លែងក្លាយ ជាឱសថដែលមានសារធាតុផ្សំមិនត្រឹមត្រូវ ឬគ្មានសារធាតុសកម្ម។
សារាចរបន្តថា បុគ្គលដែលលក់ឱសថក្លែងក្លាយ ត្រូវផ្តន្ទាទោសតាមទោសបញ្ញត្តិដែលមានចែងក្នុងច្បាប់ស្តីពីការគ្រប់គ្រងឱសថ ហើយឱសថក្លែងក្លាយដែលពាក់ព័ន្ធនឹងបទល្មើស ត្រូវឃាត់ទុក បំផ្លាញចោល និងផ្សព្វផ្សាយជាសាធារណៈ។
ជារឿយៗ គេសង្កេតឃើញក្រសួងសុខាភិបាល ក៏បានចេញសេចក្តីជូនដំណឹងពីការហាមឃាត់ការប្រើប្រាស់ឱសថមួយចំនួនដែលភាគច្រើនលក់តាមអនឡាញផងដែរ។ ជាក់ស្តែង កាលពីថ្ងៃទី២៥ ខែកុម្ភៈ ឆ្នាំ២០២៥ ក្រសួងបានហាមឃាត់ការលក់ និងប្រើប្រាស់ថ្នាំជំនួយផ្លូវភេទ ២មុខ រួមមាន SUPER XL និង AMOUR ដែលមានផ្ទុកសារធាតុ Sildenafil អាចប៉ះពាល់ធ្ងន់ធ្ងរដល់សុខភាព បេះដូង និងគ្រោះថ្នាក់ដល់អាយុជីវិត។
យោងតាមរបាយការអង្គការសុខភាពពិភព (WHO) ចុងឆ្នាំ ២០២៤ ប៉ាន់ប្រមាណថា យ៉ាងហោចណាស់ថ្នាំ១ ក្នុងចំណោម១០ នៅក្នុងប្រទេសដែលមានប្រាក់ចំណូលទាប និងមធ្យម គឺទាបជាងស្តង់ដារ ឬក្លែងក្លាយ។ របាយការណ៍មួយនេះ បន្តថា ប្រទេសនានាចំណាយប្រាក់ប្រមាណ ៣០.៥ ពាន់លានដុល្លារក្នុងមួយឆ្នាំលើផលិតផលវេជ្ជសាស្រ្តដែលមិនមានស្តង់ដារ និងក្លែងបន្លំ និងផលិតផលវេជ្ជសាស្រ្ដដែលមិនមានស្តង់ដារ និងក្លែងបន្លំច្រើនតែត្រូវបានលក់តាមអ៊ីនធឺណិត ឬទីផ្សារក្រៅផ្លូវការ៕
……………………………………..
អត្ថបទដោយ៖ ហុង សេរីហ្វុង
